Read Cuvok 1 Kweriŋtiye hay 14 Bible Online

1 Kweriŋtiye hay 14 - Cuvok bible

1 Kweriŋtiye hay 14

¹Jə macaaca ana sə, mayah mawal vaw. Mayah mahwar gədaŋ te mezlər hay masa Mesfen Mavəna a viya kad ndana hay, mahwalhwala ana sə, gədaŋ ta mabəzad ma masa e dek da vara Zlavay.

²Nda magwaɗa ma ava ma ta wunam hay mekele mekele sə, e ŋgə ŋgesey, e gweɗ kad Zlavay, bəna e gweɗ kad ndana hay bay, afa ndana hay aca cəna ma masa aŋga ta gwaɗiya bay. E gweɗekey ana ŋgesey sə, ava gədaŋ te Mesfen Mavəna, ke gweɗek da yaŋ jene hay masa ndana hay aca cəna bay.

³Amaa nda mabəzada ma masa e dek da vara Zlavay sə, e gweɗ kad ndana hay. Ma tata ana e gəlec ndana hay, e vec gədaŋ, e təkecen rav.

⁴Nda masa e gweɗ ava ma ta wunam hay mekele mekele masa ndana hay aca cəna bay sə, ŋgesey, a gal yaŋ tata, amaa nda mabəzada ma masa e dek da vara Zlavay sə, e ŋgə ŋgesey, a gal ndana hay dapa Macam yaŋ ta ndah ta Zlavay fakwanay.

⁵Ya wal sə, akwar fakwanay, akwar de gweɗ ava ma ta wunam hay mekele mekele masa ndana hay aca cəna bay, amaa ya wal mahwalhwala ana sə, mabəzad ma masa e dek da vara Zlavay. Nda mabəzada ma masa e dek da vara Zlavay sə, a fəna nda masa a sən megweɗ ava ma ta wunam hay mekele mekele. Yaw, say gəla ndana ta mavah ma tata ana ɓa te megəlec ndana hay kwa.

⁶Mawulakaw təlam nesey, malama va dəma hay, daha ya daɗ ka ta wuzaɗakwar, ya gwaɗakwar ava ma ta wunam hay mekele, daha ma taaɗaw ana a hwadakwar kwa maŋguzad jene hay aabay, kwa mesen jene aabay, kwa mabəzad ma masa e dek da vara Zlavay va mesesərek aabay sə, a da jənakwar dapa mey?

⁷Ara aŋga ana, ava jə ta maslə law hay ara slərem va ganjaval. Daha uway teceŋ ana ac macacala aabay sə, ka da sən mavən uway te slərem ana daha aabay makuɗa ta ganjaval ana sə, meemey?

⁸Daha nda mafəta mankəlak ta mazal ndana hay kad pa vəram a fətiya saw sə, akwar da ləmad vaw kad pa vəram ana gwagumaw?

⁹Ara aŋga ana, da varakwar may, daha akwa gweɗ ava ma hay masa ndana hay aca cəna bay sə, ŋgesey, nda ana a da cəna ma masa akwa wal magwaɗiya sə, gwagumaw? Ŋgesey, ma takwar ana a tərata ara memeɗ taambəla.

¹⁰Ma hay mekele mekele mabay dapa vavara nesey masa ndana hay aca gwaɗiya. Kwa tərsam wula wula sə, e gweɗ ava ma tata, a cəna.

¹¹Amaa daha ndana e gweɗiyey ava ma masa ya cəna bay, ŋgesey, nda ana a tərata ara məlaŋ fa yam te ndey taaɗaw, yey may ya tərata ara məlaŋ fa yam te ndey tata.

¹²Ara nesey, ara masa akwa yah gədaŋ te mezlər masa Mesfen Mavəna ta viya kad ndah tata, mambəla sə, mayah gədaŋ te meŋgə mezlər masa a ta zlafa megəlec ndana hay dapa Macam yaŋ ta ndah ta Zlavay cəɗem cəɗem.

¹³Mafay ana, nda masa a zlafa megweɗ ava ma ta wunam hay mekele mekele sə, a lada da cə mbahw, a da ŋgat gədaŋ ta maŋgwad ma ana.

¹⁴Daha ya cə mbahw ava ma ta wunam hay mekele mekele sə, ŋgesey, rav aɗaw aŋga dapa macə mbahw. Amaa leŋgesl aɗaw sə, e ŋgə mezlər aabay.

¹⁵Naa andə da ŋgakwa sə, gwagumalamaw? Zuwan ya ta caɓa mbahw dapa rav aɗaw va dapa leŋgesl aɗaw. Ara aŋga ana, zuwan ya ta slaɓa laway dapa rav va dapa leŋgesl aɗaw.

¹⁶Daha ka ŋgə wasay kad Zlavay dapa rav takaa babəla sə, nda makəsparav masa e sən jene bay sə, a sən jə masa ka ta gwaɗiya bay. Daha ara nesey sə, a ra vahiya kad pa macə mbahw ta wasay takaa: «E de ŋgey» sə, gwagumaw?

¹⁷Kwa daha wasay takaa dapa macə mbahw ana aŋga mambəla ana sə, a ta zlafa mavana gədaŋ kad nda mekele aabay.

¹⁸Ya ŋgə wasay kad Zlavay mafay ta masa ya fənakwar fakwanay te megweɗ ava ma ta wunam hay mekele mekele masa ndana hay aca cəna bay.

¹⁹Amaa daha ya dapa Macam yaŋ ta ndah ta Zlavay sə, ya wal megweɗ mahwalhwala ana sə, ava ma hay zlam masa ndana hay aca cəna, afa ndah mekele aca ra sasərak jene, da yaŋ masa ye te gweɗ ava ma hay bakatar kuraw masa ndana hay aca cəna bay.

²⁰Malama va dəma hay, akwar ta wulak yaŋ ara wudeh bay. Dapa mezlər takwar hay sə, akwar te ŋgə suwe bay, manjah ara wude hey. Amaa dapa mawulak yaŋ takwar sə, manjah ara ndah mazlakava hay[5].

²¹Mavinda dapa Ɗelewer mavəna, gege: «Bay Mazlakava, gege: “Ye te gweɗec ndah ana ŋgesey sə, jaka pə ma ta ndah magwaɗa ma ta wunam hay mekele mekele va jaka pa ma hay masa ndana a səniya bay. Amaa ava aŋga ana fakwanay sə, ndah ana ac ta cənawa ma aɗaw ana aabay jaŋgata.”»

²²Ara nesey, megweɗ ava ma ta wunam hay mekele mekele masa ndana hay aca cəna bay sə, aŋga ara meɗel jene kad ndah masa ac makəsparav hay bay. Amaa kad makəsparav hay sə, ara ŋga bay, mabəzad ma ta Zlavay sə, aŋga ara meɗel jene kad makəsparav hay, amaa kad ndah masa makəsparav hay bay sə, ara ŋga bay.

²³Mawulakaw: Daha akwar ndah ta Zlavay fakwanay akwar makwasa, akwar fakwanay akwa gweɗ ava ma ta wunam hay mekele mekele. Ndah waya, daha aabay, ndah masa ac ka kəs ma te Yesu aabay, aca ŋgatafakwar dapa megweɗ ava ma hay masa ndana hay aca cəna bay sə, aca paɗakwar ka ndah marəzla aabay geyey?

²⁴Amaa daha akwar fakwanay akwa bəzad ma ta Zlavay, ndah waya, daha aabay, ndah masa ac ka kəs ma te Yesu aabay, aca ŋgatafakwar, akwar dapa megweɗey sə, ma ana ŋgesey e te ŋguzdecen mebər teceŋ. Asaya, ma takwar ana ŋgesey, e te vec mawulak yaŋ da yaŋ manjah tec hay mambəla ana aabay,

²⁵jene hay maraɓa dapa rav tec hay, ec te ŋguzdekec kad avəda. Mafay ana, ec te kekəred kad Zlavay, ac ta hahəmiya, ec te gweɗ eve metehwe ana, gege: «Zlav aŋga dapa taɓa takwar.»

²⁶Me de ŋgə sə, gwagumaw malama va dəma hay? Daha akwar macama, kwa waawa takwar a zlafa maslə laway, a zlafa mekəsek mesesərekey, daha aabay maŋguzad jene hay maraɓa masa ece dek da vara Zlavay, megweɗ ava ma ta wunam hay mekele, daha aabay mavah ma masa ndana a cəna bay. A lada mezlərey ana na hay fakwanay sə, de ŋgə ka ta gal macam yaŋ ta ndah ta Zlavay dapa makəsparav.

²⁷Daha ndana hay faŋga masa ece gweɗ ava ma ta wunam hay masa ndana hay aca cəna bay sə, a da fəna ndah ecew, daha aabay mahkar bay. Eceŋ ana ŋgesey, ece re gweɗ nda amta nda amta. Nda amta de vehecen ma ana kad ndana hay.

²⁸Daha ndana ta mavah ma ana aabay, ŋgesey, nda masa e gweɗ ava ma ta wunam hay mekele mekele masa ndana hay aca cəna bay sə, e te gweɗ ava gədaŋ fəma ta ndana hay bay, amaa e de gweɗ da hwaɗ da hwaɗ kad aŋga va kad Zlavay war.

²⁹Ta mabəzad ma masa e dek da vara Zlavay sə, a lada ndah ecew, daha aabay mahkar ece re gweɗ war, ndah dərziya sə, aca ra cak zləmay, aca ra wuzaɗaw dapa yaŋ teceŋ.

³⁰Daha Zlav ka ŋguzdana jene kad nda leŋgeɗey deveŋ akwar, nda masa aŋga dapa megweɗey sə, da njah teete ɗagay.

³¹Akwar fakwanay, akwa zlafa mabəzad ma ta Zlavay, amaa megweɗ nda amta nda amta, afa ndana hay aca ra ŋgat mesesərek jene mambəla ana va maŋgat gədaŋ.

³²Ndah mehwedek ma ta Zlavay sə, aca ŋgə bay da yaŋ gədaŋ masa Zlav te veceŋ,

³³afa Zlavay sə, aŋga Zlav ta maŋgə cakazlam bay, amaa Zlav te metehey. Ara masa e ŋgə dapa Macam yaŋ hay ta ndah ta Zlavay fakwanay,

³⁴da lada sə, ŋgwazah da njah teete dapa macam yaŋ hay. Ec eve cəv te megweɗ dapa miya aabay, ec de nehecen yaŋ kad mawulah tec hay ara mavinda dapa ma majawa ta Zlavay.

³⁵Daha ac ka cəna ma da yaŋ ma masa ndana hay ta gwaɗiya aabay sə, ece re nəkefec mawulah tec hay da wunam. Ŋgwaz e gweɗ dapa macam yaŋ hay sə, mambəla ana aabay.

³⁶Akwa wulakiya sə, ma ta Zlavay ana e zlerek da varakwar war geyey? Daha aabay ma ta Zlavay ana e dek sə, kad akwar war geyey?

³⁷Daha nda masa a wulakiya aŋga nda mehwedek ma, daha aabay aŋga eve Mesfen Mavəna sə, da səna ma masa ya ta vindakwaɗ nesey sə, ma majawa masa Bay tandakwa Mazlakava ta ŋguzdawa.

³⁸Daha nda masa ka cak zləmay fa ma masa ya ta vindakwaɗ na aabay sə, ŋgesey, Zlav a sən nda ana ŋga bay may.

³⁹Ara nesey, malama va dəma hay, mayah macaaca ana sə, gədaŋ ta mahwad ma ta Zlavay. Asaya, kwa daha ndana hay ece gweɗ ava ma ta wunam hay mekele sə, akwar te recen ma bay.

⁴⁰Jə mazlakava sə, meŋgə jene hay fakwanay mambəla ana. Asaya, meŋgec eve cəvey ana.