Read Cuvok Rawma hay 5 Bible Online

Rawma hay 5 - Cuvok bible

Rawma hay 5

¹Ara nesey, Zlav ka tərandakwa ka ndah maŋga mezlər ara aŋga ana jaka makəsparav, təlam nesey andakwa manjaha dapa metehey ava Zlavay jaka pa Bay tandakwa Mazlakava Yesu Kəristi.

²Anda ŋgatakwa cəv kad pa mambəla ana ta Zlavay masa andakwa masasala dapa nesey sə, jaka vara vaw jaka pe cəv ta makəsparav. Asaya, anda ŋgakwa həɓa, afa andakwa ava mawulak yaŋ ta maŋgat mehehəm ta Zlavay.

³Kad veŋ ana saya, anda ŋgakwa həɓa sə, afa andakwa dapa marga. Anda sənakwa marga hay sə, ece heyek maŋgə gədaŋ te medey fəma fəma,

⁴maŋgə gədaŋ te medey fəma fəma e heyek majah vaw dapa marga hay. Majah vaw dapa marga hay e heyek map mawulak yaŋ ta maŋgat jene.

⁵Map mawulak yaŋ ta maŋgat jene ana sə, a ta pandakwa hwar pe ndey aabay, afa Zlav ava yaŋ tata ana, ka kwakwacaɗ mawal nda tata macəkuma bay pa rav tandakwa jaka pe Mesfen Mavəna masa aŋga ta vandakwa.

⁶Dapa masa andakwa ava gədaŋ te membəlek dapa mebər aabay sə, Kəristi ka məcata mafay tandakwa ndah maŋga mebər hay. A məcay ana sə, dapa pas masa Zlav ta piya.

⁷Anda sənakwa marga dapa kad ndana da kəs maməc pa slam ta nda maŋga mezlər ara aŋga ana. Ayakwa, gəla mafay ta nda maŋga jene mambəla ana sə, andə ta ŋgatakwa ndana mazlafa matəhaz rav ta maməc pa slam tata ɓa.

⁸Amaa sesəker dapa masa Kəristi a məc pa slam tandakwa sə, andakwa dapa mebər heley, ara nesey, Zlav e ŋguzdek a walandakwa elehey.

⁹Təlam nesey, Zlav ka tərandakwa avəda ka ndah maŋga mezlər ara aŋga ana jaka pe bembez te Yesu. Naa daha ara nesey sə, Zlav a ta mbəlandakwa avəda dapa mazam ta rav tata jaka pa Yesu ka fəna nesey ana aabay ŋgəɗa geyey?

¹⁰Eve metehwe ana, masa andakwa maslagəra ta Zlavay sə, andə ka ŋgatakwa madərazl ma ava aŋga jaka pa maməc ta Wudiya. Təlam nesey andakwa madərazla ava aŋga. Naa daha ara nesey sə, Zlav a ta mbəlandakwa avəda jaka pa manjah ta Wudiya ka fəna nesey ana aabay ŋgəɗa geyey?

¹¹Mafəna nesey ana saya sə, andə ta ŋgakwa həɓa ta macam vaw ava Zlavay mafay ta Bay tandakwa Mazlakava Yesu Kəristi masa aŋga ta dərazlandakwaɗ ma ava Zlavay təlam nesey.

¹²Mafay ana, ara masa mebər e dek kad pa vavara jaka vara nda amta, mezel Adamaw. Mebərey ana ke hwedek maməcay. Ara nesey, maməc ka ɓəla ndana hay fakwanay dapa vavara, afa ac fakwanay ac ka ŋgə mebərey.

¹³Wagaa Zlav a ta van ma tata majawa kad Muyiz sə, mebər aŋga dapa vavara cay. Amaa ara masa ma majawa aabay heley sə, Zlav ka ŋgaf mebərey ana aabay may.

¹⁴Anjəkar, dəga fa Adamaw kasl fa Muyiz sə, maməc ka ŋgə bay da yaŋ ndana hay. Maməcay ana a ŋgə bay sə, kwa da yaŋ ndah masa ac ke ŋgə mebər aabay ara Adamaw masa ka nah yaŋ kad pa ma majawa ta Zlav aabay. Adamaw ana sə, aŋga mececel ta Adamaw mekele masa e te dekey.

¹⁵Amaa mambəla ana ta Zlav masa a viya kad ndana sə, aŋga wal eve mebər ta Adamaw, afa daha maməc e tetəɓec ndana hay fakwanay jaka pe mebər ta nda amta sə, naa mambəla ana ta Zlavay sə, a fəna gaa aabay geyey. Mambəla ana tata masa a viya kad ndana hay gaa taambəla ŋgesey sə, aŋga eve mehehəm mabay, e vek sə, jaka pa nda amta, nda ana sə, mezel Yesu Kəristi.

¹⁶Mavə jene ta Zlavay sə, e heyek wudiya ana wal ava te mebər ta nda amta. Eve metehwe ana, ava dəɓa te mebər ta nda amta, mezel Adamaw, matəɗ ma ta Zlav ke heyek majaw ndana hay ke te təɗec ma yaŋ. Amaa mambəla ana ta Zlavay masa aŋga ta viya ava taambəla sə, ke tərec ndana hay avəda te mebər hay mabay sə, meŋgə jene ara aŋga ana.

¹⁷Aŋga, eve metehwe ana, maməc ke ŋguzdek meŋgə bay tata da yaŋ ndana hay jaka pe mebər ta nda amta ana ŋgesey. Amaa jaka pa Yesu Kəristi pal aŋga amta anda ŋgatakwa jene hay gaa mafəna ana. Ndah masa aca ŋgat mambəla ana mabay ta Zlavay va mavə jene te mezlər ta mambəla nda ac ta njahay va ac te ŋgə bay mafay te Kəristi.

¹⁸Yaw ara masa ndana hay fakwanay ac majawa mafay te mebər ta ndana pal amta, ara aŋga ana meŋgə jene ara aŋga ana ta ndana hay fakwanay masa a və mesfeney sə, e dek jaka pe mezlər te meŋgə jene ara aŋga ana ta nda amta.

¹⁹Ara aŋga ana, ava macən ma bay ta nda amta sə, ndana hay gaa ac ka kazlata pe mebərey. Ara aŋga ana may, jaka pa manah yaŋ ta nda amta sə, ndana hay gaa ac ka tərata ka ndah maŋga mezlər ara aŋga ana fəma ta Zlavay.

²⁰Ma majawa ta Muyiz ke dekey, mebər hay ac ke dek mabay mafəna ana saya. Amaa sesəker dapa slam masa mebər mabay sə, mambəla ana ta Zlavay ke ŋguzdek mabay mafəna ana saya may,

²¹afa ara masa mebər ke ŋguzdek meŋgə bay tata da yaŋ ndana hay te mehwedec kad pa maməcay, ara aŋga ana, jaka pe meŋgə jene ara aŋga ana, mambəla ana ta Zlavay ke ŋguzdek gədaŋ ta mambəla nda tata ka ta hwadandakwa kad pa manjah katar ka midakw jaka pa Bay tandakwa Mazlakava Yesu Kəristi.