Read Cuvok 1 Kweriŋtiye hay 1 Bible Online

1 Kweriŋtiye hay 1 - Cuvok bible

1 Kweriŋtiye hay 1

¹Yey Pawl, maslaŋ te Yesu Kəristi, masa Zlavay ava yaŋ tata ana te yeheɗiyey ha dapa mawulak yaŋ tata, afa ya da njah ara nesey ana, malamaŋ tandakwa Sawsten may aŋga fana.

²Ya vindiya kad akwar ndah dapa Macam yaŋ ta ndah ta Zlavay masa dapa berne te Kweriŋtiye. Akwar ndah masa Zlav ka palaɗakwar ha wal, afa akwar macama ava Yesu Kəristi. Akwar masa Zlav ka zalakakwar, afa akwar da njah wal kad Zlavay va ndah masa aca cə mbahw eve mezel ta Bay tandakwa Mazlakava Yesu Kəristi kwa dama dama fakwan may. Aŋga ana sə, Bay Mazlakava teceŋ va taciya may.

³Da lada sə, Zlav Papaŋ tandakwa va Bay Mazlakava Yesu Kəristi ac da vakwar mapəsma va metehey.

⁴Cəɗem cəɗem ya ŋgana wasay kad Zlavay mafay ta masa aŋga te ŋguzdek mambəla ana tata kad akwar jaka pa Yesu Kəristi.

⁵Dapa masa akwar macama ava Yesu Kəristi sə, Zlav ka vakwar mambəla ana tata fakwanay: Ka vakwar gədaŋ ta mabəzad ma metehwe ana kad ndana hay va leŋgesl ta macəna ma tata fakwanay.

⁶Ara nesey, Labara te Kəristi masa andə ta bəzadakwaɗ nesey sə, aŋga mambəla ana dapa rav takwar.

⁷Ara nesey, kwa gədaŋ te meŋgə mezlər wula wula masa Zlav a viya kad kwa waawa sə, akwa huriya aabay. Akwar masa akwa ɓal pas te meŋguzdek vaw ta Bay tandakwa Mazlakava Yesu Kəristi.

⁸Ma ta vakwar gədaŋ ta manjah mambəla ana kasl pas masa e te vehekey ka ta təɗ ma a yaŋ ndana hay sə, aŋga ana. Pas ana ŋgesey, ndana ma ta zlafa mapayafakwar da yaŋ mebər takwar sə, ɓasabay.

⁹Zlav ava yaŋ tata ana ka zalakwar, afa akwar da cam vaw ava wudiya Yesu Kəristi, Bay tandakwa Mazlakava. Aŋga sə, jə masa ka gwaɗa sə, a ŋgana avəda tehwe.

¹⁰Malama va dəma hay, ya ŋgakwar mbahw eve mezel ta Bay tandakwa Mazlakava Yesu Kəristi, afa akwar da cama vaw fa slam ana. Akwar ta vəna vaw dapa taɓa takwar bay. Manjah dapa macam vaw ava rav takwar amta, ava mawulak yaŋ amta.

¹¹Malama va dəma hay, ye gweɗ ara nesey sə, afa ndah da hwaɗ ta way ta Kəlawey ec ke gweɗiyey, akwar dapa mavan vaw dapa taɓa takwar.

¹²Macak zləmay fe jə masa ya wal ma ta gwaɗakwar. Akwar ava mawulak yaŋ dapa taɓa takwar wal wal, afa ndah leŋgeɗ, gege: «Andaw ndah ta Pawl.» Ndah dərziya, gege: «Andaw ndah ta Apawlaws.» Ndah dərziya saya, gege: «Andaw ndah te Keyfas[1]» Asaya, ndah mekele, gege: «Andaw sə, andaw ndah te Kəristi.»

¹³Akwa wulakiya sə, Kəristi aŋga mavəna dəɓa gaa hay geyey? Akwa wulakiya sə, maməc fa hap mazləlawa mafay te mebər takwar sə, Pawl geyey? Daha aabay, akwa ŋgat beetem sə, eve mezel ta Pawl geyey?

¹⁴Ya ŋgə wasay kad Zlavay, afa ya ka ŋgana beetem kad ndana deveŋ akwar aabay, say kad Kərispus va Gayus babəla.

¹⁵Ara nesey, ndana mazlafa megweɗ masa a ŋgat beetem nesey eve mezeley aɗaw sə, aabay.

¹⁶Aŋga, eve metehwe ana, e te pəsiyey dapa yaŋ bay, ye ke ŋgec beetem kad Estifanas ava ndah da hwaɗ ta way tata saya. Ayakwa, gəla ye ke ŋgec beetem ana kad ndah mekele saya masa ya sənafa sabay.

¹⁷Eve metehwe ana, Kəristi ke zlərekiyey ke te ŋgec beetem kad ndana hay sə, aabay, amaa ka ta bəzad Labara mambəla ana. Ya ka bəzadaw eve leŋgesl te meven jene hay masa ta ndana sə, aabay. Ya ŋgiya ara nesey sə, afa maməc te Yesu fa hap mazləlawa e de tər ke jene taambəla bay.

¹⁸Aŋga, ma ta hap mazləlawa sə, ŋgesey merəzley kad ndah masa ac dapa mezlekey. Amaa kad ndah masa ac dapa membəley, ara megweɗey andakwa sə, ma ana aŋga ava gədaŋ mazlakava ta Zlavay,

¹⁹afa mavinda dapa Ɗelewer mavəna, gege: «Ya ta pəlaha leŋgesl te meven jene hay ta ndah eve leŋgesl te meven jene hay sə, avəda. Ya ta təraɗ leŋgesl ta ndah eve leŋgesl ke jene taambəla.»

²⁰Daha ara nesey, ndah masəna jene hay sə, ac kəla? Yaw, ndah mesesərekecen ma majawa kad ndana hay sə, ac kəla? Ndah ta pəsna masəna magwaɗ ma hay sə, ac kəla? Zlav ka ŋguzda cay, leŋgesl te meven jene hay ta vavara nesey sə, aŋga ara nda marəzla.

²¹Eve metehwe ana, ndana hay eve leŋgesl te meven jene hay tec fakwanay ac ka sən Zlav dapa leŋgesl te meven jene hay ta Zlavay ana sə, aabay. Mafay ana, Zlav ka kəs mawulak yaŋ ta mambəl ndah masa aca kəs ma tata mbalay jaka pa mabəzad ma da yaŋ hap mazləlawa masa pəsna ndana hay aca wala ara merəzley.

²²Ara nesey, Zuwef hay aca wal mawala cah hay, afa aca ra səna ma masa andaw ta bəzadiya sə, ma metehwe ana, ta ndah masa Zuwef hay bay sə, aca yah leŋgesl te meven jene hay.

²³Amaa andaw sə, anda bəzad ma da yaŋ Kəristi masa ka məcata fa hap mazləlawa. Ma ana kad Zuwef hay sə, ara anda laf Zlavay, kad ndah masa Zuwef hay bay sə, merəzley.

²⁴Amaa ta ndah masa Zlav te zelekeceŋ, kwa Zuwef hay, kwa ndah masa ac Zuwef hay bay, Kəristi sə, aŋga gədaŋ mazlakava ta Zlavay va leŋgesl te mevən jene ta Zlavay kad eceŋ.

²⁵Jə masa Zlav ta ŋgiya, ndana hay aca wala aŋga ara merəzley, anjəkar jeŋ ana ŋgesey, jə mambəla ana, mafəna mesen jene ta ndana hay. Mezlər masa Zlav ta ŋgiya, ndana hay aca wala ara nda bəle ta ŋgiya, anjəkar mezlərey ana aŋga ava gədaŋ mafəna gədaŋ ta ndana hay.

²⁶Malama va dəma hay mawulakaw. Akwar ndah masa Zlav ta zalakakwar, akwar wa hay wa? Fa yam te ndey ta ndah ta vavara sə, ndah masəna jene hay, ndah masa ac ava gədaŋ va ndah masa ac dapa tərsam ta mazlakava hay deveŋ akwar gaa sə, aabay.

²⁷Sesəker ndah marəzla ta vavara sə, Zlav ke kəseceŋ, e de pec hwar pe ndey ta ndah masa ec eve leŋgesl ta vavara. Ndah masa ac bəle fa yam te ndey ta vavara sə, Zlav ke kəseceŋ ke te pec hwar pe ndey ta ndah masa ac ava gədaŋ ta vavara.

²⁸Zlav a kəs ke te pec hwar pe ndey ta ndah masa ec eve mehehəm dapa vavara sə, ndah mekuset ana, ndah masa ac ara jene taambəla, ndah masa ara ec te ŋgek jene kwa kusetke aabay.

²⁹Ara nesey, kwa nda amta masa a zlafa meŋgə həɓa fa yam te ndey ta Zlavay sə, aabay.

³⁰Amaa akwar sə, Zlav ka camakwar ava Yesu Kəristi. Kəristi ana sə, aŋga leŋgesl te mevən jene tandakwa masa e dek da vara Zlavay. Zlav a paɗandakwa ka ndah maŋga mezlər eve cəvey ana fa yam te ndey tata sə, jaka vara Yesu Kəristi ana saya, ka paɗandakwa ha wal kad aŋga va ka pəlandakwa avəda dapa ɓel te mebərey.

³¹Ara mavinda dapa Ma mavəna, gege: «Daha ndana a wal meŋgə həɓa sə, de ŋgə həɓa dapa mezlər ta Bay Mazlakava.»