Read Cuvok Mezlər ta Maslaŋ hay 17 Bible Online

Mezlər ta Maslaŋ hay 17 - Cuvok bible

Mezlər ta Maslaŋ hay 17

¹Pawl va Silas ec ke dey jaka pe berne ta Amfipawlis va berne ta Apawlani, ac ka husa a Tisalawnik. Dərŋga ana sə, way ta macə mbahw te Zuwef hay ɓa.

²Pawl ke dey pə way ana ara aŋga te də cəɗem cəɗem. E dey fa luma ana fa luma ana, luma mahkar. Dapa pas ta masasak vaw mahkar ana ŋgesey, ac ka tə yaw ava ndah makwasa dapa way ana faŋga da yaŋ ma hay masa ac mavinda dapa Ɗelewer mavəna.

³Aŋga dapa mesesərekec ndana hay mambəla ana da yaŋ ma ta Zlavay, gege: «Cama Kəristi sə, a ta sə marga, a ta məcata, ava dəɓa ana, a ta pərakata dapa maməcay.» Pawl ke gweɗec saya, gege: «Yesu masa ya ta ŋguzdakwaɗ ma da yaŋ ana təlam nesey sə, aŋga Kəristi.»

⁴Zuwef hay dərziya faŋga, ac ka kəs ma ana, ec ke dey kad dara Pawl va Silas. Ndah deveŋ Gərek hay dərziya makəsa ma ta Zlavay ara Zuwef hay va ŋgwazah dapa tərsam ta ndah mazlakava hay, ac ka kəs ma ana may.

⁵Amaa Zuwef hay dərziya ec ke ŋgə səlek fa Pawl va Silas, afa ndana hay gaa ac ka kəs ma teceŋ. Ec ke kwesekec ndana hay saw dapa cəv hay. Ndah ana ŋgesey, ece re dey, ece re kwesec ndah mekele saya ka ta ɓəsl ma dapa berne ana. Ec ke dey a way ta nda makəsparav ɓa, mezel Zasaŋw, ec ke yehec Pawl va Silas, ec de hwedeɗec fəma ta ndah mavəna ma ta ndana hay.

⁶Amaa ec ke ŋgetec aabay. Mafay ana, ac ka təraŋ Zasaŋw va malamaŋ hay mekele mekele, ec ke hwedeɗec fəma ta mazlakava hay maŋga bay da yaŋ berne ana. Ac ka cə lalaw, ec ke gweɗ, gege: «Ndah nesey sə, ec ke həlec ndana hay ka ta nas wunam kwa da ma da ma fakwanay. Təlam nesey, ac kana fana.

⁷Zasaŋw ke kəseceŋ, aca ra njah da way tata. Ndah ana fakwanay nesey, aca gwam ka nah yaŋ kad pə ma majawa ta bay ta Rawma hay sabay, ec ke gweɗ, gege: “Bay mekele ɓa, mezel Yesu.”»

⁸Labara ana nesey, ke bezləŋgeɗecen rav ta ndah mavəna ma ta ndana hay dapa berne ana va ta miya fakwanay ava gədaŋ.

⁹Ara nesey, mazlakava te berne ana hay, ec ke tetəkec Zasaŋw va makəsparav hay matəhaza sə, aca ra pəl səlay kad ŋgwaməna, afa baazlam e de ŋgə sabay wagaa ece re pəleceŋ.

¹⁰Ta vaɗ ana ŋgesey, malamaŋ hay makəsparav ec ke zləreɗec Pawl va Silas pe berne te Beriya. Mahusa tec faŋga, ec ke dey pə Way ta macə mbahw te Zuwef hay.

¹¹Ndah dapa berne te Beriya sə, rav tec mambəla ana, ac ara ndah dapa berne te Tisalawnik bay. Teceŋ sə, aca wal macak zləmay fa ma da yaŋ Yesu mambəla ana. Fa pas fa pas ana, aca vaɗ ma hay masa ac mavinda dapa Ɗelewer mavəna, afa aca ra səna ma ana mambəla ana.

¹²Mafay ana, Zuwef hay mabay dapa taɓa teceŋ ac ka kəs ma te Yesu. Ŋgwa Gərek hay dapa tərsam ta ndah mazlakava mabay va Gərek ana hay mabay ac ka kəs ma ana may.

¹³Amaa Zuwef hay da Tisalawnik ac ka cəna Pawl a bəzad ma ta Zlavay dapa berne te Beriya saya sə, ec ke dey a Beriya ana may. Ac ka zlar meheheɗecen dar ta ndana hay dapa berne ana.

¹⁴Mafay ana, malamaŋ hay dapa makəsparav dərŋga, ac ka padan ma ta Pawl ava mavas vaw a ma ta yam mafayakfayak ana. Amaa Silas va Timawtey sə, ec ke njehec dərŋga.

¹⁵Ndah mepedecen ma ta Pawl sə, ac ka padan ma kasl pe berne ta Atena. Faŋga, Pawl gege: «Megweɗec Silas va Timawtey sə, ece re vesek vaw kad vereyey.» Ndah ana ec ke vehec kad Beriya.

¹⁶Dapa masa Pawl e ɓəlec Silas va Timawtey dapa berne ta Atena sə, ka ŋgway, ka ŋgat mbat hay mabay dapa berne ana. Mafay ana, ka ɓaslaŋ yaŋ mabay.

¹⁷Ac ka tə yaw dapa Way ta macə mbahw te Zuwef hay faŋga ava Zuwef hay va ndah masa Zuwef hay bay manaha yaŋ kad Zlavay. Fa pas fa pas ana dapa slam ta macam yaŋ hay, aca tə yaw ava ndana hay.

¹⁸Dapa taɓa ta ndah maŋga yaw ana sə, ndah masasəraka jene ta Epikur hay va ndah masasəraka jene te Setuwesiyeŋ hay[19] ɓa. Aca tə yaw ava aŋga may. Ndah dərziya hay ece gweɗ da yaŋ Pawl, gege: «Nda masa baazlam eleh nesey sə, a wal meemey?» Dərziya hay ece gweɗ, gege: «Gəla a ŋgə na a sasərakandakwa ma da yaŋ zlav masa ndana a səniya bay kwa.» Ndah ana ece gweɗ ara nesey sə, afa Pawl ke bəzedec ma da yaŋ Yesu va mepərek tata dapa maməcay.

¹⁹Ac ka kəs Pawl, ac ka hwadaɗ vara ndah mazlakava maca mamənak hay. Ndah maca mamənak ana mezel tec sə, Aryawpaz[20]. Ac ka gwaɗa, gege: «Anda zlafa masəna ma da yaŋ mesesərek waya masa ke sesərekec ndana hay ava aŋga nesey sə, geyey?

²⁰Mesesərekey ana nesey, andə ka cəna ava zləmay taciya aabay heley. Anda wal macəna ma da yaŋ ana.»

²¹Yaw, ndah da Atena va məlaŋ hay manjaha dapa berne ana fakwanay, ece ŋgə mezlər ɓasabay, say macak zləmay fe mesesərek hay waya masa Pawl te sesərekeceney, aca kər maɗay da yaŋ ana.

²²Pawl ke zlec dapa taɓa ta ndah ta Aryawpaz, gege: «Ndah da Atena hay, ya wala akwar dapa macəp kwakwas ta mbat takwar hay eve cəvey ana.

²³Ya səniya ara nesey sə, afa dapa maŋgway aɗaw dapa berne takwar, ya ka ŋgat mbat takwar hay mabay malama. Dapa slam leŋgeɗey, ya ka ŋgat way ta mbat takwar amta, mavinda fətiya, gege: “Kad zlav masa ndana a səniya bay.” Yaw, kwa akwa səniya bay, akwa kekəred kad aŋga. Təlam nesey, ye dek sə, ka ta ŋguzdakwaɗ Zlavay ana.

²⁴Zlavay sə, aŋga nda malama vavara eve jene hay dapa fakwanay, aŋga Bay Mazlakava, aŋga Zlav maŋga bay da baymaləvaŋ va dapa vavara. Aŋga sə, a njah dapa way masa ndana hay ta lamiya ava ha sə, aabay.

²⁵Aŋga sə, a wal masa ndana hay aca ra vana jene sə, aabay, afa Zlavay sə, aŋga nda mavana mesfeney, manjahay va jene hay fakwanay.

²⁶Nda masa Zlav ta lamiya macaaca ana sə, pal amta, ava nda ana, Zlav ka zlar map tərsam hay fakwanay jaka vara vaw, aca ra njah dapa vavara. Ka pana manah ta ndana hay dapa vavara va kwakumakw ta manjah tec dapa vavara.

²⁷Zlav e lemekec ndana hay sə, aca ra yahiya, daha ac ka yahaw sə, ac ta ŋgata avəda. Eve metehwe ana, aŋga sə, aŋga dəreŋ ava kwa waawa tandakwa aabay.»

²⁸Ara masa mavinda, gege: «Anda ŋgatakwa mesfeney, maɓəla vaw va manjah eve ndey nesey sə, da vara vaw. Ara ndah dərziya hay dapa taɓa takwar ta slə laway ana hay, gege: “Andakwa sə, tərsam tata.”»

²⁹«Ara nesey, ara masa andakwa tərsam ta Zlavay. Anda ta wulakakwa Zlavay sə, aŋga ara mbat hay masa ndana hay ta lamiya ava gənaɓ hay, eve kekeŋ hay va eve jene hay mekele mekele bay. Mbat ana hay ŋgesey sə, jene hay masa ndana hay ta ŋgiya ava ha teceŋ va eve leŋgesl teceŋ.

³⁰Dapa ŋgesey ana, Zlav ka zəm rav da yaŋ eceŋ aabay, afa ndah ana ac ka sən ma tata ana aabay heley. Amaa, təlam nesey, a zal ndana hay fakwanay dapa vavara vəla vəla fakwanay aca ra ŋgwada rav teceŋ, aca ra yahaw ava rav tec pal amta.

³¹Bay Zlavay e gweɗ kad ndana hay fakwanay ara nesey sə, afa ka pana pas pal amta ka ta vən ma ta ndana hay dapa vavara. E te təɗec ma yaŋ ndana hay sə, eve metehwe ana jaka vara nda amta masa aŋga ta piya. Ka ŋguzda kad ndana hay fakwanay, nda ana nesey sə, e te təɗec ma yaŋ ndana hay, mafay ta masa Zlav ka pəraka avəda dapa maməcay.»

³²Masa ndana hay aca cəna Pawl e sesərekec ma da yaŋ mepərekek dapa maməcay sə, ndah dərziya hay aca sasarafa. Amaa ndah dərziya aca gwaɗa, gege: «Anda wal ke de dek pas mekele, ka da ŋguzdandan ma ana saya.»

³³Ara nesey, Pawl ka data.

³⁴Ndah dərziya dapa taɓa teceŋ, ac ka kəs ma ta Pawl, ac ka cəpaw. Ndah macəpiya sə, ac Denis, nda mazlakava dapa taɓa ta ndah maca mamənak ta Aryawpaz ana va ŋgwaz ɓa, mezel Damariz va ndah mekele mekele hay saya.