Read Cuvok Mezlər ta Maslaŋ hay 6 Bible Online

Mezlər ta Maslaŋ hay 6 - Cuvok bible

Mezlər ta Maslaŋ hay 6

¹Dapa ŋgesey ana, makəsparav hay ece sekekey kad veŋ ana, a veŋ ana. Deveŋ eceŋ ana sə, Zuwef hay magwaɗa ma te Gərek hay ɓa. Ece hwehwer da yaŋ Ebəre hay dərziya masa ac dapa vavara ana ŋgesey, ec ke gweɗ, gege: «Ŋgwa macəhwandə hay deveŋ andaw aca ŋgat jə ta mandə masa aca vəniya cəɗem cəɗem sə, aabay.»

²Mafay ana, maslaŋ hay kuraw dapa yaŋ ana ecew sə, ac ka kwasa ndah masasəraka jene fakwanay, gege: «Anda da gərda mabəzad ma ta Zlavay ka ta vən ɗaf sə, a lada bay.

³Mafay ana, malamaŋ taciya hay, mayah ndah tasəla deveŋ akwar, ndah masa ndana hay ece hehəmeceŋ, ndah manəha eve Mesfen Mavəna, ndah masa ec eve leŋgesl te mevən jene, anda de vecen mezlərey ana nesey pa ha teceŋ.

⁴Taciya sə, anda və yaŋ taciya ka ta cə mbahw kad Zlavay va mabəzad ma tata.»

⁵Ma ana ke wefec ndana hay fakwanay. Ac ka kəs Etiyen nda makəsparav mambəla ana, manəha eve Mesfen Mavəna. Asaya, ac ka kəs Fəlep, Pərakwar, Nikanawr, Timaŋw, Parmenas va Nikwalas nda Antakiya ana masa ka gərda kwakwas tec zleezle ka ta cəp kwakwas te Zuwef hay.

⁶Ec ke hwedeɗec ndah tasəla sə, kad vara maslaŋ hay. Maslaŋ hay sə, ac ka cə mbahw kad Zlavay mafay teceŋ, ec ke pec ha yaŋ, aca ra ŋgə mezler teceŋ ava gədaŋ ta Zlavay.

⁷Ara nesey, ma ta Zlav ke zlezləney fəma fəma. Dapa berne te Zeruzelem sə, ndah masasəraka jene ece sekekey kad veŋ ana, e veŋ ana. Ndah maŋga kwakwas ta Zlav mabay aca kəs ma te Yesu ana may.

⁸Etiyen, manəha ava mambəla ana va gədaŋ mazlakava ta Zlavay. Mafay ana, ke ŋgə cah hay marəzla ndana hay mabay dapa taɓa ta ndana hay.

⁹Amaa ndah deveŋ Zuwef hay masa ece dek dapa berne de Siren va Zuwef hay masa ac dapa berne ta Alekzandərey aca ŋgaŋgəriya. Ndah ana hay ac deveŋ ndah medə kad pə Way ta macə mbahw te Zuwef hay masa aca zaliya «Way ta ndah membəlek dapa ɓeley.» Ndah mekele maŋgaŋgəriya sə, ece dek dapa vavara te Selekiya hay va dapa vavara ta Azi. Aca tə yaw ava Etiyen.

¹⁰Amaa ac ka zlafa mambasana Etiyen dapa matə yaw teceŋ ana aabay, afa Etiyen ke gweɗec eve leŋgesl te meven jene hay masa Mesfen Mavəna ta vana.

¹¹Mafay ana, ec ke dey, ec ke vec səlay kad ndana hay, afa aca ra ŋgəlafa ma Etiyen ana. Ece re gweɗ, gege: «Andaw ka cəna nda ana nesey, ke lefec Muyiz va Zlavay.»

¹²Ara nesey, ec ke heheɗecen dar ta ndana hay, te mesnendə hay va ta ndah mesesərekecen ma majawa kad ndana hay. Ec ke dey, ac ka təhaz Etiyen, ac ka hwadaɗ a vara ndah maca mamənak te Zuwef hay.

¹³Ec ke həlekec ndah maŋgəlafa ma sə, afa ece re gweɗ, gege: «Nda nesey sə, cəɗem cəɗem e gweɗ ma mambəla ana aabay da yaŋ Way ta kwakwas va da yaŋ ma majawa ta Muyiz.

¹⁴Andə ka cəna e gweɗ, gege: “Yesu nda Nezeret, a ta mbəɗandakwaɗ Way ta kwakwas ta Zlav tandakwa na avəda. Asaya, a ta ŋgwada ma majawa masa Muyiz ta sasərakandakwaɗ sə, avəda ke mekele.”»

¹⁵Ndah manjaha fakwanay dapa macə mamənak ana ac ka pə ndey ŋgbazl-zla kad fətiya, ac ka wala ndey tata e weɗey ara ndey ta Maskəla.