Read Cuvok Mezlər ta Maslaŋ hay 24 Bible Online

Mezlər ta Maslaŋ hay 24 - Cuvok bible

Mezlər ta Maslaŋ hay 24

¹Manah zlam ava dəɓa ana, Ananiyas, mazlakava ta ndaakwas hay, ke dey pe berne ta Sizar. Mazlakava hay te Zuwef hay mekele mekele va nda mezel Tertulus, nda masəna ma majawa ta Rawma hay[29], ec ke dey fa slam ana ava Ananiyas. Aca husa fəma te gwevernel Filikis, afa aca ra cafa lalaw Pawl.

²Ec ke zelek Pawl ana. Mehusek ta Pawl a cak teceŋ sə, Tertulus ka zlar maŋgəlafa ma, ka gwaɗa Filikis ana, gege: «Awa bay taciya mazlakava Filikis, andaw manjaha dapa meteh mambəla ana sə, mafay takaa. Ka ka ləmada vavara tandakwa, jene hay fakwanay e də mambəla ana kad ndana hay dapa, afa ka nda eve leŋgesl mambəla ana.

³Ndana hay fakwanay dapa vavara tandakwa aca kəs jə masa kaa Filikis ka ta ŋgiya fakwanay, mafay ana, anda ŋgakaa wasay.

⁴Amaa ya wal mayivakaa ava ma hay gaa bay. Mafay ana, ya ŋgakaa mbahw, mbahw cəkafandaw zləmay fa ma taciya mekusetke ana nesey, afa ka nda mambəla ana masəna metekwen fa nda.

⁵Anda wala nda nesey sə, e ŋgə bay, e veɗecen dar ta ndana hay ka ta ŋgə jene hay saw dapa taɓa te Zuwef hay vəla vəla dapa vavara fakwanay. Aŋga mazlakava ta ndah mayaha cəv ta maŋgal ma masa aca zaliya “Gəva te Nezeret hay”.

⁶Asaya, aŋga sə, a wal mazləɓ Way ta kwakwas. Mafay ana, andaw ke təhezekey. [Anda wal a lada anda da təɗana ma a yaŋ ara ma majawa te Zuwef hay te gweɗey,

⁷amaa Liziyas, bay ta kafaraŋ hay ke dekey, ka pərasla avəda dapa ha taciya ava gədaŋ.

⁸Liziyas ana, ke gweɗec ndah macafa lalaw ana, aca ra dekey kad fəma takaa nesey.] Daha ka nəkafa Pawl ana sə, ka səna avəda, anda cafa lalaw sə, da yaŋ ma metehwe ana.»

⁹Zuwef hay faŋga, gege: «Metehwe ana, ma masa Tertulus te gweɗ nesey sə, ara aŋga ana.»

¹⁰Gwevernel Filikis ka baŋgaɗ ha, ka vana cəv kad Pawl a da gwaɗ ma tata. Pawl gege: «Ya səniya, mavay gaa, mavəna ma hay da yaŋ ndah tandakwa nesey sə, kaa. Ara nesey, rav aɗaw e wesl mabay, afa ya da gwaɗ ma aɗaw fəma takaa.

¹¹Masa yey te dey kad Zeruzelem ke te kekəred kad Zlavay sə, ka fəna manah 12 aabay. Daha ka nək ma ana sə, ka ŋgata avəda ara nesey ana.

¹²Kwa ndana ke ŋgetefiyey masa andaw dapa matə yaw ava ndana dapa Way ta kwakwas sə, aabay. Asaya, ndana ke ŋgetefiyey masa ya dapa meheheɗecen dar ta ndana hay ka ta ŋgə baazlam dapa Way hay ta macə mbahw te Zuwef hay, kwa dapa berne sə, aabay.

¹³Eceŋ mecefiyey lalaw nesey sə, ndana deveŋ eceŋ mazlafa maŋguzdakaɗ ma ana nesey sə, ma metehwe ana sə, ɓa geyey?

¹⁴Amaa ya ŋguzdakaɗay, yey sə, ya dapa mekekəred kad Zlavay masa papaŋ ta papaŋ taciya hay zleezle te kekəred kad aŋga. Ye kekəred kad aŋga sə, jaka pa macəp cəv Bay Mazlakava Yesu. Eceŋ sə, ece gweɗ, gege: “Cəvey ana ŋgesey sə, cəv ta mafac ndana hay”. Amaa, yey sə, ya kəs ma masa majawa ta Muyiz fakwanay va ma mavinda dapa ɗelewer ta ndah mehwedek ma fakwanay ara aŋga ana may.»

¹⁵Yey, ya ka paɗ leŋgesl aɗaw sə, a yaŋ Zlavay, ya ka kəs ma masa e gweɗ, gege: «E te pərekec ndah mambəla ana va ndah mambəla ana aabay hay avəda dapa maməcay.» Kwa ndah mecefiyey lalaw nesey sə, aca pə leŋgesl fa ma ana may.

¹⁶Mafay ana, ye ŋgə mezlər ava rav aɗaw pal amta, afa cəɗem cəɗem, ya wal rav aɗaw a da njah mambəla ana fa yam te ndey ta Zlavay va fa yam te ndey ta ndana hay.

¹⁷«Ava dəɓa ta madaɓa taaɗaw dapa berne te Zeruzelem mavay gaa sə, ye ke veh kad pe berne ana saya, ya ka hwad səlay ta majən ndah maslamarga hay deveŋ tərsam aɗaw Zuwef hay ava mavə jene hay kad Zlavay.

¹⁸Ec ke ŋgetefiyey dapa Way ta kwakwas. Ya dapa meŋgə kwakwas ana, afa ye de tər ka nda mapana fa yam te ndey ta Zlavay. Dapa ŋgesey ana, ndana da cak taaɗaw aabay, ndana maŋgana baazlam aabay.

¹⁹Amaa Zuwef hay dapa vavara ta Azi faŋga ɓa. Sesəker gəla ac ava ma tec da yaŋ yey ɓa, aca zlafa mezlecey ke te jewiyey ava ma hay fəma takaa.

²⁰Daha aabay, nəkefec ndah fəma takaa nesey, ac da ŋguzdakaɗ ye kəɗekey ana sə, wa masa mak te metəhezey, ke te hwed fəma ta ndah maca mamənak te Zuwef hay.

²¹Eve metehwe ana, fəma ta ndah maca mamənak sə, ye ke zlecey, ye ke gweɗey: “Ya dapa maɓal pas masa Zlav e te pərekec ndana hay dapa maməcay”. Gəla ece cefiyey lalaw fəma takwar nesey sə, mafay ta ma ana kwa!»

²²Filikis sə, a sən ma da yaŋ cəv te Yesu mambəla ana. A gwam ka ŋgal ma ana pəsaŋga ana bay, gege: «Ya da ŋgəlakwaɗ ma takwar ana, say pas masa Liziyas, bay ta kafaraŋ hay sə, te dekey.» Ke gweɗec aca ra daɓa kad wunam.

²³Ka gwaɗa mazlakava ta kafaraŋ hay majəɗa Pawl aca ra vahaɗ Pawl ana pa daŋgay, amaa ac ta ŋgada marga bay, aca ra vana cəvey kad guula tata hay medek ka ta jəniya.

²⁴Manah kusetke ava dəɓa ana, Filikis, ec ke dek ava ŋgwaza Dərusil, dəm te Zuwef ana. Ac ka zlar ndana ece re zelek Pawl, afa a da cəna ma da yaŋ makəs ma te Yesu Kəristi.

²⁵Medek ta Pawl, ke gweɗec da yaŋ manjah masa a wafa kad Zlavay, manjah dapa mep leŋgesl fe meŋgə jene hay saw va masa Zlav e te təɗec ma yaŋ ndana hay fakwanay pas te mendəv ta vavara. Masa Pawl a bəzad ma ana ŋgesey sə, ka laləda Filikis mabay, ka gwaɗa Pawl, gege: «Təlam nesey, ka zlafa madaɓa, ma ana makiyey cay. Pas masa ya ka ta ŋgat ha sə, ya da zalakaa saya.»

²⁶Asaya, a wulakiya sə, Pawl a ta vana səlay pəse, mafay ana, ka zala Pawl dəɓa gaa ka ta kər maɗay ava aŋga.

²⁷Ava dəɓa ana mavay ecew, gwevernel mekele ɓa, ka njah pa slam te Filikis, mezel ta nda ana sə, Pawrkiyus Festus. Filikis sə, a gwam ka ta pəla Pawl dapa daŋgay ana bay, afa a wal Zuwef hay ece re wesl da yaŋ ana.