Read Cuvok Rawma hay 15 Bible Online

Rawma hay 15 - Cuvok bible

Rawma hay 15

¹Amaa andakwa ndah masa ava gədaŋ ɓa dapa makəsparav, a lada anda ɓəsakwa bəle ta ndah masa ac ava gədaŋ pahata dapa makəsparav. Andə ta yahakwa sə, jə masa a wafandakwa babəla bay.

²A lada kwa waawa tandakwa da yah meŋgə jə masa da wafa maslavda tata. Ara nesey, andakwa fakwanay andə ta gəlakwa fəma fəma fa slam ana dapa makəsparav.

³Eve metehwe ana, anda sənakwa Kəristi sə, ka yah meŋgə jə masa a wafa kad aŋga babəla sə, aabay. Amaa ara mavinda dapa Ɗelewer mavəna, gege: «Malaf nda ta ndana hay masa ac ta lafakaa sə, ka təɗakata a yaŋ yey.»

⁴Jene hay fakwanay masa anda ŋgatakwa mavinda dapa Ɗelewer mavəna zleezle sə, ac mavinda ka ta sasərakandakwa, afa jaka pe mepəsek va matək rav masa ma ana a vandakwa sə, anda ŋgatakwa map mawulak yaŋ ta maŋgat jene da vara Zlavay.

⁵A lada Zlav nda mavana mepəsek dapa jene hay va matək rav sə, da vakwar gədaŋ ta manjah dapa macacal ma ara Yesu Kəristi ta waya.

⁶Ara nesey, akwar fakwanay fa slam ana, akwar da cama rav takwar pal amta va uway takwar pal amta ka ta hahəm Zlavay, Papaŋ ta Bay tandakwa Mazlakava Yesu Kəristi.

⁷Ara nesey, makəs vaw dapa taɓa takwar amta amta ara masa Kəristi ta kəsakwar ka ta mbaɗ Zlavay.

⁸Eve metehwe ana ya gwaɗakwar saya, Kəristi sə, a və yaŋ tata ka nda maŋga mezlər te Zuwef hay sə, afa e de ŋguzdecen Zlavay sə, aŋga nda maŋga mezlər eve cəvey ana ara masa ka gwaɗa. Ara nesey, ka ŋgana jene hay masa Zlav ka gwaɗa daha kad papaŋ ta papaŋ tec hay zleezle sə, avəda.

⁹Ta ndah masa aca sən Zlav bay sə, aca ra hahəm Zlavay mafay metekwen tata, ara masa mavinda, gege: «Mafay ana, ya ta hahəlakaɗ yaŋ fəma ta ndah dapa vavara hay masa aca sən Zlav bay. Ya ta slə laway ava mabəzan mezel takaa.»

¹⁰Mavinda saya, ke gweɗ, gege: «Akwar ndah masa Zuwef hay bay, mewesley fa slam ana ava ndah ta Zlavay.»

¹¹Mavinda saya, ke gweɗ, gege: «Akwar ndah masa Zuwef hay bay fakwanay, mahahəlan yaŋ ta Bay Zlavay. A lada tərsam hay fakwanay aca ra kəɗana ha kad aŋga.»

¹²Izay, nda mehwedek ma ke gweɗ saya, gege: «Ndana ɓa e te heyek dapa tərsam te Zesey, e te zleftek ka ta ŋgə bay da yaŋ ndah dapa vavara hay masa aca sən Zlav bay. Ndah ana ŋgesey, ac ta pə mawulak yaŋ teceŋ ta maŋgat jene da vara vaw.»

¹³A lada Zlavay, nda mavana mawulak yaŋ ta maŋgat jene sə, da nəhakwar eve mewesley va meteh masa mandəva fakwanay dapa makəsparav, afa akwar da ŋgat mawulak yaŋ ta maŋgat jene ka fəna nesey ana jaka pa gədaŋ mazlakava te Mesfen Mavəna.

¹⁴Malama va dəma hay, yey ava yaŋ taaɗaw ana, eve metehwe ana ya səniya, akwar ava yaŋ takwar ana, akwar manəha kaf ava mawal jə masa akwa wal maŋgiya mambəla ana, akwa sən jə masa te mesən fakwanay va akwa zlafa mekət vaw dapa taɓa takwar.

¹⁵Amaa dapa slam hay mekele sə, ya ka vindakwar leeter aɗaw ana nesey ava mawulak yaŋ ecew ecew ta masləfakwaɗ jə masa akwa səniya cay sə, aabay. Ya ŋgiya ara ŋgesey, afa Zlavay dapa mambəla ana tata,

¹⁶ke peɗiyey ka nda maŋga mezlər te Yesu Kəristi deveŋ ndah masa Zuwef hay bay. Ke peɗiyey ha wal pe mezlər ta Labara mambəla ana ta Zlavay, afa ndah masa Zuwef hay bay sə, aca ra tər ke jə masa mava kad Zlavay masa a wafa mabay. Jeŋ ana ŋgesey, Mesfen Mavəna ava yaŋ tata ana ka paɗ ha wal kad Zlavay.

¹⁷Mafay ana, dapa macam vaw ava Yesu Kəristi sə, ya zlafa meŋgə həɓa da yaŋ mezlərey aɗaw kad Zlavay.

¹⁸Kwa ye te gweɗ da yaŋ jene mekele sə, aabay, say da yaŋ mezlər masa Kəristi ta ŋgiya jaka vereyey te mehwedeɗec ndah masa Zuwef hay bay pa manah yaŋ kad Zlavay jaka pa ma hay masa ya ta gwaɗiya va mezlər hay masa ya ta ŋgiya,

¹⁹ava gədaŋ mazlakava te meŋgə cah hay va meŋgə jene hay masa aca rəzla nda, jaka pa gədaŋ mazlakava te Mesfen Mavəna. Ara nesey, masa ya ka bəzad Labara mambəla ana te Kəristi macəkuma bay dəga dapa berne te Zeruzelem kasl pa vavara te Iliri.

²⁰Amaa ya ka wal mabəzad ma ana ɗahw sə, dapa vavara hay masa ndah ana ac ka cəna ma da yaŋ mezel te Kəristi ana aabay heley. Ya ŋgiya ara nesey sə, afa ya da lam way da yaŋ sek ta way masa ndana mekele ka pana cay bay.

²¹Ara nesey, ya wal sə, a lada de ŋgə ara mavinda dapa Ɗelewer mavəna, gege: «Ndah masa ec ke sləfecen ma aabay sə, ac ta wala eve ndey teceŋ. Ndah masa ac ka cəna ma da yaŋ ana aabay heley sə, ac ta cəna avəda.»

²²Ya ka wulakaw dəɓa gaa hay te medə kad varakwar, amaa ya ka ŋgat ha aabay mafay te mezlərey ana nesey.

²³Təlam nesey sə, ya ka ndəvda mezlərey aɗaw dapa vavara ana hay ŋga cay. Mavay hay mabay masa ya ka hwar medey kad varakwar.

²⁴Ya wulakaw, ya ta daɗ kad varakwar sə, dapa medə taaɗaw kad pa vavara ta Espay. Eve metehwe ana ya wulak mawuzaɗakwar dapa medə taaɗaw jaka ava aŋga. Ara nesey, ya wal sə, akwar de jəniyey te medey kad pa vavara ana. Daha ya ka husaɗ varakwar cay sə, andə ta njahakwa kusetke ava akwar.

²⁵Amaa təlam nesey sə, ye də kad Zeruzelem ke te ŋgə mezlər ta makəsparav hay.

²⁶Ye te dey ana sə, afa Macam yaŋ hay ta ndah ta Zlavay da Masiduwan va da Akay ac ka cəkal jene hay ka ta jən makəsparav hay de Zeruzelem masa ac maslamarga hay.

²⁷Eceŋ ana, ac ta wulak macəkal səlay ana dapa leŋgesl teceŋ. Amaa eve metehwe ana sə, cama a lada ece jəneceŋ, afa makəsparav hay masa Zuwef hay, ac ka vən mapəsma hay masa Mesfen Mavəna te veceŋ sə, ava ndah masa ac Zuwef hay bay. Mafay ana, eceŋ may, a lada ece jənec Zuwef hay eve zleley tec hay.

²⁸Daha ya ka ndəvda mezlərey ana va mevecen səlay ana cay, ye te dey kad pa vavara ta Espay jaka varakwar.

²⁹Ya səniya, daha ya ka ta husata a varakwar sə, ya ta daɗ ava mapəsma mazlakava ana te Kəristi.

³⁰Malama va dəma hay, ya kəɗakwar ha jaka pe mezel ta Bay tandakwa Mazlakava Yesu Kəristi va jaka pa mawal nda te Mesfen Mavəna. Macamakwa vaw dapa meŋgə vəram ta macə mbahw kad Zlavay mafay taaɗaw.

³¹Macə mbahw, afa ya da mbəlata dapa ha ta ndah de Zudey masa ac ka kəs ma te Kəristi aabay. Asaya, jə masa ya ta hwadiya kad makəsparav hay de Zeruzelem sə, ac da kəsaw eve mewesley.

³²Ara nesey, daha Zlav ka walaw sə, ya ta husaɗ varakwar eve mewesley. Daha ya ka husaɗ cay, ya ta sasak vaw kusetke dapa taɓa takwar.

³³A lada Zlav nda mavana metehey kad ndana hay, da njah ava akwar fakwanay. E de ŋgey!