Read Cuvok Rawma hay 3 Bible Online

Rawma hay 3 - Cuvok bible

Rawma hay 3

¹Daha ara nesey, Zuwef hay aca ra fəna ndah masa Zuwef hay bay sə, eve melemey? Maŋgal ŋgwal teceŋ sə, a jəna nda eve mey?

²Aŋga, Zuwef hay ece fənec dapa jene hay gaa. Zlav a ŋguzad ma tata magwaɗa ana daha macaaca ana sə, kad Zuwef ana hay ɗagay.

³Andə da gwaɗakwa mey? Naa daha ndah dərziya deveŋ eceŋ ac ke ŋgə mezlər eve cəvey ana aabay, meŋgə mezlər eve cəvey ana aabay tec ŋgesey sə, a ta vavəsa meŋgə mezlər eve cəvey ana ta Zlav avəda geyey?

⁴Away, kwa e ŋgə ara na bay! Ndana hay aca ra səna, Zlavay sə, aŋga nda masa e gweɗ metehwe ana, ndamagəda sə, a ŋgal ma, ara masa mavinda dapa Ɗelewer mavəna, gege: «A lada kwa waawa da səna kaa sə, ka Zlav maŋga mezlər ara aŋga ana dapa ma takaa hay. Asaya, a lada ka njah ka bigula daha aca təɗakaa ma a yaŋ.»

⁵Amaa daha meŋgə jene tandakwa ara aŋga ana aabay nesey, a ta jən meŋguzdek meŋgə jene ara aŋga ana ta Zlavay sə, anda da gwaɗakwa mey? Daha Zlav a kəlapandakwa ava mazam rav tata sə, ŋgesey, ke ŋgə jene ara aŋga ana aabay geyey? Ye gweɗ fana nesey ara ndana hay ta gwaɗiya.

⁶Away, kwa e ŋgə ara na bay! Daha Zlav ke ŋgə jene ara aŋga ana aabay sə, naa e te təɗec ma a yaŋ ndana hay sə, meemey?

⁷Amaa daha maŋgal ma aɗaw aŋga mapa ke te ŋguzdek eve cəv mapana te metehwe ana ta Zlavay va masak mehehəm tata sə, naa e təɗiyey ma yaŋ saya sə, mafay te melemey?

⁸Daha ara nesey sə, anda gwaɗakwa: «Maŋgakwa jene hay mambəla ana aabay, afa e de ŋguzdek jə mambəla ana» sə, bay fəmey? Ara ndah megweɗ fandakwa mambəla ana aabay te gweɗ, gege: «Andakwa ana te gweɗey.» Ndah ana ŋgesey ac mak te mejewey!

⁹Naa andakwa Zuwef hay, mefənec ndah masa Zuwef hay bay la geyey? Away, mefənec aabay! Ya ka gwaɗakwaɗ ta manjəkəlak cay, ndana hay fakwanay, kwa Zuwef hay va kwa ndah masa Zuwef hay bay, mebər a ŋgə bay da yaŋ eceŋ.

¹⁰Ara mavinda dapa Ɗelewer mavəna, gege: «Ndana maŋgana jene ara aŋga ana sə, aabay, kwa nda amta aabay.

¹¹Kwa ndana eve leŋgesl sə, aabay, kwa nda amta mayaha Zlavay sə, aabay.

¹²Ac fakwanay, ac ka gərda cəv mambəla ana, ec ke zlekec fakwan fa slam ana, Ndana maŋgana jene mambəla ana sə, aabay, kwa nda amta aabay.

¹³Maŋgurlam teceŋ sə, aŋga ara jəv mawuna masa e zekey. Neneŋ teceŋ sə, e jəneceŋ ta mafəc ndana hay. Medek dapa ɗaf ta ma teceŋ sə, lak ta bay ta wudam.

¹⁴Ma teceŋ sə, manəha eve megwederey va ma hay masa dendərek.

¹⁵Sek tec e hwedec zef zef ka ta kəɗ ndana hay ka macəhwandaw.

¹⁶Magədas jene hay va marga hay ece ŋgey dapa cəv hay masa ece də jaka pa.

¹⁷Aca sən cəv masa e hwedek meteh pa taɓa ta ndana hay sə, aabay.

¹⁸Kwa ece lel fa Zlav aabay.»

¹⁹Aŋga, andakwa sə, anda sənakwa jene fakwanay masa ma majawa ta gwaɗiya, ma ana e gweɗ sə, kad ndah masa ma majawa ana mava kad eceŋ, afa kwa ndana da zlafa mawuna ma ka ta ləmad yaŋ tata bay. Ara nesey, ndana hay fakwanay ac ta walata fa yam te ndey ta Zlavay, ac ndah te mebərey.

²⁰Mafay ana, ndana maŋga mezlər ara aŋga ana fa yam te ndey ta Zlavay ava manah yaŋ kad pa ma majawa sə, aabay. Eve metehwe ana, ma majawa sə, a vana cəv kad ndana da səna mebərey.

²¹Amaa təlam nesey, Zlav ka ŋguzdakandakwa, gege: «A pandakwa ka ndah maŋga mezlər ara aŋga ana fa yam te ndey tata sə, jaka pa ma majawa bay.» Ma majawa ta Muyiz va ndah mehwedek ma ac ka tə yaw da yaŋ ana zleezle.

²²Zlav a pə nda ka nda maŋga mezlər ara aŋga ana fa yam te ndey tata sə, jaka pa makəsparav teceŋ dapa Yesu Kəristi. A ŋgiya ana sə, mafay ta ndana hay fakwanay, afa vara aŋga sə, a pal nda meepel aabay.

²³Ndana hay fakwanay ac ke ŋgə mebərey, ac mavəna eve membeɗ ta Zlavay,

²⁴amaa Zlavay, dapa mambəla ana tata, ke tərec ka ndah maŋga mezlər ara aŋga ana fa yam te ndey tata taambəla jaka pa Yesu Kəristi, nda mepəlekec dapa ɓel te mebərey.

²⁵Aŋga masa Zlav ta viya ara jə te meŋgə kwakwas masa ndana hay aca ra ŋgat mapal mebər tec ava aŋga jaka pe bembez tata jaka pe cəv ta makəsparav. Ara nesey, Zlav ka wal meŋguzdek aŋga sə, aŋga nda maŋga mezlər eve cəvey ana cəɗem cəɗem ara masa zleezle ka gərda ndana hay, ke təɗec ma yaŋ mebər tec aabay,

²⁶ke pec sek kad ndana hay. A ŋguzad meŋgə jene ara aŋga ana tata ta pəsna nesey sə, afa a da njah ka nda maŋga mezlər ara aŋga ana va mepec makəsparav hay te Yesu ka ndah maŋga mezlər ara aŋga ana.

²⁷Jene magəra masa andə da ŋgakwa həɓa mafay ana sə, ɓa saya geyey? Away, ɓasabay. Mafay te mey? Afa Zlav a ŋgaf sə, manah yaŋ kad pə ma majawa bay, amaa makəsparav.

²⁸Aŋga, eve metehwe ana, anda sənakwa Zlav e pec ndana hay ka ndah maŋga mezlər ara aŋga ana sə, jaka pa makəsparav, bəna mafay ta manah yaŋ teceŋ kad pa ma majawa bay.

²⁹Daha aabay akwa wulakiya Zlavay sə, aŋga Zlav te Zuwef hay babəla geyey? Naa aŋga Zlav ta ndah masa Zuwef hay bay sə, may? Metehwe ana, aŋga Zlav ta ndah masa Zuwef hay bay sə, may,

³⁰afa Zlav pal amta masa e te pec Zuwef hay va ndah masa Zuwef hay bay ka ndah maŋga mezlər ara aŋga ana jaka pa makəsparav.

³¹A wal megweɗ sə, makəsakwaɗ mehehəm ta ma majawa avəda fakwan jaka pa makəsparav la geyey? Away, ara na bay! Amaa sesəker anda vakwa mehehəm kad ma majawa ana.