Read Cuvok Rawma hay 9 Bible Online

Rawma hay 9 - Cuvok bible

Rawma hay 9

¹Ma masa ya gwaɗiya nesey sə, metehwe ana, bəna ya ŋgal ma bay, afa yey sə, ya nda te Kəristi. Mawulak yaŋ ta rav aɗaw jaka pa gədaŋ te Mesfen Mavəna a tə yaw da yaŋ ma masa ya gwaɗiya nesey sə, ma ana tehwe.

²Ya wal megweɗ sə, rav aɗaw aŋga manəha ava matakwa, rav e heciyey cəɗem cəɗem

³mafay ta tərsam taaɗaw Zuwef hay. Kwa daha Zlav e te gwederiyey avəda, e te vəniyey avəda ava Kəristi mafay ta malama hay Isreyel aca ra mbəlaɗay sə, ya ta kəsiya.

⁴Eceŋ sə, ac tərsam te Isreyel hay ndah ta Zlavay masa ke peleɗec ha, aca ra njah ke wudeh tata. Ke ŋguzdecen mehehəm tata, ka jaw ma hay eve eceŋ, ke vec ma majawa tata, ke ŋguzdecen cəv ta makəɗana ha va megweɗec da yaŋ jə masa e te veceŋ.

⁵Eceŋ ana sə, ac tərsam ta papaŋ ta papaŋ tandakwa hay zleezle masa Zlav ta paliya. Yesu Kəristi may e heyek dapa tərsam ana ara ndana, aŋga masa aŋga Zlavay, aŋga bay da yaŋ jene hay fakwanay. Mahahəmakwa katar ka midakw. E de ŋgey!

⁶A wal megweɗ ma masa Zlav te gweɗey sə, ke ŋgə ara aŋga ana ɓasabay sə, ara na bay, ma ana ka ŋgata. Eve metehwe ana, ndah masa ece heyek dapa tərsam te Isreyel hay sə, ac fakwan Isreyel hay metehwe ana masa Zlav ta paliya bay.

⁷Asaya, ndah masa ece heyek dapa tərsam ta Abəraham sə, ac fakwan wudeh tata metehwe ana bay, afa Zlav ka gwaɗa Abəraham ana zleezle, gege: «Ka ta ŋgat wudeh da hwaɗ ta wudiyak masa ya ka gwaɗakaa ya ta vakaa sə, jaka pa wudiyak Izak.»

⁸Ara megweɗey, Zlav a pə ke wudeh tata metehwe ana sə, wudeh masa Abəraham te heyekec fakwan bay. Wudeh ta Zlav metehwe ana sə, wudeh masa Abəraham te heyekec jaka pa ma masa Zlav ka gwaɗa daha.

⁹Ma masa Zlav ka gwaɗa daha kad Abəraham fa Izak zleezle sə, masa e gweɗ, gege: «Kasl tasəfa ara nesey sə, ye te vehekey, ya ta ŋgatafa Sara aŋga ava wat mawal dapa ha.»

¹⁰Yaw, ŋgesey ana fakwan bay, ara aŋga ana may Zlav ka gwaɗa Rebeka. Rebeka sə, aŋga ŋgwaz ta papaŋ ta papaŋ tandakwa Izak zleezle, ke heyek wudeh mawasay ecew ava mawula ana amta ŋgesey: Zakwab va Isuwa.

¹¹‏ Anjəkar wagaa wude hey ana ac te heyekey, masa ac de ŋgə jə mambəla ana va mambəla ana bay dapa manjah teceŋ sə, Zlav ka kəsaɓa amta deveŋ eceŋ cay, afa maləmad vaw tata sə, de ŋgwed bay. A kəsiya ara masa aŋga ta waya.

¹²Mapal nda ta Zlavay sə, mazlaca da yaŋ mezlər bay, amaa da yaŋ masa aŋga ta zal nda ana. Ara nesey, ka gwaɗa Rebeka, gege: «Wat mazlakava sə, a ta ŋgana mezler kad wat wuje.»

¹³Ara masa mavinda: «Zlav ke gweɗ, gege: “Ya ka wal ɗahw sə, Zakwab da yaŋ Isuwa.”»

¹⁴Naa daha ara nesey sə, andə da gwaɗakwa melemey? Naa Zlav ka ŋgə jene ara aŋga ana aabay la geyey? Away, e ŋgə ara na aabay!

¹⁵Eve metehwe ana, Zlav ka gwaɗa Muyiz zleezle, gege: «Ya ta ŋgana mambəla ana kad nda masa ya wal maŋgana mambəla ana, ya ta ŋgafa metekwen fa nda masa ya wal maŋgafa metekweney.»

¹⁶Ara nesey, Zlav a kəs ndana sə, ara masa a wal maŋgafa metekweney, bəna mafay ta masa nda ana ta waya, daha aabay mafay te mezlər tata bay.

¹⁷Mavinda dapa Ɗelewer mavəna, Zlav ka gwaɗa bay ta Misəra, gege: «Ya paɗakaa ka bay sə, ka ta ŋguzad gədaŋ aɗaw mazlakava jaka varakaa va meŋguzdecen mezeley aɗaw kad ndana hay fakwanay dapa vavara.»

¹⁸Ara nesey, Zlav a ŋgə metekwen sə, kad nda masa aŋga ta waya, a sasalan yaŋ ta ndana ara aŋga ta waya.

¹⁹Gəla ndana e te nəkefiyey: «Daha ka ŋgata ara nesey sə, naa Zlav a payafandaw saya sə, mafay te melemey? Eve metehwe ana, ma da zlafa maran mawulak yaŋ ta Zlavay te meŋgə jə masa a wal maŋgiya sə, wa?»

²⁰Naa ka sə, ka walawa, masa ka da tə yaw ava Zlavay? Maŋgam a zlafa magwaɗa nda malamiya, «Ke lemiyey ara na ke mey?» sə, ɓa geyey.

²¹Nda malama maŋgam aŋga mapəla te meŋgə jene ava rəɓasl tata ara aŋga ta waya aabay geyey? Ava rəɓasl amta ana ŋgesey, a zlafa malam gazləɓa va wut ta gandaf aabay geyey?

²²Ara nesey, daha Zlav ka wal maŋguzad mezem ta rav tata va gədaŋ tata mazlakava kad yaŋ ndah masa ac dapa mazay. Ava aŋga ana fakwanay ka ɓəsaw mabay eve mepec sek kad ndah masa ac mak ta maŋgat mezem ta rav tata ana masa aŋga zef te mezeceŋ.

²³Kad ndah dərziya, Zlav ke ŋguzdec mehehəm ta gədaŋ tata mazlakava ana masa a wal meŋgefec metekweney. Ndah ana ŋgesey sə, ke ləmedeɗec ha dəga zleezle, ka wal aca ra ŋgat mehehəm ta gədaŋ tata ana.

²⁴Ndah ana sə, andakwa nesey. Zlav a zalakandakwa sə, deveŋ Zuwef hay babəla bay, amaa deveŋ ndah masa Zuwef hay bay may.

²⁵Ara masa Zlav te gweɗey dapa ɗelewer ta nda mehwedek ma mezel Awzey, gege: «Tərsam masa ac ndah aɗaw hay bay sə, ye te zelec ndah aɗaw hay. Tərsam masa ye welec bay sə, ye te zelec ndah aɗaw hay masa ye welec elehey.

²⁶Dapa slam masa ec te gweɗey: “Akwar tərsam aɗaw hay bay” sə, ec te zelec wudeh ta Zlav masa aŋga eve ndey.»

²⁷Izay nda mehwedek ma, jaka vara vaw sə, ke gweɗ da yaŋ tərsam te Isreyel hay, gege: «Kwa daha Isreyel hay ac mabay ara wurɓaɓay da wayam sə, me te mbəlek deveŋ eceŋ sə, ndah kusetke.

²⁸Eve metehwe ana, Bay Mazlakava a ta ŋgana jə masa aŋga te gweɗ zleezle sə, avəda dapa vavara nesey zef kasl pe mendəvey ana.»

²⁹Yaw, ara masa Izay ke gweɗ zleezle saya, gege: «Daha Bay Mazlakava masa aŋga ava gədaŋ da yaŋ jene hay ka gərandakwa tərsam amta aabay sə, andə ta tərakwa ara ndah dapa wunam ta Sawduma va ta Gwamara.»

³⁰Naa daha ara nesey sə, andə da gwaɗakwa melemey? Andə ta gwaɗakwa ara nesey: Ndah masa Zuwef hay bay masa aca gwam ka yah meŋgə jene ara aŋga ana bay sə, Zlav ke peɗec ka ndah maŋga mezlər ara aŋga ana fa yam te ndey tata jaka pa makəsparav.

³¹Anjəkar ta tərsam te Isreyel hay sə, aca yah macəp ma majawa masa e de tərec ka ndah maŋga mezlər ara aŋga ana fa yam te ndey ta Zlavay sə, ac ka ŋgata jə masa ma majawa e pə ndey kad fətiya sə, aabay.

³²Ac ka ŋgataw aabay sə, mafay te mey? Afa ac ka yah Zlav de peɗec ka ndah maŋga mezlər ara aŋga ana fa yam te ndey tata sə, jaka pa makəsparav aabay, amaa aca wulak maŋgatiya sə, jaka pe mezlər teceŋ. Ara nesey, mecəhwen ke kəɗec avəda fe kekeŋ te mecəhweney.

³³Ara mavinda dapa Ɗelewer mavəna, gege: «Yey Zlavay, mawala masa ya gwaɗakwar: “Ya pə kekeŋ te mecəhweney da Siyawna, kekeŋ ana nesey sə, ta matəɗa nda. Amaa kwa waawa masa ka kəsaw pa rav sə, kwa a ta zal marava aabay.”»