Read Cuvok Mezlər ta Maslaŋ hay 25 Bible Online

Mezlər ta Maslaŋ hay 25 - Cuvok bible

Mezlər ta Maslaŋ hay 25

¹Manah mahkar ava dəɓa te mehusek pa vavara ta bay tata, Pawrkiyus Festus ke zleftek dapa berne ta Sizar, ke dey e Zeruzelem.

²De Zeruzelem, bay hay ta ndaakwas hay va mesnendə hay te Zuwef hay ece dek kad vara vaw, ac ka cafa lalaw Pawl saya. Ac ka ŋgana mbahw kad Festus,

³ac ka nəkafa, e de vec cəvey, ece re vehecen Pawl kad Zeruzelem. Aca nəkafa sə, afa ac ka cacala ma teceŋ, aca ra kəɗa Pawl avəda cukw cukw dapa cəvey.

⁴Amaa Festus ke vehecen, gege: «Pawl aŋga dapa daŋgay dapa berne ta Sizar. Kwa ye te veh kad arŋga dapa manah hay ana nesey,

⁵mambəla sə, anda dey fa slam ana ava mazlakava takwar hay pe berne ta Sizarey ana. Daha nda ana ke ŋgə jene mambəla ana aabay, ac da cafa lalaw dərŋga.»

⁶Festus ke njehek eve eceŋ de Zeruzelem ana, ke ŋgə manah cahkar daha aabay manah kuraw war. Ka vahata kad pe berne ta Sizar. Te pərek ana, ke dey, ka njah fa gwadadakw ta bay tata dapa slam ta mavən ma hay, ke və cəvey, ece re pəlek Pawl kad vara vaw.

⁷Mehusek tata sə, Zuwef hay medek de Zeruzelem ac ka tulaka, ac ka cafa lalaw ava maŋgəlafa ma hay mandalndal ana ta matəɗana ma yaŋ. Amaa ac ka zlafa mapana ma da yaŋ ana tehwe sə, aabay.

⁸Pawl ka gwaɗ ma tata, gege: «Ya ka ŋgə mebər da yaŋ ma majawa te Zuwef hay aabay, ya ka zləɓ Way ta kwakwas aabay. Kwa fa yam te ndey te gwevernel ta Rawma sə, ya ka ŋgə mebər aabay.»

⁹Yaw, Festus a wal mewesldec Zuwef hay. Dapa ŋgesey ana, ka nəkafa Pawl, gege: «Ka kəs medey e Zeruzelem ana geyey? Dərŋga sə, ac ta vənakaɗ ma takaa fəma taaɗaw da yaŋ ma masa ac ta cafaka lalaw mafay ana nesey.»

¹⁰Pawl ka vahan, gege: «Təlam nesey, ya mazlaca dapa slam ta mavən ma te gwevernel ta Rawma. Daha anjəkar mavən ma aɗaw ana e te ŋgə eve cəvey ana sə, mambəla de ŋgə fana bəna, ye ke ŋgə mebər vara Zuwef hay aabay. Kaa ava yaŋ takaa ana, ka səniya mambəla ana.

¹¹Daha ye ke ŋgə mebər ɓa mak te mekəɗ ka macəhwandaw sə, ŋgesey, mekəɗiyey fana, ya kəs maməcay ana. Amaa, ac masa mecefiyey lalaw nesey sə, aca ŋgal ma. Mafay ana, ndana mazlafa ma te peɗiyey pa ha tec aabay. Yey sə, ya ka nək cəv ta mavən ma aɗaw ana de ŋgə vara gwevernel ta Rawma.»

¹²Festus ka cə mamənak ava ndah maca mamənak tata hay. Ava dəɓa ana, ka gwaɗa Pawl, gege: «Ka ka nək cəv te medey fəma te gwevernel ta Rawma. Ara nesey, ya vakaa cəvey, ka da də fəma te gwevernel ana.»

¹³Manah kusetke ava dəɓa ana, Bay Agəripa ava dəmaŋ Berenis, ec ke dey pe berne ta Sizarey ka ta gwaɗafa Bay Festus.

¹⁴Ac ka nah gaa dapa berne ana. Dapa ŋgesey ana, Festus ka gwaɗan ma da yaŋ Pawl sə, kad Bay Agəripa, gege: «Ndana ɓa fana, aŋga dapa daŋgay dəga vara Bay Filikis.

¹⁵Masa yey de Zeruzelem sə, bay hay ta ndaakwas hay va mesnendə hay te Zuwef hay, ac ka cafa lalaw vereyey, ac ka nək cəv ta majaw yaŋ tata ke te kəɗ ka macəhwandaw.

¹⁶Amaa ye ke gweɗeceŋ, kwakwas ta Rawma hay e gweɗ sə, Rawma hay ac ta və nda masa ndana hay ta cafa lalaw ke te kəɗ ka macəhwandaw saw bay. A lada nda masa ac ta cafa lalaw sə, e dey, e zlec fəma ta ndah macafa lalaw ana, a cəna ma tec avəda ɗagay. Ava dəɓa ana, a gwaɗ ma tata.

¹⁷Andə ke dek fana eve Zuwef ana hay. Medek taaɗaw sə, ya ka njah gaa aabay heley, tedew te pərek ana, ye ke dey pa slam ta mavən ma hay, ye ke və cəvey, ke te pəlek nda ana kad vereyey.

¹⁸Ndah macafa lalaw ana, ec ke dekey. Ya ka wulakaw, gəla aca cafa lalaw da yaŋ aŋga te ŋgek jene mambəla ana aabay ɓa. Amaa, anjəkar ara na bay.

¹⁹Say aca tə yaw da yaŋ kwakwas teceŋ va da yaŋ ndana ɓa, mezel Yesu. Nda ana ka məcata cay, amaa Pawl gege: “Ka pərakata dapa maməcay, aŋga eve ndey”.

²⁰Ya sən ma ta ŋgal ma ana na bay. Mafay ana, ya ka nəkafa Pawl, ka kəs medey e Zeruzelem, aca ra ta ŋgəlakaɗ ma takaa ana dərŋga geyey?»

²¹Amaa Pawl ana, gege: «A wal da njah dapa daŋgay ɗagay, a ɓal matəɗ ma tata vara gwevernel. Ara nesey, ye ke gweɗec aca ra pafa ndey ɗagay, ya da zləraɗ kad vara gwevernel ana.»

²²Bay Agəripa ka gwaɗa bay Festus, gege: «Ya wal, macəna ma ta nda ana may.» Festus ka vahan, gege: «Tedew sə, ka ta cəna ma tata ana avəda pəse.»

²³Tedew te pərek ana, Bay Agəripa va Berenis ec ke dey ava ndah tata hay, ndana hay ec ke hehəlecen yaŋ. Ec ke sehw pa way ta mavən ma hay ava mazlakava ta kafaraŋ hay va mazlakava hay masa dapa berne ana. Festus ke vec cəvey, ece re kəsek Pawl. Ec ke kəsek Pawl ana.

²⁴Festus gege: «Awa, Bay mazlakava Agəripa va ndana hay fakwanay masa fana, mawala nda nesey. Zuwef hay fakwanay ac ka cafa lalaw de Zeruzelem va vereyey fana. Macə lalaw teceŋ sə, aca wal makəɗiya ka macəhwandaw bəna, a da njah eve ndey sabay.

²⁵Amaa taaɗaw sə, ya ka ŋgat mebər vara vaw masa mak ta makəɗiya ka macəhwandaw sə, aabay. Yaw, afa aŋga ava yaŋ tata ana, ka nək cəvey, a wal Bay mazlakava ta Rawma a da ŋgəlan ma tata ana, ya ka wulakaw, mambəla sə, ya zləraɗ kad arŋga vara vaw.

²⁶Amaa ya sən ma masa ya ta vindana kad Bay mazlakava ta Rawma da yaŋ ma ana na bay. Ara nesey, ye ke hwedek fəma takwar. Mahwalhwala ana sə, fəma takaa ɗagay, kaa, Bay Agəripa. Nəkafa, afa ya da səna jə masa ya ta vindiya da yaŋ ana, kad Bay mazlakava ta Rawma.

²⁷Dapa mawulak yaŋ aɗaw sə, mazlar ndana dapa daŋgay kad vara Bay mazlakava ta Rawma a da ŋgəlan ma tata, amaa ya ka ŋguzdan ma masa ac ta cafa lalaw mafay ana aabay sə, ŋgesey, e cen bay.»