Read Cuvok Mezlər ta Maslaŋ hay 16 Bible Online

Mezlər ta Maslaŋ hay 16 - Cuvok bible

Mezlər ta Maslaŋ hay 16

¹Ava dəɓa ana, Pawl ke dey kad pe berne te Derbey va berne ta Listira. Dərŋga ana, nda makəsparav ɓa, mezel Timawtey. Mamaŋ sə, Zuwef ana, ka kəs ma te Yesu may. Amaa papaŋ sə, nda Gərek ana.

²Malamaŋ hay makəsparav dapa berne ta Listira va dapa berne ta Ikawniya ac ka hahəmaw mabay.

³Pawl a wal Timawtey da padan ma kad pe mezlər tata, ka kəsaw. Ava dəɓa ana, ka ŋgəlan ŋgwal ta Timawtey, afa Zuwef hay dərŋga aca səniya papaŋ ta Timawtey sə, aŋga nda Gərek ana.

⁴Ec ke dey, ac ka ŋgway dapa berne hay mekele mekele. Dapa berne ana hay sə, ec ke ŋguzdecen ma majawa masa maslaŋ hay va mesnendə ta makəsparav hay ta jawiya de Zeruzelem kad makəsparav hay dərŋga. Ec ke gweɗec aca ra nah yaŋ kad pa ma ana.

⁵Dapa ŋgesey ana, Macam yaŋ hay ta ndah ta Zlavay aca ŋgat gədaŋ dapa makəsparav fəma fəma. Cəɗem cəɗem ndana hay ece sekekey kad veŋ eceŋ.

⁶Ava dəɓa ana, Pawl va ndah mapadan ma sə, aca wal medey ka ta bəzad ma ta Zlavay dapa vavara ta Azi, amaa Mesfen Mavəna ke vec cəv aabay. Ara nesey, ec ke zleŋ jaka pe cəv te medə kad pa vavara te Fərizi va cəv te medə kad pa vavara ta Galat.

⁷Mahusa tec zef ava vavara te Mesi sə, ac ka yah cəv te medə kad pa vavara ta Betani, amaa Mesfen te Yesu ke vec cəv aabay.

⁸Ec ke zleŋ jaka pa vavara te Mesi, ac ka husa pe berne ta Turwas da ma ta yam mafayakfayak ana.

⁹Ta vaɗ ana ŋgesey, Pawl ka wala nda Masiduwan ana ɓa jaka pe mesəhwney, mazlaca fəma tata, ka ŋgana mbahw, gege: «Dek kad Masiduwan ka da jənandaw.»

¹⁰Ava dəɓa ana, masa Zlav ka ŋguzdana jene kad Pawl ana cay sə, faŋga faŋga ana, andaw[17] ka yah cəv te mezleŋ ava kaslkaslah te medə kad Masiduwan, afa anda səniya eve metehwe ana, Zlav a zalandaw sə, anda de bəzedec Labara mambəla ana kad ndah dapa vavara ta Masiduwan ana.

¹¹Da Turwas, andə ke tep pa kaslkaslah, andə ke dey pa vavara ɓa dapa taɓa ta yam mafayakfayak ana, mezel Samutəras. Tedew te pərek ana, anda zleŋ kad pe berne ta Niyapawlis, anda bəreŋgə kad fa vara.

¹²Andə ke dey eve sek kad pa wunam te Filipi, berne macaaca ana dapa vavara ta Masiduwan. Wunam ana ŋgesey, masa Rawma hay ece ŋgə bay da yaŋ ana. Andə ka njah dapa manah mabay.

¹³Pas ta masasak vaw, andə ke zleftek dapa wunam ana, andə ke dey a ma ta wayam ɓa, andə ka wulakaw gəla anda ŋgat slam ta macə mbahw te Zuwef hay faŋga ɓa kwa. Mahusa taciya pa slam ta macə mbahw ana sə, andə ka ŋgat ŋgwazah makwasa faŋga ɓa. Andə ka njah faŋga, andə ka kar maɗay eve eceŋ.

¹⁴Deveŋ eceŋ ana, ŋgwaz amta ɓa, mezel Lidiya, aŋga dapa berne te Filipi ana faŋga, amaa e dek dapa berne ta Tiyatira. Ŋgwaz ana sə, a husamda rəkwat hay ta səlay mawuzlala gagaza ana. Aŋga sə, ŋgwa Zuwef ana bay, amaa a nah yaŋ kad Zlavay ara Zuwef hay. Ka cak zləmay fa ma masa Pawl ta gwaɗiya. Bay Mazlakava ka wunan rav tata ka ta kəs ma ta Pawl.

¹⁵Ara nesey, ka ŋgat beetem va ndah da hwaɗ ta way tata fakwanay. Ava dəɓa ana, ka gwaɗandaw, gege: «Daha akwar ka wala, ya ka kəs ma ta Bay Mazlakava Yesu eve metehwe ana sə, medekey, amcakwa a way aɗaw.» Ka ŋgandaw mbahw te medə kad way tata ana ava rav tata fakwanay.

¹⁶Pas leŋgeɗey, andə ke dey pa slam ta macə mbahw sə, andə ka cə yaŋ ava dem ɓa, aŋga ɓeley. Dem ana sə, aŋga ava damkwaw ta wuɗak ha kad ndana hay. Bay ta way tata hay aca ŋgat səlay mabay ava mawɗak ha tata ana.

¹⁷Ka cəpandaw va Pawl, ka cə lalaw, gege: «Ndah nesey sə, ndah maŋga mezlər ta Zlav da Wudam, ac ta ŋguzdakwaɗ cəv te membəley.»

¹⁸Dem ana, ka ŋgaw ara nesey manah ɓa. Ma ana, ka zəmana fa rav ta Pawl mabay. Pawl ka ŋgwadafa ma, ka njarafa, ka gwaɗa damkwaw dapa sə, gege: «Damkwaw, ya gwaɗakaa eve mezel te Yesu Kəristi, daɓa dapa dem ana nesey.» Faŋga faŋga ana, damkwaw sə, ka hwayata dapa dem ana.

¹⁹Bay ta way te dem ana hay aca wala sə, aca ŋgat səlay jaka pa mawɗak ha tata ɓasabay. Mafay ana, dəɗak aca təhaz Pawl va Silas. Ec ke təreŋgec kad vara mazlakava ta Rawma hay, ec ke hwedeɗec kad pa slam ta mavan ma ta ndana hay fakwanay.

²⁰Ec ke hwedeɗec fəma ta ndah mavəna ma hay ta Rawma, gege: «Ndah nesey sə, ec ke hwedek mayah ma hay kad pe berne tandakwa. Ac Zuwef ana hay,

²¹ece sesərekec kwakwas hay mekele kad ndana hay. Kwakwas ana hay masa andakwa Rawma hay anda kəsakwa va anda cəpakwa aabay.»

²²Ndana hay fakwan faŋga ec ke cemefec yaŋ Pawl va Silas. Ndah mavəna ma hay sə, ec ke gweɗec kad ndana hay ece re cəkwecen rəkwat fa vaw ta Pawl va Silas avəda fa gədaŋ, ece re kəlepec ava laway.

²³Ava dəɓa te mekəlepey, ec ke hwedeɗec pa daŋgay, ec ke gweɗec kad kafaraŋ hay maɓəla daŋgay ana, ece re pefec ndey mambəla ana.

²⁴Masa nda maɓəla daŋgay ana, a cəna ara nesey sə, ke hwedeɗec pə way dapa taɓa ta daŋgay ana, ke sehweɗec sek tec Pawl va Silas pe veɗ te sesele[18] dapa daŋgay ana ɓa.

²⁵Ta yaŋ ta vaɗ, Pawl va Silas ac ka cə mbahw kad Zlavay, ac ka hahəm Zlavay ava laway. Ndah dərziya majawa dapa daŋgay ana, ec ke cəkefec zləmay.

²⁶Faŋga faŋga ana, vavara ka ɓəla vaw, dar ta way ta daŋgay ana, ka ɓəla vaw. Ma ta way ana hay fakwanay ec ke wuneceŋ, jajarɓay hay masa ec te jewec ndana hay fakwan ava aŋga sə, ec ke pəleceŋ.

²⁷Nda majəɗa ndah dapa daŋgay sə, a ta cəna sə, paf! E zleftek dapa waŋ. A ta wala sə, ma ta way ana hay mawuna. Ka wulakaw, gəla ndah dapa daŋgay ana, ec ke hweyeceŋ. Mafay ana, ke seɗek kafaya tata kad a vəda ka ta zlal vaw tata, a da məcaɓa.

²⁸Amaa, Pawl ka gwaɗa ava gədaŋ, gege: «Ka kəɗa yaŋ takaa bay! Andaw kana fana fakwanay!»

²⁹Nda majəɗa ndah dapa daŋgay sə, a cəna ara nesey, ka yah kwakwaw, ka hway, ke sehw pa slam masa Pawl va Silas dapa. Ke kekesley, afa zidaw ka ŋgana, ke kekəred fəma ta Pawl va Silas.

³⁰Ke hwedekec kad a vəda, ke nəkefec, gege: «Bay aɗaw hay, ya da ŋgana gwagumaw, masa ya da ŋgat membəley?»

³¹Pawl va Silas, ac ka vahan, gege: «Kəs ma ta Bay Mazlakava Yesu, ka ta mbəlata, kaa va ndah da hwaɗ ta way takaa fakwanay.»

³²Ac ka bəzadana ma ta Bay Mazlakava Yesu kad aŋga va ndah da hwaɗ ta way tata sə, fakwanay.

³³Ta yaŋ ta vaɗ ana ŋgesey, nda majəɗa ndah dapa daŋgay sə, ke pəlekec Pawl va Silas avəda, ke penecen mbəlek te mekəlepey fa vaw teceŋ avəda. Pawl va Silas ac ka ŋgana beetem kad nda ana va ndah da hwaɗ ta way tata fakwanay ta vaɗ ana ŋgesey.

³⁴Ke hwedeɗec Pawl va Silas a way tata, ke vec jə ta manday. Ac ava ndah da hwaɗ ta way tata fakwanay ec ke wesley, afa ac ka kəs ma ta Zlavay.

³⁵Metev ta slam pərek, Rawma hay mavəna ma ta ndana hay sə, ac ka zlar kafaraŋ hay kad vara nda majəɗa ndah dapa daŋgay sə, aca ra gwaɗa: «Pəlec Pawl va Silas, aca ra daɓa.»

³⁶Nda majəɗa ndah dapa daŋgay sə, ke dey, ke gweɗec Pawl, gege: «Rawma hay mavəna ma ta ndana hay sə, ac ka viyey cəvey, ya da pəlakwar. Ara nesey, akwa zlafa medek kad a vəda, akwa daɓa dapa metehey.»

³⁷Amaa Pawl e gweɗec kad kafaraŋ hay masa ac te zlərekeceŋ sə, gege: «Ac ka kəlapandaw meendey ta miya fakwanay, ava dəɓa ana, ac ka ɓəzlaɗandaw pa daŋgay, amaa ac ka vənandan ma taciya ana aabay heley. Yaw, andaw sə, andaw Rawma hay may. Naa təlam nesey, aca wal mapəlandaw, anda da daɓa ava makar? Ara na e ŋgə aabay! Say ndah mavəna ma ana hay ava yaŋ teceŋ ana, ece re dekey, ac da pəlandaw!»

³⁸Kafaraŋ hay sə, ec ke deceŋ, ec ke vehecen ma masa Pawl va Silas te gweɗec sə, kad ndah mavəna ma ta Rawma ana hay. Masa ndah ana hay aca cəna Pawl va Silas sə, ac Rawma hay sə, ma ana, ke ŋgec zidaw macəkuma bay.

³⁹Dapa ŋgesey ana, ec ke dey kad vara Pawl va Silas ke te ŋgec mbahw. Ec ke kəsekec kad a vəda dapa daŋgay ana, ec ke gweɗec aca ra daɓa dapa wunam teceŋ.

⁴⁰Medek tec Pawl va Silas kad a vəda sə, ec ke dey kad way ta Lidiya. Ece ŋgetefec malamaŋ tec hay makəsparav makwasa faŋga, ec ke vec gədaŋ. Ava dəɓa ana, ac ka data kad pa slam mekele saya.