Read Cuvok Rawma hay 2 Bible Online

Rawma hay 2 - Cuvok bible

Rawma hay 2

¹Kaa masa ke təɗec ma yaŋ ndana hay, kwa ka waawa, ka ava ma amta te megweɗ aabay, afa masa ke təɗec ma yaŋ ndana hay ŋgesey sə, ka ka jawa yaŋ takaa avəda, anjəkar kaa ana ka dapa maŋgiya ara eceŋ sə, ŋgesey ka təɗ ma yaŋ kad pa yaŋ takaa ana.

²Anda sənakwa matəɗ ma ta Zlavay sə, e ŋgə ara metehwe ana te gweɗey da yaŋ ndah maŋgana mezlərey ana ara nesey.

³Kaa masa ka təɗ ma yaŋ ndah maŋga jə masa kaa ana ka ŋgiya sə, ka wulakiya ka ta mbəlata fa matəɗ ma ta Zlav geyey?

⁴Daha aabay, ka ka paɗ mambəla ana tata masa macəkuma bay, mepəsek tata va mevel tata ke jene taambəla geyey? Ka sən masa a ŋgakaa mambəla ana ŋgesey sə, afa a da hwadaɗakaa pa maŋgwad rav[1] sə, bay geyey?

⁵Ava masasal yaŋ takaa, ava masasal rav takaa, ka ŋgə sə, ke ɓəcek mazam rav ta Zlavay kad pa yaŋ takaa kad pa pas ta matəɗ ma. Pəsaŋga ana ŋgesey, Zlav e te ŋguzdek mazam rav tata va matəɗ ma tata masa ara aŋga ana,

⁶a ta pəl meyəv ta kwa waawa təɗe fe mezlər ta nda ana.

⁷Pəsaŋga ana ŋgesey, e te vec mesfen katar ka midakw kad ndah maŋga gədaŋ te meŋgə jə mambəla ana va mayah mehehəmey, mahahəl yaŋ va manjah masa e ndəv aabay.

⁸Amaa e te ŋguzdek mazam rav tata fakwanay kad yaŋ ndah maŋgaŋgəriya, ndah masa aca gwam ka kəs ma metehwe ana bay va ndah masa ec ke tərec ke ɓel te meŋgə jene hay mambəla ana aabay.

⁹Aŋga, ndana hay fakwan maŋgana jene mambəla ana hay aabay sə, ac ta sə marga, ac ta ŋgə zidaw macəkuma bay. Macaaca ana sə, Zuwef hay ɗagay, ava dəɓa ana, ndah masa Zuwef hay bay.

¹⁰Amaa ndana hay fakwan maŋga jene mambəla ana, macaaca ana sə, Zuwef hay, ava dəɓa ana, ndah masa Zuwef hay bay, Zlav e te mbeɗeceŋ, e te hehəlecen yaŋ va menjeheɗec pe metehey,

¹¹afa da vara Zlavay sə, mapəl nda meepel aabay.

¹²Ndah fakwan maŋga mebər masa aca sən ma majawa ta Muyiz bay sə, ac ta məcata, kwa ma majawa ta Muyiz ana e te təɗec ma yaŋ aabay may. Amaa ndah fakwan maŋga mebər masa aca sən ma majawa ta Muyiz, ma majawa ta Muyiz ana e te təɗec ma yaŋ.

¹³Eve metehwe ana sə, Zlav a pə ka ndah maŋga mezlər ara aŋga ana fəma tata sə, ndah macəka zləmay fa ma majawa bay, amaa ndah maŋga jə masa ma majawa ana te gweɗey.

¹⁴Ndah masa Zuwef hay bay sə, aca sən ma majawa ta Muyiz bay, amaa daha ec ke ŋgə jə masa ma majawa ana te gweɗey, kwa ac ka sasərakaw aabay sə, ŋgesey, ara ac ava aŋga ɓa dapa rav teceŋ.

¹⁵Manjah tec e ŋguzdek sə, mezlər masa ma majawa a nəkiya sə, aŋga mavinda dapa rav teceŋ. Mawulak yaŋ ta rav teceŋ a tə yaw da yaŋ ana. Pas mekele mawulak yaŋ tec e jeweceŋ, pas mekele e receŋ.

¹⁶A ta walata mambəla ana pas masa Zlav e te təɗec ma a yaŋ ndana hay jaka pa Yesu Kəristi da yaŋ jene hay maraɓa masa ac ta ŋgiya dapa manjah teceŋ ara Labara mambəla ana masa ya bəzadiya te gweɗey.

¹⁷Amaa daha kaa masa ke gweɗ, ka nda Zuwef ana nesey sə, ka gas vaw fa ma majawa, ka ŋgə həɓa da yaŋ Zlav takaa,

¹⁸kaa masa ka sən mawulak yaŋ ta Zlavay, ma majawa ka sasərakakaa ta mayah meŋgə jə masa mambəla ana,

¹⁹kaa masa ka kəsiya dapa leŋgesl takaa, ka zlafa mepedecen ma ta mahazlaw hay, ka ka paɗ yaŋ takaa ka slam mawaɗa ta ndah masa ac dapa ləvaŋ,

²⁰ka ka paɗ yaŋ takaa ka nda makəta ndah masa ece sən jene bay, ka nda masasəraka ndah masa ac ara wude hey, afa ka ka kəsaw tehwe ma majawa ka ŋguzdakaa mesən jene va ka ŋguzdakaa metehwe ana.

²¹Yaw e tehey, kaa masa ka ka paɗ yaŋ takaa ka nda masasəraka ndana hay, amaa ka sasərak yaŋ takaa ana aabay sə, meemey! Kaa masa ka bəzad ma kad ndana hay, makar e teh bay, amaa kaa ana ke kərey!

²²Ka pay fa maŋgə madama, amaa kaa ana ka ŋgə madama ana! Mat mbat a ndarakaa, amaa ka kar jə ta mbat ana hay dapa veŋ ta mbat ana!

²³Ka ŋgə həɓa afa Zlav ka vakaa ma majawa, amaa ka nah yaŋ kad pa ma majawa ana aabay, ŋgesey a hwadafa hwar kad fa Zlavay!

²⁴Eve metehwe ana, ara mavinda dapa Ɗelewer mavəna, gege: «Ndah masa Zuwef hay bay aca laf mezel ta Zlavay mafay takwar Zuwef hay.»

²⁵Kwa mawulak yaŋ dapa aabay, daha ka nah yaŋ kad pa ma majawa sə, ŋgesey, maŋgal ŋgwal a jənakaa. Amaa daha ka nah yaŋ kad pa ma majawa aabay sə, kwa ava ŋgwal takaa maŋgəla ana sə, ka ara nda masa ŋgwal maŋgəla bay.

²⁶Naa daha nda masa ŋgwal tata maŋgəla bay, a cəp ma hay masa mavinda dapa ma majawa ta Muyiz sə, Zlav a ta pə nda ana ŋgesey ara nda masa ŋgwal tata maŋgəla aabay geyey?

²⁷Nda masa ŋgwal tata maŋgəla bay dapa slaw ta vaw, amaa a nah yaŋ kad pa ma majawa ta Muyiz sə, a ta təɗakaa ma yaŋ, afa kaa masa ŋgwal takaa maŋgəla, ka ava ma majawa mavinda ɓa, amaa ka nah yaŋ kad pa aabay.

²⁸Ma da sən nda masa aŋga nda Zuwef eve metehwe ana sə, jaka pa jə masa ndey a wala babəla bay, kwa daha aabay jaka pe meɗel jene masa e weley fa slaw ta vaw ara maŋgal ŋgwal babəla bay,

²⁹amaa nda Zuwef eve metehwe ana sə, e sən jaka pe jə masa aŋga maraɓa dapa vaw tata, maŋgal ŋgwal masa dapa rav. Maŋgal ŋgwal ana ŋgesey, e dek dapa Mesfen Mavəna, bəna e dek dapa ma majawa mavinda bay. Nda Zuwef metehwe ana nesey sə, a ta ŋgat mehehəm tata vara ndana hay bay, amaa vara Zlavay.