Read Cuvok Rawma hay 16 Bible Online

Rawma hay 16 - Cuvok bible

Rawma hay 16

¹Ya zləraɗ kad varakwar dəmaŋ tandakwa Febey, ŋgwaz mesnendey majəna Macam yaŋ ta ndah ta Zlavay de Senkərey dapa mezlər hay.

²Makəsaw mambəla ana eve mezel ta Bay tandakwa Mazlakava. Makəsaw sə, ara masa a lada kad makəsparav hay. Majənaw cəɗem cəɗem dapa masa a hwar majəna nda takwar, afa aŋga ava yaŋ tata ana ka jən ndana hay mabay, mahwalhwala ana, ke jəniyey may.

³Megweɗefec Pəriska va mawula Akilas. Eceŋ sə, ac ndah masa andə ke ŋgə mezlər te Yesu Kəristi fa slam ana.

⁴Ac ka və yaŋ teceŋ ke te mbəlek mesfeney aɗaw avəda dapa maməcay. Meŋgec wasay ana nesey sə, ya amta bay, amaa ndah dapa Macam yaŋ hay ta ndah ta Zlavay fakwanay masa Zuwef hay bay, ece ŋgec wasay may.

⁵Asaya, megweɗefec Macam yaŋ ta ndah ta Zlavay masa ac makwasa da way teceŋ. Magwaɗafa Epaynet, guula aɗaw masa ya waya elehey saya may, aŋga sə, aŋga nda makəsa ma te Kəristi macaaca ana dapa vavara ta Azi.

⁶Magwaɗafa Maaray, ŋgwaz masa ke ŋgə mezlər mabay mafay takwar.

⁷Asaya, megweɗefec Andərawnikus va Zuniyas. Ac tərsam taaɗaw hay, andaw ka njah dapa daŋgay fa slam ana eve eceŋ. Eceŋ sə, ac maslaŋ hay masa ndana hay ece nehecen yaŋ mabay. Eceŋ sə, ac ka kəsa ma te Kəristi avəda kamma fe yey.

⁸Magwaɗafa Ampəliyatus, guula aɗaw masa ya waya elehey dapa Bay Mazlakava saya.

⁹Magwaɗafa Urbeŋ, nda masa andə ka ŋgakwa mezlər te Kəristi fa slam ana ava aŋga saya may. Magwaɗafa Istakis, guula aɗaw masa ya waya elehey.

¹⁰Asaya, magwaɗafa Apeles, nda masa ke ŋguzdek makəsparav tata metehwe ana da yaŋ Kəristi. Megweɗefec ndah da way ta Aristawbul saya may.

¹¹Magwaɗafa Herawdiyaŋw, tərsam taaɗaw. Asaya, megweɗefec ndah medek kad hwaɗ ta way ta Narsis, masa ac macama ava Bay Mazlakava.

¹²Megweɗefec Tərifen va Tərifaws, ŋgwazah mavana yaŋ teceŋ te meŋgə mezlər ta Bay Mazlakava saya may. Magwaɗafa dəmaŋ tandakwa Persiz, guula aɗaw masa ya waya elehey, aŋga masa mavana yaŋ tata mabay ka ta ŋgana mezlər kad Bay Mazlakava.

¹³Magwaɗafa Rufus, nda maŋga mezlərey masa Bay Mazlakava ka yahaɗha va mamaŋ masa aŋga ara mma may.

¹⁴Asaya, megweɗefec Asiŋkərit, Fəlagaŋw, Hermes, Patərawbas, Hərmas, malamaŋ hay va dəmaŋ hay masa ac de verec dərŋga.

¹⁵Megweɗefec Filalawgaws va Zuli, Nerey va dəmaŋ, Awlimpas va makəsparav hay fakwan faŋga saya.

¹⁶Megweɗ fa vaw dapa taɓa takwar amta ava amta ava mahumbat vaw ara malamaŋ va dəmaŋ hay dapa makəsparav. Macam yaŋ hay ta ndah ta Zlavay masa te Yesu Kəristi fakwanay fana aca gwaɗafakwar saya may.

¹⁷Malama va dəma hay, ya kəɗakwar ha, map leŋgesl fa ndah meheheɗecen dar ta ndana hay ka ta hwadakwar mavan vaw dapa taɓa takwar. Ara nesey, ec te teɗdec dapa makəsparav hay kad pe mebərey ava magwaɗ ma hay masa ece teh bay da yaŋ mesesərek hay masa akwar ta cəna. Madaɓa dəreŋ eve eceŋ,

¹⁸afa tərsam ta ndah ana ŋgesey sə, aca ŋgə mezlər kad Kəristi Bay tandakwa Mazlakava bay, amaa aca ŋgə mezlər sə, mafay ta hwaɗ teceŋ. Jaka pa ɗaf ta ma tec hay masa mambəla ana va maɗay tec hay masa ta mafəca nda ŋgesey sə, ece zec ndah kelembe hay.

¹⁹Eve metehwe ana, ndana hay fakwanay aca səniya akwa nah yaŋ kad Bay Mazlakava. Mafay ana, ye wesl mabay da yaŋ akwar, amaa ya wal sə, akwar da njah ka ndah eve leŋgesl te meven jene ka ta ŋgə jə mambəla ana va jə masa mapana ana ta malalak vaw fe jə masa e teh bay.

²⁰Zlav nda mavana meteh kad ndana hay sə, mbala a ta kakaɗan yaŋ ta Saadan, bay ta haalay da dara sek takwar. A lada mambəla ana ta Bay tandakwa Mazlakava Yesu da njah ava akwar!

²¹Timawtey, nda masa andə ŋgə mezlər ava aŋga fa slam ana, a gwaɗafakwar. Asaya, Luziyus, Zasaŋw va Sawsipatar, ac tərsam taaɗaw hay aca gwaɗafakwar may.

²²Yey, Tertiyus, nda mavinda leeter ana nesey, ya gwaɗafakwar dapa macam vaw ava Bay Mazlakava, nda macamandakwaɗ yaŋ.

²³Gayus a gwaɗafakwar, aŋga sə, aŋga nda masa ya ka njah da way tata, Macam yaŋ ta ndah ta Zlavay may, aca kwas vaw ta macə mbahw da way tata. Erastus, nda matəhaza səlay dapa berne fana va malamaŋ tandakwa Kartus aca gwaɗafakwar may. [

²⁴A lada mambəla ana ta Bay tandakwa Mazlakava Yesu Kəristi da njah ava akwar fakwanay. E de ŋgey!]

²⁵Mahahəmakwa Zlav masa aŋga ava gədaŋ ta masasalakwar dapa makəsparav ara Labara mambəla ana va mabəzad ma da yaŋ Yesu Kəristi, ara maŋguzad jene hay maraɓa ta Zlavay dapa maləmad vaw tata dəga zleezle.

²⁶Amaa təlam nesey, mawulak yaŋ tata maraɓa dapa maləmad vaw tata sə, ka ŋguzdakata kad a vəda. Ara nesey, tərsam hay masa Zuwef hay bay fakwanay sə, ac ta səna avəda jaka pe ɗelewer ta ndah mehwedek ma. Zlav Ndazlay masa aŋga ɓa dəga zleezle sə, ka vana cəvey ana, afa tərsam hay fakwanay aca ra kəs ma tata va manahan yaŋ.

²⁷Mahahəmakwa Zlavay, nda masa aŋga eve leŋgesl te meven jene pal aŋga amta! Mahahəmakwa jaka pa Yesu Kəristi katar ka midakw. E de ŋgey!