Read Cuvok Rawma hay 1 Bible Online

Rawma hay 1 - Cuvok bible

Rawma hay 1

¹Yey Pawl, nda maŋga mezlər te Yesu Kəristi masa mazala ka ta njah ka maslaŋ. Ya mapa ha wal ka ta bəzad Labara mambəla ana ta Zlavay.

²Labara mambəla ana ŋgesey sə, Zlav ka gwaɗa daha dəga zleezle jaka vara ndah mehwedek ma tata hay dapa Ɗelewer mavəna,

³masa e gweɗ da yaŋ Wudiya, Bay tandakwa Mazlakava Yesu Kəristi. Jaka pa slaw ta vaw sə, e dek jaka pa tərsam ta bay Deevet.

⁴Amaa jaka pe Mesfen Mavəna sə, Zlav ka paɗ ka Wudiya ava gədaŋ tata mazlakava jaka pe mepərekek tata dapa maməcay. Aŋga, Yesu Kəristi Bay tandakwa Mazlakava.

⁵Zlav ke ŋgiyey mambəla ana tata ta manjah ka maslaŋ jaka pa Kəristi, ke te hwedec ndah masa Zuwef hay bay fakwanay, aca ra kəs ma tata va manahan yaŋ ka ta hahəlan yaŋ te Kəristi.

⁶Kwa akwar may, akwar deveŋ ndah masa Zuwef hay bay masa Zlav ta zalakakwar ka ta njah ava Yesu Kəristi.

⁷Ya vindiya sə, kad ndah masa Zlav e welec fakwanay dapa vavara ta Rawma, akwar ndah masa Zlav ka zalakwar ka ta njah kad aŋga. Da lada sə, Zlav Papaŋ tandakwa va Bay Mazlakava Yesu Kəristi ac da vakwar mapəsma va metehey.

⁸Macaaca ana sə, ya ŋgə wasay kad Zlavay aɗaw jaka pa Yesu Kəristi mafay takwar fakwanay, afa ece gweɗey da yaŋ makəsparav takwar dapa vavara fakwanay.

⁹Zlav sə, a sən masa ye gweɗek nesey sə, tehwe. Aŋga masa ya kəɗana ha ava rav aɗaw dapa mabəzad Labara mambəla ana da yaŋ Wudiya. Dapa macə mbahw taaɗaw cəɗem cəɗem sə, ya sləfakwar,

¹⁰ya nəkafa cəɗem cəɗem dapa macə mbahw aɗaw hay, afa a da viyey cəv te medə kad varakwar ara masa aŋga ta waya.

¹¹Aŋga, eve metehwe ana, ya ka hwar mawalakwar eve ndey taaɗaw macəkuma bay, afa anda da vənakwa mavən ta ma te mezlər masa Mesfen Mavəna te viyey. Ara nesey, makəsparav takwar a ta ŋgat gədaŋ saya,

¹²ara megweɗey, ya ta ŋgat gədaŋ mafay ta makəsparav takwar, akwar may, akwar ta ŋgat gədaŋ mafay ta makəsparav taaɗaw. Makəsparav ana ŋgesey sə, ya ava aŋga, akwar ava aŋga may.

¹³Malama hay, ya wal sə, masəna, cəɗem cəɗem ya ka kəs mawulak yaŋ te medey kad varakwar, amaa kasl pəsna ya ka ŋgat ha ta madaɗ aabay heley. Ya ka wal wut te mezlərey aɗaw de ŋguzdekey da varakwar ara aŋga te ŋguzdek da vara ndah mekele masa Zuwef hay bay.

¹⁴Cama ye bəzedec Labara mambəla ana kad ndana hay fakwanay, kwa kad ndah masa ndey tec mawna va kad ndah masa ndey tec mawna bay, kwa kad ndah masa ece sen jene va kad ndah masa ece sən jene bay.

¹⁵Mafay ana, ya ka hwar mabəzadakwar Labara mambəla ana kad akwar ndah da Rawma hay may.

¹⁶Ya ka ŋgə hwar mafay ta Labara mambəla ana sə, aabay, afa labara ana aŋga gədaŋ mazlakava ta Zlavay, masa a mbəl ndah makəsiya fakwanay. Macaaca ana sə, Zuwef hay ɗagay, ava dəɓa ana, ndah masa ac Zuwef hay bay.

¹⁷Labara mambəla ana sə, e ŋguzdek Zlav a ŋguzad ndah maŋga mezlər ara aŋga ana fəma tata sə, meemey, a ŋguzadiya jaka pa makəsparav va kad makəsparav, ara masa ma mavinda, gege: «Nda maŋga mezlər ara aŋga ana jaka pa makəsparav sə, a ta njah eve ndey.»

¹⁸Dəga da wudam da baymaləvaŋ, Zlav ke ŋguzdek mazam ta rav tata kad yaŋ mebər hay fakwanay va meŋgə jene hay mambəla ana aabay fakwan masa ndana hay ta ŋgiya. Eve mezlər tec hay mambəla ana aabay ŋgesey, ac ka ran ma te metehwe ana te meŋgə mezlər tata.

¹⁹Jə masa ndana a zlafa masəniya da yaŋ Zlavay sə, aŋga mapana kad ec fakwanay, afa Zlavay ava yaŋ tata ana ke ŋguzdecen mambəla ana.

²⁰Eve metehwe ana, dəga dapa melem ta vavara, jene hay masa ece wel bay da yaŋ Zlavay sə, ndana a zlafa macəna jaka pe leŋgesl tata ava mawala mezlər masa Zlav ta ŋgiya. Jeŋ ana hay sə, gədaŋ tata mazlakava masa e ndəv aabay va jene hay masa ece ŋguzdek aŋga sə, aŋga Zlavay. Ara nesey, ac ava ma amta te megweɗ aabay,

²¹aca sən Zlavay, amaa ac ka vana mehehəm aabay, ac ka ŋgana wasay ara aŋga Zlavay sə, aabay. Amaa sesəker mawulak yaŋ teceŋ ka data dəreŋ eve eceŋ, yaŋ tec masa leŋgesl aabay ŋgesey, ke hwedeɗec kad pa ləvaŋ.

²²Aca pə yaŋ teceŋ sə, ka ndah eve leŋgesl te meven jene hay, anjəkar ac ndah marəzla.

²³Ac ka gərda mahahəm Zlav masa a məc aabay ka ta hahəm jene hay mavəɗa pa slam ta ndana masa a maməcata, pa slam ta ɗiyak hay, pa slam ta gənaw hay masa ece də eve sek hay faɗ va masa ece də ava hwaɗ ava hwaɗ.

²⁴Mafay ana, Zlav ke gəreɗec pe mezlər hay maləza ara mekekesl ta vaw ta rav teceŋ ta waya. Ara nesey, aca nas vaw teceŋ ana ava jə maŋga hwaray.

²⁵Ac ka ŋgwada metehwe ana ta Zlavay sə, ka maŋgal ma. Ece kekəredey va meŋgə mezlərey sə, kad jene hay masa Zlav te lemeceŋ pa slam ta Zlav malama jeŋ ana hay masa ndana hay aca ra hahəmiya katar ka midakw. E de ŋgey!

²⁶Mafay ana, Zlav ke gəreɗec pe mezlər hay ta hwaray. Ŋgwazah tec hay ac ka gərda manah ava mawula hay ara tecəɗem, aca nah ava ŋgwazah caliya.

²⁷Mawulah may, ara aŋga ana, ac ka gərda manah ava ŋgwaza hay, sesəker aca wal ɗahw sə, makəs vaw fa vaw teceŋ. Mawula hay aca ŋgə mezlər hay masa ta hwaray. Ara nesey, ke hwedefec meyəv teceŋ masa təɗe fe mezlek teceŋ kad fa vaw teceŋ ana.

²⁸Ara masa ac ka gərda masən Zlavay, Zlavay may ke gərdeceŋ eve leŋgesl tec marəzla ana ŋgesey. Ara nesey, aca ŋgə jene hay saw masa te meŋgə bay.

²⁹Ac manəha ava tərsam te jene hay fakwan masa te meŋgə jene ara aŋga ana bay, meŋgə jene mambəla ana hay aabay, meŋgə ndey fe jene ta ndana, meŋgə suwe, meŋgə səlek, makəɗa nda, mapay ava ndana, maŋgə mayaŋ fe jene ta ndana, mafəc nda va maŋgal ma fa ndana,

³⁰maŋgal dar, manjah ka maslagəra hay ta Zlavay, mayah ma hay, magal yaŋ, meŋgə həɓa cəɗem cəɗem, mayah wewer hay mekele mekele te meŋgə jene hay mambəla ana aabay kad ndana, ece cənecen ma ta papaŋ va mamaŋ tec hay aabay,

³¹ac eve leŋgesl aabay, aca ŋgwad ma elehey, ac ava rav masasala, aca sən metekwen fa nda bay.

³²Kwa aca sən matəɗ ma ta Zlav mambəla ana da yaŋ jeŋ ana hay, masa e gweɗ da yaŋ tərsam ta nda maŋgana jeŋ ana ara nesey sə, aŋga mak te mekəɗ ka macəhwandaw. Ava aŋga ana fakwanay, ece dey fəma fəma ava meŋgə jene mambəla ana aabay, kad veŋ ana saya, aca hahəm ndah maŋgana jene mambəla ana hay aabay ara eceŋ ana may.