Read Cuvok Mezlər ta Maslaŋ hay 21 Bible Online

Mezlər ta Maslaŋ hay 21 - Cuvok bible

Mezlər ta Maslaŋ hay 21

¹Masa andaw ke gərdec mesnendə hay de Efez sə, andə ke dey ava kaslkaslah te medə kad pa vavara mazlakava dapa taɓa ta yam mafayakfayak ana mezel Kwas. Tedew te pərek ana, andə ke dey, andə ka husa pa vavara mazlakava dapa taɓa ta yam mafayakfayak ana mekele saya, mezel Rawdey. Dapa faŋga, andə ke dey ava kaslkaslah te medə kad pe berne ta Patara.

²Da Patara ana, andə ka ŋgat kaslkaslah mekele te medə kad pa vavara te Fenesi, andə ke tep kad pa kaslkaslah ana, andə ke dey.

³Masa andaw dapa taɓa ta yam mafayakfayak ana sə, anda wala vavara te Kipərus jaka ha ta gula, amaa anda dey sə, kad pa vavara te Siriya. Kaslkaslah sə, ke zlec de Tir dapa vavara te Siriya ana, afa aca ra bəreŋgekec jene hay avəda dapa.

⁴Andə ke bəreŋgey, andə ke dey, andə ke ŋgetefec makəsparav hay faŋga. Andə ka njah eve eceŋ luma amta. Mesfen Mavəna ke ŋguzdecen jə ma ta ŋgana kad Pawl de Zeruzelem kad makəsparav hay faŋga. Mafay ana, ndah ana ac ka gwaɗa Pawl sə, e te də Zeruzelem ana sabay.

⁵Amaa mamaɗ yaŋ ta luma amta sə, andə ke zleftek, andə ka data maŋgway taciya. Ac fakwanay ava ŋgwazah teceŋ va wudeh teceŋ ac ka padandan ma dəga dapa berne ana kasl a vəda te berne ana. Anda husa a ma ta yam ana, andə ke kekəredey, andə ka cə mbahw kad Zlavay.

⁶Ava dəɓa ta macə mbahw taciya sə, andə ke gweɗ fa vaw amta amta dapa taɓa taciya fakwanay, andə ke tep pa kaslkaslah. Ac may, ac ka vahata kad wunam teceŋ.

⁷Anda də ava kaslkaslah te medə de Tir kad pe berne ta Pətawlemayis. Faŋga, anda bəreŋgey, anda gweɗefec malamaŋ taciya hay makəsparav andə ke ŋgə manah amta eve eceŋ.

⁸Badamta ana, andə ke dey, andə ka husa pe berne ta Sizar. Faŋga, Nda mabəzada ma ɓa, mezel Fəlep. Aŋga sə, aŋga nda amta deveŋ ndah tasəla[27] masa ec te pelec de Zeruzelem ka ta jən maslaŋ hay. Andə ke dey, andə ka njah da way tata.

⁹Daŋgwaya hay faɗ ɓa, ec ke də a way ta mawal aabay heley, ec dehw mehwedek ma ta Zlavay.

¹⁰Dapa manah taciya gaa faŋga sə, nda mehwedek ma ɓa, mezel Agabus. E dek de Zudey

¹¹kad varandaw, ka kəs kanda ta Pawl, ke jewec sek tata va ha tata hay, ke gweɗ, gege: «Wala, Mesfen Mavəna, gege: “Zuwef hay dapa vavara te Zeruzelem ac ta jaw nda ta kanda ana nesey, ara yey ta jaw ha va sek aɗaw hay nesey, ac ta paɗ pa ha ta ndah Zuwef hay bay.”»

¹²Masa anda cəna ma ana nesey sə, andaw ava makəsparav hay da Sizarey ana faŋga, andə ka ŋgana mbahw Pawl, e de də Zeruzelem sabay.

¹³Amaa Pawl ka vahandan ma, gege: «Akwa kuɗa sə, mafay te mey? Akwa wal maməcawa vaw aɗaw geyey? Yey sə, kwa ec te jewiyey, kwa ec te kəɗiyey avəda de Zeruzelem ana mafay ta Bay Mazlakava Yesu sə, ya ta kəsiya.»

¹⁴Ara nesey, andə ka zlafa maŋgwada mawulak yaŋ tata aabay. Mafay ana, andə ka gərda a da daɗay. Andə ka gwaɗa: «A lada Bay Mazlakava Yesu da ŋgaw ara aŋga ta waya.»

¹⁵Ava dəɓa ta manah kusetke, andə ka ləmad vaw, andə ke dey e Zeruzelem.

¹⁶Makəsparav hay dərziya dapa vavara ta Sizarey, ac ka padandan ma kasl a way ta ndana ɓa, mezel Mənasaŋw. Aŋga ana sə, aŋga nda Kipərus ana, aŋga makəsparav dəga zleezle. Andə ka nah da way tata faŋga.

¹⁷Mahusa taciya e Zeruzelem sə, malamaŋ hay dapa Macam yaŋ ta ndah ta Zlavay ac ka kəsandaw eve mewesley.

¹⁸Badamta ana, andaw ava Pawl andə ke dey a way ta Zak. Mesnendə hay ta ndah dapa Macam yaŋ ta ndah ta Zlavay fakwanay makwasa dərŋga.

¹⁹Pawl ke gweɗefeceŋ, ke ŋguzdecen jene hay fakwanay mambəla ana masa Zlav te ŋgeceŋ dapa taɓa ta ndah masa Zuwef hay bay jaka pe mezlər tata masa aŋga ta ŋgiya deveŋ eceŋ.

²⁰Ndah macəna ma ana ŋgesey sə, ac ka slə law ta mahahəm Zlavay. Ac ka gwaɗa Pawl, gege: «Malamaŋ taciya, ka səniya ndana hay deveŋ Zuwef hay ece ŋgə bakatar gaa, masa ec ke tərec ka ndah makəsparav hay. Amaa ac fakwanay aca wal ma majawa ta Muyiz mabay jaŋgata.

²¹Ndah ana hay, ac ka cəna ke ke bəzedec ma ta Zlavay kad Zuwef hay fakwanay masa deveŋ tərsam hay mekele, ke ke gweɗec aca ra gərda macəp ma majawa ta Muyiz va magərda meŋgəlecen ŋgwal te wudeh tec hay, ac ta cəp kwakwas te Zuwef hay sabay.

²²Anda da ŋgakwa sə, gwagumaw? Afa mehusek takaa fana nesey sə, ac ta cəna avəda tehwe.

²³Mambəla sə, ŋgə jə masa andaw ta gwaɗakaa nesey. Andaw ava ndah faɗ fana ɓa masa ac ka jawa mawulak yaŋ tec fəma ta Zlavay.

²⁴Pas masa ac ta ŋgə jə masa mawulak yaŋ tec ta wal maŋgiya kad Zlavay sə, mbala hukw cay. Ac ta ŋgə kwakwas ana kad Zlavay sə, afa aca ra tər ka ndah mapana fa yam te ndey ta Zlavay, ava dəɓa ana, ac ka həca yaŋ tec avəda. Mambəla sə, madaɗ eve eceŋ, ke de husemec jene hay ka ta ŋgə kwakwas ana ava səlay takaa. Ara nesey, ndana hay fakwanay ac ta səniya ma hay masa ac ta cəna da yaŋ kaa nesey sə, anjəkar maŋgal ma. Asaya, aca ra səna, kaa sə, ka nda manaha yaŋ kad pə ma majawa ta Muyiz ana may.

²⁵Kad makəsparav masa Zuwef hay bay sə, andaw ka ləmada ma ana cay, andə ke vindec leeter pa ha da yaŋ ma ana, andə ke gweɗeceŋ, “Ac ta ndə slaw ta kwakwas ta mbat hay bay, ac ta ndə bembez bay, ac ta ndə slaw te jene hay maməca ana bay, ac ta kəs vaw fa zana ana bay.”»

²⁶Tedew te pərek ana, Pawl ke dey vara ndah ana, ac ka ŋgə kwakwas kad Zlavay, afa aca ra tər ka ndah mapana fa yam te ndey ta Zlavay. Pawl va ndah faɗ sə, ec ke sehw pə Way ta kwakwas. Ec ke dey vara ndaakwas hay dərŋga, gege: «Magəra manah tasəla masa anda ra tər ka ndah mapana fa yam te ndey ta Zlavay. Daha andə ka tərata ka ndah mapana fa yam te ndey ta Zlav cay sə, anda re vehek ka ta və jene kad Zlavay.»

²⁷Mbala manah tasəla sə, e ndəvey, Zuwef hay mekele medek dapa vavara ta Azi ac ka wala Pawl dapa Way ta kwakwas. Ec ke heheɗecen dar ta ndana hay fakwanay dərŋga ka ta təhaz Pawl, ac ka təhazaw.

²⁸Ac ka cə lalaw, gege: «Isreyel hay, majənandaw! Mawala, nda mesesərekec ndana hay kwa da ma da ma ava ma mambəla ana aabay da yaŋ Isreyel hay va da yaŋ ma majawa ta Muyiz. Asaya, da yaŋ Way ta kwakwas sə, aŋga kana. Təlam nesey kwa Gərek hay sə, ke həlekec avəda kad pə Way ta kwakwas, afa aca ra zləɓa way ana avəda!»

²⁹Ece gweɗ ara nesey, afa ac ke welec Pawl va Tərawfim, nda Efez ana ɓa dapa berne te Zeruzelem. Aca wulakiya sə, Pawl ka sahwaɗ pə Way ta kwakwas ana.

³⁰Ma ana nesey ke husefec ndana hay fakwanay de Zeruzelem. Mafay ana, ec ke hwekey da gəva hay mekele mekele, ac ka kwasa vaw pə way ana. Ac ka təhaz Pawl, ec ke kəsek kad a vəda. Ac ka ɓəzla ma ta way hay ta Way ta kwakwas ana zef zef.

³¹Masa ac ta kəɗiya ka macəhwandaw sə, bay ta kafaraŋ hay ta Rawma ka cəna ndah de Zeruzelem fakwanay aca ɓəsl ma.

³²Faŋga faŋga ana ŋgesey, ec ke həlek kafaraŋ hay va kafaraŋ mazlakava hay da yaŋ kafaraŋ ana hay, ec ke hwekey kad vara miya makwasa. Masa ndana hay aca wala bay ta kafaraŋ hay va kafaraŋ ana hay dərziya sə, ac ka gərda makəɗ Pawl.

³³Ara nesey, bay ta kafaraŋ hay sə, ka ŋgucafa vaw Pawl, ka təhazaw, ke gweɗec kafaraŋ hay, gege: «Majawa ava jajarɓay hay ecew.» Bay ta kafaraŋ hay sə, ke nəkefec miya makwasa sə, gege: «Nesey ana sə, ndana wa? E ŋgekey ana sə, mey?»

³⁴Kwa waawa tec fakwanay aca gwaɗ ma ana hay wal wal. Bay ta kafaraŋ sə, ka cəna ma ana mambəla ana aabay, afa ndana hay aca ɓəsl ma elehey. Dapa ŋgesey ana, ke gweɗec kad kafaraŋ tata hay aca ra hwadaɗ Pawl pe bərew ta kafaraŋ hay.

³⁵Masa aca husa fe merey te metep pe bərew ana sə, kafaraŋ hay aca zəɓiya meezəɓey, afa baazlam ta miya da yaŋ Pawl ana.

³⁶Ndana hay mabay ec ke dey kad dar ana ava macə lalaw, gege: «Makəɗa avəda cukw cukw! Makəɗa avəda cukw cukw!»

³⁷Masa ac ka sahwaɗ Pawl pe bərew ta kafaraŋ ana hay cay sə, Pawl ka gwaɗa bay ta kafaraŋ ana hay, gege: «Ke viyey cəv ta magwaɗakaa may geyey?» Bay ta kafaraŋ hay sə, ka nəkafa, gege: «Ka sən ma te Gərek hay geyey?

³⁸Kaa sə, ka nda Misəra ana, meveɗecen dar ta ndana hay ka ta ŋgə gada dapa manah hay ana nesey sə, kaa biba? Naa mehwedekec ndana hay bakatar faɗ kad pə yaŋ ta səɓak ka ta nas ma majawa ta Rawma hay sə, kaa?»

³⁹Pawl ka vahan, gege: «Yey sə, ya nda Zuwef ana. Ye heyek da Tarsis dapa vavara te Selekiya, berne masa ndana hay te pefiyey mezeley. Mbahw, viyey cəvey, afa ye de gweɗec ndah nesey.»

⁴⁰Bay ta kafaraŋ hay sə, ka vana cəvey. Pawl deŋ! E zlecey fa slam te metep kad pə way ana, ka baŋgaɗ ha, afa ndana hay aca ra səna a wal megweɗey. Ndah ana fakwanay, ec ke njehec teete. Pawl ke gweɗec ava ma te Ibəre hay, gege: