Read Cuvok Rawma hay 11 Bible Online

Rawma hay 11 - Cuvok bible

Rawma hay 11

¹Ara nesey, ya nəkiya, naa Zlav ke kezldec ndah tata Isreyel hay la geyey? Away, ara na e ŋgə aabay! Afa yey ava yaŋ taaɗaw ana, ya nda Isreyel ana, ya dapa tərsam ta Abəraham, da hwaɗ ta way ta gwalay Benjemeŋ.

²Zlav ke kezldec ndah tata Isreyel hay masa aŋga te peleɗec ha dəga zleezle sə, aabay. Akwa sənafa ma mavinda dapa Ɗelewer mavəna masa Eli ta kuɗafa Zlavay mafay te Isreyel sə, sabay geyey? Ke gweɗ, gege:

³«Bay Mazlakava, ec ke kəɗec ndah mehwedek ma takaa avəda fakwanay, ac ka pəlaha slam hay te meŋgeŋgez təbekw ta kwakwas takaa avəda, magəra yey amta. Ece yehiyey ka ta kəɗ saya.»

⁴Amaa Zlav ka vahan kad pa, gege: «Away, magəra ka amta bay! Ya ka raɓaɗ ndana hay bakatar tasəla kad yey. Ndah masa ac ke kekəred fəma ta mbat mezel Bal sə, aabay.»

⁵Ara aŋga ana, kwa pəsna nesey ndana hay magəra kusetke deveŋ ndah masa Zlav te peleɗec ha dapa mambəla ana tata sə, aɓa.

⁶Amaa daha e pelec sə, jaka pa mambəla ana tata sə, ŋgesey mafay te mezlər sabay, afa daha mafay te mezlər teceŋ sə, ŋgesey mambəla ana tata ana aŋga mambəla ana sabay.

⁷Naa daha ara nesey sə, andə da gwaɗakwa melemey? Jə masa Isreyel hay aca yahiya sə, ac ka ŋgataw aabay! Amaa ta ndah masa Zlav ke peleɗec ha sə, ac ka ŋgataw. Ta ndah dərziya hay sə, yaŋ tec masasala.

⁸Ara mavinda dapa Ɗelewer mavəna, gege: «Zlav ke tərecen leŋgesl tec avəda ke kelembe, ke həɗezlecen ndey tec avəda, ke dəzlecen zləmay tec avəda, kasl pəsna nesey.»

⁹Bay Deevet ke gweɗ may, gege: «Slam ta mandə ɗaf teceŋ sə, da njah ke dəɓel teceŋ va veɗ teceŋ, afa aca ra təɗaɗ kad pa va maŋgat meyəv masa təɗe fe mezlər teceŋ.

¹⁰A lada ndey tec da həɗazlaɗ fakwanay. Dəɓa tec da hurmaɗ cəɗem cəɗem.»

¹¹Ara nesey, ya nəkiya: «Naa Zuwef ana hay masa mecəhwen te kəɗeceŋ, ec ke təɗec nesey sə, ac ta pərakata ɓasabay katar la geyey? Away e ŋgə ara na aabay! Amaa mbalay mafay te mezlek teceŋ ana nesey, ndah masa ac Zuwef hay bay ac ka ŋgat cəv te membəley, ke te bezləŋgeɗek səlek te Zuwef hay.

¹²Yaw daha mezlek te Zuwef hay ke ŋgec jə mambəla ana kad ndana hay dapa vavara, daha meteɗ tec ke ŋgec jə mambəla ana ta Zlavay macəkuma bay kad ndah masa ac Zuwef hay bay sə, naa daha ac fakwanay ec ke mbəleceŋ sə, membəl teceŋ ana ŋgesey e te kəsek jene mambəla ana mafəna gaa saya aabay ŋgəɗa geyey?»

¹³Ye gweɗ təlam nesey kad akwar ndah masa Zuwef hay bay. Yey sə, ya maslaŋ masa mazləra kad akwar ndah masa Zuwef hay bay. Mafay ana, ya ŋgə həɓa mabay da yaŋ mezlərey ana.

¹⁴Ya wulakiya eve mezlərey ana nesey, e de bezləŋgeɗek səlek ta tərsam taaɗaw Zuwef hay, afa Zlav de mbəlec ndah dərziya avəda deveŋ eceŋ.

¹⁵Eve metehwe ana, daha mep te Zuwef hay ava zlalav sə, ka tərata madərazl ma ta ndana hay dapa vavara ava Zlavay sə, naa daha Zlav ke te vehekec avəda sə, mevehek teceŋ ana ŋgesey, e te ŋgə gwagumalamaw? Ŋgesey a ta tərata ara mepərekek metehwe ana dapa maməcay kad pa manjah eve ndey.

¹⁶Masəna daha ndana ka bacana gəva macaaca ana te peŋ kad Zlavay sə, dərsiya ana ŋgesey aŋga mapa ta Zlavay ana jaŋgata. Asaya, daha slaslalay te wudez aŋga mapa kad Zlavay sə, ha te wudez ana hay fakwanay ŋgesey ac mapa kad Zlavay ana jaŋgata.

¹⁷Isreyel hay sə, ac ara wudez ta Awliviyey maŋgaya masa Zlav ka ŋgəla ha ana hay dərziya avəda. Amaa akwar ndah masa Zuwef hay bay akwar ara wudez ta Awliviyey masa e pəcek saw de ley, Zlav ka njəɓaɗakwar pa taɓa ta ha te wudez ana hay dərziya maza. Təlam nesey, akwa zlafa maŋgat yam te wudez ana masa e dek dəga dapa slaslalay ana.

¹⁸Mafay ana, akwar ta paɗ ha te wudez macaaca ana maŋgəla avəda sə, ke jene taambəla bay. Akwar da zlafa meŋgə həɓa da yaŋ eceŋ sə, meemey? Mazəɓa slaslalay fa yaŋ sə, kaa bay, amaa slaslalay ta zəɓakaa!

¹⁹Gəla ndah dərziya deveŋ akwar ec te gweɗ, gege: «Zlav e ŋgəlec ha ana hay sə, afa ac da jəɓaɗandaw pa slam ana.»

²⁰Metehwe ana. Zlav e ŋgəleceŋ sə, afa ac ava makəsparav aabay, naa akwar masa aca njəɓaɗakwar pa slam teceŋ sə, mafay ta makəsparav takwar. Mafay ana, akwar te ŋgə həɓa bay, amaa sesəker melel fa Zlavay.

²¹Eve metehwe ana, daha Zlav ka ŋgəla ha te wudez masa aŋga ana ta ŋgayiya avəda sə, ŋgesey, a ta ŋgakaa ara aŋga ana may.

²²Mawala, masa Zlav e ŋguzdek mambəla ana va maŋgə rav tata fa ndana da ma amta: Kad Zuwef hay masa ec ke təɗeceŋ sə, ke ŋguzdec mezem ta rav tata, kad akwar ndah masa Zuwef hay bay sə, ka ŋguzdakwar mambəla ana tata. Amaa a lada akwa dey fəma fəma ava manjah dapa mambəla ana tata, daha aabay sə, a ta ŋgəlakwar avəda may.

²³Yaw, daha pas masa Zuwef hay ac ke te vehekec kad pe cəv ta makəsparav sə, Zlav e te njəɓeɗec pa slam teceŋ ana saya fa vaw te wudez masa aŋga te ŋgəlekec fətiya, afa aŋga ava gədaŋ te menjəɓeɗec pa slam tec macaaca ana saya.

²⁴Eve metehwe ana, akwar sə, akwar ha te wudez ta Awliviyey masa e pəcek de ley saw. Zlav ka ŋgəlakakwar, ka njəɓaɗakwar fe wudez ta Awliviyey masa aŋga ta ŋgayiya. Zuwef hay sə, ac ha te wudez ta Awliviyey masa aŋga ta ŋgayiya. Ara nesey, Zlav a zlafa menjəɓeɗec pa slam teceŋ fe wudez masa aŋga ta ŋgayiya!

²⁵Malama va dəma hay, masəna maləmad vaw masa maraɓa ta Zlavay, afa akwar da ŋgə həɓa ta map yaŋ takwar ka ndah masa ac eve leŋgesl te meven jene hay bay. Maləmad vaw ta Zlavay ana sə, masa gəva te Zuwef hay amta ac ava yaŋ masasala kasl pa pas masa ndah masa Zuwef hay bay ac ta ŋgat membəl may.

²⁶Ara nesey, Zuwef hay fakwanay ec te mbəleceŋ ara mavinda dapa Ɗelewer mavəna, gege: «Nda ma te pəlec ndana hay sə, e te təhek dapa wudam ta Siyawna. A kəsa mezlek ta ndah dapa tərsam ta Zakwab avəda.

²⁷Nesey majaw ma aɗaw eve eceŋ pas masa ye te pəlecen mebər teceŋ.»

²⁸Jaka luwa ta Labara mambəla ana sə, Zuwef hay ac maslagəra hay ta Zlavay mafay ta mambəla ana tata kad akwar. Amaa jaka luwa ta mapal nda ta Zlavay sə, Zlav e weleceŋ mafay ta papaŋ ta papaŋ tec hay zleezle,

²⁹afa ta Zlavay sə, jə masa ka vana cay, a kəsa avəda sə, aabay, nda masa ka zala cay, a mbasana sə, aabay.

³⁰Eve metehwe ana, akwar ndah masa Zuwef hay bay sə, zleezle akwar ka nah yaŋ kad Zlav aabay, amaa təlam nesey jaka pa magal yaŋ te Zuwef hay sə, Zlav ka ŋgafakwar metekweney.

³¹Ara aŋga ana təlam nesey, Zuwef hay masa ac ka nah yaŋ kad Zlav maŋgafakwar metekwen na aabay sə, afa eceŋ may, aca wal Zlav de ŋgefec metekweney.

³²Eve metehwe ana, Zlav ka ɓəzlaɗ ndana hay fakwanay pa magal yaŋ, afa e de ŋguzdek metekwen tata kad fa ndana hay fakwanay.

³³Eve metehwe ana, Zlavay sə, aŋga mazlakava ana macəkuma bay! Leŋgesl te meven jene hay tata va mesən jene tata ac mazləla macəkuma bay! Ndana masəna mawulak yaŋ tata sə, aabay! Kwa maləmad vaw tata, ndana masəniya aabay!

³⁴Ara mavinda dapa Ɗelewer mavəna, gege: «Masəna mawulak yaŋ ta Bay Mazlakava sə, wa? Mazlafa mavana mamənak sə, wa?

³⁵Mavana jene kad Zlavay kamma afa Zlav da pəlan ava dəɓa ana sə, wa?»

³⁶Eve metehwe ana, jene hay fakwanay sə, ece dek da vara vaw, jene hay fakwanay aca njahay sə, jaka vara vaw va mafay tata. A lada ndana hay aca ra hahəmaw katar ka midakw. E de ŋgey!