Read Cuvok Mezlər ta Maslaŋ hay 26 Bible Online

Mezlər ta Maslaŋ hay 26 - Cuvok bible

Mezlər ta Maslaŋ hay 26

¹Bay Agəripa ka gwaɗa Pawl, gege: «Ya vakaa cəvey ka ta mbəɗ ma takaa.» Pawl ka baŋgaɗa ha tata, ka zlar mamɓəɗ ma tata, gege:

²«Awa Bay Agəripa, ta pəsna, ye eve meweslə gaa ta mambəɗakaɗ ma aɗaw kad kaa, da yaŋ ma hay masa malama hay Zuwef hay fakwanay te cefiyey lalaw,

³afa kaa sə, ka sən ma da yaŋ ma majawa te Zuwef hay va baazlam teceŋ ana mambəla ana. Mafay ana, ya kəɗakaa ha, mbahw cəkefiyey zləmay eve mepəsek.»

⁴«Yaw, Zuwef hay fakwanay aca sən ma da yaŋ manjah taaɗaw dəga dapa wat kasl pəsna. Asaya, aca sən manjah taaɗaw deveŋ ndah aɗaw hay va manjah taaɗaw de Zeruzelem.

⁵Zuwef ana hay, ece səniyey dəga zleezle. Daha aca waya sə, aca zlafa matə yaw da yaŋ yey. Aca səniya dapa manjah taaɗaw sə, ya ka cəp ma majawa ta Muyiz ava gədaŋ taaɗaw fakwanay, afa ya nda Farisa ana. Farisa hay sə, Zuwef hay masa macəpa ma majawa ta Muyiz ava gədaŋ tec fakwanay, ka fəna ndah mekele.

⁶Təlam nesey, ece təɗiyey ma a yaŋ sə, afa ye te pə leŋgesl fe jə masa Zlav te gweɗec kad papaŋ ta papaŋ taciya hay zleezle e te ŋgeceney.

⁷Jə masa Zlav e gweɗec e te ŋgeceney ana sə, tərsam taciya hay kuraw dapa yaŋ ana ecew ece pə leŋgesl fətiya, aca wal aca ra wala. Mafay ana, hwavavaɗ, hwapapas, aca kəɗana ha kad Zlavay. Awa Bay aɗaw, Zuwef hay ece cefiyey lalaw sə, mafay ana.

⁸Akwar Zuwef hay, akwa wal makəs ma masa Zlav e te pərekek ndana hay avəda dapa maməc bay sə, mafay te mey?»

⁹«Zleezle, yey ava yaŋ taaɗaw ana, ya ka wulakaw, mambəla sə, ya yah wewer hay mekele mekele ka ta nas mezel te Yesu, nda Nezeret.

¹⁰Nesey, jə masa ya ta ŋgiya de Zeruzelem. Bay hay ta ndaakwas hay ke viyey cəvey ke te təhezekec makəsparav hay, ye de kezleɗec pa daŋgay. Dapa masa ece təɗec ma a yaŋ ke te kəɗec ka macəhwandaw sə, ma ana ke wefiyey mabay.

¹¹Cəɗem cəɗem, ye dey ke te ŋgedec marga dapa Way ta macə mbahw te Zuwef hay fakwanay. Ye ke tetəkec ndana hay aca ra laf mezel te Yesu. Rav ke heciyey da yaŋ eceŋ macəkuma bay. Dapa ŋgesey ana, ye ke dey ke te yehekec kwa dapa vavara ta ndah masa Zuwef hay bay, ye ŋgedec marga dərŋga.»

¹²«Ara nesey, pas leŋgeɗ ɓa, yey ke dey a Damas. Bay hay ta ndaakwas hay te zlerdeyey eve leeter ta mavə cəvey te metəhezekec makəsparav hay.

¹³Yaw, Bay Agəripa, ta yaŋ pas, ye dey dapa cəvey, ya ta wala slam ke weɗefiyey da baymaləvaŋ pay! Meweɗey ana, ka fəna meweɗ ta pas. Meweɗey ana ke weɗey da yaŋ yey va ndah da cak taaɗaw.

¹⁴Andaw fakwanay, andə ka təɗata fa vara. Yey sə, ya ka cəna uway ta ndana e gweɗiyey ava ma ta Ibəre hay, gege: “Sawl, Sawl, ke ŋgediyey marga ara nesey sə, mafay te mey? Ka gal yaŋ takaa ara zla ta zlar gada ta nda maɓəciya taambəla”.

¹⁵Ya ka nəkafa: “Bay Mazlakava, kaa ana sə, ka wa?” Ka vahawa, gege: “Yey sə, ye Yesu masa ka ŋgada marga.

¹⁶Amaa zleftek, zlec meezlecey. Ya ŋguzdakaɗ vaw nesey sə, afa ya ka yahaɗakaa ha ka da njah ka nda maŋga mezlərey aɗaw. Ka ta tə yaw da yaŋ yey, ke te gweɗec kad ndana hay da yaŋ masa ke te weleyey ta pəsna nesey. Asaya, ke te ŋguzdecen jə masa ya ta ŋguzdakaɗay.

¹⁷Ya zlardakaa vara Zuwef hay va ndah masa Zuwef hay bay. Kwa daha ac ka ŋgakaa jene masa e teh bay, ya ta mbəlakaa avəda dapa ha teceŋ.

¹⁸Ya zlardakaa sə, afa ke de wunecen ndey teceŋ va mehəlekec avəda dapa ləvaŋ kad pa slam mawaɗa. Ke de həlekec avəda dapa ha ta Saadan kad vara Zlavay, afa aca ra ŋgat mapəl mebər teceŋ va maŋgat macam meven ta ma te jene hay masa ya ta viya kad ndah ta Zlavay jaka pa makəsparav teceŋ kad vereyey.”»

¹⁹«Awa Bay Agəripa, e zler dəga ta pas masa Bay Mazlakava ta ŋguzdawa vaw da baymaləvaŋ ŋgesey sə, ya ka pə leŋgesl fətiya, ya ka ŋgə jeŋ ana ara masa aŋga ta ŋguzdawa.

²⁰Ara nesey, ya ka zlar mabəzad ma tata macaaca ana kad ndah dapa berne ta Damas, ava dəɓa ana, ye ke bəzedecen ma ana kad ndah de Zeruzelem, kad ndah de Zudey fakwanay va ndah masa Zuwef hay bay dapa tərsam hay mekele mekele saya. Ye ke gweɗeceŋ: “Say akwa ŋgwada rav takwar, maŋgwadafa ma Zlavay, mayahaw ava rav takwar pal amta, meŋgə mezlər mambəla ana fəma ta Zlavay masa a da ŋguzdakakwar akwar ka ŋgwada rav takwar cay”.

²¹Mafay ana, ec ke təhezekiyey dapa Way ta kwakwas, ac ka wal mekəɗiyey avəda cukw cukw.

²²Amaa kasl pəsna Zlav ke jəniyey. Mafay ana, ta pəsna ya mazlaca fəma takwar, ya bəzad ma ta Zlavay fəma ta ndana hay fakwanay, kwa kad mazlakava hay, kwa kad ndah wula wula fakwanay. Ya bəzad sə, say ma ta Muyiz va ta ndah mehwedek ma masa ec ke gweɗ da yaŋ jə masa e te ŋgey. Ec ke gweɗ, gege:

²³“Kəristi, a ta sə marga. Aŋga sə, nda macaaca ana deveŋ ndah me te pərekek dapa maməcay. Mafay te mepərek tata dapa maməcay ana ŋgesey, e te sləfecen meweɗ ta Zlavay kad Zuwef hay va ndah masa Zuwef hay bay fakwanay.”»

²⁴Dapa masa Pawl a mbaɗ ma tata ara nesey sə, Bay Festus ka payafa Pawl ava gədaŋ, gege: «Pawl, ka marəzla, mesen jene takaa eleh ŋgesey sə, ka rəzlakaa avəda.»

²⁵Pawl ka vahan ma ana, gege: «Away! Bay mazlakava Festus, leŋgesl aɗaw ke nes aabay. Ma masa ye te gweɗek nesey sə, ma masa saw bay, amaa ma metehwe ana.

²⁶Bay Agəripa sə, a sən ma ana. Mafay ana, ya zlafa magwaɗa ava zidaw dapa vaw aabay, afa ya wulakiya, a sən ma da yaŋ jeŋ ana hay fakwanay, afa jeŋ ana hay maraɓa fa yam te ndey ta ndana hay fakwan aabay.

²⁷Awa Bay Agəripa, ka kəs ma ta ndah mehwedek ma pe leŋgesl takaa geyey? Yey sə, ya səniya, kaa sə, ka ta kəs ma ana.»

²⁸Agəripa ka vahan, gege: «Ka wulakiya sə, ka wal metəriyey ka nda kəretiyeŋ ana təlam təlam na war geyey?»

²⁹Pawl ka vahan, gege: «Ya cə mbahw kad Zlavay, afa kwa təlam nesey, kwa kad fəma sə, kaa va ndah macəna ma ana pəsna na fakwanay sə, akwa ra njah ara yey, amaa ac ta jawakwar ava jajarɓay ara yey na aabay.»

³⁰Ava dəɓa ana, Bay Agəripa, gwevernel Festus, Berenis va ndana hay fakwanay da cak teceŋ, ec ke zleftek, ac ka data.

³¹Masa aca ŋgəla vaw kusetke ava zlalav sə, aca sasak ma dapa taɓa teceŋ, gege: «Nda nesey sə, ke ŋgə mebər masa təɗe te mekəɗ ka macəhwandaw va mekezl pa daŋgay sə, aabay.»

³²Ava dəɓa ana, Agəripa ka gwaɗa Festus, gege: «Anda zlafakwaɗ mapəla nda ana nesey, amaa e ŋgə sabay, afa ka nək cəv te medey kad vara gwevernel ta Rawma hay.»