Read Cuvok Mezlər ta Maslaŋ hay 23 Bible Online

Mezlər ta Maslaŋ hay 23 - Cuvok bible

Mezlər ta Maslaŋ hay 23

¹Pawl e njer ndey ŋgbazla kad fa ndah maca mamənak te Zuwef hay, ke gweɗec, gege: «Malama hay, yey sə, ya ka ŋgə mezlər ava mawulak yaŋ ta rav aɗaw mambəla ana kad Zlavay kasl pəsna, ye ke ŋgə mebər aabay.»

²Amaa mazlakava ta ndaakwas hay faŋga, mezel Ananiyas, ke gweɗec ndah mazlaca da cak ta Pawl, aca ra kəɗaw pa ma.

³Pawl ka gwaɗa, gege: «Zlav a ta kəɗ sesəker kaa, nda masa neneŋ dapa ma ecew ecew! Sesəker ka manjaha fana ke te təɗiyey ma a yaŋ ara ma majawa ta Muyiz te gweɗey, kaa ana maa ka cəp kwakwas ana aabay, ke vec cəv kad ndana hay ece re kəɗiyey!»

⁴Ndah da cak ta Pawl, ac ka gwaɗa, gege: «Ka laf mazlakava ta ndaakwas hay sə, gwagumaw?»

⁵Pawl ke vehecen, gege: «Malama hay, yey sə, ya sən masa nda nesey sə, aŋga mazlakava ta ndaakwas hay bay. Mavinda dapa Ɗelewer mavəna, gege: “Ke te gweɗ ma mambəla ana aabay da yaŋ bay ta ndah takaa bay.”»

⁶Pawl a səniya dapa macam yaŋ ana faŋga sə, gəva ta ndah leŋgeɗey ac Saaduki hay ɓa, dərziya hay ac Farisa hay. Ka cə lalaw dapa taɓa ta ndah maca mamənak, gege: «Malama hay, yey sə, ya nda Farisa ana, ya wut ta nda Farisa ana. Ece peɗiyey pa daŋgay sə, mafay ta mapə mawulak yaŋ ta maŋgat jene tandakwa va mepərek ta ndah dapa maməcay.»

⁷Masa e gweɗ ara nesey sə, ke bəzleŋgeɗecen rav ta Farisa hay va Saaduki hay, mafay ana, ac ka tə yaw dapa taɓa teceŋ. Ndah makwasa faŋga sə, ac ka vəna vaw gəva ecew.

⁸Saaduki hay aca wulakiya, gege: «Ndah maməca, ec te pərekek dapa maməc aabay, maskəla hay va mesfen hay aabay.» Amaa ta Farisa hay, aca kəsiya: «Jeŋ ana hay ŋgesey sə, fakwan ac ɓa metehwe ana.»

⁹Ndana hay fakwanay aca cə lalaw ava gədaŋ. Ndah mesesərekecen ma majawa kad ndana hay deveŋ Farisa hay, ec ke zleftek, ac ka pay ava gədaŋ, ec ke gweɗ, gege: «Andə ka ŋgat mebər vara nda nesey kwa kusetke aabay. Gəla maskəla ta Zlav da wudam te dekey ta gwaɗa, kwa daha aabay, gəla mesfeney.»

¹⁰Matə yaw ana nesey ke vərem ava gədaŋ. Bay ta kafaraŋ hay sə, ka ŋgə zidaw, ka wulakaw Zuwef ana hay, ac ta puwa Pawl avəda. Mafay ana, ke gweɗec kad kafaraŋ tata hay ece re dey kəsek Pawl ana avəda dapa taɓa ndah ana. Ac ka hwadaɗ Pawl ana pe bərew ta kafaraŋ ana hay.

¹¹Dapa vaɗ ana ŋgesey, Bay Mazlakava Yesu ka ŋguzdan vaw kad Pawl, ka gwaɗa, gege: «Ke te lel bay! Ara ka ta tə yaw da yaŋ yey de Zeruzelem nesey sə, a lada ke dey ka tə yaw da yaŋ yey dapa berne ta Rawma may.»

¹²Te pərek ana, Zuwef hay ac ka cama vaw, ac ka cacala ma tec pal amta. Ec ke mbeɗey, gege: «Andə ta ndə ɗaf aabay, andə ta sə yam aabay, say andə ta kəɗa Pawl avəda cukw cukw.»

¹³Ndah membeɗey ana sə, ece ŋgə 40.

¹⁴Ec ke dey kad vara bay hay ta ndaakwas hay va mesnendə te Zuwef hay, gege: «Andaw ke mbeɗey, andə ta ndə ɗaf aabay, andə ta sə yam aabay, say andaw ta kəɗa Pawl ana avəda cukw cukw.»

¹⁵Təlam nesey, akwar ava yaŋ takwar ana ava mawulak yaŋ ta ndah maca mamənak te Zuwef hay, magwaɗa bay ta kafaraŋ hay ana, e de hwedek Pawl ana kad fəma takwar, ara akwa wal mawuzaɗa ma tata ana mambəla ana. Taciya sə, anda ta jəɗiya pe cəvey ka ta kəɗiya, wagaa a da husaɗay.

¹⁶Masa ece gweɗey ana ŋgesey sə, wut ta dəmaŋ ta Pawl ana deveŋ eceŋ faŋga ɓa, ka cəna ma ana. Ke dey, ke sehw kad pe bərew ta kafaraŋ ana hay, ka gwaɗan ma ana kad Pawl.

¹⁷Pawl ke zelek nda amta deveŋ mazlakava hay da yaŋ kafaraŋ ana hay, ka gwaɗa, gege: «Hwadaɗ wat gawla nesey kad vara bay takwar, afa aŋga ava ma ta magwaɗa ɓa.»

¹⁸Mazlakava ta kafaraŋ hay sə, ka hwadaɗ wat gawla sə, vara bay teceŋ, ka gwaɗa, gege: «Pawl, nda dapa daŋgay sə, ke zeliyey, ke gweɗiyey, ye de hwedek wat gawla nesey kad varakaa, ma tata ɓa ta magwaɗakaa.»

¹⁹Bay ta kafaraŋ ana hay sə, ka gujahw wat ana ava zlalav, ka nəkafa, gege: «Ka wal megweɗiyey sə, mey?»

²⁰Wat sə, ka gwaɗa, gege: «Zuwef hay ac ka cacala ma tec pal amta, afa aca ra nəkafakaa tedew ka da hwadaɗ Pawl kad fəma ta ndah maca mamənak te Zuwef hay, afa aca wal mawuzaɗa ma ana mambəla ana.

²¹Amaa ka ta kəs ma ana bay, afa ndana hay a fəna 40, aca jəɗiya dapa cəvey. Ac fakwanay ac ke mbeɗey, ec ke gweɗ, gege: “Ac ta ndə ɗaf aabay, ac ta sə yam aabay, say ac ta kəɗa Pawl ana avəda cukw cukw”. Təlam nesey, ac maləmada mambəla ana cay. Aca ɓal nesey sə, mavah ma takaa.»

²²Ara nesey, bay ta kafaraŋ hay sə, a gwaɗa wat ana, gege: «Ma masa ka ta gwaɗafa nesey sə, ka ta ŋguzda kwa kad ndana bay.» Ava dəɓa ana, ka gwaɗa a da daɓa.

²³Ava dəɓa ana, bay ta kafaraŋ hay sə, ke zelekec mazlakava ta kafaraŋ hay ecew, gege: «Makwasa kafaraŋ hay 200 va kafaraŋ hay masa medə eve pəlez hay 70. Asaya, kafaraŋ hay masa ac ava zekw hay 200. Akwar fakwanay maləmada vaw, ke te də kad pe berne ta Sizarey fe ler cuɗ ta vaɗ.

²⁴Asaya, mayah pəlez kad Pawl, afa e de tep fətiya, akwar da hwadaɗ eve metehey kad vara gwevernel Filikis.»

²⁵Ke vində leeter, gege:

²⁶«Yey, Kəlawd Liziyas, bay ta kafaraŋ hay ta vindakaa leeter nesey pa ha, kad kaa, bay aɗaw mazlakava, gwevernel Filikis. Ya gwaɗafakaa.

²⁷Ya wal magwaɗakaa da yaŋ nda nesey. Zuwef hay ta təhaziya, aca wal makəɗiya ka macəhwandaw. Masa ya cəna aŋga nda Rawma ana sə, ye ke dey ava kafaraŋ aɗaw hay, ke te mbəlek avəda dapa ha teceŋ.

²⁸Ara masa ya ka kəs mawulak yaŋ ta masəna ma hay masa aca cafa lalaw fətiya, ya ka zlacaɗ fəma ta ndah maca mamənak te Zuwef hay.

²⁹Ya wala, aca cafa lalaw sə, da yaŋ ma ta kwakwas teceŋ. Aŋga ke ŋgə mebər masa təɗe te mekəɗ ka macəhwandaw, kwa te mekezl pa daŋgay sə, aabay.

³⁰Amaa ya cəna sə, Zuwef hay ac ka cacala ma teceŋ ka ta kəɗiya ka macəhwandaw. Ya zlərakaɗ zef zef nesey sə, mafay ana. Ye ke gweɗec ndah macafa lalaw sə, aca ra dey ka ta cafa lalaw ana varakaa. [Nesey ma aɗaw kad varakaa.»]

³¹Kafaraŋ hay, ec ke kəsek Pawl ara bay tec te gweɗeceŋ. Ac ka hwadaw ta vaɗ ana ŋgesey kad pe berne ta Aŋtipatəris.

³²Te pərek ana, kafaraŋ hay medə eve sek, ec ke vehek kad wunam, ec ke gərdec kafaraŋ hay medə eve pəlez hay aca ra hwad Pawl ana.

³³Aca husa pe berne ta Sizar. Ac ka van leeter ana kad gwevernel Filikis, Pawl may, ac ka gəraɗ pa ha tata.

³⁴Gwevernel sə, ka jaŋga leeter ana, ka nəkafa Pawl, gege: «Kaa sə, ka dapa vavara wula?» Pawl ka vahan, gege: «Yey sə, ya nda Selekiya ana.»

³⁵Dapa ŋgesey, gwevernel Filikis ka gwaɗa, gege: «Daha ndah macafakaa lalaw ec ke dekey sə, ya ta nəkafakaa da yaŋ ma ana.» Ka gwaɗa kafaraŋ hay aca ra ɓəzlaɗ pa way ta bay masa Herawt ta lamiya.