Read Cuvok 1 Kweriŋtiye hay 10 Bible Online

1 Kweriŋtiye hay 10 - Cuvok bible

1 Kweriŋtiye hay 10

¹Malama va dəma hay, ya wal magərdakwar dapa mesen jene bay bay, zleezle Papaŋ ta Papaŋ tandakwa hay fakwanay magwabagwaba ke səretec avəda, ac fakwanay ac ka zlaŋgə yam mafayakfayak ana.

²Ac fakwanay, Zlav ke ŋgec beetem dapa magwabagwaba va dapa yam mafayakfayak ana.

³Ac fakwanay, ac ka ndə jə masa e dek da vara Zlavay fa slam ana.

⁴Asaya, ac fakwanay ac ka sə yam masa e dek da vara Zlavay ana sə, may. Yam masa ac ta siya ana sə, e təhek dapa pəra masa Zlav te veceney. Pəra ana, e cəpeceŋ. Pəra ana sə, aŋga Kəristi.

⁵Ava aŋga ana fakwanay, ndana hay gaa deveŋ eceŋ, ec ke ŋgə jə masa a wafa Zlav bay. Mafay ana, ac ke məceceŋ, macəhwandə tec makwakwaca mabay dapa səɓak.

⁶Jeŋ ana hay masa e ŋgə ŋgesey ana sə, a pandakwa leŋgesl, afa jə mambəla ana hay aabay masa Papaŋ ta papaŋ tandakwa hay masa ac ta wal maŋgiya ŋgesey sə, a da husafandakwa bay.

⁷Ndah dərziya deveŋ eceŋ ac ka tə mbat hay ɓa. Ara mavinda zleezle dapa Ɗelewer mavəna, gege: «Ndana hay aca njahay ka ta ndə jene va masə wuzam ta mbat hay. Ava dəɓa ana, ece zleftek, ece gərev da cak ta mbat ana.» Akwar sə, akwar ta tə mbat ara ec bay.

⁸Ndah dərziya deveŋ eceŋ aca kəs vaw fa zaŋ ana, mafay ana, ndana hay bakatar kwakwar ecew dapa yaŋ ana mahkar (23.000) ec ke məcec pas amta. Andakwa may, anda ta kəsakwa vaw fa zaŋ ana ara ec bay.

⁹Ndah dərziya deveŋ eceŋ ac ka caka Bay Mazlakava, zezekw hay ke hecec avəda, ec ke məceceŋ. Andakwa sə, andə ta cakakwa Kəristi ara ec bay may.

¹⁰Mamaɗ yaŋ ana, ndah dərziya dapa taɓa teceŋ, ec ke hwehwərey, mafay ana, maskəla makəɗa nda sə, ke kəɗec avəda ka macəhwandaw. Akwar may, akwar te hwehwer ara ec bay.

¹¹Jene hay mambəla ana aabay masa aca ŋgatafa papaŋ ta papaŋ tandakwa ana hay ŋgesey sə, afa a da pandakwa leŋgesl. Aca vinda jeŋ ana hay ŋgesey sə, ta masasərakandakwa, andakwa masa mbala hukw pe mendəv te jene hay fakwan cay nesey.

¹²Mafay ana, nda masa a kəsiya dapa rav tata, aŋga sə, aŋga masasala caŋw caŋw dapa cəv ta Zlavay, a da pə leŋgesl, daha aabay sə, a ta təɗata.

¹³Macak nda hay masa aca ŋgatafakwar sə, ac amta eve mecek hay masa te ŋgetefec ndana hay fakwanay. Zlavay sə, aŋga nda masa ka gwaɗa ma sə, jeŋ ana a ŋgata tehwe. A ta vana cəv kwa kad mecek amta masa a da fənakwar fa gədaŋ sə, aabay. Daha mecek hay aca ŋgatafakwar ka ta cakakwar sə, Zlav a vakwar gədaŋ, afa akwar da ɓəsa mecek ana hay avəda. Asaya, a ta ŋguzdakwaɗ cəv te membəl dapa mecekey ana hay.

¹⁴Ara nesey, guula aɗaw hay masa ya walakwar elehey, mahwaɓa dəreŋ ava mbat hay.

¹⁵Ya gwaɗakwar ara nesey sə, afa akwar ndah masa ec eve leŋgesl te mevən jene. Ma masa ya ta gwaɗiya nesey sə, ma metehwe ana. Akwar ava yaŋ takwar ana mavəna ma ana.

¹⁶Dapa masa anda ndakwa ɗaf ta masənafa maməc te Kəristi, anda ŋgakwa wasay kad Zlavay mafay ta jə ta masay dapa kwap. Masa anda sakwa jeŋ ana sə, naa andakwa macama ava Kəristi dapa bembez tata? Masa anda ndakwa peŋ, naa andakwa macama ava Kəristi dapa slaw ta vaw tata?

¹⁷Mandana peŋ ana sə, andakwa mabay, amaa peŋ ana pal amta war. Ŋgesey, e ŋguzdek sə, andakwa macama amta.

¹⁸Mawulakaw da yaŋ Isreyel hay zleezle, ndah mandana slaw masa mava kad Zlavay da yaŋ slam te meŋgeŋgez təbekw sə, ac macama ava Zlavay ana aabay geyey?

¹⁹Yaw, ma ana nesey sə, a wal megweɗ gwagumaw? A wal megweɗ sə, mbat va slaw ta mbat ana hay sə, jene hay masa ec eve mehehəm ɓa geyey?

²⁰Away, ara na bay! Amaa ya wal megweɗey slaw ta kwakwas ta mbat masa ndah ava dəɓa hay ta viya kad mbat hay sə, aca viya ŋgesey, kad damkwaw hay, bəna kad Zlav bay. Ya wal sə, akwar da cam vaw ava damkwaw hay bay.

²¹Akwa zlafa masə jə dapa kwap ta masənafa maməc ta Bay Mazlakava Yesu va jə dapa kwap masa mava kad damkwaw hay fa slam ana bay. Asaya, akwa zlafa mandə ɗaf ta masənafa maməc ta Bay Mazlakava Yesu fa slam ana va ɗaf masa mava kad damkwaw hay bay.

²²Daha anda ŋgakwa ara nesey sə, anda wal mabaŋgaɗakakwa səlek ta Bay Mazlakava geyey? Akwa wulakiya sə, anda fənakwaɗ Bay Mazlakava ava gədaŋ geyey?

²³Ndah dərziya dapa taɓa takwar aca wulakiya, gege: «Ac ava cəv te meŋgə jene hay fakwanay.» Aŋga, amaa jene hay fakwanay mambəla ana aabay. «Cəv ɓa te meŋgə jene hay fakwanay.» Amaa eve jene hay dərziya sə, a gəlandakwa dapa cəv ta Zlav aabay.

²⁴Da lada sə, kwa waawa da ŋgə jə masa a ta jən nda mekele may, bəna a ta yah majən yaŋ tata babəla bay.

²⁵Slaw fakwanay masa akwar ta ŋgatiya dapa luma sə, akwa zlafa mahusamiya, akwa zlafa mandiya, akwar ta nək ma da yaŋ ana masa ta matəɗakwaɗ rav bay.

²⁶Ye gweɗ ara nesey sə, afa mavinda dapa Ɗelewer mavəna, gege: «Vavara va jene hay dapa fakwanay sə, ta Bay Mazlakava.»

²⁷Ara nesey, daha nda masa aŋga makəsparav bay ka zalakwar ka ta ndə ɗaf da way tata, daha akwar ka kəs medə a way tata ana sə, ɗaf masa ac ta vakwar, mandaw, akwar ta nək ma da yaŋ ana masa ta matəɗakwaɗ rav bay.

²⁸Amaa daha ndana a gwaɗakwar, gege: «Slaw nesey sə, ta mbat» ŋgesey, akwar ta ndiya bay. Akwa ndiya bay ana sə, afa ka gwaɗakwar. Asaya, afa mawulak yaŋ ta rav tata a vana cəv aabay.

²⁹Ye gweɗ fana nesey sə, mafay ta mawulak yaŋ ta rav tata, bəna takwar bay. Yaw, mawulak yaŋ ta rav ta nda mekele de təɗiyey ma yaŋ da yaŋ jə masa ya mapəla ta maŋgiya sə, mafay te mey?

³⁰Daha ya ndə jene sə, ya ŋgana wasay kad Zlavay mafay ta jeŋ ana. Naa ndana de gweɗ mambəla ana aabay da yaŋ yey, mafay ta mandə jə masa ya ka ŋgana wasay kad Zlav cay sə, memey?

³¹Mafay ana, kwa akwa ndə jene, kwa akwa sə jene, kwa akwa ŋgə jene wula wula sə, maŋgaw mafay ta mambaɗ Zlavay.

³²Akwar ta ŋgə jene masa a da taɗda ndana kad pe mebər bay, kwa kad Zuwef hay, kwa kad ndah masa Zuwef hay bay va kad Macam yaŋ ta ndah ta Zlavay ta Zlavay.

³³Maŋgaw ara yey. Yey sə, ya ŋgə gədaŋ te meŋgə jene hay masa e de wefec ndana hay fakwanay. Ya ka yah meŋgə jə masa e de jəniyey babəla sə, aabay, amaa masa e te jənec ndana hay mabay, afa Zlav de mbəlec avəda dapa mebərey.