Read Cuvok Mezlər ta Maslaŋ hay 22 Bible Online

Mezlər ta Maslaŋ hay 22 - Cuvok bible

Mezlər ta Maslaŋ hay 22

¹«Awa papaŋ va malamaŋ taaɗaw Zuwef hay, macak zləmay fa ma masa ya ta gwaɗakwar təlam nesey da yaŋ jə masa e ŋgə de vereyey.»

²Masa aca cəna Pawl e gweɗ ava ma te Ibəre hay sə, ec ke njehec teete mafəna ana saya, ac ka cəkafa zləmay. Pawl gege:

³«Yey sə, ya nda Zuwef ana, ye heyek da Tarsis dapa vavara te Selekiya. Amaa ye gel de Zeruzelem fana, ye ke jeŋgə da vara Gamaliyel, nda mesesərekiyey eve cəvey ana da yaŋ ma majawa ta papaŋ ta papaŋ tandakwa hay. Yey, ya nda maŋga mezlər kad Zlavay ava rav aɗaw fakwanay ara akwar ta pəsna na may.

⁴Ye ke ŋgedec marga mabay kad ndah macəpa cəv te Yesu, ye ke kəɗec ndah dərziya avəda cukw cukw. Ye ke təhezec mawulah va ŋgwazah avəda, ye ke kezleɗec pa daŋgay.

⁵Mazlakava ta ndaakwas hay va mesnendə hay te Zuwef hay fakwanay aca səniya ma masa ye gweɗ nesey sə, metehwe ana. Ec ke viyey leeter hay pa ha masa ec te vindecen kad malamaŋ tec Zuwef hay dapa berne ta Damas. Leeter ana ke viyey cəv te medə kad Damas ana ke te təhezek ndah macəpa cəv te Yesu, afa ye de jewekeceŋ, ye de hwedekec e Zeruzelem, mesnendə hay ece re təɗec ma a yaŋ, ece re ŋgedec marga.»

⁶«Ta yaŋ pas, ya dapa cəv te medə kad pe berne ta Damas. Masa mbala ya husa pe berne ana, faŋga faŋga ana, slam ke weɗek pay, da baymaləvaŋ kad yaŋ yey.

⁷Ya ka təɗata fa vara, ya ka cəna uway ɓa, e gweɗiyey, gege: “Sawl, Sawl, ke ŋgediyey hahar sə, mafay te mey?”

⁸Ya ka nəkaw: “Ka wa Bay Mazlakava aɗaw?” Ka vahawa, gege: “Yey, ye Yesu, nda Nezeret, masa ka wala fe ndey bay”.

⁹Ndah da cak taaɗaw hay sə, ac ka wala meweɗ ta slam ana, amaa ac ka cəna uway masa aŋga te gweɗiyey sə, aabay.

¹⁰Ya ka nəkafa: “Bay Mazlakava, naa ye de ŋgə sə, gwagumaw?” Ka vahawa, gege: “Zleftek, daɗ pe berne ta Damas. Dərŋga sə, ac ta ŋguzdakaɗ jene hay fakwanay masa Zlav ta yahaɗakaa ha, ka da ŋgiya”.

¹¹Meweɗ ta slam ana sə, ka həɗazlawa ndey avəda, ndah da cak taaɗaw sə, ec ke təreŋgiyey ava ha, ec ke hwedeɗiyey pe berne ta Damas ana.»

¹²«Dapa berne ana ŋgesey, ndana ɓa, mezel Ananiyas, a cəp cəv ta Zlavay ava rav amta, a cəp ma majawa ta Muyiz eve cəvey ana, Zuwef hay dapa berne ta Damas ana fakwanay aca hahəmiya mabay.

¹³Ke dekey, ke ŋgetefiyey, ke gweɗiyey, gege: “Sawl, malama, ndey takaa da wunaɗay”. Faŋga faŋga ana, ndey aɗaw sə, ka wunata, ya ka wala Ananiyas mambəla ana.

¹⁴Ananiyas ke gweɗiyey, gege: “Zlav masa papaŋ ta papaŋ tandakwa hay te kekəred kad aŋga zleezle sə, ka yahaɗakaa ha, afa ka da səna mezlər masa aŋga ta waya, ka da ŋganay. Ka yahaɗakaa ha, afa ka da wala Yesu nda maŋga mezlər eve cəvey ana eve ndey takaa. Asaya, afa ka da cəna uway tata,

¹⁵afa ka ta njah ka nda matana yaw da yaŋ nda ana, ke te bəzedec ma kad ndana hay fakwanay da yaŋ jə masa ka ta wala va jə masa ka ta cəna.

¹⁶Na təlam nesey sə, ke ɓel mey? Zleftek, kəs beetem, nəkafa Bay Mazlakava a da jənakaa, afa Zlav da pəlakaɗ mebər takaa.”»

¹⁷«Ava dəɓa ana, ye ke veh e Zeruzelem. Pas pal amta ɓa, ya cə mbahw dapa Way ta kwakwas sə, Zlav ke ŋguzediyey jene.

¹⁸Ya ka wala Bay Mazlakava, e gweɗiyey, gege: “Vas vaw, daɓa de Zeruzelem ana ke zef, afa ndah dapa berne ana nesey ac ta kəs ma masa ke te ŋguzdecen da yaŋ yey sə, aabay”.

¹⁹Ya ka vahan, gege: “Bay Mazlakava, eceŋ sə, aca səniya metehwe ana, ye ke dey pə Way ta macə mbahw te Zuwef hay mekele mekele, ye ke təhezek ndah makəsa ma takaa hay, ye ke kezleɗec pa daŋgay, ŋgeɗ hay, ye ke kəɗec avəda cukw cukw.

²⁰Etiyen, nda matana yaw da yaŋ ma takaa sə, pas masa ac ta kəɗiya ka macəhwandaw, yey ava yaŋ taaɗaw ana, ya faŋga. Masa aca kəɗiya ka macəhwandaw ana sə, ke wefiyey. Ye ke ɓəlefec fa rəkwat ta ndah makəɗiya ana hay”.

²¹Amaa ke gweɗiyey, gege: “Daɗay, ya zlardakaa dəreŋ kad vara ndah dapa vavara hay masa ece səniyey bay.”»

²²Ndah makwasa sə, ac ka cəkafa zləmay Pawl kasl pe memeɗ ta ma tata masa e gweɗ, gege: «Daɗay, ya zlardakaa dəreŋ vara ndah dapa vavara masa ece səniyey bay.» Amaa masa aca cəna ma ana sə, ac ka cə lalaw, gege: «Makəsaw, makəɗa avəda cukw cukw! Akwar ta gərda a da njah eve ndey bay!»

²³Ac ka cə lalaw ava gədaŋ, ec ke kwi rəkwat tec hay kad wudam, ec ke pek wuyak kad wudam.

²⁴Bay ta kafaraŋ hay sə, ke gweɗec kafaraŋ tata hay aca ra hwadaɗ Pawl pe bərew ta kafaraŋ hay. Aca ra kəlapa ava laway, afa e de ŋguzdek mawulak yaŋ ta ndah makwasa sə, aca cə lalaw kad yaŋ ana ara nesey sə, mafay te mey.

²⁵Masa aca jawiya ke te kəlepey sə, Pawl ka gwaɗa bay ta kafaraŋ hay masa da cak tata sə, gege: «Akwar eve cəv ta makəlap nda Rawma ana masa ma da yaŋ ana mavəna bay hel ɓa geyey?»

²⁶Masa mazlakava ta kafaraŋ hay a cəna ma ana nesey sə, ke dey kad vara bay ta kafaraŋ hay, ka nəkafa, gege: «Ka wal ma ta ŋgana nda ana sə, mey? Anjəkar aŋga nda Rawma ana!»

²⁷Bay ta kafaraŋ hay sə, ke dey vara Pawl, ka nəkafa, gege: «Ŋguzdawa, kaa sə, ka nda Rawma ana tehwe may geyey?» Pawl ka vahan, gege: «Aŋga.»

²⁸Bay ta kafaraŋ hay sə, ka gwaɗa, gege: «Yey, ye de tər ka nda Rawma ana nesey sə, ya ka və səlay mabay.» Pawl ka vahan, gege: «Amaa yey sə, ya nda Rawma ana per dəga dapa meheyə taaɗaw.»

²⁹A faŋga sə, ndah ma ta kəlapiya masa e de gweɗek ma tata sə, aca cəna aŋga nda Rawma ana, ac ka vahda vaw kad ava dəɓa ava dəɓa. Masa bay ta kafaraŋ ana hay a cəna Pawl aŋga nda Rawma ana sə, ka ŋgana zidaw mabay, afa masa aŋga ta jawiya ava jajarɓay[28].

³⁰Tedew te pərek ana, bay ta kafaraŋ hay sə, a wal a da səna eve metehwe ana, Zuwef hay aca cafa lalaw sə, mafay te mey. Ka pəla dapa jajarɓay va ke və cəv ta macam yaŋ ta mazlakava hay ta ndaakwas hay va ndah maca mamənak te Zuwef hay fakwanay. Ke kəsek Pawl, ka ta zlacaɗ fəma teceŋ.