Read Cuvok Rawma hay 14 Bible Online

Rawma hay 14 - Cuvok bible

Rawma hay 14

¹Makəs ndah masa gədaŋ pahata dapa makəsparav, akwar te gweɗ da yaŋ mawulak yaŋ tata masa e teh bay sə, bay.

²Mececeley, nda leŋgeɗ a kəsiya dapa rav tata, a zlafa mandə jene hay fakwanay. Anjəkar ta nda masa gədaŋ pahata dapa makəsparav sə, e lel ta mandə jene hay fakwanay, a ndə sə, say gamslak ta lak babəla war.

³Ara nesey, a lada nda mandana jene hay fakwanay sə, a ta paɗ nda masa e lel ta mandə jene hay fakwanay sə, ke jene taambəla bay. Ara aŋga ana, nda masa e lel ta mandə jene hay fakwanay sə, a ta təɗana ma yaŋ nda mandana jene hay fakwan bay may, afa nda mandana jene hay fakwanay sə, Zlav ka kəsaw ara aŋga ana may.

⁴Naa kaa sə, ka walawa masa ka da təɗana ma yaŋ nda maŋga mezlər ta nda mekele? Kwa aŋga mazlaca, kwa e təɗey, ma ta təɗana ma yaŋ sə, bay ta way tata. Eve metehwe ana, nda ana a ta zlacata caŋw caŋw, afa Bay Mazlakava aŋga ava gədaŋ ta majəniya.

⁵Ta nda leŋgeɗey, a wulakiya manah hay ŋgeɗey, ec eve mehehəm ka fəna manah hay dərziya. Nda mekele, a wulakiya manah hay ana ŋgesey, ac amta. Da lada sə, kwa waawa da səna tehwe jə masa a wulakiya dapa leŋgesl tata.

⁶Nda masa a vana mehehəm kad manah leŋgeɗey ka fəna manah hay dərziya sə, nda ŋgesey, a ŋgiya mafay ta Bay Mazlakava. Ara aŋga ana, nda mandana jene hay fakwanay sə, nda ŋgesey, a ŋgiya mafay ta Bay Mazlakava may, afa a ŋgana wasay kad Zlavay mafay ta ɗaf tata. Nda masa a ndə jene hay fakwan aabay sə, nda ŋgesey, a ŋgiya mafay ta Bay Mazlakava jaŋgata may, afa a ŋgana wasay kad Zlavay saya may.

⁷Eve metehwe ana, kwa nda amta deveŋ andakwa masa a njah eve ndey mafay ta yaŋ tata sə, aabay. Asaya, kwa nda amta deveŋ andakwa masa a məcay mafay ta yaŋ tata sə, aabay,

⁸afa daha anda njahakwa eve ndey sə, anda njahakwa mafay ta Bay Mazlakava. Daha anda məcakwa sə, anda məcakwa mafay ta Bay Mazlakava. Ara nesey, kwa daha anda njahakwa eve ndey, kwa daha anda məcakwa sə, andakwa dapa ha ta Bay Mazlakava,

⁹afa, Kəristi ka məcata, ka pərakata dapa maməcay ka ta ŋgə Bay Mazlakava ta ndah maməca va ta ndah eve ndey.

¹⁰Amaa kaa sə, ka təɗana ma yaŋ malamakw daha aabay dəmakw sə, mafay te melemey? Asaya, ke pec ara jene taambəla sə, mafay te mey? Eve metehwe ana, andakwa fakwanay andə ta zlacakwa fəma ta Zlavay a da təɗandakwa ma yaŋ.

¹¹Ara mavinda dapa Ɗelewer mavəna, gege: «Yey, Bay Mazlakava masa ya məc aabay, ye gweɗ eve metehwe ana: “Ndamagəda hay fakwanay ec te kekəred fəma taaɗaw, ndamagəda hay fakwanay ec te hehəmiyey Zlavay ava ɗaf ta ma teceŋ.”»

¹²Ara nesey, kwa waawa tandakwa a ta gwaɗan jə masa aŋga ta ŋgiya ava yaŋ tata ana sə, kad Zlavay.

¹³Ara nesey, magərakwaɗ matəɗ ma fa vaw tandakwa. Amaa sesəker meŋgə jə masa e de zlekdec malamaŋ daha aabay dəmaŋ takwar hay kad pe mecəhwen de kəɗeceŋ va metəɗdec kad pa jə masa e teh bay bay.

¹⁴Ya səniya, mbalay Bay Mazlakava Yesu, ya səniya tehwe: Jene masa a ndara nda sə, aabay. Amaa jə masa a ndara nda sə, kad nda masa a wala a ndarana.

¹⁵Daha ka məcan vaw ta malamakw, daha aabay dəmakw mafay te jə masa ka ndiya sə, ŋgesey, ka ka yah medə dapa mawal vaw ava aŋga ɓasabay. Jə ta mandə takaa de tər ka jə ta mazə malamakw, daha aabay dəmakw masa Kəristi ta məc mafay tata may sə, bay.

¹⁶Jə masa mambəla ana kad akwar sə, e de tər ke jə masa ndana hay ac da ŋgat cəv te megweɗ mambəla aabay fətiya kad ndah mekele bay,

¹⁷afa Meŋgə bay ta Zlavay sə, aŋga mezlər ta jə ta manday va te jə ta mas bay. Amaa aŋga mezlər te meŋgə jene ara aŋga ana, metehey va mewesley masa Mesfen Mavəna ta viya.

¹⁸Daha ndana a ŋgana mezlər kad Kəristi ara nesey sə, a wafa Zlavay, ndana hay may ac ta hahəlan yaŋ.

¹⁹Ara nesey, mayahakwa jə masa e te hwedek metehey va masasal vaw tandakwa ke te gel fəma fəma dapa makəsparav fa slam ana.

²⁰Mafay te jə ta manday sə, akwar ta nasa mezlər ta Zlav bay. Aŋga, eve metehwe ana, kwa jene masa maləza sə, aabay, amaa daha jeŋ ana a ta hwadaɗ malamakw daha aabay dəmakw pe meŋgə jə masa e teh bay sə, ŋgesey, mambəla ana ta mandə bay.

²¹Jə mambəla ana sə, magərda mandə slaw, magərda masə wuzam va magərda kwa jene wula wula masa a ta taɗda malamaŋ daha aabay dəmaŋ hay.

²²Ma masa ka ta kəsiya pa rav da yaŋ mandə jene va mas jene nesey sə, sləkaɗ pe leŋgesl takaa va Zlav takaa. Mapəsma ɓa kad nda masa a wulak yaŋ ecew ecew aabay fe jə masa a ŋgiya.

²³Amaa nda masa ka wulak yaŋ ecew ecew da yaŋ jə ta manday ana, ava dəɓa ana, ka ndaw sə, ŋgesey ka jawa yaŋ tata avəda, afa manjah tata sə, aŋga ava jə masa aŋga mapa tehwe masa e dek dapa makəsparav tata sə, aabay. Kwa jene meemey masa aŋga mapa tehwe masa e dek dapa makəsparav aabay sə, ŋgesey mebərey.