Read Cuvok Mezlər ta Maslaŋ hay 19 Bible Online

Mezlər ta Maslaŋ hay 19 - Cuvok bible

Mezlər ta Maslaŋ hay 19

¹Dapa masa Apawlaws aŋga da Kweriŋtiye dapa vavara ta Akay sə, Pawl ke dey jaka pa wudam hay, ka husa kasl pe berne te Efez. Ke ŋgetefec makəsparav hay kusetke dərŋga.

²Ke nəkefeceŋ, gege: «Akwar ka ŋgat Mesfen Mavəna pas masa akwar ta kəs ma te Yesu geyey? Ac ka vahan, gege: “Dapa manjah taciya, andə ka cəna ma da yaŋ Mesfen Mavəna aabay.”»

³Pawl ke nəkefec, gege: «Naa, akwa ŋgek beetem sə, wula?» Ac ka vahan, gege: «Anda ŋgek beetem ta Zaŋ.»

⁴Pawl ke gweɗec saya, gege: «Zleezle Zaŋ e ŋgec beetem sə, kad ndah masa ac ka ŋgwada rav tec hay mambəla ana aabay. Zaŋ ana, ke gweɗec Zuwef hay, gege: “Ndana ɓa, e te dekey ava dəɓa tata. Mambəla sə, akwar da kəs ma tata eve metehwe ana. Nda ana sə, aŋga Yesu.”»

⁵Masa aca cəna ma ana nesey sə, ac ka ŋgat beetem eve mezel ta Bay Mazlakava Yesu.

⁶Pawl ke pec ha a yaŋ, Mesfen Mavəna ke dek a yaŋ eceŋ, ec ke gweɗ ava ma ta wunam hay mekele mekele masa aca səniya bay, ac ka zlar mabəzad ma masa Zlav te vecen ke te bəzedey.

⁷Ndah ana fakwanay ece ŋgə 12.

⁸Ava dəɓa ana, Pawl ke dey pa way ta macə mbahw te Zuwef hay. Da hwaɗ ta kiya mahkar, ka kəs ma, ke gweɗey kad ndana hay faŋga ava zidaw dapa vaw aabay da yaŋ Meŋgə bay ta Zlavay. Ka ŋgə gədaŋ, ka wal ndah macəkafa zləmay aca ra kəs ma ana.

⁹Amaa ndah dərziya dapa deveŋ eceŋ, ac ka kəs ma ana aabay, kwa macəkafa zləmay. Mafay ana, ece seserey da yaŋ cəv ta Bay Mazlakava fəma ta ndana hay fakwan faŋga. Ara nesey, Pawl ke gərdeceŋ, ke kəsec makəsparav hay, ec ke dec eveceŋ. Cəɗem cəɗem Pawl e dey ke te sesərekec ndana hay dapa lekwel ta ndana ɓa, mezel Tiranaws.

¹⁰Ka ŋgaw ara nesey mavay ecew. Mafay ana, ndah dapa vavara ta Azi fakwanay, kwa Zuwef hay, kwa Gərek hay, ac ka ŋgat macəna ma ta Bay Mazlakava Yesu.

¹¹Zlav ka ŋgə cah hay mekele mekele marəzla ndana hay jaka vara Pawl.

¹²Dapa ŋgesey ana, ndana hay ec ke kəsek rəkwat te mezlər ta Pawl ava rəkwat tata hay mekele mekele masa ka dərazlafa vaw tata, ac ka hwadaɗ fa ndah gwabay hay. Ara nesey, nda gwabay madərazla vaw fətiya sə, ac ka mbəlata. Daha nda masa aŋga ava damkwaw, ka dərazlafa vaw sə, damkwaw ana a data a vəda dapa ana.

¹³Dapa manah hay ana ŋgesey, Zuwef hay ɓa, ac ka ŋgway ka ta mbas damkwaw dapa ndana hay. Ac ka cak mambas damkwaw ana eve mezel ta Bay Mazlakava Yesu. Ara nesey, ac ka gwaɗa damkwaw, gege: «Anda gwaɗakaa eve mezel te Yesu, masa Pawl ta bəzad ma da yaŋ ana, daɓa dapa nda nesey.»

¹⁴Wudeh ta nda ɓa, mezel Sekuwas, ac tasəla, ac ka ŋgaw ara aŋga ana. Sekuwas sə, aŋga deveŋ bay hay ta ndaakwas hay ta Zuwef hay.

¹⁵Amaa damkwaw ke vehecen, gege: «Yesu sə, ya səniya. Pawl, ya səniya. Naa akwar sə, akwar wa hay wa?»

¹⁶Nda masa aŋga ava damkwaw sə, ke hwefeceŋ, ke fənec fakwanay ava gədaŋ, ke kəɗeceŋ, ke ŋgefec mbəlek fa vaw, ke ŋgerecen rəkwat avəda fa vaw. Ara nesey, wude hey ana, ec ke mbəlekec kad a vəda, ac ka hway ava vaw dahəŋga.

¹⁷Ndah dapa berne te Efez fakwanay, masa Zuwef hay va Gərek hay, ac ka cəna labara ana, ac fakwanay zidaw ke kəɗeceŋ, ac ka hahəm Bay Mazlakava Yesu mafəna ana saya.

¹⁸Ndana hay mabay ac ka kəs ma te Yesu, ec ke dey, ac ka ŋguzad jene hay mambəla ana aabay hay masa ac ta ŋgiya zleezle fəma ta ndana hay fakwanay, ac ka cə mbahw mafay ana.

¹⁹Ndana hay gaa maŋga menjev ta manas ndana hay sə, ec ke hwedek ɗelewer tec hay masa ma hay ta manas nda mavinda da fətiya sə, ac ka ndala avəda fəma ta ndana hay fakwanay. Ɗelewer ana hay fakwanay sə, səlay ana mabay[22].

²⁰Ara nesey, jaka pa gədaŋ ta Bay Mazlakava, ma ta Zlavay ke dey fəma fəma va ka ŋgat gədaŋ mazlakava.

²¹Ava dəɓa te jeŋ ana hay ŋgesey sə, Pawl ka kəs mawulak yaŋ te medə e Zeruzelem, e de zleŋ jaka pa vavara ta Masiduwan va vavara ta Akay. Ke gweɗ, gege: «Daha yey ka ta husata e Zeruzelem sə, a lada ye de də pe berne ta Rawma may.»

²²Ka zlar ndah majəniya ecew kad pa vavara ta Masiduwan. Ndah ana sə, ac Timawtey va Erastus[23]. Amaa Pawl sə, ka njahata dapa vavara ta Azi manah kusetke.

²³Dapa manah hay ana ŋgesey, ndana hay ac ka ŋgə baazlam mabay de Efez da yaŋ cəv ta Bay Mazlakava Yesu.

²⁴Ndana dapa berne ana ɓa, mezel Demetəriyus. A vaɗ way ta ɓəray hay mekweskwes ana ava ɓəray masa ece husem bay, masa manjaha ara Way ta kwakwas ta mbat teceŋ mezel Artimes. Aŋga ava ndah maŋga mezlərey ana ac ka ŋgat səlay mabay eve mezlərey ana teceŋ ana ŋgesey.

²⁵Demetəriyus sə, ke zelekec guula tata hay va ndah maŋga mezlər ara aŋga hay mekele, gege: «Guula aɗaw hay, akwa səniya mezlər tandakwa nesey sə, a hwadandakwa zleley mabay.

²⁶Amaa akwar ava yaŋ takwar ana, akwar ka cəna, akwar ka wala jə masa nda mezel Pawl ta ŋgiya. Ke gweɗec kad ndana hay, gege: “Mbat hay masa ndana hay ta lamiya ava ha sə, ŋgesey, jə masa a jəna nda aabay”. Mafay ana, ndana hay mabay de Efez ana, ac ka ŋgwada mawulak yaŋ teceŋ, ka ta kəs ma tata. Makəsa ma tata ana hay sə, ndah dapa berne fana babəla bay, amaa kwa ndana hay dapa vavara ta Azi fakwanay ac ka kəsaw.

²⁷Daha jeŋ ana e ŋgey ara nesey sə, ndana hay ac ta zləɓandakwaɗ mezlər tandakwa na avəda. Ac ta zlaɓ sə, mezlər tandakwa babəla bay, amaa ndana hay ac ta gərda mekekəred dapa way mazlakava ta kwakwas ta mbat Artimes ana saya may. Eve metehwe ana, mbat Artimes sə, mbat mazlakava masa ndah dama dama dapa vavara ta Azi va dapa vavara fakwanay ece kekəred kad aŋga. Amaa daha ndana hay ac ka kəs ma ta Pawl nesey sə, ndana hay ac ta kəs mbat ana eve mehehəm ɓasabay.»

²⁸Dapa masa ndana hay aca cəna ma masa Demetəriyus te gweɗek ara nesey sə, rav ke hecec mabay. Ac ka cə lalaw, gege: «Artimes, mbat te Efez hay sə, mbat mazlakava!»

²⁹Macə lalaw ana e cen kad vara ndah mekele mekele dapa berne ana, ke ɓeslecen yaŋ. Ndana hay ac ka təraŋgə Gayus va Aristarkus, ndah mepedek ma ta Pawl dapa vavara ta Masiduwan sə, may. Ndana hay fakwanay ac ka hway kad pa bərakw.

³⁰Pawl ka wal medey vara ndah ana, amaa ndah masasəraka jene tata ac ka daran ma.

³¹Ndah deveŋ mazlakava hay maŋga bay da yaŋ vavara ta Azi sə, ac guula ta Pawl. Ec ke zlərek ndana hay kad vara vaw, ac da vana mamənak, gege: «A ta də pa bərakw ana bay!»

³²Dapa ŋgesey ana, miya makwasa fakwan faŋga sə, ac ke dəŋgezleceŋ. Kwa waawa a caɓa lalaw saw. Ndana hay fakwanay ac ka cə lalaw, kwa waawa a caɓa lalaw wal wal. Amaa hamazlakava ta ndana hay deveŋ eceŋ sə, ac ka sən masa ac makwasa faŋga mafay te mey sə, aabay.

³³Nda Zuwef ana ɓa, mezel Alekzandərus. Zuwef hay mekele ac ka kəsaw deveŋ Zuwef hay dərziya, ac ka zlacaɗ fəma ta ndah makwasa, afa e de ŋguzdecen ma ana mambəla ana. Alekzandərus ka baŋgaɗ ha ke te gweɗey, a wal e de ŋguzdecen ma ana kad miya makwasa.

³⁴Amaa masa aca səniya aŋga nda Zuwef ana sə, ac ka zlar macə lalaw fa slam ana, gege: «Artimes, mbat ta ndah de Efez hay sə, mbat mazlakava!» E ŋgə ler ecew, aca cə lalaw ara nesey.

³⁵Nda mavinda jene mazlakava te berne ana, e derecen ma te meŋgə baazlam sə, ava gəra dapa, ec ke njehec teete. Ke gweɗec, gege: «Akwar ndah de Efez, ndana hay fakwanay aca sən Way ta kwakwas ta mbat Artimes va kekeŋ masa e kezlek da baymaləvaŋ sə, aŋga mazlakava ana.

³⁶Ndana ma ta zlafa megweɗ da yaŋ ana wal sə, aabay. Ara nesey, manjaha teete, akwa wulaka mambəla ana ɗagay wagaa akwar te ŋgə jeŋ ana.

³⁷Akwa hwedek ndah ana nesey sə, mafay te mey? Ec ke kərek jene dapa Way ta kwakwas ana ɓa geyey? Ac ka laf mbat tandakwa ana ɓa geyey?

³⁸Pas ana hay ɓa mapa ka ta vən ma ta ndana hay. Ndah mavəna ma hay sə, ɓa. Daha Demetəriyus va ndah tata hay ac ka wal ma te cefec lalaw ndana hay sə, zuwan ece dey ka ta wuzaɗ ma ana vereceŋ.

³⁹Daha akwa wal ma ta ləmad ma mekele mafəna ana nesey saya sə, say akwa hwadaɗ ma ana pa macam yaŋ nda maŋga bay da yaŋ ndana hay ka ta wuzaɗiya.

⁴⁰Ac ta jawandakwa avəda ava ma hay da yaŋ meŋgərey mafay ta macam yaŋ tandakwa pəsna nesey, afa yaŋ ta ma ana masa andə da zlafakwaɗ mevehecen ma ana mak sə, aabay.» Ava ma ana hay nesey, ke gweɗec ndana hay aca ra vəna yaŋ.