Read Cuvok Mezlər ta Maslaŋ hay 18 Bible Online

Mezlər ta Maslaŋ hay 18 - Cuvok bible

Mezlər ta Maslaŋ hay 18

¹Ava dəɓa ana, Pawl ke zleftek da Atena, ke dey pe berne te Kweriŋtiye.

²Faŋga, ka ŋgatafa nda Zuwef ana ɓa, mezel Akilas, nda ana e heyek dapa vavara ta Paŋw. Akilas ana, e dek da Rawma masa dapa vavara ta Itali sə, manjah gaa aabay heley. Ece dek, ava ŋgwaza Pəresil, afa Kəlawd, bay mazlakava ta wunam hay masa berne ta Rawma te ŋgə bay da yaŋ ana, ke mbesec Zuwef hay fakwanay dapa berne ana. Pawl ke dey a way ta Akilas va Pəresil,

³ac ka njah eve eceŋ, ec ke ŋgə mezlər fa slam ana, afa mezlər tec amta. Ac ka cə rəkwat ta mbal ta makar way hay mazlakava te mehusemey.

⁴Cəɗem cəɗem pas ta masasak vaw, a kəs ma te megweɗey dapa way ta macə mbahw te Zuwef hay, a yah cəvey ta maŋgwad mawulak yaŋ te Zuwef hay va ta ndah masa Zuwef hay bay, aca ra kəs ma ana.

⁵Masa Silas va Timawtey ec ke dekec dapa vavara ta Masiduwan cay sə, Pawl ka gərda mezlər tata, ka və yaŋ tata ta mabəzad ma ta Zlavay, ke gweɗec Zuwef hay, gege: «Yesu sə, aŋga Kəristi.»

⁶Amaa Zuwef ana hay, aca wal ma ta Pawl ana bay, aca lafiya. Mafay ana, Pawl ka sləvaɗ melbelbe fa rəkwat tata a yaŋ eceŋ, ke gweɗec ava gədaŋ, gege: «Daha akwar ka zə takwar, ŋgesey mebər takwar, masəna, yey sə, ma aɗaw dapa ɓasabay. Təlam nesey, ya ta gərdakwar, ya ta daɓa kad vara ndah masa Zuwef hay bay.»

⁷Pəla! E ŋgwedefec dəɓa, a daɓa kad a vəda dapa Way ta macə mbahw te Zuwef hay, ke dey a way ta ndana ɓa, mezel Titiyaws Zustus. Aŋga sə, nda Zuwef ana bay, amaa e lel fa Zlavay ara Zuwef hay. Way tata da cak ta Way ta macə mbahw te Zuwef ana hay.

⁸Kərispus, mesnendə ta Way ta macə mbahw te Zuwef hay va ndah da way tata, aca kəs ma ta Bay Mazlakava Yesu ana. Ndah deveŋ Kweriŋtiye hay mabay, macəka zləmay fa mabəzad ma ta Pawl sə, ac ka kəs ma te Yesu ana may, ac ka ŋgat beetem.

⁹Pas mekele ɓa ta vaɗ, meshwen ka ŋgana Pawl. Dapa meshweney ana, Bay Mazlakava ka gwaɗa, gege: «Ke te lel ta mabəzad ma aɗaw bay, ka ta njah teete bay, bəzedec ma kad ndah ana jaŋgata,

¹⁰afa yey ava dəɓa takaa. Kwa ndana ma ta zlafa matəhazakaa, ka ta ŋgadakaa marga aabay, afa ndah aɗaw mabay dapa berne ana na ɓa.»

¹¹Pawl ka njah dapa berne ana mavay amta ava kiya makwa, ka bəzad ma ta Zlavay kad ndana hay faŋga.

¹²Masa Galiyaŋw, aŋga gwevernel da yaŋ vavara ta Akay sə, Zuwef hay, ac ka cacala ma teceŋ kad yaŋ Pawl. Ac ka təhazaw, ac ka hwadaɗ pa slam ta mavən ma ta ndana hay,

¹³ec ke gweɗ, gege: «Nda nesey sə, e fəcec ndana hay ka ta kəɗ ha kad Zlavay eve cəv mekele masa wal ava ma majawa tandakwa.»

¹⁴Pawl ka wal mevehecen ma ana, amaa Galiyaŋw, ke gweɗec kad Zuwef hay, gege: «Akwar Zuwef hay, daha nda ana nesey ke kəɗek ndana, daha aabay ke ŋgə mebər mazlakava ana ɓa sə, ŋgesey, ya cəkafakwar zləmay.

¹⁵Amaa akwa hwedek sə, yaw da yaŋ mesesərek takwar, da yaŋ mezel ta ndah takwar va da yaŋ kwakwas takwar hay. Ara nesey, a lada akwar ava yaŋ takwar ana, madaɗ ma ta vəna ma ana. Yey sə, ya kəs mavən ma da yaŋ tərsam ta ma ana hay ara na aabay.»

¹⁶Ke mbesekec dapa slam ta mavən ma ana hay kad a vəda.

¹⁷Ndana hay fakwanay, ac ka təhaz Sawsten, bay ta Way ta macə mbahw te Zuwef hay faŋga, ac ka kəɗaw fəma ta slam ta mavən ma ana. Amaa kwa Galiyaŋw ka wulak ma da yaŋ mekəɗey ana aabay.

¹⁸Ava dəɓa ana, Pawl ka nah gaa de Kweriŋtiye ava malamaŋ hay makəsparav faŋga. Ec ke gərdeceŋ, ec ke dey ava Pəresil va Akilas pe berne te Senkərey, afa aca ra kəs kaslkaslah te medey kad pa vavara te Siriya. Dəga de Senkərey ana sə, Pawl ka həca yaŋ[21] afa ka paslana ha kad Zlavay, təlam nesey, ka ŋgan jeŋ ana cay. Ec ke tep pa kaslkaslah, ec ke dey pa vavara te Siriya.

¹⁹Mahusa tec pe berne te Efez sə, Pawl ke gərdec Pəresil va Akilas faŋga. Ke də aŋga amta pə Way ta macə mbahw te Zuwef hay, ac ka tə yaw ava Zuwef hay dapa way ana.

²⁰Dərziya hay ac ka nəkafa a da njah kusetke vereceŋ saya, amaa Pawl ka wal ma ana aabay.

²¹Ke gərdeceŋ, gege: «Daha Zlav ka walaw sə, ye de vehek kad varakwar pas mekele.» Ke zleftek dapa berne te Efez, ke sehw pa kaslkaslah, ka data.

²²Mahusa tata pe berne ta Sizar, ke bəreŋgə kad fa vara, ke dey e Zeruzelem ke te gweɗefec ndah dapa Macam yaŋ ta ndah ta Zlavay dərŋga ɗagay. Ava dəɓa ana, ke dey pe berne ta Antakiya masa dapa vavara te Siriya.

²³Ke njehek dərŋga kusetke, ke dey, ka ŋgway dapa vavara ta Galat va dapa vavara te Fərizi, ke də a gəva hay mekele mekele dərŋga. Ke vec gədaŋ kad ndah masasəraka jene fakwanay.

²⁴Nda Zuwef ana ɓa, mezel Apawlaws, e heyek dapa berne ta Alekzandərey ka husa e Efez. Apawlaws ana sə, aŋga nda masa e sən jene mabay da yaŋ ma hay masa ac mavinda dapa Ɗelewer mavəna.

²⁵Ndana hay ac ka sasəraka mambəla ana da yaŋ ma ta Bay Mazlakava Yesu. A sən sə, beetem ta Zaŋ Baatis war, amaa e bəzedec ma da yaŋ Yesu kad ndana hay eve mewesley, e sesərekec eve cəvey ana jaŋgata.

²⁶E gweɗey ava zidaw aabay dapa Way ta macə mbahw te Zuwef hay. Amaa masa Pəresil va Akilas, masa ac ka cəna ma ana cay sə, ac ka kəsaw kad way teceŋ, ac ka ŋguzdana cəv ta macəp Zlavay, afa a da səna mafəna ana saya.

²⁷Ava dəɓa ana, Apawlaws ka wal madaɓa kad pa vavara ta Akay. Malamaŋ hay makəsparav de Efez, ac ka vana gədaŋ, ac ka vindana ɗelewer pa ha kad makəsparav hay da Akay, afa ac da kəsiya mambəla ana. Apawlaws ana ke dey. Mahusa tata arŋga sə, ke jənec makəsparav hay dərŋga ana mabay, afa mambəla ana ta Zlavay aŋga da yaŋ ana.

²⁸Ke peyefec Zuwef hay fəma ta ndana hay fakwanay, ac ka zlafa mavahan kad pa aabay, afa ke ŋguzdecen eve metehwe ana jaka pa ma hay mavinda dapa Ɗelewer mavəna, Yesu sə, aŋga Kəristi.