Read Cuvok 1 Kweriŋtiye hay 11 Bible Online

1 Kweriŋtiye hay 11 - Cuvok bible

1 Kweriŋtiye hay 11

¹Mazazahw yey ara masa ya ta zazahw Kəristi.

²Ya hahəmakwar, afa akwa wulak yaŋ da yaŋ yey cəɗem cəɗem va meŋgə jene hay masa ya ta sasərakakwaɗay.

³Amaa ya wal sə, masəna ma nesey: Kəristi aŋga bay da yaŋ mawula hay, mawal aŋga bay da yaŋ ŋgwaza, Zlavay aŋga bay da yaŋ Kəristi.

⁴Daha mawal a cə mbahw, daha aabay, a bəzad ma masa e dek da vara Zlavay ava kwalbatakw dapa yaŋ sə, ŋgesey, ka nahan yaŋ kad Kəristi, bay tata aabay.

⁵Amaa ŋgwaz, daha a cə mbahw, daha aabay, a bəzad ma masa e dek da vara Zlavay, aŋga ava yaŋ dahəŋga sə, ŋgesey, ka nahan yaŋ kad bay tata, mawula aabay. Aŋga ara ŋgwaz masa yaŋ mahəca avəda.

⁶Ŋgwaz masa a jaw adikwaw pə yaŋ aabay sə, zuwan da həca yaŋ ana avəda nduslay. Amaa, mehəcey daha aabay maɓac ŋgwec fə yaŋ ta ŋgwaz sə, a pana hwar pe ndey, zuwan aŋga ta jaw adikwaw pə yaŋ.

⁷Mawal sə, a ta pə jene fa yaŋ bay, afa aŋga sə, aŋga meezeŋ va membeɗ ta Zlavay. Amaa ŋgwaz sə, aŋga membeɗ ta mawal.

⁸Yaw, Zlav ke lemek mawal ava slaw ta vaw ta ŋgwaz aabay, amaa e lemek ŋgwaz ava slaw ta vaw ta mawal.

⁹Zlav ka lam mawal mafay ta ŋgwaz sə, aabay, amaa a lam ŋgwaz mafay ta mawal.

¹⁰Mafay ana, ŋgwaz sə, a lada a da pə jene pə yaŋ masa e ŋguzdek meŋgə bay ta mawal da yaŋ ana ɓa mafay ta maskəla hay.

¹¹Fəma ta Bay Mazlakava sə, ŋgwaz a zlafa manjah ava mawal aabay sə, e ŋgə bay. Ara aŋga ana, mawal a zlafa manjah ava ŋgwaz aabay sə, e ŋgə bay.

¹²Ya wal megweɗ sə, ara masa Zlav e lemek ŋgwaz jaka pa mawal, ara aŋga ana təlam nesey, mawal e heyek jaka pa ŋgwaz. Jene hay fakwanay ece dek da vara Zlavay.

¹³Akwar ava yaŋ takwar, mawulakaw, daha ŋgwaz dapa macam yaŋ takwar a cə mbahw kad Zlavay ava yaŋ dahəŋga sə, mambəla ana, geyey?

¹⁴Kwa waawa a sən jə masa Zlav te lemekey dapa vavara, daha mawal aŋga ava ŋgwec fə yaŋ jevɗeɗemɗem sə, ŋgesey, hwar kad aŋga.

¹⁵Amaa ta ŋgwaz, masa ka ŋgat ŋgwec fə yaŋ masəbat səbat ana sə, ŋgesey, a vana mehehəmey, afa ŋgwec ana a tərata jə ta mabəraɗ yaŋ tata.

¹⁶Daha ndana a wal matə yaw mafay ta ma ana nesey sə, a da səna, kwa Macam yaŋ hay ta ndah ta Zlavay, kwa andaw ana, andaw ava kwakwas mekele da yaŋ ma ana nesey sə, aabay.

¹⁷Ara masa ya dapa meɗel jene hay, ya ta hahəmakwar aabay, afa macam yaŋ hay takwar sə, a nasakwar, bəna a ləmadakwar aabay.

¹⁸Macaaca ana: «Dapa macam yaŋ takwar sə, akwar mavəna wal wal.» Ndana hay ece gweɗiyey ara nesey. Ya ka kəsaw dapa rav aɗaw, ma masa ac te gweɗ nesey sə, tehwe.

¹⁹Yaw, a lada mavən vaw ana ŋgesey de ŋgə dapa taɓa takwar ana, afa anda sənakwaɗ ndah macəpa cəv te Yesu Kəristi eve cəvey ana.

²⁰Macam vaw takwar fakwanay sə, mafay ta mandə ɗaf ta masənafa maməc Bay Mazlakava eve metehwe ana sabay,

²¹afa daha akwa ndə ɗaf sə, kwa waawa a vas vaw ka ta ndə ɗaf tata. Ara nesey, ndah leŋgeɗey ac ava mayə, anjəkar dərziya hay ac mban.

²²Naa akwar sə, akwar ava way takwar hay ɓa masa akwar de ndek ɗaf va mesek jene hay dapa? Akwa paɗ Macam yaŋ ta ndah ta Zlavay ta Zlavay sə, ke jene taambəla geyey? Akwa wal mepec hwar pe ndey ta maslamarga hay geyey? Akwa wal ya da gwaɗakwar sə, gwagumaw? Akwa wulakiya sə, ya da hahəmakwar geyey? Away! Mafay ta slam hay nesey sə, ya hahəmakwar aabay.

²³Ma hay masa ya sasərakakwaɗ nesey sə, Bay Mazlakava Yesu ta sasərakawa. Ta yaŋ ta vaɗ masa Bay Mazlakava Yesu a və yaŋ tata pa ha ta maslagəra tata hay, aca ra ŋgada marga sə, ka kəs peŋ.

²⁴Ava dəɓa ta maŋgana wasay Zlavay, ka waca peŋ ana, ke gweɗ, gege: «Nesey sə, vaw aɗaw masa aŋga mava kad akwar. Mandaw cəɗem cəɗem, a ta pəsakwar da yaŋ bay.»

²⁵Ka ŋgaw ara aŋga ana ava kwap, ava dəɓa ta mandə ɗaf, eve megweɗ, gege: «Kwap ana nesey sə, Majaw ma Waya jaka pe bembez aɗaw. Maŋgaw ara nesey cəɗem cəɗem pas masa akwa siya, a ta pəsakwar dapa yaŋ bay.»

²⁶Cəɗem cəɗem masa akwa ndə peŋ ana nesey va masə akwa sə jene dapa kwap ana nesey sə, akwa ŋgə sə, akwa bəzad maməc ta Bay Mazlakava kasl pa pas te mevehek tata.

²⁷Mafay ana, daha ndana a ndə peŋ[4] ta Bay Mazlakava va masə bembez tata dapa kwap saw ka pafa leŋgesl aabay, ŋgesey, ke ŋgə mebərey fa slaw ta vaw ta Bay Mazlakava va bembez tata.

²⁸Ara nesey, da lada sə, kwa waawa da wuzaɗa manjah tata ɗagay, wagaa a ta ndə peŋ va masə bembez ta Bay Mazlakava dapa kwap,

²⁹afa daha ndana a ndə peŋ va masə bembez tata dapa kwap ana nesey, ka səna nesey sə, slaw ta vaw ta Bay Mazlakava aabay, ka paɗ ke jene taambəla sə, ŋgesey, a tambaɗ matəɗ ma kad pa yaŋ tata.

³⁰Mafay ana, ndah mekele mabay dapa taɓa takwar masa ac gwabay, ndah leŋgeɗey ac ava gədaŋ pahata, ndana hay gaa ec ke məceceŋ.

³¹Daha kwa waawa tandakwa a wuzaɗa manjah tata, ava yaŋ tata ana, wagaa a ta ndə ɗaf ta masənafa maməc ta Bay Mazlakava sə, ŋgesey, Zlavay a ta zəm rav da yaŋ ana aabay.

³²Daha Bay Zlavay a ŋgadandakwa marga sə, ŋgesey, a kətandakwa, afa pas masa e te təɗec ma a yaŋ ndana hay dapa vavara sə, matəɗ ma tata ana, a da təhazandakwa ara ndah dərziya sabay.

³³Ara nesey, malama va dəma hay, daha akwa kwas vaw ka ta ndə ɗaf ta masənafa maməc ta Bay Mazlakava sə, maɓəl kwa waawa takwar.

³⁴Daha mayə a kəɗa ndana, e de ndek ɗaf avəda da way tata, afa akwar da ɓəc vaw mafay ta matambaɗ matəɗ ma kad pa yaŋ akwar bay. «Da yaŋ manək ma hay mekele mekele sə, daha ya ka husata a varakwar cay sə, ya ta gwaɗakwaɗay.»