Read Cuvok Rawma hay 8 Bible Online

Rawma hay 8 - Cuvok bible

Rawma hay 8

¹Təlam nesey, ndah masa ac macama ava Yesu Kəristi sə, ac majawa ɓasabay,

²afa ma majawa te Mesfen Mavəna dapa Yesu Kəristi ke mbəliyey avəda dapa ma majawa te mbərey va ta maməcay. Mesfen Mavəna ana ŋgesey, ke viyey manjah eve ndey.

³Membəley ana nesey sə, masa ma majawa ta Muyiz ka zlafa maŋgiya aabay, afa slaw ta vaw masa a wal meŋgə mebərey sə, ka təra avəda ke jə masa gədaŋ aabay, amaa Zlav ka ŋgana avəda. Ara nesey, ke zlərek Wudiya, ke dek jaka pa slaw ta vaw ara vaw ta nda maŋga mebərey mafay te mebərey. Jaka pe cəvey ana ŋgesey, Zlav ka jawa mebər maŋga mezlər dapa ndana sə, avəda.

⁴Zlav a ŋgiya ara nesey sə, afa meŋgə jene ara aŋga ana masa ma majawa te gweɗey sə, da ŋgata dapa andakwa masa anda dakwa dapa slaw ta vaw masa a ŋgə bay da yaŋ andakwa sə, aabay, amaa sesəker Mesfen Mavəna ta ŋgə bay da yaŋ andakwa.

⁵Eve metehwe ana, ndah masa slaw ta vaw a ŋgə bay da yaŋ eceŋ sə, ac ta yah ɗahw sə, meŋgə jə masa slaw ta vaw ana ta waya. Amaa ndah masa Mesfen Mavəna a ŋgə bay da yaŋ eceŋ sə, ac ta yah ɗahw sə, meŋgə jə masa Mesfeney ana ta waya.

⁶Mayah meŋgə jə masa slaw ta vaw ta waya sə, a hwada nda kad pa maməcay, amaa mayah meŋgə jə masa Mesfen Mavəna ta waya sə, a hwada nda kad pa manjah eve ndey va manjah dapa metehey.

⁷Ndah mayaha meŋgə jə masa slaw ta vaw ta waya sə, ac maslagəra hay ta Zlavay. Dapa manjah teceŋ sə, aca nah yaŋ kad pa ma majawa ta Zlav aabay, kwa aca zlafa manahan yaŋ bay ana.

⁸Ndah macəpa mekekesl ta slaw ta vaw teceŋ sə, aca zlafa meŋgə jə masa a da wafa Zlavay sə, aabay.

⁹Takwar sə, akwa cəp mekekesl ta slaw ta vaw ana ŋgesey sə, aabay, akwa cəp Mesfen Mavəna, afa Mesfeney ana aŋga dapa akwar. Daha nda masa aŋga eve Mesfen te Kəristi aabay sə, ŋgesey, aŋga nda te Kəristi bay.

¹⁰Daha Kəristi aŋga dapa akwar, ŋgesey, tehwe vaw takwar a ta məcata mafay te mebərey. Amaa Mesfen Mavəna a ta vakwar manjah eve ndey, mafay ta masa Zlav ka paɗakwar ka ndah maŋga mezlər ara aŋga ana.

¹¹Ara masa Mesfen Mavəna mepərekek Yesu dapa maməcay aŋga dapa akwar, ŋgesey, Zlav mepərekek Kəristi dapa maməcay nesey sə, a ta vakwar manjah eve ndey kad vaw takwar hay masa ac məcata ana ŋgesey jaka pe Mesfen tata masa aŋga dapa akwar.

¹²Mafay ana, malama va dəma hay, andakwa ava duwa dapa yaŋ ɓa, duwa ana sə, kad mekekesl ta slaw ta vaw tandakwa bay. Andə ta njahakwa ara masa mekekesl ta slaw ta vaw ana ta waya bay.

¹³Eve metehwe ana, daha akwa cəp meŋgə jə masa a wafa slaw ta vaw takwar sə, ŋgesey, akwa məcata. Amaa daha jaka pa gədaŋ te Mesfen Mavəna akwar ka gərda meŋgə jə masa slaw ta vaw takwar a waya sə, ŋgesey, akwar ta njah eve ndey.

¹⁴Eve metehwe ana, ndana hay fakwan masa Mesfen Mavəna e pedecen ma sə, ac wudeh ta Zlavay.

¹⁵Mesfen Mavəna masa akwar ta ŋgatiya sə, aŋga mesfen matəra nda ke ɓel bay, aŋga mesfen mahwada nda pa zidaw bay. Amaa aŋga Mesfen Mavəna masa a tərakwar ke wudeh ta Zlavay. Asaya, a jənandakwa ta mazal Zlavay: Aba! A ra megweɗey, «Papa!»

¹⁶Mesfen Mavəna ava yaŋ tata ana, a tə yaw da yaŋ andakwa, eve metehwe ana andakwa sə, wudeh ta Zlavay.

¹⁷Aŋga, andakwa wudeh ta Zlavay. Ara nesey, anda ta ŋgatakwa meven ta ma tandakwa ta macam jə masa aŋga ta raɓaɗ ha kad ndah tata. Anda ta ŋgatakwa jeŋ ana sə, fa slam ana ava Kəristi, afa daha andə ka sakwa marga fa slam ana ava aŋga sə, anda ta njahakwa fa slam ana dapa mehehəm tata ava aŋga.

¹⁸Ya wulakiya eve metehwe ana, marga hay masa anda sakwa təlam nesey, ec te cecel eve mehehəm masa Zlav a ta ŋguzdiya kad andakwa maayaŋ kad fəma sə, aabay.

¹⁹Afa jene hay fakwan masa Zlav ta lamiya sə, aca vas vaw ta mawala pas masa Zlav e te ŋguzdek wudeh tata.

²⁰Aca vas vaw sə, afa jene hay fakwanay masa Zlav te lemekeceŋ sə, ac dapa ha ta gədaŋ masa e jənec aabay. Jeŋ ana hay ac ta yahiya bay, amaa Zlav te peɗec ara nesey ana. Ava aŋga ana fakwanay, ke vec mapə mawulak yaŋ te membəley jaŋgata.

²¹Mezlərey ana sə, Zlav e te pəlekec avəda dapa ɓeley dapa ha ta nda meneseceŋ, afa aca ra ŋgat medey pe mepəl dapa ɓel te mehehəm te wudeh ta Zlavay.

²²Anda sənakwa təlam nesey, jene hay malama fakwanay ece jerey ara ŋgwaz masa e səfey.

²³Mejerey ana sə, jene hay masa Zlav te lemec babəla bay, amaa andakwa masa andakwa eve Mesfen Mavəna ɓa. Mesfeney ana aŋga ara meven ta ma te jə macaaca ana masa Zlav a ta vandakwa. Anda jarakwa da hwaɗ da hwad ava maɓal pas masa Zlav da tərandakwa avəda zef ke wudeh tata va mapəlakandakwa avəda fakwanay dapa slaw ta vaw.

²⁴Eve metehwe ana Zlav ka mbəlandakwa avəda, amaa dapa mawulak yaŋ ta maŋgat jene. Daha jə masa anda pakwa mawulak yaŋ ta maŋgatiya anda walakwaɗ eve ndey tandakwa cay sə, ŋgesey, jə masa andakwa pakwa mawulak yaŋ fətiya te meŋget bay, afa, ndana wa masa a pə mawulak yaŋ ta maŋgat jene, a wala jeŋ ana cay?

²⁵Map mawulak yaŋ ta maŋgat jene masa anda walakwaɗ bay sə, a wal megweɗey, meɓəl jene eve mepəsek macəkuma bay.

²⁶Ara aŋga ana, Mesfen Mavəna a jənandakwa dapa bəle tandakwa, afa anda sənakwa macə mbahw mambəla ana bay. Amaa aŋga ava yaŋ tata ana, a cana mbahw kad Zlavay mafay tandakwa. A nəkafa Zlavay ava rav tata pal amta ara nda masa aŋga dapa mejerey, mejerey ana sə, masa ndana a zlafa magwaɗiya bay.

²⁷Zlav nda mawuzaɗa jene dapa rav ta ndana sə, a sən jə masa Mesfen tata a wulakiya, afa Mesfeney ana a nəkafa Zlavay e de jənec ndah tata ara masa Zlav ta waya.

²⁸Anda sənakwa Zlav e ŋgə jene hay fakwanay sə, mafay ta mambəla ana ta ndah masa aca wal Zlavay ana. Ndah ana ŋgesey sə, ndah masa aŋga te zelekec ara maləmad vaw tata masa aŋga ta ləmadiya zleezle.

²⁹Dəga zleezle Zlav ke peleɗec ndah tata ana ha, ka kəsa mawulak yaŋ ana dəga zleezle te metərec ka njah ara Wudiya ana may, afa a wal Wudiya ana a da njah ka wat cəvandaw deveŋ malamaŋ hay da hwaɗ ta way mazlakava.

³⁰Ndah masa aŋga te peleceŋ ana ŋgesey, ke zelekec saya may. Ndah masa aŋga te zeleceŋ ana ŋgesey, ke tərec ka ndah maŋga mezlər ara aŋga ana saya may. Ndah masa aŋga te tərec ka ndah maŋga mezlər ara aŋga ana ŋgesey, ke hehəmec saya may.

³¹Andə da gwaɗakwa kad veŋ ana saya sə, mey? Daha Zlav aŋga ava andakwa, ma da zlafa matatarandakwa dapa vəram sə, wa?

³²Aŋga masa ka raɓda Wudiya malay aabay, amaa ka vana avəda ke te kəɗey mafay tandakwa fakwanay. Naa daha ara nesey sə, a ta vandakwa jene hay fakwanay jaka vara Wudiya ana ŋga aabay ŋgəɗa geyey?

³³Ma ta zlafa mejewec ndah masa Zlav ke peleɗec ha kad aŋga cay ava ma sə, wa? Kwa ndana aabay, afa mepec ka ndah maŋga mezlər ara aŋga ana sə, Zlavay ava yaŋ tata ana.

³⁴Ma da zlafa mejewec ava ma ke te ŋgedec marga sə, wa? Kwa ndana aabay! Eve metehwe ana, Yesu Kəristi ka məcata, mahwalhwala ana saya, ka pərakata dapa maməcay, aŋga manjaha da ha ta zam ta Zlavay, a cə mbahw mafay tandakwa.

³⁵Daha ara nesey sə, ma ta vənandakwa ava mawal nda te Yesu Kəristi sə, melemey? Marga hay geyey? Mawulak yaŋ geyey? Mayah ma ta ndana hay geyey? May, daha aabay maslamarga geyey? Makaslafay, daha aabay maməc geyey?

³⁶Ara mavinda dapa Ɗelewer mavəna, gege: «Ndana hay aca yahandaw cəɗem cəɗem ke te kəɗey, aca pandaw ara təmak hay masa ac mapa ke te zlehey, afa andaw ndah takaa.»

³⁷Amaa dapa jeŋ ana hay fakwanay sə, andə ta njahakwa bigula mafəna ana macəkuma bay da yaŋ ana fakwanay ava gədaŋ te Kəristi masa a walandakwa.

³⁸Aŋga, ya səniya eve metehwe ana, jene ma ta zlafa mavənandakwa ava mawal nda ta Zlav sə, aabay. Kwa maməcay, kwa manjah eve ndey, kwa maskəla hay, daha aabay mesfen hay masa ac ava gədaŋ, kwa pəsna, daha aabay maayaŋ kad fəma, kwa gədaŋ hay mazlakava,

³⁹kwa gədaŋ hay masa ac da baymaləvaŋ, daha aabay kwa gədaŋ hay masa dapa veɗ, kwa jene malama wula wula masa a zlafa mavənandakwa avəda ava mawal nda ta Zlavay masa e ŋguzdek jaka vara Yesu Kəristi Bay tandakwa Mazlakava sə, aabay.