Read Cuvok Rawma hay 4 Bible Online

Rawma hay 4 - Cuvok bible

Rawma hay 4

¹Andə da gwaɗakwa da yaŋ Abəraham papaŋ ta papaŋ tandakwa sə, mey? E ŋgetek dapa gədaŋ tata ɓa sə, mey?

²Daha Zlav ka paɗ Abəraham ka nda maŋga mezlər ara aŋga ana fəma tata mafay te mezlər masa aŋga ta ŋgiya sə, ŋgesey, a ŋgana həɓa avəda, amaa fəma ta Zlav bay.

³Eve metehwe ana mavinda dapa Ɗelewer mavəna, gege: «Abəraham sə, ka kəs ma ta Zlav pa rav. Ara nesey, Zlav ka paɗ ka nda maŋga mezlər ara aŋga ana mafay ta makəsparav tata.»

⁴Nda masa e ŋgə mezlərey sə, a ŋgat mapal meyəv tata. Mapal meyəvey ana ŋgesey sə, mapa ara mav jene taambəla bay, amaa jə masa cama ac da vana mafay te mezlər tata.

⁵Nda masa ke ŋgə mezlər aabay, amaa a kəs ma ta Zlavay pa rav tata eve megweɗ, Zlav sə, a kəs nda te mebərey. Ara nesey, Zlav a kəs makəsparav tata ana ŋgesey, a ta paɗ ka nda maŋga mezlər ara aŋga ana.

⁶Ara nesey, zleezle bay Deevet ke gweɗ da yaŋ mambivaw ta nda masa Zlav ta piya ka nda maŋga mezlər ara aŋga ana mafay te mezlər hay masa aŋga ta ŋgiya sə, bay, gege:

⁷«Mapəsma ɓa, kad ndah masa Zlav ke pəlecen mebər tec hay, ke vevəsecen mezlek tec hay.

⁸Mapəsma ɓa, kad nda masa Bay Mazlakava a slaf mebər tata ɓasabay.»

⁹Mambivaw ana nesey sə, aŋga mapa kad ndah masa Zuwef hay war geyey, kad ndah masa Zuwef hay bay may? Aŋga, andə ka gwaɗakwa: «Zlav a paɗ Abəraham ka nda maŋga mezlər ara aŋga ana sə, mafay ta makəsparav tata.»

¹⁰Dapa masa Zlav a pə Abəraham ka nda maŋga mezlər ara aŋga ana sə, wagaa a ta ŋgal ŋgwal geyey, ava dəɓa ana? Away, ava dəɓa ana bay, amaa wagaa a ta ŋgal ŋgwal tata.

¹¹Ava dəɓa ana, Abəraham ka ŋgat jə ta maɗal nda ta maŋgal ŋgwal tata ara tampaŋw te meŋgə jene ara aŋga ana masa a ŋgatiya jaka pa makəsparav dapa masa aŋga ava aŋga dəga ka ŋgəla ŋgwal tata aabay heley. Ara nesey, ka tərata papaŋ ta makəsparav hay fakwanay masa kwa ŋgwal tec maŋgəla bay, afa Zlav de pec ka ndah maŋga mezlər ara aŋga ana may.

¹²Asaya, aŋga papaŋ ta ndah masa ŋgwal tec maŋgəla may. Amaa naa ndah masa ŋgwal tec maŋgəla fakwan bay, ndah masa ŋgwal tec maŋgəla, amaa ac makəsparav hay macəpa makəsparav ta papaŋ ta papaŋ tandakwa Abəraham wagaa maŋgal ŋgwal tata.

¹³Zlav ka gwaɗa Abəraham va tərsam tata, ac ta cam vavara kad eceŋ. Abəraham a ŋgat ma magwaɗa daha nesey sə, mafay ta masa aŋga ta nahda yaŋ kad pə ma majawa bay, amaa afa aŋga nda maŋga mezlər ara aŋga ana jaka pa makəsparav.

¹⁴Daha ndah ma ta cama jene hay ac ta ŋgatiya mafay ta masa ac ta nah yaŋ kad pə ma majawa sə, ŋgesey, makəsparav a vavəsata, ma masa magwaɗa ana daha a tərata ara jene taambəla,

¹⁵afa ma majawa ana sə, e bezləŋgeɗek mazam ta Zlavay. Dapa slam masa ma majawa aabay sə, mambərasl ma majawa ana sə, aabay may.

¹⁶Ara nesey, ma masa Zlav ka gwaɗa daha da yaŋ macam jene sə, e dek jaka pa makəsparav, afa e de tər ke jene masa taambəla metehwe ana masa e de ŋgə kad tərsam ta Abəraham fakwanay. Ma ana e de ŋgə sə, mafay ta ndah manaha yaŋ kad pə ma majawa babəla bay, amaa mafay ta ndah makəsparav hay ara Abəraham, papaŋ ta papaŋ tandakwa fakwanay.

¹⁷Ara mavinda dapa Ɗelewer mavəna, gege: «Yey Zlavay, ya ka paɗakaa, ka papaŋ ta tərsam hay gaa.» Yaw, Abəraham aŋga papaŋ tandakwa fakwanay, dapa masa a kəs ma tata fa yam te ndey ta Zlavay. Zlav masa mapəraka ndana hay dapa maməcay, aŋga nda malama jene masa malama bay heley.

¹⁸Abəraham sə, ka pə mawulak yaŋ ta maŋgat jene masa ndana ka wulak maŋgatiya aabay. Ara nesey, ka kəsaw, ka tərata papaŋ ta tərsam hay gaa ara masa Zlav ka gwaɗa, gege: «Wudeh da hwaɗ takaa sə, ec te yeslə gaa.»

¹⁹Dapa masa Zlav a gwaɗa ana ŋgesey sə, mavay tata e ŋgə mbala temere, kwa makəsparav tata ke sef aabay dapa masa a wulak yaŋ fa vaw tata masa mbala a ta məcay va fa ŋgwaza Sara, masa aŋga dəlay.

²⁰Ava aŋga ana fakwanay makəsparav tata ke sef aabay, ka wulak yaŋ ecew ecew da yaŋ jə masa Zlav a ta vana sə, aabay. Amaa ka ŋgat gədaŋ fəma fəma jaka pa makəsparav va gədaŋ ta mahahəm Zlavay,

²¹a səniya tehwe masa Zlav aŋga ava gədaŋ mazlakava ta maŋgan jə masa aŋga ka gwaɗa daha.

²²Mafay ana, Zlav ka paɗ ka nda maŋga mezlər ara aŋga ana.

²³Amaa ma hay masa ece gweɗ: «“Zlav ka paɗ ka nda maŋga mezlər ara aŋga ana” sə, ac mavinda mafay tata aŋga amta bay,

²⁴amaa ma ana hay mavinda mafay tandakwa masa Zlav ta paɗandakwa ka ndah maŋga mezlər ara aŋga ana, andakwa masa makəsa ma ta Zlav mepərekek Bay tandakwa Mazlakava Yesu dapa maməcay pa rav tandakwa.

²⁵Zlav ka paɗ pa ha ta ndana hay, ac da kəɗa avəda mafay te mebər tandakwa. Amaa, Zlavay ana ke pərekek avəda dapa maməcay, afa a da tərandakwa ka ndah maŋga mezlər ara aŋga ana fəma tata.»