Read Cuvok Rawma hay 7 Bible Online

Rawma hay 7 - Cuvok bible

Rawma hay 7

¹Malama va dəma hay, akwa səniya eve metehwe ana cay ma masa ya ta gwaɗakwaɗ nesey, afa akwa sən ma majawa. Akwa səniya, ma majawa a ŋgə bay da yaŋ ndana sə, dapa masa nda ana aŋga eve ndey.

²Ara ŋgwaz da way ta mawal, ma majawa ka jawa dapa masa mawula aŋga eve ndey heley, ma ana a pəlan ma ta makəs mawal mekele aabay. Amaa daha mawula ana ka məcata sə, aŋga mapəla ta makəs mawal mekele, ma majawa sə, a jawa sabay.

³Ara nesey, daha ŋgwaz masa mawula aŋga eve ndey heley, a kəs mawal mekele sə, ŋgesey aŋga ŋgwaz maŋga madama. Amaa daha mawula ka məcata, aŋga mapəla ta makəs mawal mekele masa aŋga ta waya, afa aŋga mapəla dapa ma majawa. Ŋgesey, ka ŋgə madama aabay.

⁴Ara aŋga ana malama va dəma hay, jaka luwa ta ma majawa sə, akwar maməca ana cay, afa akwar ka cama vaw takwar jaka pa vaw te Yesu Kəristi. Təlam nesey, akwar mapa kad nda masa Zlav ke pərekek avəda dapa maməcay, afa andə da ŋgakwa mezlər hay mambəla ana masa a wafa Zlavay.

⁵Eve metehwe ana, zleezle masa andakwa manjaha dapa slaw ta vaw masa a wal meŋgə mebərey sə, anda ŋgakwa jene hay saw ara masa ma majawa ta hahaɗan dar te mekekesl ta vaw tandakwa masa e teh bay. Ara nesey, anda ŋgakwa mezlər hay mambəla ana aabay masa a hwada nda kad pa maməcay.

⁶Amaa təlam nesey, andakwa mapəla dapa ha ta ma majawa, afa andakwa maməca jaka gəva te jə masa ka təhazaɗandakwa pa daŋgay. Ara nesey, anda zlafa maŋgakwa mezlər kad Zlavay eve cəv waya dapa gədaŋ te Mesfen Mavəna, bəna eve cəv mezleezle ana masa ma majawa ta ŋguzdandakwaɗ sabay.

⁷Naa ara nesey sə, anda da gwaɗakwa melemey? Ma majawa sə, aŋga mebər la geyey? Away, ara na e ŋgə aabay. Amaa daha ya sən mebərey sə, mafay ta ma majawa. Eve metehwe ana, daha ma majawa ana ke gweɗ: «Ke te ŋgə ndey fe jene ta ndana bay» aabay sə, ya ta sən mekekesl ta vaw aabay.

⁸Mebər ka ŋgat cəv jaka pə ma ta ma majawa ke te heyek tərsam te mekekesl ta vaw hay fakwan dapa yey. Efes daha ma majawa ana aabay sə, mebər aŋga ara jene maməca ana.

⁹Zleezle masa ya ka sən ma da yaŋ ma majawa ana aabay heley sə, ya ka njah eve ndey. Amaa medek ta ma ta ma majawa sə, mebər ka zlar manjah eve ndey,

¹⁰yey sə, ya ara nda maməca. Ma ta ma majawa masa a hwad nda kad pa manjah eve ndey sə, ka tərata fa yam te ndey taaɗaw jə masa te mehwediyey kad pa maməcay.

¹¹Mebər ka ŋgat cəv te mefəciyey jaka pə ma ta ma majawa ana. Ara nesey, mebərey ana ke hwedefiyey maməcay jaka pə ma ta ma majawa.

¹²Amaa ma majawa sə, aŋga mavəna, ma hay ta ma majawa ac mavəna, ac ara aŋga ana va ac mambəla ana.

¹³Ara nesey, jə masa mambəla ana sə, ka tərata jə masa e te hwedefiyey maməc geyey? Away, e ŋgə ara na aabay! Amaa sesəker mebər te ŋgə mezlər jaka pe jə mambəla ana, ke hwedefiyey maməcay. E ŋgə ara nesey sə, afa mebər de ŋguzdek yaŋ tata, aŋga sə, aŋga mebər metehwe ana. Asaya, e de ŋguzdek aŋga sə, aŋga jene mambəla ana aabay ka fəna jene hay fakwanay jaka pə ma ta ma majawa.

¹⁴Aŋga, anda sənakwa ma majawa sə, e dek da vara Zlavay, amaa yey sə, ya dapa slaw ta vaw, yey ara nda mahusama kad pe ɓel te mebərey.

¹⁵Eve metehwe ana, jə masa ya ŋgiya dapa manjah taaɗaw sə, ya cəna bay, afa jə mambəla ana masa ya wal maŋgiya sə, ya ŋgiya aabay. Sesəker ye ŋgə sə, jə masa e nderiyey.

¹⁶Daha ya ŋgə jə masa ya wal maŋgiya bay, ŋgesey, a wal megweɗ, ya ka kəsaw, ma majawa sə, aŋga mambəla ana.

¹⁷Maŋgana mezlərey ana ŋgesey sə, ya bay. Amaa mebər masa aŋga dapa yey.

¹⁸Aŋga, ya səniya, jə mambəla ana sə, aŋga dapa yey aabay, ya wal megweɗ, dapa slaw ta vaw aɗaw masa aŋga bəle. Eve metehwe ana, mahwar meŋgə jə mambəla ana sə, aɓa dapa yey, amaa ya ava gədaŋ ta maŋgiya aabay,

¹⁹afa jə mambəla ana masa ya wal maŋgiya sə, ya ŋgiya aabay, amaa sesəker jə mambəla ana aabay masa ya wal maŋgiya bay sə, ya ŋgiya.

²⁰Daha ya ŋgə jə masa ya wal maŋgiya bay sə, ŋgesey, maŋgiya yey bay. Amaa mebər masa aŋga dapa yey.

²¹Nesey, jə masa ya ɗaliya dapa manjahay aɗaw: Daha ya wal meŋgə jə mambəla ana, ye te ŋgek sə, jə mambəla ana aabay.

²²Dapa rav aɗaw sə, ye wesley da yaŋ ma majawa ta Zlavay.

²³Amaa ya ŋgat dapa slaw ta vaw aɗaw sə, ma majawa mekele masa a ŋgə vəram ava ma majawa masa leŋgesl aɗaw a waya. Ke peɗiyey pa daŋgay ta ma majawa te mebər masa aŋga dapa gəva hay ta vaw aɗaw.

²⁴Wabaw kad yey! Me te mbəliyey dapa ha ta slaw ta vaw masa a hwad nda kad pa maməc na wa?

²⁵Amaa təlam nesey, wasay kad Zlavay jaka pa Yesu Kəristi Bay tandakwa Mazlakava. Ara nesey, dapa leŋgesl aɗaw sə, ya nah yaŋ kad ma majawa ta Zlavay. Anjəkar dapa bəle aɗaw jaka pa slaw ta vaw sə, ya nah yaŋ kad ma majawa te mebərey.