Read Cuvok Mezlər ta Maslaŋ hay 15 Bible Online

Mezlər ta Maslaŋ hay 15 - Cuvok bible

Mezlər ta Maslaŋ hay 15

¹Zuwef hay dərziya dapa vavara te Zudey ec ke dek kad pe berne ta Antakiya masa dapa vavara te Siriya, ec ke sesərekec malamaŋ tec hay makəsparav hay dərŋga, gege: «Daha akwar ka ŋgəla ŋgwal takwar ara ma majawa ta Muyiz te gweɗ aabay sə, akwa ŋgat membəl aabay.»

²Pawl va Barnabas sə, ac ka kəs ma ana aabay. Mafay ana, ac ka pay eve eceŋ mabay da yaŋ ma ana. Ara nesey, makəsparav hay dapa berne ta Antakiya ac ka kəs mawulak yaŋ, ec ke zlərdec Pawl, Barnabas va ndah mekele deveŋ eceŋ ece re dey ke te wuzeɗek ma ana de Zeruzelem vara maslaŋ hay, mesnendə hay va makəsparav hay dərŋga.

³Ara nesey, Macam yaŋ ta ndah ta Zlavay dapa berne ta Antakiya sə, ec ke vec jene kad Pawl, Barnabas va ndah sə, e de jənec dapa maŋgway tec kad Zeruzelem ana. Ndah ana, ec ke dey jaka pa vavara te Fenesi va vavara ta Samariya. Dapa medə teceŋ, ec ke gweɗec kad ndana hay da yaŋ ndah masa Zuwef hay bay masa ac ka gərda meŋgə mebərey, ac ka kəs ma ta Bay Mazlakava Yesu. Mafay ana, malamaŋ tec hay dərŋga masa aca cəna ma ana sə, ec ke wesl mabay.

⁴Mahusa tec e Zeruzelem sə, ndah dapa Macam yaŋ ta ndah ta Zlavay, mesnendə hay va maslaŋ hay ece kəsec eve mewesley. Pawl va Barnabas, ec ke ŋguzdecen jene hay masa Zlav ta ŋgiya de vereceŋ fakwanay.

⁵Farisa hay dərziya ec ke zleftek de Zeruzelem kad vara ndah masa Zuwef hay bay, ke te gweɗec, gege: «A lada aca ŋgəla ŋgwal teceŋ va manahda yaŋ kad pə ma majawa ta Muyiz.»

⁶Mafay ana, maslaŋ hay va mesnendə ta makəsparav hay ac ka cama yaŋ fakwanay fa slam amta ka ta wuzaɗ ma ana.

⁷Ava dəɓa ta magwaɗ ma gaa da yaŋ ana, Piyer ke zleftek, gege: «Malama hay, akwa səniya dəga zleezle Zlav ke kəsiyey dapa taɓa takwar ka ta bəzad Labara mambəla ana kad ndah masa Zuwef hay bay aca ra cəna ma ana, aca ra tər ka makəsparav hay.

⁸Zlavay sə, aŋga nda masəna rav ta ndana hay fakwanay. Mevec Mesfen tata kad ndah masa Zuwef hay bay, ara masa andə ta ŋgatakwa sə, aŋga ana. Ara nesey, a wal maŋguzdandakwaɗ sə, ke kəsec ndah ana hay cay.

⁹Zlav ka vənandakwa ava ndah masa Zuwef hay bay sə, aabay. Ke penecen rav teceŋ afa ac ta kəs ma te Yesu.

¹⁰Təlam nesey sə, akwa cak Zlavay ara nesey sə, mafay te mey? Akwa wal metetəkec makəsparav hay ka ta cəp ma majawa ta Muyiz sə, mafay te mey? Jə masa kwa papaŋ ta papaŋ tandakwa hay, kwa andakwa ana, anda zlafakwaɗ manah yaŋ kad pa ma ana hay fakwan aabay!

¹¹Sesəker ara masa anda mbəlakakwa dapa mebərey jaka pa mawal nda ta Bay Mazlakava Yesu sə, e mbəlec ndah masa Zuwef hay bay sə, ara aŋga ana may.»

¹²Miya makwasa faŋga sə, ec ke njehec teete, ec ke cəkefec zləmay Pawl va Barnabas. Pawl va Barnabas ana, ec ke ŋguzdecen ma da yaŋ jə masa Zlav ta ŋgiya jaka vereceŋ dapa taɓa ta ndah masa Zuwef hay bay.

¹³Masa ac ka ndəvda ma teceŋ ana, Zak ka kəs ma, ka zlar megweɗ, gege: Malama hay, macak zləmay!

¹⁴Təlam nesey, Simaŋw ka ŋguzdandakwaɗ ma da yaŋ pas masa Zlav a zlar mepefec ndey ndah dapa vavara hay masa aca sən Zlav bay ka ta yah dapa taɓa teceŋ tərsam masa a da bəzad mezel tata.

¹⁵Ma ana, ac amta ava ma ta ndah mehwedek ma zleezle, mavinda dapa ma ta Zlavay ana ke gweɗ, gege:

¹⁶«Bay Mazlakava ke gweɗ, gege: “Way ta bay Deevet[14] ka mbəɗata. Ava dəɓa ana, ye te vehekey, ya ta lama way ana avəda[15], ya ta zlacaɗ pa slam ana.

¹⁷E zler dəga pəsaŋga ana ŋgesey, ndah dərziya fakwanay ac ta yah Bay Mazlakava, va ndah dapa vavara hay fakwanay masa mezeley aɗaw verec ɓa.” Nesey masa Bay Mazlakava te gweɗey, a ŋgə mezlər masa ka ləmada ha dəga zleezle sə, ara nesey,

¹⁸maləmad vaw tata ana masəna dəga zleezle.»

¹⁹Zak ke gweɗ saya, gege: «Mawulak yaŋ taaɗaw sə, a lada ndah masa Zuwef hay bay, meŋgwedek ma kad vara Zlav nesey sə, meŋgedec marga bay.

²⁰Amaa mavindakwa leeter kad eceŋ, megweɗeceŋ: “Ac ta ndə slaw masa mava kad mbat hay bay, ac ta kəs vaw saw fa Zaŋ ana bay, ac ta ndə slaw te jene maməca ana bay, ac ta ndə bembez bay”.

²¹Dəga zleezle kasl pəsna ndana hay aca bəzad ma da yaŋ ma majawa ta Muyiz dapa berne hay fakwanay va mejeŋgecen ma ana cəɗem cəɗem dapa Way ta macə mbahw te Zuwef hay pas ta masasak vaw hay.»

²²Masa Zak ka ndəvda ma tata, maslaŋ hay, mesnendə hay va ndah dapa Macam yaŋ ta ndah ta Zlavay ana fakwanay, ma ana ke wefec macəkuma bay. Mafay ana, ac ka kəs mawulak yaŋ ta mayah ndana hay dapa taɓa teceŋ, ece re zlerdec kad pe berne ta Antakiya ava Pawl va Barnabas. Ece kəsek sə, Zud masa aca zaliya Barsabas va Silas. Ac cuweeney ece hehəmec mabay dapa taɓa tec faŋga.

²³Ec ke vindec leeter pa ha. Dapa leeter ana, ec ke gweɗec, gege: «Andaw maslaŋ hay, mesnendə hay va malamaŋ takwar hay, ta gwaɗafakwar. Akwar ndah masa Zuwef hay bay makəsparav hay dapa berne ta Antakiya dapa vavara te Siriya va dapa vavara te Selekiya.

²⁴Andə ka cəna ndana hay deveŋ andaw fana ac ke dey kad varakwar ka ta dəŋgazlakwaɗ yaŋ va magədasakwaɗ leŋgesl ava ma tec hay. Amaa andaw te zlerdec bay.

²⁵Mafay ana, andaw ka cacala ma taciya amta, anda ka kər maɗay da yaŋ ma ana, andə ka kəs ndana hay ka ta zləraɗ kad varakwar. Ndah ana, ac ta daɗ ava Pawl va Barnabas ndah masa anda welec elehey.

²⁶Pawl va Barnabas sə, ac ndah mavana yaŋ teceŋ ka ta ŋgana mezlər kad Bay Mazlakava Yesu Kəristi.

²⁷Mafay ana, anda zlərakwaɗ Zud va Silas, afa aca ra ŋguzdakwaɗ ma ana ara masa anda ta vindakwaɗ nesey.

²⁸Ma ana nesey, ka wafa Mesfen Mavəna mabay va andaw fakwanay, anda da vakwar ma majawa mekele sabay. Amaa say masa andaw ta vindakwaɗ nesey. Aha, anda gwaɗakwar:

²⁹“Akwar ta ndə slaw ta kwakwas ta mbat hay bay, akwar ta ndə bembez bay, akwar ta ndə slaw te jene maməca ana bay. Asaya, akwar ta kəs vaw saw fa Zaŋ ana bay. Daha akwar ka zlafa matəhaz yaŋ takwar dapa meŋgə jeŋ ana hay nesey sə, ŋgesey akwar ke ŋgə jene mambəla ana.” Zlav da njahaɗandakwa dapa meteh tata.»

³⁰Ec ke gərdec ndah masa ec te zlerdec sə, ece re dey kad pe berne ta Antakiya ana. Mahusa tec arŋga sə, ec ke cemecen yaŋ ta makəsparav hay fakwanay, ec ke vecen leeter ana.

³¹Makəsparav hay dərŋga sə, ac ka jaŋgaw, ec ke wesl mabay da yaŋ ma ana. Ma ana ke vec gədaŋ macəkuma bay.

³²Zud va Silas ana, ac ndah mehwedek ma. Ec ke vec gədaŋ mabay ava ma hay mekele mekele kad malamaŋ tec hay makəsparav. Ac ke vec gədaŋ aca ra jaha vaw dapa cəv te Yesu.

³³Ec ke njehek kusetke dərŋga. Ava dəɓa ana, aca wal meveh kad vara maslaŋ hay masa ec te zlərekeceŋ. Mafay ana, makəsparav hay dərŋga ana, gege: «Madaɗay dapa metehey, megweɗefec ndah mazlərakakwar.» [

³⁴Amaa Silas sə, tata ka njahata ava dəɓa dərŋga.[16]]

³⁵Ta Pawl va Barnabas sə, ec ke njehec dapa berne ta Antakiya ana, ac ava ndana hay mekele mekele mabay. Ec ke sesərekec ndana hay mabay, ec ke bəzedec Labara mambəla ana ta Bay Mazlakava.

³⁶Ava dəɓa ana kusetke, Pawl ka gwaɗa Barnabas, gege: «Mavahakwa kad vara malamaŋ tandakwa hay dapa berne hay mekele mekele masa andakwa te bəzedec ma ta Bay Mazlakava Yesu zleezle, me te wuzeɗekeceŋ, afa andə da walakwaɗ manjah teceŋ.»

³⁷Barnabas a wal makəs Zaŋ Markwas daha kad vereceŋ.

³⁸Amaa Pawl, ka wal ma ana aabay, afa Zaŋ Markwas ana ke gərdeceŋ dapa masa ac da Pamfili. E gərdeceŋ ana ŋgesey sə, mezlər tec mandəva bay heley.

³⁹Pawl va Barnabas ana, ac ka pay dapa taɓa teceŋ. Mamaɗ yaŋ ana, ac ka vəna vaw avəda. Dapa ŋgesey ana, Barnabas ka kəs Zaŋ Markwas ec ke də cuweeney, ec ke zleŋ ava kaslkaslah kad pa vavara ɓa dapa taɓa ta yam mafayakfayak ana, mezel Kipərus.

⁴⁰Amaa ta Pawl sə, ka kəs Silas. Malamaŋ tec hay makəsparav dərŋga ana, ac ka cə mbahw kad Zlavay mafay teceŋ, afa Zlav de pəsefec ma. Pawl va Silas, ec ke dey.

⁴¹Pa wunam hay mekele mekele dapa vavara te Siriya va vavara te Selekiya. Ec ke vec gədaŋ kad Macam yaŋ hay ta ndah ta Zlavay dərŋga fakwanay.