Read Cuvok Rawma hay 6 Bible Online

Rawma hay 6 - Cuvok bible

Rawma hay 6

¹Naa daha ara nesey sə, andə da gwaɗakwa melemey? Manjahakwa cəɗem cəɗem dapa mebərey, afa mambəla ana ta Zlav de ŋguzdek mafəna ana geyey?

²Away, ara na e ŋgə aabay! Jaka gəva te mebərey sə, andakwa ara ndah maməca. Naa, anda da njahakwa dapa mebər saya sə, meemey?

³Akwa sən masa andakwa fakwan maŋgana beetem, andakwa macama ava Yesu Kəristi sə, bay geyey? Ara nesey, beetem ana ka camandakwa ava maməc tata.

⁴Eve beetem ana ŋgesey, andə ka pəsahakwaɗ yaŋ tandakwa avəda ava aŋga dapa macam vaw ava aŋga dapa maməc tata, afa ara masa Kəristi te pərekek dapa maməcay jaka pe mehehəm ta gədaŋ ta Papaŋ, andakwa may, andə da njahakwa dapa manjah masa waya.

⁵Eve metehwe ana, daha andakwa macama ava aŋga jaka pa maməc masa ara tata sə, ara aŋga ana, andə ta camakwa vaw ava aŋga jaka pe mepərek dapa maməcay ara tata.

⁶Masənakwaɗ jə na mambəla ana: Manjah tandakwa mezleezle ana sə, ɓasabay, andə ka zləlawakwaɗ avəda fa hap mazləlawa ava Kəristi. Mebər masa aŋga dapa andakwa sə, ka zata. Ara nesey, andakwa ɓel te mebər ɓasabay,

⁷afa nda masa ka məcata sə, aŋga mapəla dapa mebərey.

⁸Amaa daha andə ka məc tandakwa ava Kəristi sə, anda kəsakwa, andə ta njahakwa eve ndey ava aŋga may.

⁹Anda sənakwa, Kəristi sə, ka pərakata dapa maməcay, a ta məc ɓasabay. Maməc aŋga ava gədaŋ da yaŋ ana ɓasabay.

¹⁰Kəristi a məcay sə, mafay te mebərey, maməcay ana e ŋgə pal dəɓa amta. Amaa təlam nesey aŋga eve ndey, a njah eve ndey sə, kad Zlavay.

¹¹Ara aŋga ana, akwar may, mapaɗ yaŋ takwar ara ndah masa maməca dapa mebərey. Asaya, mapaɗ yaŋ takwar ara ndah masa ec eve ndey kad Zlavay jaka pa macam vaw takwar ava Yesu Kəristi.

¹²A lada mebər de ŋgə bay da yaŋ vaw takwar masa a ta məcata mahwadakwar kad pa manah yaŋ kad mekekesl ta vaw tata hay masa ec teh bay ŋga sabay.

¹³Akwar ta paɗ gəva ta vaw hay takwar ka ŋgə mezlər te mebərey ara jə te mezlər te meŋgə jene ara aŋga ana aabay bay. Amaa mavan yaŋ takwar fakwanay kad Zlavay ara ndah eve ndey masa ece pərekek dapa maməcay, mapaɗ gəva ta vaw hay takwar fakwanay pe mezlər tata ara jə te mezlər te meŋgə jene masa ara aŋga ana.

¹⁴Mebər de ŋgə bay da yaŋ akwar sabay, afa akwar da dara ma majawa ta Muyiz ɓasabay, amaa akwar da dara mambəla ana ta Zlavay.

¹⁵Naa, anda da gwaɗakwa sə, melemey? Maŋgakwa mebərey, afa andakwa da dara ma majawa ɓasabay, amaa da dara mambəla ana ta Zlav geyey? Away, ara na e ŋgə aabay!

¹⁶Akwa sən masa ava mavə yaŋ takwar ka ta ŋgə mezlər ta ndana ara ɓeley ka ta nahan yaŋ sə, ŋgesey akwar ɓel ta nda ana, kwa daha aabay ke te ŋgə mezlər te mebər masa a hwad nda kad pa maməcay, kwa daha aabay ta manah yaŋ kad Zlavay masa a hwad nda kad pe meŋgə jene ara aŋga ana sə, bay geyey?

¹⁷Maŋgakwa wasay kad Zlavay, afa zleezle sə, akwar ɓel te mebərey, amaa təlam nesey, akwar ka nah yaŋ ava rav takwar fakwanay kad pe mesesərekey ara masa ac ta sasərakiya kad kwa waawa fakwanay.

¹⁸Zlav ka pəlakwar avəda dapa ɓel te mebərey, akwar ka tərata ɓel te meŋgə jene ara aŋga ana.

¹⁹Ya gwaɗakwar ara ndamagəda te gweɗey sə, afa gədaŋ takwar pahata ta macəna ma da yaŋ ana. Ara masa tecəɗem akwar ta paɗ gəva ta vaw takwar hay ara ɓeley kad pe mezlər te jene hay maləza va meŋgə jene hay mazləɓa masa a hwad nda kad pa mayah ma fa Zlavay sə, mepeɗec təlam nesey ara ɓeley kad pe mezlər te meŋgə jene ara aŋga ana masa a hwad nda kad pa manjah masa mavəna.

²⁰Zleezle masa akwar ɓel te mebərey sə, akwar mapəla paɗ ta magərda meŋgə jene ara aŋga ana.

²¹Dapa ŋgesey ana, akwa heyek dapa manjah takwar hay sə, mey hay melemey? Təlam nesey a ŋgakwar hwaray, afa jeŋ ana hay ŋgesey aca hwad nda kad pa maməcay.

²²Amaa təlam nesey, akwar mapəla dapa ɓel te mebərey, akwar ka tərata ke ɓel ta Zlavay, ara nesey, mezlər takwar e te heyek manjah mavəna masa a hwad nda kad pa manjah katar ka midakw,

²³afa meyəv te mebərey sə, maməcay. Amaa jə masa Zlav a viya taambəla sə, manjah katar ka midakw dapa Yesu Kəristi Bay tandakwa Mazlakava.