Read Cuvok Mezlər ta Maslaŋ hay 20 Bible Online

Mezlər ta Maslaŋ hay 20 - Cuvok bible

Mezlər ta Maslaŋ hay 20

¹Ava dəɓa ana, masa baazlam de Efez sə, ka ndəvata cay, Pawl ke zelekec ndah masasəraka jene, ke vec gədaŋ. Ke gweɗefec avəda, ac ka vəna yaŋ, aŋga may, ka data kad pa vavara ta Masiduwan.

²Ka ŋgway dapa vavara ana, ke vec gədaŋ kad makəsparav hay faŋga ava ma hay mekele mekele mabay. Ava dəɓa ana, ka husata pa vavara te Gərek hay[24]

³Ka njah dapa vavara ana kiya mahkar. Masa e te sehw kad pa kaslkaslah te medə kad pa vavara te Siriya sə, ka cəna Zuwef hay ac ka cacala ma teceŋ, ka ta kəɗiya ka macəhwandaw. Ka kəs mawulak yaŋ ta mavahaɓa kad Siriya jaka pe cəv te medə kad Masiduwan.

⁴Pawl ece dey sə, ava Sawpatərus, wut ta Pirus dapa berne te Beriya, Aristarkus va Sekundus ndah dapa berne ta Tisalawnik, Gayus nda dapa berne te Derbey ana, Timawtey, Tisek va Tərawfim ndah dapa vavara ta Azi.

⁵Ndah ana nesey sə, ec ke dec kamma fəma taciya, ac ka ɓəlandaw da Turwas[25].

⁶Ava dəɓa ta macunam te peŋ masa kəfa ana maɓəsla bay sə, andə ke zleftek dapa berne te Filipi, andə ke sehw kad pa kaslkaslah te medə kad Turwas. Manah zlam ava dəɓa ana, anda husa a Turwas ana, anda ŋgetefeceŋ, anda ŋgə luma amta dərŋga eve eceŋ.

⁷Pas ta luma ta Dəram ta fakwaɗ[26] andə ka kwas vaw ka ta ndə ɗaf. Pawl ke bəzedec ma kad ndah makwasa sə, kasl yaŋ ta vaɗ, afa tedew ana a ta daɓa kad pa slam mekele cay.

⁸Dapa way da yaŋ way masa andaw makwasa dapa sə, petərla hay mabay da way ana ɓa.

⁹Wat gawla ɓa, mezel Yawtek manjaha fe melever ta way ana. Pawl a bəzad ma, a bəzad ma, gawla sə, ka yəvata ta manjahay. Waŋ ka kəɗa avəda, ka njata waŋ. Masa aŋga dapa waŋ dapa way da yaŋ way mamahkar ana da wudam sə, ka təɗata kad fa vara. Ndana hay ec te də ka ta zləmadiya sə, ac ta ŋgatafa ka məcata cay.

¹⁰Pawl ke bəreŋgey, ke dey kad yaŋ wat ana, ka nah a yaŋ ana, ka humbataw, ke gweɗec ndana hay, gege: «Akwa ta kuɗa bay, aŋga eve ndey.»

¹¹Pawl ke veh kad pə way da yaŋ way sə, ka vən peŋ, ac ka ndaw fa slam ana. E gweɗey, e gweɗey kasl slam e təvey. Ava dəɓa ana, ka data.

¹²Wat gawla sə, aŋga werwer ka mbəlata cay. Ndana hay ac ka kəsaw, ec ke dey kad way. Masa aca wala wat gawla sə, ka mbəlata, ke təkecen rav mabay.

¹³Pawl a wal medey kad Asaws ava sek ɗagay. Dapa ŋgesey ana, ka gwaɗandaw anda de dey jaka pa kaslkaslah fəma kad Asaws. Andə ke dey, andə ka ɓəlaw da Asaws ana, afa anda de dey fa slam ana.

¹⁴Masa aŋga ta ŋgatafandaw da Asaws sə, ke sehwek pa kaslkaslah ana may, andə ke dey kad pe berne te Mitilen.

¹⁵Anda zleftek dərŋga ava kaslkaslah. Te pərek ana, anda husa kad pa kwakumakw ta vavara dapa taɓa ta yam mafayakfayak ana ɓa, mezel Kiyaw. Badamta ana, anda zleŋ yam mafayakfayak ana, anda dey kad pa vavara dapa taɓa ta yam ana mekele mezel Samaws. Badamta saya, anda husa kad pe berne te Miltus.

¹⁶Anda dey kad Miltus, anda gərda berne te Efez sə, afa Pawl a wal mapas vaw dapa vavara ta Azi gaa bay. A vas vaw te medə kad pe berne te Zeruzelem, afa wagaa pas ta macunam ta Pantikwasta de husek sə, ka husata cay.

¹⁷Masa Pawl aŋga dapa berne te Miltus sə, ke zler kad Efez ke te zelek mesnendə hay ta Macam yaŋ ta ndah ta Zlavay dərŋga.

¹⁸Masa mesnendey ana hay aca husa a cak tata de Miltus sə, Pawl gege: «Akwa sən manjah taaɗaw deveŋ akwar, dəga dapa medə taaɗaw kad varakwar macaaca ana kad pa vavara ta Azi.

¹⁹Ye ke ŋgə mezlərey kad Bay Mazlakava sə, ava manah yaŋ, ava makuɗa dapa ndey va maɓəs marga hay mabay mafay te Zuwef hay, mayaha cəvey ke te kəɗiyey.

²⁰Akwa səniya, kwa ya ka raɓda jene fa akwar masa a ta jənakwar sə, aabay. Ya ka ŋguzdakwaɗ ma ta Zlavay, ya ka sasərakakwar kwa dapa zaŋ ana, kwa da way takwar hay.

²¹Ye ke gweɗec kad Zuwef hay va kad Gərek hay, aca ra ŋgwada rav teceŋ, aca ra ŋgwad ma kad vara Zlavay, aca ra paɗ Bay tandakwa Mazlakava Yesu ka nda ma te mbəleceŋ eve metehwe ana.

²²Təlam nesey, ye dey kad Zeruzelem, afa Mesfen Mavəna ke tetəkiyey avəda te medey, amaa ye sən jə masa e te ŋgetefiyey dərŋga bay.

²³Jə masa ya səniya sə, kwa dapa berne wula wula Mesfen Mavəna ka ŋguzdawa, ac te ŋgediyey marga, ec te kezleɗiyey pa daŋgay.

²⁴Amaa kwa ya məcay, kwa yey eve ndey, kad yey sə, e wefiyey war. Jə mazlakava kad yey sə, mendəv mezlər masa Bay Mazlakava Yesu ta puwa pa ha aɗaw te meŋgey. Mezlərey ana sə, mabəzad Labara mambəla ana da yaŋ mawal nda ta Zlavay.»

²⁵«Ya ka ŋgway dapa taɓa takwar fakwanay, ya ka ŋguzdakwaɗ ma da yaŋ meŋgə bay ta Zlavay. Amaa təlam nesey, ya səniya kwa nda amta deveŋ akwar a ta ŋgat meweleyey ɓasabay.

²⁶Mafay ana, ya gwaɗakwar, dəga pəsna, daha ndana deveŋ akwar ka zata sə, ma taaɗaw dapa ɓasabay,

²⁷afa ya ka ŋguzdakwaɗ ma ana hay fakwanay da yaŋ jə masa Zlav ta waya te meŋgey. Kwa ya ka raɓafakwar ma ana aabay.

²⁸Ya gwaɗakwar, mep leŋgesl fə yaŋ takwar, mepefec ndey ndana hay fakwanay masa Mesfen Mavəna ta vakwaɗ pa ha takwar ara gwala jene te pə ndey fa təmak tata hay. Manjah ka gwala jene hay ta ndah dapa macam yaŋ ta ndah ta Zlavay. Eceŋ sə, Zlav ke peɗec ha wal kad aŋga jaka pa maməc ta Wudiya.

²⁹Ya səniya, pas masa ya ka ta data sə, ndana hay ara wagalak hay, ec te dekey kad pa taɓa takwar, ec te ŋgedec marga kad ndah dapa Macam yaŋ ta ndah ta Zlavay.

³⁰Kwa ndah deveŋ akwar, ac ta ŋgal ma, afa ec re tetəkec ndah masasəraka jene, ece re cəpeceŋ.

³¹Ara nesey, mep leŋgesl fə yaŋ takwar. Masənafa, mavay mahkar yey deveŋ akwar, hwavavaɗ, hwapapas, ya kətakwar amta amta fakwanay takwar. Asaya, ya ka kuɗa mafay takwar.»

³²«Təlam nesey, ya paɗakwar pa ha ta Zlavay va pa ha ta labara ta mambəla ana tata, masa aŋga ava gədaŋ mazlakava ta magəlakwar va mavakwar jene hay masa akwar ta camiya tehwe ava ndah tata fakwanay.

³³Ndey ke ŋgiyey kwa fa səlay takwar, kwa fa gənaɓ takwar, kwa fa rəkwat ta nda amta sə, aabay.

³⁴Akwar ava yaŋ takwar ana, akwa səniya mambəla ana, ye ke ŋgə mezlərey ava ha taaɗaw, afa ya da ŋgat səlay ka ta husem jene ta manday kad yey va kad ndah masa andaw eve eceŋ fa slam ana.

³⁵Ara nesey, dapa jene hay fakwanay sə, ya ka ŋguzdakwaɗ a lada kwa waawa de ŋgə mezlərey ava ha tata, a da zlafa mejənec maslamarga hay ava aŋga. Masənafa ma ta Bay Mazlakava Yesu masa aŋga te gweɗ ava ma tata, gege: “Nda mavana jene kad ndana sə, aŋga ava meweslə gaa ka fəna nda makəsa jeŋ ana.”»

³⁶Masa Pawl ka ndəvda megweɗey, ndana hay fakwanay ec ke kekəredey ka ta cə mbahw. Ac ka cə mbahw kad Zlavay fakwanay.

³⁷Ava dəɓa ana, ndana hay ac ka humbataw, ac ka gwaɗafa, afa e de də dapa metehey, amaa ac fakwanay ac ka kuɗa mafay tata.

³⁸Aca kuɗa gaa sə, afa aŋga te gweɗec, gege: «Akwar te weleyey fe ndey ɓasabay.» Ac ka padan ma kasl a ma ta wayam, pa slam te metep pa kaslkaslah hay.