Read Cuvok Rawma hay 10 Bible Online

Rawma hay 10 - Cuvok bible

Rawma hay 10

¹Malama va dəma hay, jə masa rav aɗaw a waya va macə mbahw aɗaw kad Zlavay mafay te Zuwef hay sə, a lada aca ra mbəlaɗay.

²Ya zlafa matə yaw da yaŋ eceŋ, afa ac ava matəhaz rav ta macəp Zlavay, amaa matəhaz rav teceŋ ana sə, mazlaca da yaŋ mesən jene metehwe ana sə, aabay.

³Ara megweɗey: Ac ka wal masəna cəv masa Zlav a pə nda ka nda maŋga mezlər ara aŋga ana meemey sə, aabay. Aca yah manjah ka ndah maŋga mezlər ara aŋga ana sə, jaka pe cəv teceŋ ana. Ara nesey, cəv masa Zlav a pə ndana hay ka ndah maŋga mezlər ara aŋga ana sə, ac ka nah yaŋ kad pa aabay.

⁴Eve metehwe ana, mamaɗ yaŋ ta gədaŋ ta ma majawa ta Muyiz sə, Kəristi, afa kwa waawa masa aŋga ava makəsparav sə, Zlav a təra avəda ka nda maŋga mezlər ara aŋga ana jaka pa makəsparav ana.

⁵Mawala masa Muyiz ava yaŋ tata ana ta vindiya zleezle da yaŋ masa Zlav a pə ndana ka nda maŋga mezlər ara aŋga ana, jaka pa ma majawa, gege: «Nda manaha yaŋ kad pa ma hay ta ma majawa, a ta njah eve ndey sə, mbalay jaka pa ma ana hay.»

⁶Amaa sesəker meŋgə jene ara aŋga ana masa e dek dapa makəsparav sə, e gweɗ ara nesey: «Ke te gweɗ dapa rav takaa: “Ma te tep kad baymaləvaŋ wa” sə, bay, ara megweɗey, ke te bəreŋgek Kəristi kad fa vara.»

⁷Asaya, «kwa ke te gweɗ dapa rav takaa: “Me te sehw pe veɗ mekweleeleŋ na wa” sə, bay», ara ka wal me te pərekek Kəristi dapa maməcay.

⁸Naa meŋgə jene ara aŋga ana masa e dek dapa makəsparav sə, e gweɗ melemey? Ke gweɗ, gege: «Ma ta Zlavay sə, kwa aŋga dəreŋ ava kaa aabay, aŋga dapa ma takaa va dapa rav takaa.» Ma ana nesey sə, ma ta makəsparav masa anda bəzadiya kad ndana hay.

⁹Daha dapa ma takaa ka tə yaw fəma ta ndana hay masa Yesu sə, aŋga Bay Mazlakava, daha ka ka kəsaw pa rav takaa masa Zlav ke pərekek avəda dapa maməcay sə, ŋgesey, ka ta mbəlata.

¹⁰Eve metehwe ana, daha ndana ka kəsaw pa rav tata sə, a hwadiya kad pe meŋgə jene ara aŋga ana ta Zlavay. Matə yaw ava ɗaf ta ma sə, a hwad nda kad pe membəley.

¹¹Mavinda dapa Ɗelewer mavəna, gege: «Nda masa ka kəsaw pa rav sə, a ta zal marava aabay.»

¹²Ara nesey sə, walay dapa taɓa te Zuwef hay va ndah masa Zuwef hay bay sə, aabay. Ara megweɗey, ac fakwanay ac ava Bay Mazlakava tec pal amta, masa a və mambəla ana tata kad ndah mazala mezel tata fakwanay.

¹³Eve metehwe ana, mavinda dapa Ɗelewer mavəna, gege: «Kwa waawa mazala mezel ta Bay Mazlakava sə, a ta mbəlata.»

¹⁴Amaa ndana da zal Bay Mazlakava a da jəniya ana sə, meemey, daha ka kəsaw pa rav aabay? A da kəsiya ana meemey, daha ka cəna ma da yaŋ Bay Mazlakava ana aabay? A da cəna ana meemey, daha ndana ta mabəzadana ma ana aabay?

¹⁵Ma da bəzadan ma ana wa, daha ndana mazləra aabay? Ara masa mavinda dapa Ɗelewer mavəna, gege: «Meteh ara sek ta ndah mehwedek Labara mambəla ana kad ndana hay sə, mey!»

¹⁶Amaa ndana hay fakwanay ac ka nah yaŋ kad Labara mambəla ana sə, aabay. Eve metehwe ana, Izay nda mehwedek ma zleezle, gege: «Bay Mazlakava, makəsa mabəzad ma taciya pa rav sə, wa?»

¹⁷Ara nesey, makəsparav sə, e dek dapa mabəzad ma. Mebəzedey ana ŋgesey, aŋga mazlaca da yaŋ ma te Kəristi.

¹⁸Ara nesey, ya nəkiya, Zuwef hay ac ka cəna Labara mambəla ana sə, aabay tehwe may geyey? Amaa aŋga, ara mavinda dapa Ɗelewer mavəna, gege: «Uway tec ke cen vəla vəla dapa vavara fakwanay, ma tec hay ka husata kasl pa kwakumakw ta vavara.»

¹⁹Ya nəkiya saya, naa Isreyel hay ac ka cəna ma ana aabay tehwe may geyey? Yaw e tehey, mawala mavah ma masa Muyiz ta viya, gege: «Zlav, gege: “Ya ta tərakwar avəda ka ndah maŋga səlek fa tərsam hay masa metehwe ana bay. Ya ta bəzlaŋgaɗakwaɗ rav takwar a da zəmakwar fa rav da yaŋ tərsam hay masa leŋgesl pahata.”»

²⁰Ava dəɓa ana, nda mehwedek ma Izay, ke lel te megweɗ ma ana aabay, gege: «Zlav, gege: “Ndah masa ec ke yehiyey aabay sə, ec ke ŋgeteyey avəda. Ye ke ŋguzdecen yaŋ aɗaw kad ndah masa aca wal menəkefiyey jene bay.”»

²¹Amaa da yaŋ Isreyel hay sə, Zlav ke gweɗ saya, gege: «Ya ka təha ha aɗaw hwapapas ka ta kəs ndah magəla yaŋ va ndah masa aca cən ma bay.»