Read Cuvok Mezlər ta Maslaŋ hay 27 Bible Online

Mezlər ta Maslaŋ hay 27 - Cuvok bible

Mezlər ta Maslaŋ hay 27

¹«Masa ac ka cana mamənak [30]ta madə taciya ava kaslkaslah kad pa vavara ta Itali sə, ec ke peɗec Pawl va ndah ta daŋgay dərziya pa ha ta nda mezel Zawliyus, mazlakava ta kafaraŋ ta Rawma hay. Nda ana aŋga deveŋ kafaraŋ hay masa ece zelec: “Gəva ta kafaraŋ hay te mezlər ta Bay Agustus”.

²Andə ke tep pa kaslkaslah te medek dapa berne ta Adəramit kad pa slam te mebəreŋgey da ma ta yam mafayakfayak ana ta vavara ta Azi. Andə ke dey. Andaw ava ndana ɓa mezel Aristarkus, nda Masiduwan ana dapa berne ta Tisalawnik.

³Tedew te pərek ana, anda husa pe berne ta Sidaŋw. Zawliyus ka ŋgafa metekwen Pawl, ka vana cəv Pawl ana e de bəreŋgey kad fa vara, e dey kad pa wunam ana ke te wuzeɗek guula tata hay, afa aca ra jəna.

⁴Ava dəɓa ana, andə ke tep pa kaslkaslah ana saya. Anda zlafa mezleŋ yam ana derre bay, afa bərgadaŋ e ŋgek kad yaŋ andaw. Andə ke dey jaka cak ta vavara ɓa dapa taɓa ta yam mafayakfayak ana, mezel Kipərus, masa bərgadaŋ e ŋgə eleh aabay.

⁵Anda zlaŋ yam mafayakfayak ana zef kad gəva ta vavara te Selekiya va vavara ta Pamfili, andə ka husa a Mira dapa vavara te Lesi.

⁶Faŋga, mazlakava ta kafaraŋ hay sə, ka ŋgat kaslkaslah mekele. Ka yahandaw kaslkaslah te medek dapa berne ta Alekzandərey ka də pa vavara ta Itali. Ka tapaɗandaw pa kaslkaslah ana.»

⁷Manah gaa anda dey neke neke. Anda husa pe berne te Kenit sə, bərgadaŋ ka ŋgadandaw hahar mabay, afa bərgadaŋ ana e bebər elehey, a vahdandaw kad ava dəɓa ava dəɓa. Mafay ana, anda cak vaw jaka pa slam ɓa, mezel Salmawney dapa taɓa ta yam mafayakfayak ana, anda da husa a gəva leŋgeɗey ta vavara ɓa, mezel Kəret dapa taɓa ta yam ana, gəva masa bərgadaŋ e ŋgə eleh aabay.

⁸Anda də ava gədaŋ dapa jaka ma ta yam ana. Andə ka husa pa vavara te Kəret, mezel «Slam te Mebəreŋgə Mambəla ana» zef eve berne te Lezey.

⁹Dapa medə taciya ana sə, andaw ka njah manah gaa. Dapa ŋgesey ana, pas te meŋgə dalyama te Zuwef hay mafay ta mapal mebərey sə, ka data ava dəɓa cay. Ara megweɗey, viya mbala cay, maŋgway ava kaslkaslah e ŋgə sabay. Mafay ana, Pawl e gweɗ, gege:

¹⁰«Awa guula aɗaw hay, ya wala sə, maŋgway tandakwa nesey sə, a ta ŋgadandakwa hahar mabay. Kaslkaslah eve jene hay dapa ec te ndermeɗec pa yam, ec te zeceŋ. Ma ta zə jene hay babəla bay, amaa kwa andakwa ava yaŋ tandakwa ana fakwanay.»

¹¹Mazlakava ta kafaraŋ hay sə, ka cənan ma ta Pawl aabay, amaa a cən sə, ma tec nda mazlərɗa kaslkaslah ana va nda ta kaslkaslah ana.

¹²Slam te mebəreŋgə faŋga ana sə, e teh ke zlec kaslkaslah ta viya bay. Dapa ŋgesey ana, hamazlakava ta miya aca wal madaɓa. Daha e ŋgefeceŋ sə, aca wal mahusa pa slam te mebəreŋgey dapa berne te Fenikis, afa aca ra njah faŋga ta viya ana ŋgesey. Wunam mazlakava te Fenikis ana sə, aŋga dapa vavara te Kəret dapa taɓa ta yam mafayakfayak ana. Slam te mebəreŋgə de Fenikis ana sə, aŋga jaka luwa ta hwahwaɓay ta ha ta gula ta nda mapana ndey kad ma ta wudam va jaka luwa ta ha ta zam ta nda mapana ndey kad a gəva ta bəlam.

¹³Ava dəɓa ana, bərgadaŋ jaka gəva ta hwahwaɓay e ŋgek neke neke. Aca wulakiya sə, aca ŋgat cəv ta mahusa e Fenesi ara masa ac ta waya. Mafay ana, ac ka saɗa ɓəray madazldazlazlə ana ta mazlac kaslkaslah ana avəda, ac ka paɗ pa. Ec ke dey jaka ma ta yam ta luwa ta vavara te Kəret.

¹⁴Ava dəɓa ana kusetke, bərgadaŋ mazlakava ana, mezel «Sakatay» ke ŋgek jaka pa wudam dapa vavara te Kəret.

¹⁵Bərgadaŋ ana ka fəna kaslkaslah sə, ava gədaŋ. Anda zlafa mahwad kaslkaslah ana, derre sabay. Andə ka pəlan ma ta bərgadaŋ ana da hwadandaw kad rav ta zazay.

¹⁶Ava dəɓa ana, andə ke dey jaka cak ta vavara kusetke mekele dapa taɓa ta yam mafayakfayak ana, mezel Kawda. Vavara ana ka rafandaw bərgadaŋ kusetke. Dapa masa kaslkaslah ana e də da yaŋ yam sə, andə ke beŋgeɗek kaslkaslah wuje[31] avəda dapa yam ana kad pa kaslkaslah mazlakava, afa kaslkaslah ana a ta ndərmaɗata pa yam. Amaa anda beŋgeɗek ava gədaŋ dapa, afa bərgadaŋ e ŋgə elehey.

¹⁷Masa ndah mazlarɗa kaslkaslah ana ac ka paɗ kaslkaslah wuje pa kaslkaslah mazlakava cay sə, ac ka təkaɗaɗ ɗuweŋ ana hay fa kaslkaslah mazlakava, afa kaslkaslah ana a ta ŋgwahakata. Ac ka kuyafa jene hay dapa kaslkaslah ana kad pa yam mafayakfayak ana, afa a da kəɗafa gədaŋ ta mahway kad rav ta zazay jaka luwa ta vavara te Lebi. Aca ŋgə zidaw sə, afa daha kaslkaslah ana ka ta husata a rav ta zazay sə, a ta ndərmaɗata pa wurɓaɓay. Ava dəɓa ana, ac ka gərda kaslkaslah ana, memeɗ da hwadaw kad pa taɓa ta yam.

¹⁸Memeɗ ana ke ŋgə ava gədaŋ jaŋgata. Ara nesey, tedew ana ac ka zlar mekwidec jə te fəlew tec hay dapa kaslkaslah ana kad pa yam.

¹⁹Badamta te pərek ana, bərgadaŋ sə, ke ŋgey jaŋgata. Jə mandalndal ana hay fakwan fa kaslkaslah ana sə, ndah mazlərɗiya ec ke cəkwec avəda, ec ke kuyeɗec pa yam ava ha teceŋ.

²⁰Manah gaa andə ka wala pas fe ndey aabay, kwa menjewzle hay andə ke welec aabay, afa bərgadaŋ ana ɓek ɓek. Bərgadaŋ ana ke ŋgə ava gədaŋ, andə ka zalda marava eve megweɗ andə te mbəl ɓasabay.

²¹Manah gaa, ndah dapa kaslkaslah ana, ac ka ndə jene aabay. Pawl ke zlec fəma tec fakwanay, ke gweɗ, gege: «Awa guula aɗaw hay, efes daha akwar ka cənawa ma aɗaw sə, me ke zleftek dapa vavara te Kəret ana aabay. Daha efes akwar ka cənawa ma aɗaw sə, jə tandakwa hay nesey ece nes aabay, aca zə aabay.

²²Amaa təlam nesey, ya gwaɗakwar, matəhaza rav, kwa nda amta deveŋ andakwa a ta zə aabay, say ma ta zə kaslkaslah.

²³Tefes ta vaɗ nesey, Zlav nda meyeheɗiyey ha, nda masa ye kekəred kad aŋga, ke zlərek maskəla tata da wudam kad vereyey.

²⁴Ke gweɗiyey, gege: “Pawl, ke te lel bay, eve metehwe ana, say ka ta husata fəma te gwevernel ta Rawma a da ŋgəlakan ma takaa ana. Zlav e te mbəlec ndana hay avəda fakwanay dapa kaslkaslah ana nesey, ac ta zə aabay mafay ta mambəla ana tata da yaŋ kaa”.

²⁵Mafay ana, guula aɗaw hay, akwar ta ŋgə zidaw bay, afa ya səniya eve metehwe ana, Zlav megweɗiyey nesey sə, a ta ŋgana jeŋ ana avəda ara masa aŋga te gweɗiyey.

²⁶Amaa cama kaslkaslah ana a zlacata da yaŋ wurɓaɓay dapa taɓa ta yam ana ɗagay.»

²⁷Manah makuraw dapa yaŋ ana faɗ ana, bərgadaŋ ka hwadandaw kad pa yam mafayakfayak ana mezel Adəriyatik[32]. Ta yaŋ ta vaɗ ana ŋgesey, ndah mazlərɗa kaslkaslah ana, ac ka wulakaw, ac ta husata zef a ma ta yam ana.

²⁸Ec ke pəlek ɗuweŋ va ɓəray ta majaw kaslkaslah ana ka ta lavə yam. Aca ŋgat yam ana mazləla kweleleŋleŋ, e ŋgə meeter kwakwar mahkar dapa yaŋ ana tasəla. Ec ke dey kad fəma kusetke saya, aca ŋgat yam ana e ŋgə meeter kwakwar ecew dapa yaŋ ana cahkar.

²⁹Ec ke leley afa bərgadaŋ a ta hwadaɗ kaslkaslah ana kad yaŋ gwadakwam hay. Mafay ana, ec ke kezleɗec ɓəray hay mandalndal ana faɗ ta mazlac kaslkaslah kad ava dəɓa ta kaslkaslah ana. Aca ɓal slam de təvey, amaa slam ana ke təvefec zef aabay.

³⁰Ndah mazlərɗa kaslkaslah ana, aca wal medekec kad a vəda, aca ra mbəlaɓa. Mafay ana, ec ke bəreŋgek kaslkaslah wuje da hwaɗ ta kaslkaslah mazlakava sə, kad yaŋ yam ana. Aca ŋgiya ara ac ta zlacaɗ ava ɓəray mandalndal ana ta madar kaslkaslah mazlakava jaka fəma.

³¹Amaa Pawl ke gweɗec kad kafaraŋ hay va mazlakava teceŋ, gege: «Daha ndah mazlərɗa kaslkaslah ana ac dapa ɓasabay sə, akwa zlafa membəl da yaŋ yam ana aabay.»

³²Kafaraŋ ana hay ac ka gəla ɗuweŋ ta matəhaz kaslkaslah wuje fa kaslkaslah mazlakava sə, avəda, ac ka gərda da yaŋ yam ana da daɗay.

³³Mbala slam pərek sə, Pawl ka zal ndana hay fakwanay aca ra ndaɓa ɗaf, gege: «Akwar ka ɓəs marga hay dapa manah kuraw dapa yaŋ ana faɗ, kwa akwar ka ndə jene aabay.

³⁴A lada anda ndakwa jene ta manday a da vandakwa gədaŋ te membəley. Masəna mambəla ana, kwa ŋgwec fə yaŋ ta nda amta a ta zə aabay.»

³⁵Dapa masa e gweɗek ara nesey sə, ka kəs peŋ, ka ŋgana wasay Zlavay fəma tec fakwanay, ka pəɗaka, ka ndaw.

³⁶Mafay ana, ac fakwanay ac ka ŋgat gədaŋ, ac ka ndə peŋ ana.

³⁷Andaw dapa kaslkaslah ana fakwanay, anda ŋgə temere ecew va kwakwar tasəla dapa yaŋ ana makwa.

³⁸Ava dəɓa ta masa ac mban cay sə, ac ka kazlaɗ bəley kad pa yam ana, afa a da həlafa gədaŋ te jene hay dapa kaslkaslah ana.

³⁹Metev ta slam pərek, ndah mazlərɗa kaslkaslah sə, aca sən slam masa ac fana sə, bay, amaa ac ta wala slam ɓa da ma ta yam ana, wurɓaɓay dapa mambəla ana ta mazlac kaslkaslah. Daha efes e ŋgefeceŋ sə, aca wal mahwadaɗ kaslkaslah ana faŋga, aca ra gərda faŋga ana.

⁴⁰Mafay ana, ac ka pəla ɗuweŋ ta majaw ɓəray mandalndal ana hay faɗ sə, avəda, ac ka gərda dapa yam. Ac ka pəla ɗuweŋ hay ta majaw hap ta mazləraɗ kaslkaslah ana avəda saya. Ava dəɓa ana, ac ka pəla rəkwat fəma ta kaslkaslah ana avəda, afa memeɗ da hwadaɗ kad rav ta zazay.

⁴¹Amaa kaslkaslah sə, ka husata pa slam masa yam dapa gaa aabay, ka zlacata da yaŋ wurɓaɓay, ma ta kaslkaslah ana ka ndərmaɗata pa wurɓaɓay, a ɓəla vaw ɓasabay. Meŋgeŋgel ta yam ka daŋgwafafa ava gədaŋ, ka pasla hap jaka ava dəɓa ta kaslkaslah ana avəda.

⁴²Dapa ŋgesey ana, kafaraŋ hay ac ka wulakaw, zuwan mekəɗec ndah ta daŋgay avəda, afa gəla ec te reɓec pa yam, ec te mbəleceŋ.

⁴³Amaa mazlakava ta kafaraŋ hay ka wal membəl Pawl, mafay ana, ke recen ma avəda, ec te kəɗec bay. Ke gweɗec ndah masəna mezlevzlev, aca ra cəkwalaɗ kad pa yam ana kamma, kad rav ta zazay.

⁴⁴Ndah dərziya ece mbəlek sə, ava matəhaz ha fa hap ta kaslkaslah mapasla hay. Ara nesey, andaw fakwanay, andə ka mbəlakata kad fa vara, kwa jene ka ŋgandaw aabay.