Read Cuvok Rawma hay 12 Bible Online

Rawma hay 12 - Cuvok bible

Rawma hay 12

¹Malama va dəma hay, ara masa Zlav ka ŋgafandakwa metekweney, ya kəɗakwar ha, mavan yaŋ takwar kad Zlavay ara mavə jə ta kwakwas masa aŋga eve ndey, masa aŋga mavəna va masa a wafa kad Zlavay. Nesey kwakwas ta macə mbahw metehwe ana masa kwar da ŋgiya.

²Akwar ta cəp kwakwas ta ndah ta vavara masa andakwa dapa na bay, sesəker mavana cəv kad Zlav da ŋgwadakwar jaka pa mavakwar leŋgesl waya, afa akwar da zlafa masəna jə masa Zlav a waya sə, wula. Ara megweɗey: Jə masa mambəla ana, jə masa a wafa va jə masa maŋga avəda fakwanay.

³Mafay ta mambəla ana masa Zlav te viyey, ye gweɗ kad kwa waawa takwar: «Ndana a ta paɗ yaŋ tata ka mazlakava da fəna merey tata masa Zlav ta paɗ pa bay. Amaa sesəker kwa waawa da njah makwaɗ ma ava gədaŋ masa aŋga ava aŋga dapa makəsparav masa Zlav ta viya kad kwa waawa.

⁴Eve metehwe ana, andakwa ava gəva hay ta vaw mabay fa vaw pal amta, amaa gəva hay ta vaw ana ŋgesey mezlər tec wal wal.

⁵Andakwa may, ara aŋga ana, kwa andakwa mabay, andakwa vaw amta dapa macam vaw tandakwa ava Kəristi. Andakwa macama fakwanay ava ndana hay amta amta ara gəva hay ta vaw pal amta.

⁶Zlav ka vandakwa gədaŋ te meŋgə jene wal wal taambəla kad kwa waawa tandakwa. Ara nesey, daha nda amta deveŋ andakwa ka ŋgat gədaŋ te megweɗ ara nda mehwedek ma, da gwaɗaw ara makəsparav masa andakwa ava aŋga ɓa fakwanay.

⁷Daha nda leŋgeɗ ka ŋgat gədaŋ ta majən ndana hay, a lada e de jəneceŋ eve cəvey ana. Nda masa ka ŋgat gədaŋ ta masasərak ndana hay, e de sesərekec eve cəvey ana.

⁸Nda masa ka ŋgat gədaŋ ta matək rav ta ndana hay sə, e de təkecen eve cəvey ana. Nda masa a wal mavən zleley tata ava ndana hay sə, a da vaw ava rav mambəla ana. Nda masa a pad ma ta ndana hay sə, da ŋgaw ava matəhaz rav. Nda masa ka ŋgat gədaŋ te meŋgə metekwen fa ndah dərziya sə, da ŋgaw eve mewesley.

⁹Da lada sə, mawal nda takwar de ŋgə sə, metehwe ana masa e dek dapa rav. Mahwaɓa fe jene hay masa ece teh bay, amaa sesəker mayah matəhaz meŋgə jə mambəla ana.

¹⁰Mawal vaw fa vaw takwar ava rav takwar fakwanay ara malamaŋ va dəma hay dapa makəsparav. Manjah cəɗem cəɗem ndah macaaca ta manahda yaŋ fa vaw takwar.

¹¹Maŋgana mezlər kad Bay Mazlakava ava maŋgaŋgar vaw, akwar ta ŋgə mayaɗ bay, matəhaza rav.

¹²Manjah cəɗem cəɗem ta maɓal jə masa Zlav a ta vakwar sə, eve mewesley. Mepəsek dapa marga hay, meŋgə gədaŋ cəɗem cəɗem ta macə mbahw.

¹³Mejənec makəsparav hay masa ac dapa mahwar jene. Mekəsec ndah madaɗ kad hwaɗ ta way takwar mambəla ana.

¹⁴Mepəsefec ma ndah masa aca ŋgadakwar hahar mafay ta makəsparav takwar. Mepəsefec ma ndana hay, akwar te gwederec bay.

¹⁵Ndah masa ac dapa mewesley sə, meweslə eve eceŋ fa slam ana, makuɗa fa slam ana ava ndah masa ac dapa makuɗa.

¹⁶Dapa manjah takwar sə, manjah ma takwar macacala. Akwar ta yah jene hay mazlakava mazlakava bay, amaa sesəker mayah sə, jene hay masa mekweskwes ana. Akwar ta paɗ yaŋ takwar ka ndah eve leŋgesl te meven jene hay bay.

¹⁷Akwar ta vah jə masa e teh bay kad nda maŋgakwar jə masa e teh bay bay. Amaa sesəker meŋgə gədaŋ te meŋgec jene hay mambəla ana kad ndana hay fakwanay.

¹⁸Efes daha akwa zlafa sə, meŋgə jene hay fakwan masa a da njahaɗakwar pe metehey ava ndana hay fakwanay.

¹⁹Guula aɗaw hay masa ya walakwar elehey, daha ndana ka ŋgakwar jene masa e teh bay sə, akwar ta vahan bay. Amaa magərda mezem ta rav ta Zlavay de ŋgə mezlərey, afa Bay Mazlakava ke gweɗ dapa mavinda dapa Ɗelewer mavəna, gege: “Ma ta vaha jə masa e teh bay kad ndana sə, yey! Ma ta pəla meyəv ta ndana fe mezlər tata sə, yey may!”

²⁰Mavinda dapa Ɗelewer mavəna saya, ke gweɗ, gege: “Daha maslagəra takaa may a kəɗa sə, vana jene ta manday. Daha yam a kəɗa, vana yam. Ava maŋgana mambəla ana ara nesey sə, ka ŋgata ara ka ta həlana zay ta kwakwaw kad fa yaŋ tata.”

²¹Ka ta vana cəv kad suwe a da ŋgə bay da yaŋ kaa bay, amaa njah bigula da yaŋ suwe ava meŋgə jə mambəla ana.»