Read Cuvok Mezlər ta Maslaŋ hay 9 Bible Online

Mezlər ta Maslaŋ hay 9 - Cuvok bible

Mezlər ta Maslaŋ hay 9

¹Dapa manah hay ana ŋgesey, Sawl ke ŋgedec marga va mebezlec ndah masasəraka jene ta Bay Mazlakava.

²Ke dey ka ta nək ɗelewer te cəvey vara mazlakava ta ndaakwas hay, e de də ava aŋga kad pa way ta macə mbahw te Zuwef hay da Damas. Ara nesey, daha ka ta ŋgat ndana hay, mawula hay, kwa ŋgwaza hay makəsparav dərŋga sə, e te hwedekeceŋ, ac majawa ava jajarɓay kad Zeruzelem.

³Masa aŋga dapa cəv te medə kad Damas, aŋga zef ava wunam ana cay, faŋga faŋga ana slam ka waɗafa da baymaləvaŋ.

⁴Sawl sə, ka təɗata fa vara, ka cəna uway ta ndana ɓa a zala, gege: «Sawl, Sawl ke ŋgediyey marga ara nesey sə, mafay te mey?»

⁵Sawl sə, ka nəkafa, gege: «Bay Mazlakava, kaa ana sə, ka wa?» Bay Mazlakava ana ka vahan, gege: «Yey sə, ye Yesu masa ke ŋgediyey hahar.»

⁶Amaa zleftek, daɗ pe berne ta Damas ana ɗagay. Dərŋga sə, ac ta ŋguzdakaɗ jə masa ka ta ŋgiya.

⁷Ndah medə fa slam ana ava Sawl sə, ac mazlaca, ac ka zlafa mawuna ma te megweɗ aabay, afa zidaw ke ŋgeceŋ. Ac ka cəna uway ta ndana ɓa, amaa ac ka wala nda ana aabay.

⁸Sawl ke zleftek, ke zlecey, ka wal menjerey, amaa a wala ndey bay. Mafay ana, ndah medek ava aŋga sə, ac ka təhazaw pa ha, ac ka hwadaɗ a Damas.

⁹Manah mahkar, a wala ndey bay, a ndə jene aabay, a sə jene bay.

¹⁰Da Damas ana, nda masasəraka jene ɓa, mezel Ananiyas. Bay Mazlakava ka zala, ka ŋguzdana jene, ka gwaɗa, gege: «Ananiyas!» Ananiyas sə, ka gumana, gege: «Away, ya kana Bay Mazlakava aɗaw.»

¹¹Bay Mazlakava sə, ka gwaɗa, gege: «Zleftek, daɗ təlam nesey, kəs cəv derre, yah way ta Zudas. Dapa faŋga, nak nda Tarsis ana ɓa, mezel Sawl, aŋga dapa macə mbahw.

¹²Dapa macə mbahw tata ana sə, jene ka ŋguzdana vaw ɓa, ka wala ndana ɓa mezel Ananiyas, e də kad vara vaw ka ta pana ha yaŋ, ndey tata a da wunata, a da wala ndey saya.»

¹³Ananiyas ka vahan kad pa, gege: «Bay Mazlakava, ndana hay gaa ec ke gweɗiyey da yaŋ nda ana. Ec ke gweɗ, gege: “Ke ŋgedec marga mabay kad ndah takaa hay de Zeruzelem.

¹⁴E dek kad fana nesey sə, bay hay ta ndaakwas hay ta vana cəvey ka ta təhaz ndah mazala mezel takaa fakwanay.”»

¹⁵Amaa Bay Mazlakava ka gwaɗa, gege: «Daɗay, afa nda ana ŋgesey ya ka yahaɗha ka ta ŋgawa mezlərey aɗaw, e de ŋguzdecen mezeley aɗaw kad ndah dapa vavara hay masa aca sən Zlav bay, kad bay hay va kad Isreyel hay.

¹⁶Yey ana, ya ta ŋguzdanay, a ta sə marga mabay dapa mezlərey aɗaw mafay taaɗaw.»

¹⁷Ananiyas pərtakaɗ! E zleftek, ke dey. Ke sehw a way, ka ŋgatafa Sawl, ka pana ha yaŋ, ka gwaɗa, gege: «Sawl, malama, Bay Mazlakava Yesu te zlərekiyey kad varakaa. Aŋga nda maŋguzdakaɗ vaw dapa cəv masa ke dek kad fana nesey. E zlərekiyey sə, afa ka da wala ndey saya. Asaya, afa a da nəhakaa eve Mesfen Mavəna.»

¹⁸Faŋga faŋga ana, jene hay ɓa ara dəɓa te kəlef ec ke kwiyek dapa ndey ta Sawl ana. Ndey tata sə, ka wunata, ke zleftek, ka ŋgat beetem.

¹⁹Ava dəɓa ana, ka ndə jene, ka ŋgat gədaŋ saya. Sawl ke nehek kusetke da Damas da vara ndah masasəraka jene.

²⁰Faŋga faŋga ana, ke də pə way ta mabəzad ma ta Zlav dərŋga, ke bəzedec ma ta Zlavay kad ndana hay, gege: «Yesu sə, aŋga wut ta Zlavay.»

²¹Ndah macəna ma tata ana fakwanay sə, ec ke rəzleceŋ, ac ka sasak ma, gege: «Nda nesey sə, aŋga nda metəhezec makəsparav hay de Zeruzelem sə, biba? E dek kad fana nesey sə, ka ta təhaz makəsparav hay, e de hwedeɗec vara bay hay ta ndaakwas hay sə, biba?»

²²Amaa fa pas fa pas ana, Sawl e dey fəma fəma eve mebəzedec Labara mambəla ana kad Zuwef hay da Damas, gege: «Eve metehwe ana, Yesu sə, aŋga Kəristi.»

²³Ava dəɓa ta manah gaa, Zuwef hay ac ka cə mamənak da yaŋ Sawl ana ka ta kəɗ ka macəhwandaw.

²⁴Zuwef ana hay ac ka jəɗ Sawl ana fəma ta way te berne ta Damas ana, hwavavaɗ vaɗ, hwapapas, aca ra təhaziya, aca ra kəɗa vəda ka macəhwandaw. Anjəkar werwer tec masa aca ŋgiya ŋgesey sə, Sawl ka səna vəda.

²⁵Mafay ana, ta vaɗ ɓa, ndah masasəraka jene ta Sawl ana, ac ka kutakwaɗ pa waŋ, ac ka talaɗ jaka pe melever te meɗəzley. Ma ta waŋ ana majawa ava ɗuweŋ kasl kad a vəda te meɗezl te berne ana.

²⁶«Ava dəɓa ana, Sawl ke veh e Zeruzelem, ka yah cəvey ka ta cam vaw ava makəsparav hay. Amaa makəsparav hay ana ac ka ŋgə zidaw fətiya, afa ac ka wulakaw, ke tər ka nda makəsparav metehwe ana aabay heley.

²⁷Amaa, ta Barnabas sə, ka ŋgafa zidaw aabay, ka kəsaw, ka hwadaɗ vara maslaŋ hay. Ke ŋguzdecen ma da yaŋ Sawl ana masa aŋga ta wala Bay Mazlakava Yesu dapa cəv ta Damas va masa Bay Mazlakava Yesu ta gwaɗa. Asaya, ke ŋguzdecen ma da yaŋ Sawl masa a bəzad ma te Yesu da Damas ava zidaw dapa vaw aabay.

²⁸E zler ta pəsaŋga ana ŋgesey, Sawl ka njah ava makəsparav hay de Zeruzelem, ac ka ŋgway eve eceŋ fa slam ana. Sawl ana, ka bəzad ma da yaŋ Bay Mazlakava Yesu kad ndana hay ava zidaw dapa vaw aabay.

²⁹Ac ka cə yaŋ ava Zuwef hay magwaɗa ma te Gərek hay ac ka tə yaw eve eceŋ. Amaa eceŋ sə, ac ka yah cəv ta makəɗiya ka macəhwandaw.

³⁰Malamaŋ hay dapa Yesu ac ka cəna Zuwef hay aca wal makəɗa avəda cukw cukw sə, ac ka kəsaw kad pe berne ta Sizarey da ma ta yam mafayakfayak ana ɓa, ac ka sahwaɗ pa kaslkaslah te medə kad Tarsis[5]»

³¹Dapa ŋgesey ana, Macam yaŋ hay ta ndah ta Zlavay dapa vavara te Zudey, dapa vavara te Gelile va dapa vavara ta Samariya, ac manjaha eve metehey. Fa pas fa pas ana, aca ŋgat gədaŋ te makəs ma te Yesu fəma fəma. Dapa manjah teceŋ sə, ac ka nahda yaŋ kad Zlavay. Mesfen Mavəna aŋga eve eceŋ. Mafay ana, Macam yaŋ ta ndah ta Zlavay ec ke sekek kad veŋ ana, e veŋ ana.

³²Piyer ka ŋgway kwa fəla fəla. Pas mekele ɓa ke dey ke te wuzeɗek makəsparav hay dapa berne ta Lida.

³³Dapa berne ana ŋgesey, ndana ɓa mezel Eney, aŋga mahahalɓa ana. Mavay tata cahkar dapa mehecey ana, a zlafa mezlec bay.

³⁴Piyer ka gwaɗa, gege: «Eney Yesu Kəristi ka mbəlakaa avəda cay. Zleftek, zlecey, paɗ gədegəde takaa.» Faŋga faŋga ana, Eney sə, ke zleftek.

³⁵Ndana hay dapa berne ta Lida ana va ndah da Saraŋw fakwanay ac ka wala nda ana. Mafay ana, ac fakwanay ac ka kəs ma ta Bay Mazlakava Yesu may.

³⁶Ŋgwaz ɓa, mezel Tabita aŋga dapa berne ta Zawpey, aŋga makəsparav. Mezel tata ana ava ma te Gərek sə, «Durkas», a wal megweɗey, «Meney.» Cəɗem cəɗem e ŋgə mezlər mambəla ana, e jənec maslamarga hay.

³⁷Pas ɓa, mehecey kap! A təhaziya, tep! A məcata. Masa ka məcata cay, ndana hay ac ka pana macəhwandaw ana, ac ka hwadaɗ pə way da yaŋ way ɓa.

³⁸Ara masa wunam ta Lida aŋga zef ava wunam ta Zawpey, ndah masasəraka jene ac ka cəna masa Piyer aŋga dərŋga. Ac ka zlar maslaŋ hay ecew kad vara vaw ke te zelekey, eve megweɗey: «Vesek vaw zef kad varandaw.»

³⁹Dapa masa Piyer a cəna ma ana ara nesey sə, ec ke də ava maslaŋ ana hay kad Zawpey, kwa ac ke ŋgə matəhwahwam aabay. Mahusa teceŋ, ac ka padan ma te Piyer kad pə way da yaŋ way. Ŋgwefidey hay fakwanay faŋga, ac ka ŋgucafa vaw Piyer, ava makuɗa. Ac ka ŋguzdan rəkwat hay masa Durkas te dekeceney dapa masa aŋga eve ndey heley.

⁴⁰Ava dəɓa ana, Piyer ke mbesekec ndana hay fakwanay kad a vəda, ke kekəredey, ka cə mbahw kad Zlavay. Ke pə ndey kad fa macəhwandaw ana, ka gwaɗa, gege: «Tabita, zleftek!» Tabita ka wuna ndey. Masa a wala Piyer sə, pərtakaɗ e zleftek cəkwam! A njah maanjahay.

⁴¹Piyer ka təhazan ha, ka baŋgaɗaw. Ke zelec ŋgwefidey hay va makəsparav hay faŋga ke ŋguzdecen Tabita sə, ka pərakata dapa maməcay.

⁴²Ma ana ke husefec ndah dapa berne ta Zawpey fakwanay. Mafay ana, ndana hay mabay ac ka kəs ma ta Bay Mazlakava.

⁴³Piyer sə, ka njah gaa dapa berne ta Zawpey da way ta nda maləɓa mbal, mezel Simaŋw.