Read Cuvok Mezlər ta Maslaŋ hay 8 Bible Online

Mezlər ta Maslaŋ hay 8 - Cuvok bible

Mezlər ta Maslaŋ hay 8

¹Maməc te Etiyen ana ara nesey sə, ka wafa Sawl mabay. Pəsaŋga ana ŋgesey, marga masa e ɓəs bay sə, ke ŋgetefec makəsparav hay de Zeruzelem. Mafay ana, ac fakwanay ac ka vəna yaŋ kad pa vavara te Zudey va ta Samariya, magəra sə, maslaŋ hay babəla.

²Ndah dərziya masa ece lel fa Zlavay, ac ka təhaz rav, ec ke dey ka ta kəs slaw ta vaw te Etiyen ke te pəsehey, ac ka kuɗa mabay mafay ta maməc tata ana.

³Amaa ta Sawl sə, tata e ŋgə gədaŋ te meŋgedec marga kad Macam yaŋ ta ndah ta Zlavay. Mafay ana, ke dey fa way fa way ke təhezekec mawula hay va ŋgwaza hay, ke ɓəzleɗec pa daŋgay.

⁴Makəsparav hay masa ac ke kwekwececeŋ sə, ac ka ŋgway vəla vəla, ac ka bəzad Labara mambəla ana da yaŋ Yesu.

⁵Ara nesey Fəlep, mahusa tata pe berne dapa vavara ta Samariya, ka bəzad Labara mambəla ana kad ndana hay da yaŋ Kəristi.

⁶Ndah dapa berne ana fakwanay, ec ke dey ka ta cəkafa zləmay, ac ka wala cah hay masa aŋga ta ŋgiya. Mafay ana, ac ka pafa leŋgesl ma masa Fəlep te gweɗeceŋ.

⁷Dapa ŋgesey ana, damkwaw hay ec ke dec kad a vəda dapa ndana hay. Dapa medə tec dek kad a vəda sə, aca cə lalaw ava gədaŋ. Asaya, ndah mahahalɓa va ndah masa sek tec maməca ec ke mbəleceŋ.

⁸Mafay ana, ndah dapa berne ana ec ke weslə macəkuma bay.

⁹Dapa berne ana ŋgesey, ndana ɓa mezel Simaŋw. Dapa masa Fəlep ka husa pe berne ana aabay heley sə, Simaŋw ana, aŋga matiməzla, ka ŋgə cah hay mekele mekele te merəzlec ndana hay dapa berne ta Samariya ana. Amaa cah tata ana hay sə, ece dek da vara Zlav bay. Asaya, ka paɗ yaŋ tata, ka nda mazlakava.

¹⁰Mafay ana, ndana hay fakwanay dapa berne ana, wudeh va mazlakava hay aca kəs ma tata. Aca hahəmiya, gege: «Aŋga sə, nda masa aŋga ava gədaŋ masa aca zaliya “Gədaŋ Mazlakava ta Zlavay.”»

¹¹Ndana hay ac ka kəs ma tata mabay, afa ka njah gaa dapa taɓa teceŋ, ke rəzlec ava cah hay mekele mekele masa aŋga ta ŋgiya.

¹²Amaa masa ac ka ŋgat makəsparav masa Fəlep te bəzedec Labara mambəla ana da yaŋ Meŋgə bay ta Zlavay va da yaŋ mezel te Yesu Kəristi sə, ac ka ŋgat beetem mawulah va ŋgwazah fakwanay.

¹³Simaŋw, matiməzla sə, ka kəs ma te Yesu ana may. Ava dəɓa ana, ka ŋgat beetem, ka cəp Fəlep. Ka rəzlata mafay ta masa ka wala cah hay mazlakava masa Fəlep te ŋgeceŋ ava gədaŋ ta Zlavay.

¹⁴Ava dəɓa ana, maslaŋ hay de Zeruzelem ac ka cəna, ndah dapa vavara ta Samariya ac ka kəs ma ta Zlavay. Ec ke zlərec Piyer va Zaŋ.

¹⁵Mahusa tec Piyer va Zaŋ a Samariya ana sə, ac ka cə mbahw kad Zlavay mafay ta ndah ana. Dapa macə mbahw teceŋ, ac ka nəkafa Zlavay, e de vec Mesfen Mavəna may.

¹⁶Aca cə mbahw kad Zlavay mafay ta ndah ana sə, afa nda amta deveŋ eceŋ masa ka ŋgat Mesfen Mavəna ana sə, aabay heley. Aca ŋgat sə, beetem eve mezel ta Bay Mazlakava Yesu war.

¹⁷Dapa ŋgesey ana, Piyer va Zaŋ ec ke pec ha a yaŋ ndah ana. Ndah ana ac ka ŋgat Mesfen Mavəna.

¹⁸Masa Simaŋw a wala makəsparav hay, aca ŋgat Mesfen Mavəna mafay ta masa maslaŋ hay te pec ha yaŋ sə, ke vec səlay kad Piyer va Zaŋ.

¹⁹Ke gweɗ, gege: «Meviyey gədaŋ ana may, afa daha ya ta pə ha kad yaŋ kwa waawa sə, nda ana a ra ŋgat Mesfen Mavəna ana may.»

²⁰Amaa Piyer ka vahan, gege: «A lada Zlav da zanakaa avəda ava səlay takaa ana fakwanay. Ka wulakiya sə, ka zlafa mahusama gədaŋ masa Zlav ta viya kad ndah tata ava səlay geyey!

²¹Ka eve meven ta ma takaa, kwa ava jə masa ka ta camiya dapa mezlərey ana nesey sə, aabay, afa rav takaa aŋga manjaha nduwak fa yam te ndey ta Zlavay sə, aabay.

²²Gərda meŋgə mebərey, nəkafa Zlavay da yaŋ mebər takaa. Gəla Zlav a pəlakaɗ mawulak yaŋ takaa mambəla ana aabay ŋga avəda kwa.

²³Ya wala rav takaa madakala tekw tekw elehey. Kaa nda maŋga səlek, ke ɓel te mebərey.»

²⁴Simaŋw ke gweɗec Piyer va Zaŋ, gege: «Mbahw akwar ava yaŋ takwar ana, macə mbahw kad Zlavay mafay taaɗaw, afa ma masa akwar te gweɗek nesey sə, e de husefiyey bay.»

²⁵Ava dəɓa ta masa Piyer va Zaŋ ac ka ndəvda matə yaw teceŋ da yaŋ ma ta Bay Mazlakava Yesu da Samariya, ec ke veh kad Zeruzelem. Dapa medə tec dapa cəvey sə, ac ka bəzad Labara mambəla ana kad ndana hay dapa wunam hay mekele mekele dapa vavara ta Samariya ana.

²⁶Maskəla ta Bay Mazlakava ka gwaɗa Fəlep, gege: «Zleftek, daɗ jaka hwahwaɓay pe cəv te medə de Zeruzelem kad pe berne ta Gaaza. Cəvey ana ŋgesey sə, ndana hay ece də jaka pa kwasa ɓasabay.»

²⁷Fəlep ke zleftek, ke dey. Dapa cəv te medə tata ana ŋgesey, ka wala nda Etiyawpi ana ɓa, e də kad a wunam. Nda ana sə, aŋga nda mazlakava ana, aŋga mala, afa aŋga madərlam ta Kandas, ŋgwaz bay da yaŋ vavara ta Etiyawpi. Aŋga nda maŋga mezlər mazlakava eve zleley ta bay ana fakwanay. Nda ana sə, e dek de Zeruzelem e cek mbahw kad Zlavay.

²⁸E vehek kad a wunam, manjaha dapa mawta te pəlez tata. Aŋga dapa majaŋgə ɗelewer ta Izay, nda mehwedek ma zleezle.

²⁹Mesfen Mavəna ka gwaɗa Fəlep sə, gege: «Daɗay, cəp nda dapa mawta te pəlez tata antisey.»

³⁰Fəlep ka hway, kad dara nda ana dapa cəvey. Masa a ta wala nda ana a jaŋgə ɗelewer ta Izay, nda mehwedek ma zleezle, ka nəkafa, gege: «Ka ka cəna ma da yaŋ ma masa ka jaŋgiya dapa ɗelewer ana na geyey?»

³¹Nda Etiyawpi sə, ka vahan, gege: «Daha ndana ka ŋguzdawa aabay sə, ya da cəna ma da yaŋ ana gwagumaw?» Ka gwaɗa Fəlep sə, a da tapafa kad pa mawta te pəlez tata ana. Fəlep sə, ka tapafa, ka njah da cak tata.

³²Ma ana dapa Ɗelewer mavəna masa a jaŋgiya sə, e gweɗ, gege: «Aŋga sə, aŋga ara təmak masa aca hwadiya ke te zlehey, ara Wut ta təmak masa aŋga fəma ta nda maɓacan ŋgwec tata, ara nesey ka wuna ma ka ta kuɗa aabay.

³³Dapa manahda yaŋ tata, ka ŋgat jə masa mapa kad aŋga sə, aabay. Ka gərda wudiya dapa vavara masa a da njah ka tərsam tata sə, aabay, afa ac ka kəsan mesfen tata avəda dapa vavara.»

³⁴Nda Etiyawpi sə, ka gwaɗa Fəlep, gege: «Mbahw ŋguzdawa ma da yaŋ ana hwa! Nda mehwedek ma na e gweɗ da yaŋ wa? E gweɗ nesey sə, fə yaŋ tata ana geyey, fa nda mekele?»

³⁵Fəlep ka ŋguzdan ma dapa ma ta Zlavay. A zlariya ava ma masa nda ana aŋga ta jaŋgiya, ka bəzadana Labara mambəla ana da yaŋ Yesu.

³⁶Medə tec dapa cəvey, aca husa a ma ta yam ɓa. Nda Etiyawpi sə, ka gwaɗa Fəlep, gege: «Wala, yam kana ɓa, ma da təkawa ma te meŋgə beetem təlam nesey sə, mesemey?» [

³⁷Fəlep sə, ka gwaɗa, gege: «Daha ka ka kəs ma ana ava rav takaa fakwanay sə, cəv ɓa.» Nda sə, a vahan, gege: «Ya kəsiya Yesu Kəristi sə, aŋga wut ta Zlavay.»]

³⁸Ava dəɓa ana, ka gwaɗa nda matəhazan yaŋ te pəlez tata e de zlecey. Fəlep va nda Etiyawpi sə, ec ke bəreŋgek kad fa vara, ec ke kezl pa yam. Fəlep ka ŋgana beetem.

³⁹Masa ece dek kad a vəda dapa yam sə, Mesfen Mavəna njeɗ! A kəsa Fəlep sə, avəda. Nda Etiyawpi sə, a wala ɓasabay, amaa e dey ava meweslə mabay.

⁴⁰Faŋga faŋga ana, Fəlep a ta wala sə, aŋga dapa berne ta Azawtus. E dey ava mabəzad Labara mambəla ana da gəva hay fakwanay kasl pe berne ta Sizar.