Read Cuvok 1 Kweriŋtiye hay 12 Bible Online

1 Kweriŋtiye hay 12 - Cuvok bible

1 Kweriŋtiye hay 12

¹Malama va dəma makəsparav hay, da yaŋ gədaŋ te mezlər hay masa Mesfen Mavəna ta viya kad kwa waawa sə, ya wal masa akwar da njah ara ndah masa aca sən ma da yaŋ bay sə, bay.

²Akwa səniya, zleezle masa akwa sən Zlav bay heley sə, akwa tə mbat hay. Mbat ana hay ŋgesey, ece gweɗ aabay, amaa akwa və yaŋ takwar ka tə mbat ana hay ac da ŋgə bay da yaŋ akwar fəma fəma.

³Mafay ana, ya wal sə, akwar da səna eve metehwe ana, kad akwar sə, ara na bay. Daha nda masa e gweɗ ava gədaŋ te Mesfen Mavəna sə, nda ana ŋgesey, a zlafa megweɗ: «Da lada sə, Zlav da gwadara Yesu avəda» sə, aabay. Amaa daha ndana e gweɗ, gege: «Yesu sə, aŋga Bay tandakwa Mazlakava», ŋgesey, nda ana e gweɗek ava gədaŋ ta Mesfen Mavəna, bəna e gweɗek ara na aabay.

⁴Gədaŋ te mezlər hay masa Mesfen Mavəna ta viya sə, ac wal wal, amaa Mesfeney ana pal amta ana ŋgesey ta vəniya.

⁵Mezlər hay masa Bay Mazlakava Yesu te vec kad ndana hay sə, ac wal wal may, amaa anda ŋgakwa mezlərey ana sə, kad Bay Mazlakava aŋga amta.

⁶Zlav e vec gədaŋ wal wal kad ndana hay te meŋgə mezlər tata, amaa Zlavay ana ŋgesey, aŋga amta, aŋga nda mavana gədaŋ te meŋgə mezlər ana hay fakwanay.

⁷Gədaŋ te Mesfen Mavəna e ŋguzdek vaw wal wal dapa kwa waawa takwar. E ŋguzdek vaw wal wal ana ara nesey sə, afa a da jəna ndana hay fakwanay.

⁸Kad nda leŋgeɗey,Mesfen Mavəna a vana gədaŋ te megweɗ eve leŋgesl te mevən jene hay, kad nda leŋgeɗ saya, Mesfeney ana a vana gədaŋ te meŋguzdecen Zlavay kad ndana hay.

⁹Nda leŋgeɗey, Mesfen Mavəna ana, a vana gədaŋ ta makəsparav masa masasala. Kad nda leŋgeɗ saya, Mesfen ana ŋgesey a vana gədaŋ ta mambəl mehecey hay.

¹⁰Nda leŋgeɗey a ŋgat gədaŋ te meŋgə cah hay, ta nda leŋgeɗ sə, a ŋgat gədaŋ te mehwedek ma masa e dek da vara Zlavay. Ta nda leŋgeɗey, a ŋgat gədaŋ ta mavən mezlər te Mesfen Mavəna va mezlər te mesfen maləza. Ta nda leŋgeɗ saya, a ŋgat gədaŋ te megweɗ ava ma ta wunam hay mekele mekele, ta nda leŋgeɗey a ŋgat gədaŋ ta mavahiya kad ndana hay.

¹¹Amaa mavana gədaŋ te meŋgə mezlərey ana hay fakwanay nesey sə, Mesfeney ana aŋga amta. A və gədaŋ ana hay wal wal nesey kad kwa waawa ara aŋga ta waya.

¹²Yaw, macacalakwa ava gada ta vaw ta ndana. Vaw sə, aŋga ndəlak amta, amaa gəva ana hay mekele mekele fətiya mabay. Kwa gəva hay mekele mekele fətiya gaa sə, amaa ac ka camata ka vaw amta. Kəristi sə, aŋga ara aŋga ana may.

¹³Dapa masa anda ŋgatakwa beetem sə, andakwa fakwanay andə ka tər tandakwa gada ta vaw amta jaka pa gədaŋ te Mesfen Mavəna masa aŋga amta. Andakwa fakwanay, kwa Zuwef hay, kwa ndah masa Zuwef hay bay, kwa ɓel hay, kwa ndah masa ac mapəla dapa ɓeley, Zlav a vandakwa Mesfeney ana sə, pal amta masa andakwa fakwanay ta sakakwa yam da vara Mesfeney ana amta ŋgesey.

¹⁴Vaw ta ndana sə, aŋga ava gəva amta babəla bay, amaa aŋga ava gəva hay gaa.

¹⁵Kwa daha sek, gege: «Yey sə, ya gəva ta vaw bay, afa ya ha bay», kwa aŋga ta gwaɗaɓa ara nesey sə, aŋga gəva ta vaw jaŋgata.

¹⁶Daha zləmay e gweɗey: «Yey sə, ya gəva ta vaw bay, afa ye ndey bay», kwa daha aŋga ta gwaɗaɓa ara nesey sə, aŋga gəva ta vaw jaŋgata.

¹⁷Daha gada ta vaw ta ndana fakwanay aŋga ndey babəla sə, ŋgesey, nda ana a da cəna jene gwagumaw? Daha vaw ta ndana fakwanay, aŋga zləmay, ŋgesey, nda ana a da cəna mezek te jene hay sə, meemey?

¹⁸Amaa Zlav ka paɗ gəva hay fakwanay fa gada ta vaw ta ndana ara aŋga ta waya.

¹⁹Daha Zlav a pə gəva ta vaw amta kad fa gada ta vaw war sə, ŋgesey, vaw bay.

²⁰Anda sənakwa, gəva ta vaw hay sə, ac gaa, amaa gada ta vaw sə, aŋga ndəlak amta.

²¹Ara nesey, ndey a zlafa megweɗ kad ha: «Ma taaɗaw ava kaa aabay», kwa yaŋ may, a zlafa megweɗ kad sek masa: «Ma taaɗaw ava kaa aabay» sə, aabay.

²²Gəva hay masa ac ara gədaŋ aabay sə, anjəkar aca jəna nda mabay.

²³Gəva hay masa anda wulakakwa aca ŋgandakwa hwaray sə, anda hahəlakwaɗ yaŋ teceŋ mafəna ana sesəker. Gəva hay ta vaw masa anda pakwa leŋgesl feceŋ aabay sə, sesəker ŋgesey, anda vakwa mehehəm mabay kad eceŋ.

²⁴Gəva hay ta vaw masa aca vandakwa mahahəl yaŋ sə, aca wal masa anda de jənekwec sə, aabay. Zlav ka pana gada ta vaw, ka vana mehehəm mabay kad gəva hay ta vaw masa ac ava mehehəm pahata.

²⁵E pec ara nesey sə, afa mavən vaw de ŋgə dapa vaw bay, amaa a lada gəva hay ta vaw aca ra ŋgat macam mawulak yaŋ dapa taɓa teceŋ amta amta.

²⁶Daha gəva ta vaw amta a sə marga sə, gəva hay fakwanay aca sə marga ava aŋga may. Daha gəva ta vaw amta ka ŋgat membeɗey sə, gəva hay dərziya fakwanay ac dapa mewesl.

²⁷Yaw, macam yaŋ takwar fakwanay sə, aŋga vaw te Kəristi, kwa waawa takwar aŋga gəva ta vaw ana.

²⁸Dapa Macam yaŋ ta ndah ta Zlavay sə, Zlav ka pə ndana hay ke ŋgə mezlər tata, e pek macaaca ana sə, maslaŋ hay, meecew ana, ndah mehwedek ma, mamahkar ana, ndah masasəraka ndana hay. Ava dəɓa ana, ndah maŋga cah hay mekele mekele, ndah mambəla nda dapa mehecey hay, ndah masa ac ava gədaŋ ta majəna nda va ndah masa ac ava gədaŋ ta mapad ma ta ndana hay dapa macam yaŋ hay. Mamaɗ yaŋ ana, ndah masa ac ava gədaŋ te megweɗ ava ma ta wunam hay mekele mekele.

²⁹Ndana hay fakwan ac maslaŋ hay geyey? Away. Ndana hay fakwan ac ndah mehwedek ma geyey? Away. Ndana hay fakwan ac ndah masasəraka ndana hay geyey? Away. Ndana hay fakwanay ac ndah maŋga cah hay geyey? Away.

³⁰Daha aabay, ndana hay fakwanay ac ndah mambəla nda dapa mehecey hay geyey? Away. Ndana hay fakwanay aca sən megweɗ ava ma ta wunam hay mekele mekele war geyey? Away. Ndana hay fakwanay aca sən mavah ma hay war geyey? Away.

³¹Ara nesey, mayah gədaŋ te mezlər hay mazlakava mazlakava masa Mesfen ta viya kad ndana hay ava rav pal amta. Təlam nesey, ya ta ŋguzadakwar cəv mambəla ana mafəna dərziya hay.