Read Cuvok 1 Kweriŋtiye hay 15 Bible Online

1 Kweriŋtiye hay 15 - Cuvok bible

1 Kweriŋtiye hay 15

¹Malama va dəma hay, ya wal masləfakwaɗ saya da yaŋ Labara mambəla ana masa ya ta ŋguzdakwaɗ zleezle. Akwar ka kəs labara ana pa rav takwar, akwar ka təhaza mambəla ana.

²Ma ta mbəlakakwar dapa mebərey sə, Labara mambəla ana ŋgesey, daha akwar ka təhazaɗ pe leŋgesl takwar ara masa ya ta bəzadakwaɗay. Daha aabay sə, makəsparav takwar ana a tərata jene taambəla.

³Ya ka sasərakakwaɗ jə macaaca ana masa ac ta sasərakakwar. Yaŋ ta ma mazlakava sə, Kəristi ka məcata mafay te mebər tandakwa, ara ma hay masa ac mavinda dapa Ɗelewer mavəna te gweɗey.

⁴Ac ka paɗ pa jəvay, manah mamahkar ana, ka pərakata dapa maməcay, ara ma hay masa ac mavinda dapa Ɗelewer mavəna te gweɗey.

⁵Dapa masa ka pərakata dapa maməcay ana sə, ka ŋguzdan vaw kad Keyfas. Asaya, ke ŋguzdecen vaw kad maslaŋ tata hay kuraw dapa yaŋ ana ecew.

⁶Ava dəɓa ana, ke ŋguzdecen vaw kad makəsparav hay masa aca fəna temere zlam da ma amta. Ndah mawala ana sə, hamazlakava teceŋ ec eve ndey ɗagay, amaa dərziya hay ec ke məceceŋ.

⁷Ka ŋguzdan vaw kad Zak. Ava dəɓa ana, ka ŋguzdan vaw kad maslaŋ tata hay fakwanay.

⁸Mamaɗ yaŋ ana, ka ŋguzdawa vaw kad yey masa ara wat masa e heyek kiya tata bay heley,

⁹afa ye kusetke deveŋ maslaŋ tata hay. Daha anda gwaɗakwa eve metehwe ana sə, ya husa te mezel maslaŋ bay, afa ye ke ŋgedec marga kad Macam yaŋ ta ndah ta Zlavay.

¹⁰Amaa mafay ta mambəla ana ta Zlavay da yaŋ yey sə, ya ka tərata ka nda masa akwa wala təlam nesey. Mambəla ana ta Zlavay sə, ke tər ara jene taambəla de vereyey sə, aabay, sesəker ye ke ŋgə mezlər gaa, mafəna maslaŋ hay fakwanay. Eve metehwe ana, maŋgana mezlərey ana ŋgesey sə, yey ava gədaŋ taaɗaw bay, amaa mambəla ana ta Zlavay dapa yey.

¹¹Ara nesey, kwa daha yey, kwa daha maslaŋ hay, nesey ma masa anda bəzadakwaɗay, akwa kəs pa rav takwar sə, ma ana ŋgesey ana.

¹²Anda bəzadiya kad ndana hay Kəristi ka pərakata dapa maməcay. Naa, ndah dərziya dapa taɓa takwar, gege: «Ndana hay ec te pərek dapa maməcay aabay» sə, meemey?

¹³Eve metehwe ana, daha ndana hay ec te pərek dapa maməc aabay sə, ŋgesey, Kəristi ke pərek dapa maməc aabay may.

¹⁴Daha Kəristi ka pərakata dapa maməcay aabay sə, ŋgesey, ma ta Zlav masa andə ta bəzadiya nesey sə, jene taambəla, akwa kəs ma ana ŋgesey sə, taambəla may.

¹⁵Daha ara nesey sə, andə ka ŋgəlafa ma Zlavay, afa andə ke ŋgəlec ma kad ndana hay, eve megweɗey, Zlav ke pərekek Kəristi avəda dapa maməcay, anjəkar kwa Zlav ka ŋgə jene aabay.

¹⁶Daha Zlav e te pərekek ndana hay avəda dapa maməc aabay sə, ŋgesey, Zlav ke pərekek Kəristi dapa maməc aabay may.

¹⁷Daha Zlavay ke pərekek Kəristi dapa maməc aabay sə, ŋgesey, akwa kəs ma tata taambəla. Ara nesey, mebər takwar mapəla bay, aŋga da yaŋ akwar heley may.

¹⁸Ara megweɗ saya, ndah makəsparav te Kəristi masa ec ke məceceŋ sə, ec ke zeceŋ.

¹⁹Daha anda pakwa Kəristi ka nda ma ta jənandakwa dapa vavara na babəla sə, ŋgesey andakwa dapa matakwa mafəna ndana hay fakwanay.

²⁰Amaa eve metehwe ana, Kəristi ka pərakata dapa maməcay. Aŋga nda masa ka pərakata macaaca ana dapa maməcay. Ara nesey, e ŋguzdek eve metehwe ana, ndah maməca hay mekele ac ta pərakata dapa maməcay.

²¹Maməcay ana e dek kad pa vavara sə, jaka vara nda amta, mezel Adamaw. Yaw, mawuna cəv kad ndana hay aca ra pərakata dapa maməcay sə, nda amta may, mezel Yesu Kəristi.

²²Ndana hay fakwanay aca məcay, afa ac macama ava Adamaw ana. Ara aŋga ana, ndah masa ac macama ava Kəristi sə, ac fakwanay ac ta ŋgat mesfeney.

²³Amaa kwa waawa e te pərekek dapa maməcay sə, fe dəle fe dəle, mepərekek kamma sə, Kəristi. Macəpiya ana, ndah te Kəristi ana, pas masa e te vehekey.

²⁴Ava dəɓa ana, memeɗ te jene hay fakwanay. Kəristi a ta van meŋgə bay tata kad Zlavay, Papaŋ ava dəɓa ta mazə gədaŋ ta bay fakwanay, matimaazlaɓ fakwanay va gədaŋ mazlakava te mesfen hay.

²⁵Amaa say Kəristi e ŋgə bay da yaŋ jene hay fakwanay ɗagay kasl pa pas masa Zlavay, Papaŋ ta paɗ maslagəra tata hay fakwanay a dara sek tata.

²⁶Maslagəra metekweɗ ana masa Zlav a ta zana avəda sə, maməcay.

²⁷Yaw, mavinda dapa ma ta Zlavay, gege: «Zlav ke peɗec jene hay fakwanay pa ha ta Wudiya.» Aŋga, mavinda ara aŋga ana. Amaa eve metehwe ana Zlavay sə, a ta njah pa ha ta Wudiya aabay, afa aŋga ta paɗ jeŋ ana hay fakwanay pa ha tata.

²⁸Dapa masa Zlav Papaŋ ke peɗec jene hay fakwanay a pa ha ta wudiya ana sə, wudiya ana may, a ta nahan yaŋ kad Papaŋ, nda mavan jene hay fakwanay. Ara nesey, Zlav Papaŋ e te ŋgə bay da yaŋ jeŋ ana hay fakwanay.

²⁹Mawulakaw da yaŋ ndah dərziya dapa taɓa takwar maŋga beetem mafay ta ndah maməca. Eve metehwe ana daha ndah maməca ec te pərek dapa maməc aabay sə, aca ŋgə beetem pa slam ta ndah maməca sə, mafay te mey?

³⁰Asaya, daha ndah maməca ac ta pərakata dapa maməc aabay sə, anda və yaŋ taciya cəɗem cəɗem ke te kəɗey sə, mafay te mey?

³¹Aŋga, cəɗem cəɗem ya wala maməcay eve ndey aɗaw. Malama va dəma hay, ya gwaɗakwaɗ jene hay fakwanay nesey sə, afa eve metehwe ana, ya ŋgə həɓa da yaŋ akwar, masa akwar macama ava Yesu Kəristi, Bay tandakwa Mazlakava.

³²Fana de Efez, maslagəra hay mabay, anda ŋgə vəram eve eceŋ ara jene hay te ley masa ac ava suwe mabay. Daha ya ŋgə vəram ana ara nesey, mafay ta mawulak yaŋ ta nda magəda babəla sə, vəram ana e de jəniyey ɓa eve mey? Daha ndah maməca ac ta pərakata ɓasabay sə, ŋgesey, ma ana tehwe masa e gweɗ, gege: «Mandakwa jene, masakwa jene, afa tedew andakwa ɓasabay.»

³³Akwa fəca yaŋ takwar bay, nda masa a ŋgway ava ndah maŋga jene hay masa e teh bay, ŋgesey ac ta zləɓan manjah tata mambəla ana ŋga avəda may.

³⁴Meŋgə mezlər eve cəvey ana, akwar te ŋgə mebər sabay. Ndah dərziya dapa taɓa takwar ɓa masa aca sən Zlav bay. Ye gweɗ ara nesey sə, ma ta hwar kad akwar.

³⁵Daha kwa ndana a zlafa mawulakiya dapa yaŋ tata, gege: «Zlav e te pərekek ndana dapa maməcay sə, gwagumaw? Nda me te pərekek dapa maməcay ana sə, a ta ŋgat vaw wula?»

³⁶Nda masa a wulakiya ara nesey sə, aŋga kelembe. Mawulakaw da yaŋ hulef masa akwa sləkiya de ley, a məcata ɗagay ava dəɓa ana a ta pəcata.

³⁷Hulef masa ka ta sləkiya, kwa ke sləkek bəley, kwa jene hay mekele, ke sləkek sə, wudiya ana babəla, me te pəcek sə, panday ana. Hulefey va panday ana, ac wal wal.

³⁸Hulef wula wula sə, Zlav a vana panday ana wal wal ara aŋga ta waya.

³⁹Jene hay fakwanay masa ec eve mesfeney sə, vaw tec wal wal may. Ara megweɗey, vaw ta nda magəda sə, aŋga wal ava ta gənaw hay va ta ɗiyak hay. Asaya, aŋga wal eve te kəlef hay.

⁴⁰Jene hay da baymaləvaŋ ɓa, jene hay dapa vavara ɓa may. Meteh te jene hay da baymaləvaŋ sə, aŋga wal eve meteh te jene hay dapa vavara.

⁴¹Meweɗ ta pas, aŋga wal eve meweɗ ta kiya. Meweɗ te menjewzle hay, aŋga wal eve meweɗ ta pas va kiya saya. Kwa dapa taɓa te menjewzle ana hay sə, meweɗ teceŋ ana wal wal saya.

⁴²Mepərek dapa maməcay sə, aŋga ara aŋga ana may. Macəhwandə hay masa ac mapəsaha cay sə, ac ara hulefey, ac ta kuɗapata. Vaw masa e pərekek dapa maməcay sə, e te kuɗep ɓasabay.

⁴³Macəhwandaw ana masa aca pəsahiya sə, aŋga ara jene taambəla, amaa pas masa e te pərekekey sə, aŋga eve mehehəm mabay. Dapa masa aca pəsahiya sə, aŋga dapa bəle, amaa pas masa e te pərekekey sə, aŋga ava gədaŋ mabay.

⁴⁴Vaw masa anda pəsahakwa pa wuyak sə, aŋga slaw ta vaw babəla. Amaa daha ka ta pərakata dapa maməcay sə, Mesfen Mavəna a ta vana mesfeney. Anda ŋgatakwa vaw masa aŋga slaw ta vaw ta babəla sə, ɓa. Amaa vaw masa a ŋgat mesfen da vara Mesfen Mavəna sə, aɓa may.

⁴⁵Ara masa mavinda dapa Ɗelewer mavəna, gege: «Adamaw, nda macaaca ana sə, aŋga nda magəda masa Zlav ta vana mesfeney.» Adamaw metekweɗ ana sə, aŋga manəha eve Mesfen mavana mesfeney kad ndana hay.

⁴⁶Vaw macaaca ana sə, vaw masa Mesfen Mavəna ta lamiya bay, amaa vaw ta ndana. Ara nesey, vaw macaaca ana sə, vaw ta nda magəda dapa vavara na ɗagay, ava dəɓa ana, vaw masa Mesfen Mavəna ta lamiya.

⁴⁷Adamaw, nda macaaca ana sə, aŋga nda magəda masa Zlav ta lamiya ava wuyak. Amaa Adamaw meecew ana sə, e dek da baymaləvaŋ.

⁴⁸Ndana hay sə, vaw teceŋ ara vaw ta nda masa Zlav ta lamiya ava wuyak. Ndah da baymaləvaŋ sə, vaw tec ara vaw ta nda medek da baymaləvaŋ sə, may.

⁴⁹Təlam nesey, vaw tandakwa aŋga ara vaw ta nda masa Zlav ta lamiya ava wuyak. Pas ana e te dekey, masa vaw tandakwa a ta tərata ara vaw ta nda masa e dek da baymaləvaŋ.

⁵⁰Mawala masa ya wal megweɗey, malama va dəma hay: Nda masa aŋga ava slaw ta vaw va bembez sə, a ta ŋgat manjah dapa Wunam ta bay ta Zlav aabay, kwa jə masa e kuɗepey sə, a zlafa macama jə masa e kuɗep aabay sə, bay.

⁵¹Macak zləmay, təlam nesey ya ta gwaɗakwar da yaŋ jene maraɓa ɓa, ndah dərziya dapa taɓa tandakwa fakwanay ac ta macə aabay, amaa andakwa fakwanay, vaw tandakwa a ta ŋgwadata.

⁵²Masa ac ta fat dərem dapa pas metekweɗ ana sə, vaw tandakwa a ta ŋgwadata zef zef ara ndana te becem ndey faŋga faŋga. Masa ac ka fəta dərem ana cay sə, ndah maməca ac ta pərakata dapa maməcay ava vaw tec masa a ta njah katar ka midakw. Andakwa dərziya masa eve ndey sə, vaw tandakwa fakwanay a ta ŋgwadata.

⁵³Ara megweɗey, vaw tandakwa masa a ta kuɗapata sə, a ta tərata ka vaw masa a ta njah katar ka midakw. Aŋga, vaw tandakwa masa a ta məcata sə, e te tər ka vaw masa a ta məc ɓasabay.

⁵⁴Daha vaw tandakwa masa a ta kuɗapata ka ŋgwadata cay sə, a ta ŋgat mesfen masa e te ndəv aabay. Vaw masa a ta məcata sə, a ta njah katar ka midakw. Ara nesey, jene hay fakwanay ac ta ŋgata ara masa mavinda dapa Ɗelewer mavəna, gege: «Bigula masa ndana da yaŋ ana ɓasabay sə, ka maməha maməc avəda.»

⁵⁵«Away, maməcay, gədaŋ takaa sə, aŋga kəla? Lalaŋ takaa masa ka ta ɓal ndana hay ava aŋga sə, aŋga kəla?»

⁵⁶Lalaŋ ta maməcay sə, mebərey, mavana gədaŋ mazlakava kad mebərey sə, ma majawa.

⁵⁷Amaa maŋgakwa wasay kad Zlavay, afa aŋga ta vandakwa gədaŋ da yaŋ maməcay jaka vara Bay tandakwa Mazlakava Yesu Kəristi.

⁵⁸Mafay ana, malama va dəma hay masa ya walakwar elehey, manjah ava gədaŋ, manjah akwar masasala dapa makəsparav. Meŋgə mezlər ta Bay Mazlakava Yesu cəɗem cəɗem ava medə fəma fəma. Akwa səniya, mezlər masa akwar ta ŋgiya ava gədaŋ tata nesey sə, a zə taambəla aabay.