Read Cuvok Mezlər ta Maslaŋ hay 2 Bible Online

Mezlər ta Maslaŋ hay 2 - Cuvok bible

Mezlər ta Maslaŋ hay 2

¹Mehusek ta pas ta macunam ta Pantikwasta sə, makəsparav hay ac ka ɓəca vaw fakwanay fa slam ana.

²Faŋga faŋga ana, ac ka cəna jene e ŋgek da baymaləvaŋ ara memeɗ masa e bebər elehey. Jeŋ ana, ka nəha way masa ac manjaha dapa.

³Ac ka wala jene ɓa ara neneŋ ta kwakwaw te gəɗey, ka vəna yaŋ, ka njah a yaŋ eceŋ ana amta amta teceŋ fakwanay.

⁴Ac fakwanay, ec ke nəhec eve Mesfen Mavəna, ec ke gweɗey ava ma ta wunam hay mekele mekele masa aca səniya bay ara masa Mesfen Mavəna te vec gədaŋ te megweɗey.

⁵Anjəkar de Zeruzelem ana sə, Zuwef hay medek dapa vavara hay fakwanay, macəpa cəv ta Zlavay ava rav pal amta ɓa.

⁶Dapa masa aca cəna jene e bebər ara memeɗ sə, ndana hay gaa ec ke kwesek vaw kad faŋga. Ac fakwanay, ec ke rəzleceŋ, afa kwa waawa a cəna makəsparav hay ana ece gweɗ ava ma ta wunam tata.

⁷Ec ke rəzley, ac ka wulakaw, ac ka nəkaw dapa taɓa tec, gege: «Ndah magwaɗa ma ana hay nesey sə, ac fakwan dapa vavara te Gelile biba?

⁸Naa kwa waawa tandakwa a cəna ma tata vara ndah ana masa aca gwaɗiya sə, a ŋgana gwagumaw?

⁹Deveŋ andakwa fana nesey sə, ndah medek dapa vavara ta Partey, te Medi, ta Elaŋ, ta Mizawpawtami, te Zudey, ta Kapaduwas, ta Paŋw va dapa vavara ta Azi.

¹⁰Dapa vavara te Fərizi, ta Pamfili, ta Misəra, te Lebi, masa zef eve berne te Siren va ndah mekele medek da Rawma.

¹¹Ndah medek de Kəret va da Arab hay ɓa may. Deveŋ andakwa ana sə, ŋgeɗ hay Zuwef hay, ŋgeɗ hay ac ta ŋgwada rav teceŋ ka ta cəp ma majawa ta Muyiz. Amaa anda cənakwaɗ ece gweɗ ava ma tandakwa da yaŋ mezler hay mazlakava masa Zlav ta ŋgiya.»

¹²Ara nesey, ec ke rəzlec fakwanay, ac ka sən jə masa ac ta ŋgiya ɓasabay, ec ke gweɗ dapa taɓa tec, gege: «Jeŋ ana nesey sə, a wal megweɗ gwagumaw?»

¹³Amaa ndah dərziya hay, ec ke seser da yaŋ makəsparav hay ana, gege: «Ac fakwanay makwa ana!»

¹⁴Ara nesey, Piyer va maslaŋ hay kuraw dapa yaŋ ana amta ec ke zleftek, ac ka zlar megweɗec ndah makwasa fəma teceŋ sə, gege: Akwar Zuwef hay dapa vavara te Zudey va akwar ndah de Zeruzelem fakwanay, macak zləmay mambəla ana fa ma masa ya ta gwaɗakwar nesey, akwar da cəna ma da yaŋ ma ana mambəla ana.

¹⁵Ndah nesey sə, ece kwey ara masa akwar ta wulakiya bay, afa aŋga na pərek heley, pas te mehel tepey.

¹⁶Jeŋ ana e ŋgə təlam nesey sə, ara Zuwel nda mehwedek ma te gweɗ zleezle, gege:

¹⁷«Zlav ke gweɗ, gege: “Mbala pas te memeɗ ta vavara sə, ye te vec Mesfeney aɗaw kad ndana hay fakwanay. Dapa ŋgesey ana, wudeh mawula hay va dehwey, ec te tərec ka ndah mehwedek ma aɗaw hay. Kad wudeh gawla hay sə, ye te ŋguzdec jene hay waya masa ya ta ŋgiya. Marndaw hay deveŋ akwar may, meshwen e te kəɗeceŋ afa aca ra wala jeŋ ana.

¹⁸Aŋga, dapa pas ana hay ŋgesey, ye te vec Mesfeney aɗaw Mavəna kad ndah maŋga mezlərey aɗaw hay. Mawulah va ŋgwazah fakwanay, ac te tərec ka ndah mehwedek ma aɗaw hay.

¹⁹Ye te ŋgə cah hay da baymaləvaŋ, ye te ŋgə jə marəzla ndana hay dapa vavara. Bembez, kwakwaw va neneŋ ta cacak ec te təhekey.

²⁰Pas e te weɗ ɓasabay, kiya a ta ŋgwadata gagaza ana ara bembez. Ava dəɓa ana, Bay Mazlakava e te vehekey ke te təɗec ma a yaŋ ndana hay. Ta pəsaŋga ana ŋgesey, ndana hay ac ta wala gədaŋ tata ac ta səniya pas ana ŋgesey sə, a fəna dərziya hay.

²¹Ara nesey, kwa waawa mazala mezel ta Bay Mazlakava ke te jəney sə, a ta mbəlata.”»

²²Piyer ke gweɗ saya, gege: «Akwar Isreyel hay, macak zləmay fa ma aɗaw hay. Yesu nda Nezeret sə, aŋga nda masa Zlav ta ŋguzdakwaɗ aŋga sə, e dek da vara Zlavay. A ŋguzdakwaɗ jaka pe meŋgə cah hay mazlakava marəzla nda jaka vara vaw dapa taɓa takwar.

²³Nda ana sə, Zlav ka vakwaɗ pa ha takwar ara aŋga ta waya. Zlavay, dapa maləmad vaw tata mezleezle ana sə, ka səna jə masa akwar ta ŋgiya sə, avəda. Akwar ka paɗ Yesu ana pa ha ta ndah masa aca sən Zlav bay, aca ra kəɗa avəda cukw cukw fa hap mazləlawa.

²⁴Amaa Zlav ke pərekek avəda, ka mbəla avəda dapa marga ta maməcay, afa maməcay ana aŋga ava gədaŋ kwa kusetke da yaŋ ana aabay.

²⁵Yaw, zleezle bay Deevet ke gweɗ da yaŋ Yesu ana, gege: “Ya wala Bay Mazlakava cəɗem cəɗem fəma taaɗaw, aŋga manjaha da ha ta zam aɗaw, afa ye de ŋgə zidaw bay.

²⁶Mafay ana, rav aɗaw manəha eve mewesley, ya slə laway eve mewesley. Kwa ya ka məcata sə, vaw aɗaw, a ta ŋgat masasak vaw dapa maɓal jene da vara Zlavay,

²⁷afa kaa, Bay Mazlakava ka ta gərda mesfeney aɗaw dapa wunam ta ndah maməca aabay. Ka ta gərda slaw ta vaw ta nda maŋga mezlər takaa sə, da kuɗapaɗ dapa jav aabay.

²⁸Ka ka ŋguzdawa cəv te mesfeney, ke te nəheyey eve mewesley, afa ka ta njah da cak taaɗaw.”»

²⁹Piyer ke gweɗec saya, gege: «Malama hay Zuwef hay, ya zlafa mapanakwaɗ ma da yaŋ bay Deevet papaŋ ta papaŋ tandakwa ana mambəla ana. Ya gwaɗakwar, bay Deevet sə, ka məcata, ac ka pəsaha avəda, jav tata ana haa pəsna aŋga ɓa fana[1]

³⁰Aŋga ana sə, nda mehwedek ma, a səniya Zlav ka gwaɗana ma ɓa eve membeɗey, gege: “Ava dəɓa takaa sə, ya ta paɗ nda amta dapa tərsam takaa, a da njah ka bay ara kaa.”»[2]

³¹«Ara nesey, Deevet ana ka səna jə masa Zlav a ta ŋgiya maayaŋ kad fəma sə, avəda. Ke gweɗey da yaŋ mepərek te Kəristi, gege: “Zlav a ta gərda dapa wunam ta ndah maməca sə, aabay, slaw ta vaw tata e te kuɗep aabay.”»

³²Yesu ana nesey sə, Zlav ke pərekek avəda dapa maməcay, andaw fakwan təlam nesey, anda tə yaw da yaŋ ma ana.

³³Zlav ka kəsa avəda kad a wudam, ka njahaɗ a ha ta zam tata. Zlav Papaŋ ka vana Mesfen tata masa aŋga ta gwaɗa, a ta vana. Yesu ka zlərandakwaɗ Mesfeney ana, ara masa akwa wala va masa akwa cəna təlam nesey.

³⁴Anda sənakwa Deevet ava yaŋ tata ana, ke ŋgeɗ kad a wudam sə, aabay, amaa ke gweɗ da yaŋ Kəristi, gege: «Bay Zlavay ka gwaɗa Bay Mazlakava aɗaw, gege: “Dekey njah da ha ta zam aɗaw,

³⁵kasl pa pas masa ye te peɗec maslagəra takaa hay a hwaɗ ta ha takaa.”»

³⁶Piyer ke gweɗec saya, gege: «A lada hwaɗ ta way te Isreyel hay fakwanay aca ra səna eve metehwe ana, Yesu sə, Zlav ka paɗ ka Bay Mazlakava va Kəristi, aŋga nda masa akwar ka zləlawaɗ fa hap mazləlawa.»

³⁷Dapa masa ndah makwasa aca cəna ma nesey sə, rav ke təɗec mabay. Mafay ana, ec ke gweɗec Piyer va maslaŋ hay dərziya, gege: «Ara nesey sə, andaw de ŋgə mey malama hay?»

³⁸Piyer ke vehecen, gege: «Maŋgwada rav takwar, a lada kwa waawa takwar da yah meŋgə beetem eve mezel te Yesu Kəristi mafay ta mapal mebər tata hay va maŋgat Mesfen Mavəna.

³⁹Zlavay ke gweɗey a ta və Mesfen tata sə, kad ndah masa ac fana təlam nesey. Mesfeney ana sə, a ta viya kad akwar va wudeh takwar hay. Asaya, kad ndah dəreŋ va ndah masa Zlavay, Bay tandakwa te zelekeceŋ kad vara vaw.»

⁴⁰Piyer ke gweɗec ma hay mekele mekele saya masa aca ra kəs ma tata ana, ke vec gədaŋ, gege: «Mavəna vaw ava ndah suwe hay dapa vavara təlam nesey, afa Bay Zlavay da mbəlakwar avəda dapa pas masa e te təɗec ma a yaŋ!»

⁴¹Ndana hay mabay deveŋ ndah ana hay ŋgesey ac ka kəs ma ta Piyer, ac ka ŋgat beetem. Pəsaŋga ana ŋgesey, ndana hay ec ke ŋgə bakatar mahkar masa ac ke sekek kad e veŋ makəsparav hay.

⁴²Cəɗem cəɗem makəsparav hay aca cak zləmay fe mesesərek ta maslaŋ hay ava rav pal amta. Ac manjaha ara wudeh ta nda amta. Kwa dapa mavan jene ta manday ta masənafa maməc te Yesu va dapa macə mbahw kad Zlavay sə, ac fa slam ana.

⁴³Maslaŋ hay ac ke ŋgə cah hay mabay masa e ŋguzdek gədaŋ ta Zlavay aŋga eve eceŋ. Ndana hay fakwanay ec ke rəzleceŋ mafay ta cah hay ana, ac ka nah yaŋ kad Zlavay.

⁴⁴Makəsparav hay fakwanay ac macama fa slam ana, aca vən jə masa ac ava aŋga sə, fa vaw teceŋ[3]

⁴⁵Ara megweɗey, ac ka husamda ley tec hay va jene tec hay, aca vən səlay ana fa slam ana. Kwa waawa ka ŋgat jə masa aŋga ta waya ava səlay ana masa da husana.

⁴⁶Fa pas fa pas, aca cam vaw fa slam ana dapa Way ta kwakwas ava rav amta. Aca ndə ɗaf fa slam ana da way tec hay eve mewesley va ava rav mambəla ana.

⁴⁷Ac fakwanay, ac ka hahəm Zlavay fa slam ana. Ndana hay fakwanay ec ke hehəmec mabay. Cəɗem cəɗem Bay Zlavay e zelekec ndah masa ec ke mbəlekec dapa mebər teceŋ kad e veŋ macam yaŋ ta ndah tata.