Read Cuvok Mezlər ta Maslaŋ hay 28 Bible Online

Mezlər ta Maslaŋ hay 28 - Cuvok bible

Mezlər ta Maslaŋ hay 28

¹Ava dəɓa te membəl taciya sə, andə ka husa pa vavara ɓa mezel Malta dapa taɓa ta yam mafayakfayak ana.

²Ndah dərŋga ac ka kəsandaw mambəla ana eve mewesley. Dapa ŋgesey ana, yam a slay, memeɗ e ŋgey. Mafay ana, ndana hay ac ka gəɗandaw kwakwaw gaa, ac ka kəsandaw kad cak ta kwakwaw ana.

³Pawl ke həlek sasam, ka paslaɗ fa kwakwaw ana, anjəkar zezekw makaftasay dapa sasam ana ɓa. Masa kwakwaw a hacafa sə, e dek kad a vəda, caa! A hac Pawl pa ha, sləpatata fa ha ana.

⁴Ndah dapa wunam ana, aca wala zezekw ana masləpata fa ha ta Pawl sə, aca sasak ma dapa taɓa tec, gege: «Eve metehwe ana, nda nesey sə, aŋga nda makəɗa nda. Kwa ka mbəlakata dapa yam mafayakfayak ana sə, mbat tandakwa mavərsa ma a yaŋ ndana hay sə, a vana cəv te membəl ɓasabay.»

⁵Amaa, Pawl ka kucaw, ka kazlaɗ zezekw ana pa kwakwaw. Kwa ka cəna mehec te zezekw ana aabay.

⁶Ndana hay ac ka pafa ndey, ac ka wulakaw, ha tata ana a ta həzlata, daha aabay, aŋga ava yaŋ tata ana, a məcata təlam nesey. Ac ka njah gaa, amaa ac ka wala kwa jene maŋgana Pawl ana aabay. Dapa ŋgesey ana, ac ka kəs mawulak yaŋ mekele saya, ec ke gweɗ da yaŋ ana, gege: «Aŋga ana sə, haalay te tərek ka ndana.»

⁷Bay ta wunam ana, mezel Pubəliyus. Way tata va ley tata hay ac zef ava slam masa anda bəreŋgə dapa. Ka kəsandaw eve mewesley kad way tata. Andə ka njah da way tata manah mahkar.

⁸Papaŋ ta Pubəliyus ana aŋga manaha, kwakwaw fa vaw, a cah zay bembez bembez. Pawl ke də vara vaw, ka cə mbahw kad Zlavay, ka pana ha yaŋ, ka mbəla vəda.

⁹Ava dəɓa ana, ndah gwabay fakwanay ec ke dekey vara Pawl, Pawl ana ke mbəlec avəda.

¹⁰Ndah dapa vavara ta Malta ana ac ka kəsandaw eve mehehəm macəkuma bay, ac ka vandaw jene hay mekele mekele ta majənandaw dapa maŋgay taciya.

¹¹Andə ke ŋgə kiya mahkar dapa vavara ana. Dapa masa anda te tep kad pa kaslkaslah, andə te dey sə, ac ka vandaw jene hay mekele mekele ta majənandaw dapa maŋgway taciya kad Rawma saya. Anda dey ava kaslkaslah medek dapa berne ta Alekzandərey. Kaslkaslah ana ka njah dapa vavara ta Malta ana ta viya. Aca zal kaslkaslah ana, «Mbat Mawasay hay[33].»

¹²Andə ke zleŋgey ava kaslkaslah ana, andə ka husa pe berne ta Sirakuz, andə ka njah faŋga manah mahkar.

¹³Andə ke zleftek da Sirakuz ava kaslkaslah, andə ke dey pe berne ta Reziyaw. Tedew te pərek ana, bərgadaŋ ke ŋgek jaka luwa ta hwahwaɓay. Ava dəɓa ta manah ecew da yaŋ yam, andə ka husata pe berne ta Puzawl.

¹⁴Dapa wunam ana, andə ka ŋgat malamaŋ taciya hay makəsparav hay. Ac ka zalandaw, andə da njah luma amta eve eceŋ. Ara nesey, anda husa a Rawma.

¹⁵Malamaŋ hay makəsparav da Rawma, ac ka cəna labara te medə taciya. Mafay ana, ec ke dekey ka ta cə yaŋ ava andaw dapa cəv te medə kad arŋga dapa luma ta Apiyus. Mekele hay anda cə yaŋ eve eceŋ dapa Way hay ta manah məlaŋ hay. Masa Pawl e weleceŋ sə, ka ŋgana wasay Zlavay va ka ŋgat gədaŋ.

¹⁶Dapa mahusa taciya a Rawma ana sə, mazlakava ta kafaraŋ faŋga sə, ka vana cəv kad Pawl a da njah dapa way ta haya pal aŋga amta, ac ava kafaraŋ maɓəliya.

¹⁷Ava dəɓa ta manah mahkar, Pawl ke zelec mesnendə te Zuwef hay da Rawma kad pa way masa aŋga dapa. Ke cemecen yaŋ, gege: «Malama hay, ya səniya, ye ke ŋgə jene mambəla ana aabay kad ndah tandakwa sə, aabay, kwa ya ka nas kwakwas ta papaŋ ta papaŋ tandakwa hay sə, aabay, amaa ec ke təheziyey avəda de Zeruzelem, ec ke peɗiyey pa ha ta Rawma hay.

¹⁸Ndah da Rawma ana, ec ke nəkefiyey da yaŋ jə masa ya ta ŋgiya. Ava dəɓa ana, aca wal mepəleyey, afa ac ka ŋgat mebərey aɗaw masa təɗe te mekəɗiyey ka macəhwandaw sə, aabay.

¹⁹Amaa bay te Zuwef hay ac ka wal mepəleyey aabay, mafay ana, wewer aɗaw mekele sə, ɓasabay, say ye gweɗeceŋ, aca ra hwadawa ma aɗaw ana, kad vara bay ta Rawma. Bəna ye ke dek ke te ŋgəlefec ma tərsam aɗaw hay bay.

²⁰Mawala ya zalakakwar nesey sə, mafay ta ma ana, afa ya da walakwar, ya da gwaɗakwar. Ece jeweɗiyey ava jajarɓay nesey sə, afa ya ka paɗ yaŋ aɗaw a yaŋ nda masa andakwa Zuwef hay anda ɓəlakwa.»

²¹Zuwef hay sə, ac ka vahan gege: «Andaw ka ŋgat ɗelewer masa Zuwef hay dapa vavara te Zudey te vindek da yaŋ kaa sə, aabay. Asaya, kwa nda amta deveŋ malamaŋ tandakwa hay medek dərŋga ka gwaɗandan ma da yaŋ kaa sə, aabay.

²²Amaa anda wal macəna mawulak yaŋ takaa, afa anda səniya ndana hay dapa vavara mekele mekele ece pec makəsparav hay ara kaa nesey ke jene taambəla.»

²³Pas ana masa ac ta pasl ha ta macam yaŋ ava aŋga saya sə, ka husakata cay, ec ke dekey, ac mabay ac ka ŋgatafa pa way tata. Dapa maŋguzad yaŋ tata, Pawl ka tə yaw da yaŋ Meŋgə bay ta Zlavay. Dəga te pərek kasl fakwaɗ, ke gweɗecen jə metehwe ana da yaŋ Yesu dəga dapa ma majawa ta Muyiz kasl fa ndah mehwedek ma.

²⁴Ndah dərziya ac ka kəs ma tata, amaa dərziya hay sə, ac ka kəsaw aabay.

²⁵Dapa ŋgesey ana, ac ka tə yaw dapa taɓa tec mabay, afa mawulak yaŋ teceŋ ana wal wal. Dapa masa ac ta daɓa sə, Pawl ke gweɗec ma pal amta saya, gege: «Ma masa Mesfen Mavəna te gweɗec kad papaŋ ta papaŋ takwar hay jaka pa ma ta nda mehwedek ma zleezle, mezel Izay sə, ma ana metehwe ana.

²⁶Mesfeney ana, ka gwaɗa, gege: “Daɗay, gweɗec ndah ana, akwa cak zləmay mambəla ana, akwa cəna bay. Akwa pə ndey mambəla ana, akwa wala ndey bay.

²⁷Afa rav ta ndah ana aca cəna jene bay, zləmay tec hay ka dəzlata, ac ka həɗazla ndey tec hay avəda. Aca ŋgiya ara nesey sə, afa aca wal mawala eve ndey tec bay, aca wal macəna ava zləmay tec bay, aca wal makəsiya ava rav tec bay, aca wal mevehek kad vereyey bay. Aca ŋgiya ara nesey sə, afa aca wal ye de mbəlec bay.”

²⁸Ara nesey, masəna, Zlav e zlərek Labara mambəla ana te membəley sə, kad ndah masa Zuwef hay bay, afa eceŋ sə, ac ta cənan ma!» [

²⁹Ava dəɓa te megweɗ ta Pawl, Zuwef hay ec ke dey ava matə yaw dapa taɓa teceŋ fəma fəma.]

³⁰Yaw, mavay ecew, Pawl aŋga dapa way ta haya. E kəsec ndah medek ka ta wuzaɗiya fakwanay.

³¹A bəzad ma da yaŋ Meŋgə bay ta Zlavay va mesesərekec ndana hay da yaŋ Bay Mazlakava Yesu Kəristi ava zidaw dapa vaw aabay, kwa ndana maŋgəlan ma aabay.