Read Cuvok Mezlər ta Maslaŋ hay 7 Bible Online

Mezlər ta Maslaŋ hay 7 - Cuvok bible

Mezlər ta Maslaŋ hay 7

¹Mazlakava ta ndaakwas hay ac ka nəkafa Etiyen, gege: «Ma masa ec te gweɗek da yaŋ kaa nesey sə, metehwe ana geyey?»

²Etiyen ka vahan, gege: «Malama hay va papaŋ taaɗaw hay, mecəkefiyey zləmay. Zlav masa manjaha dapa slam mawaɗa sə, ka ŋguzdan vaw kad papaŋ ta papaŋ tandakwa Abəraham zleezle masa aŋga dapa vavara ta Mizawpawtami, ke zev kad pe berne ta Haran aabay heley.

³Zlav ka gwaɗa, gege: “Zleftek, daɓa dapa vavara takaa, gərdec tərsam takaa hay, daɗ pa vavara masa ya ta ŋguzdakaɗay.”

⁴Mafay ana, Abəraham ke zleftek dapa vavara ta Kaldiya hay, ke dey, ka njah dapa berne ta Haran. Ava dəɓa ta maməc ta papaŋ, Zlav ka gwaɗa saya, gege: “Zəvaɓa da Haran kad pa vavara mekele.” Dapa ŋgesey ana, ke dey kad pa vavara ta Kanana masa andakwa Zuwef hay dapa ta pəsna nesey.

⁵Ka njah dapa, amaa dapa ŋgesey ana, Zlav ka van vavara ana kad Abəraham aabay heley. Kwa slam kusetke te mepəsek dapa vavara ana, ka ŋgataw kad aŋga sə, aabay heley. Dapa ŋgesey ana saya, Abəraham ka ŋgat wat aabay heley, amaa Zlav ka gwaɗa, a ta van vavara ana, e de ŋgə bay da yaŋ ana. Asaya, wudeh ta wudiya hay ac te ŋgə bay da yaŋ ana ava dəɓa tata.

⁶Zlav ka gwaɗa saya, gege: “Wut te wudeh takaa ac ta njah dapa vavara ta ndah mekele. Ndah ana ac te ŋgə bay da yaŋ eceŋ, ac may, ac ta njah ke ɓel ta ndah ana. Ndah ana, ec te ŋgedec marga mavay 400.

⁷Amaa ava dəɓa ana, ye te təɗec ma yaŋ ndah meŋgedec marga dapa ɓeley ana. Ava dəɓa ana, ec te dekec dapa vavara ana, ec te vehekey ke te kəɗiyey ha sə, dapa slam ana fana.”

⁸Zlav ka jaw ma ava Abəraham. Majaw ana sə, jaka pa maŋgal ŋgwal. Ara nesey, Abəraham ke heyek Izak. Ava dəɓa ta luma pal amta sə, ka ŋgəlan ŋgwal tata, Izak ka ŋgəlan ŋgwal ta wudiya Zakwab ara aŋga ana. Zakwab ke ŋgəlecen ta wudiya hay kuraw dapa yaŋ ana ecew[4] ara nesey ana. Meheyekec tərsam tandakwa hay kuraw dapa yaŋ ana ecew ara nesey sə, wudeh ta Zakwab ana hay.»

⁹Papaŋ ta papaŋ tandakwa hay kuraw dapa yaŋ ana ecew masa Zakwab te heyekeceŋ sə, ac ka ŋgafa səlek Zezef, malamaŋ teceŋ. Ac ka husamda ke ɓeley kad pa vavara ta Misəra. Amaa Zlav ka njah ava aŋga,

¹⁰ka pafa ndey, ka mbəla avəda dapa marga tata hay fakwanay, Firawna, bay ta Misəra ana ka wulak yaŋ mambəla ana da yaŋ Zezef, afa Zlav ka vana leŋgesl te mevən jene. Firawna ka paɗ Zezef ka nda mazlakava da yaŋ vavara tata ava hwaɗ ta way tata fakwanay.

¹¹Ava dəɓa ana, may ke ŋgə mabay dapa vavara ta Misəra va dapa vavara ta Kanana fakwanay. Marga mazlakava ana ke ŋgetefec ndah ta vavara ana. Papaŋ ta papaŋ tandakwa hay, wudeh ta Zakwab sə, aca ŋgat jə ta mandə ɓasabay.

¹²Amaa Zakwab a ta cəna jə ta mandə da Misəra ɓa sə, ka zlar wudiya hay. Ŋgesey ana sə, mezler macaaca ana.

¹³Dapa medə tec ke ecew ana sə, Zezef ke ŋguzdecen vaw kad malamaŋ hay. Firawna e sənec tərsam te Zezef hay sə, dapa ŋgesey ana.

¹⁴Ava dəɓa ana, Zezef ke zlerdec malamaŋ hay ke te kəsekec Zakwab papaŋ va ndah da hwaɗ ta way tata fakwanay, aca ra dek njah eve eceŋ fa slam ana da Misəra. Ndah da hwaɗ ta way ta Zakwab fakwanay sə, ac 75.

¹⁵Zakwab ke dey a Misəra. A məc dərŋga ana. Wudiya hay masa papaŋ ta papaŋ tandakwa fakwanay aca məc dərŋga ana.

¹⁶Ava dəɓa ana, ac ke hwedeɗec macəhwandə tec hay kad pa vavara te Sikem ke te pəseheɗec faŋga pa jəv ta Abəraham. Jəvay ana sə, jəv masa Abəraham ta husamiya da vara wudeh ta Hamawr de Sikem ana zleezle, ke vec səlay ara masa ac ta nəkiya.

¹⁷«Pas masa Zlav a ta ŋgə jə masa aŋga ta gwaɗa Abəraham zleezle sə, hwak cay. Dapa ŋgesey ana, Isreyel ndah tandakwa hay masa ac dapa ɓel da Misəra sə, ec ke yisley fəma fəma mabay.

¹⁸Ac ka pə bay mekele dapa vavara ta Misəra. Bay ana, a sən Zezef bay.

¹⁹Bay ana ŋgesey, ke ŋgefec wewer tərsam ta papaŋ ta papaŋ tandakwa Isreyel hay, ke ŋgedec marga mabay. Ke tetəkec Isreyel hay ece re kwidec wudeh tec gwendez saw, aca ra məcaɗay.»

²⁰«Dapa manah hay ana ŋgesey, ece heyek Muyiz. Muyiz ana sə, aŋga wat masa etehey, a wafa Zlavay. Ke gel da way ta papaŋ kiya mahkar.

²¹Ava dəɓa ana, ac papaŋ va mamaŋ, ec ke kəsek avəda kad a vəda, ac ka kazlda. Amaa dəm ta Firawna ke ŋgetek avəda. Ka gəlaw ara wudiya.

²²Ara nesey, Muyiz ka sasərak mesən jene hay ta Misəra hay fakwanay, ka ŋgat gədaŋ mabay jaka pe megweɗ tata hay va mezlər tata hay.»

²³«Dapa masa aŋga ava mavay kwakwar faɗ sə, ka kəs mawulak yaŋ te medey ke te wuzeɗek malamaŋ Isreyel hay.

²⁴Mahusa tata faŋga sə, ka ŋgatafa nda Misəra ana ɓa a kəɗ nda amta deveŋ Isreyel hay. Ke dey, ka jən nda teceŋ Isreyel ana, ka ŋgə gada pa slam tata, ka kəɗa nda Misəra sə, avəda cukw cukw.

²⁵Muyiz ka wulakaw, ndah tata Isreyel ac ta səniya, Zlav e te mbəlec dapa vavara ta Misəra sə, jaka pa ha tata, amaa ndah tata ana ac ka sənaw aabay.»

²⁶«Badamta te pərek ana saya, Muyiz ke ŋgetefec Isreyel hay ecew aca kuɗa vaw, a wal e de ŋgəlec avəda aca ra njah dapa metehey, gege: “Guula aɗaw hay, akwar malamaŋ hay, akwa ŋgə gada fa vaw takwar maŋgata mey?”

²⁷Amaa nda mayaha ma sə, ka ɗəmazl Muyiz, ka gwaɗa, gege: “Mapaɗakaa ka bay taciya va nda mavəna ma taciya sə, wa?

²⁸Ka wal mekəɗiyey ara ka ta kəɗ nda Misəra ana taavan sə, may geyey?”

²⁹Muyiz a cəna ma ana ara nesey sə, zidaw ka kəɗa. Ka hwayata pa vavara ta Madiyan. Ka njah dapa vavara ana ara nda məlaŋ. Ke heyek wudeh mawulah ecew dərŋga.»

³⁰«Mamaɗ yaŋ ta mavay 40 sə, maskəla ka ŋguzdana vaw dapa səɓak ta wudam ta Sina jaka pa kwakwaw fa gamslak.

³¹Muyiz ka wala sə, ka rəzlata. Ka wal maŋgucafa vaw, afa a da wala kwakwaw ana mambəla ana, faŋga ka cəna uway ta Bay Mazlakava a gwaɗa, gege:

³²“Yey sə, ya Zlav masa papaŋ ta papaŋ takwar hay zleezle te kekəred fəma tata. Aŋga, yey sə, ya Zlav masa Abəraham, Izak va Zakwab ta nahan yaŋ”. Zidaw ka ŋgana Muyiz, ke kekesley, ka gərda mandandazliya.

³³Bay Zlavay ka gwaɗa, gege: “Cəkwa tahkar dapa sek takaa avəda, afa slam masa ka mazlaca dapa nesey sə, slam masa mapal wal kad yey.

³⁴Eve metehwe ana, ya wala marga ta ndah aɗaw hay da Misəra, ya ka cəna makuɗa teceŋ. Mafay ana, ye ke bəreŋgekey ke te pəlec avəda dapa ɓeley. Təlam nesey, daɗay, ya zlardakaa a Misəra.”»

³⁵«Yaw, Muyiz ana sə, aŋga nda masa zleezle Isreyel hay aca waya bay, ac ka gwaɗa, gege: “Mapaɗakaa ka bay taciya va nda mavəna ma taciya sə, wa?” Amaa, Muyiz ana sə, aŋga nda masa Zlav ta piya ka bay va nda me te pəlekec dapa ɓeley. Zlav a paɗiya sə, jaka pa ma ta maskəla masa aŋga ta ŋguzdan vaw dapa kwakwaw fa gamslak.

³⁶Mehəlekec Isreyel hay da Misəra sə, Muyiz ana ava meŋgə cah hay va jə marəzla nda hay dapa vavara ta Misəra, dapa yam gagaza mafayakfayak ana va dapa yaŋ ta səɓak, da hwaɗ ta mavay 40.

³⁷Megweɗec kad Isreyel masa, “Zlav a ta zlərakwar nda mehwedek ma tata mekele ɓa dapa tərsam takwar ara masa aŋga te zlərekiyey sə, Muyiz ana”.

³⁸Dapa masa Zuwef hay ac makwasa dapa yaŋ ta səɓak sə, mazlaca dapa taɓa teceŋ va maskəla magwaɗa dapa wudam ta Sina sə, Muyiz ana. Mekəsek ma hay mavana mesfen sə, ka ta vandakwaɗay sə, Muyiz ana.»

³⁹«Amaa papaŋ tandakwa hay ana ac ka wal macənan ma ta Muyiz ana aabay, ac ka wal makəs ma tata ana aabay. Ac ka wal meveh a Misəra ana jaŋgata.

⁴⁰Mafay ana, ac ka gwaɗa Harawna, gege: “Lamandakwa mbat hay, ac da jənandakwa dapa maŋgway tandakwa hay, afa Muyiz, nda mahəlakandakwa da Misəra sə, anda sənakwa jə maŋgana bay”.

⁴¹Ec ke vəɗek mbat ɓa ara wut ta zla pəsaŋga ana ŋgesey, ac ka ŋgana kwakwas kad mbat ana, ac ka ŋgə macunam eve mewesley mafay te jeŋ ana masa ac ta ŋgiya ava ha teceŋ.»

⁴²Amaa Zlav ke ŋgwedefec dəɓa, ke gərdeceŋ aca ra kəɗ ha kad menjewzle hay da baymaləvaŋ ara mavinda dapa ɗelewer ta ndah mehwedek ma ke gweɗ, gege: «Akwar ndah da hwaɗ ta way te Isreyel, mavay 40 dapa yaŋ ta səɓak sə, akwar ke ŋgiyey kwakwas va meviyey jene hay ɓa geyey?

⁴³Akwar ke viyey jene aabay! Amaa akwa tə sə, mbat hay mekele mekele. Akwar ka zəɓ way ta mbat masa aca zaliya Malakw ava ha takwar. Asaya, akwar ka zəɓ mbat malama ara menjewzle mezel Refan. Mafay ta masa akwar ta lam mbat ana hay nesey, akwa nah yaŋ kad eceŋ sə, ya ta hwadaɗakwar pa vavara dəreŋ mafəna vavara ta Baabilaŋw.»

⁴⁴Etiyen ke gweɗec saya, gege: «Papaŋ ta papaŋ tandakwa hay ac ka kar way zleezle dapa yaŋ ta səɓak ka ta pə ekwete ta majaw ma ta Zlavay va ndana hay, ac ka ŋgway ava aŋga. Maŋguzdan kad Muyiz masa a da kar way ana gwagumaw sə, Zlavay ana. Ava dəɓa ana, Muyiz ka kara way ana ara masa Zlav ta ŋguzdanay.

⁴⁵Papaŋ ta papaŋ tandakwa hay ac ka ŋgway ava way makara ana kasl pa pas masa Yasuwa aŋga mesnendə teceŋ. Dapa masa Yasuwa aŋga mesnendə teceŋ sə, Zlav ke mbesec ndah masa Zuwef hay bay dapa vavara nesey fəma teceŋ, afa Zuwef hay aca ra ŋgə bay dapa vavara ana. Way makara kad Zlavay ava mbal sə, aŋga ɓa kasl pas masa Deevet aŋga bay.

⁴⁶Bay Deevet ka ŋgat mambəla ana ta Zlavay. Dapa ŋgesey ana, ka nəkafa Zlavay, a da vana cəv ka ta lamana way waya ana kad Zlav masa Zakwab e kekəred kad aŋga.

⁴⁷Amaa ma ta lama way ana kad Zlavay sə, wudiya bay Salmaŋw.»

⁴⁸Amaa Zlav da Wudam ka njah dapa way masa ndana hay ta lamiya ava ha teceŋ sə, aabay. Ara nda mehwedek ma zleezle te gweɗ, gege:

⁴⁹«Bay Mazlakava ke gweɗ, gege: “Slam da baymaləvaŋ sə, ŋgesey slam ta bay aɗaw, slam dapa vavara may, ŋgesey slam te mepəsek aɗaw. Naa akwar te lemiyey sə, way wula Sawul? Slam ta masasak vaw aɗaw sə, wula?

⁵⁰Mapana slam ana hay fakwanay nesey sə, yey ana bay geyey?”»

⁵¹Etiyen ke gweɗec saya, gege: «Akwar ndah masa yaŋ masasala! Akwa wal Zlavay ava rav takwar pal amta bay, akwa gwam ka cənan ma te Mesfen Mavəna bay. Akwar ara papaŋ ta papaŋ takwar hay zleezle ta cənan ma tata bay.

⁵²Ndah mehwedek ma ta Zlavay, masa papaŋ ta papaŋ takwar hay ec ke ŋgedec hahar aabay sə, ɓa geyey? Maslaŋ hay ta Zlavay mehwedek labara mambəla da yaŋ nda maŋga mezlər tata mambəla ana sə, ec ke kəɗec avəda cukw cukw biba? Təlam nesey, akwar ka ŋgafa mbaɗa mbaɗa nda maŋga mezlər tata ana, akwar ka kəɗa avəda cukw cukw.

⁵³Akwar sə, Zlav ka zlərakwar ma tata majawa jaka pa ha ta maskəla tata hay da baymaləvaŋ. Amaa akwar ka cəp ma ana hay aabay.»

⁵⁴Ndah maca mamənak te Zuwef hay sə, rav ke hecec mabay da yaŋ Etiyen ana. Aca hac ha, afa rav e hecec mafay ta ma hay masa Etiyen ta gwaɗiya.

⁵⁵Etiyen manəha eve Mesfen Mavəna, ka baŋgaɗ ndey kad a wudam, ka wala membeɗ ta Zlavay va Yesu aŋga mazlaca da ha ta zam ta Zlavay.

⁵⁶Ke gweɗ, gege: «Mawala, slam da baymaləvaŋ mawuna, ya wala Wut ta nda mazlaca da ha ta zam ta Zlavay.»

⁵⁷Masa aca cəna Etiyen e gweɗ ara nesey sə, aca cə lalaw ava gədaŋ, aca dəzla zləmay tec hay ava ha. Ac fakwanay, ac ka camafa yaŋ,

⁵⁸ac ka təhazaw, ac ka təraŋgaw kad a vəda te berne, ac ka kalaw eve kekeŋ. Wagaa masa ac ta kaliya sə, ac ka gərda rəkwat tec hay vara ndana ɓa mezel Sawl.

⁵⁹Dapa masa aca kaliya sə, Etiyen ka cə mbahw, gege: «Bay Mazlakava Yesu, kəs mesfeney aɗaw.»

⁶⁰Ke kekəredey, ka cə lalaw ava gədaŋ, ke gweɗ, gege: «Bay Mazlakava, pəlecen mebər teceŋ.» Ava dəɓa te megweɗ ara nesey sə, ka məcata.