Read Cuvok 1 Kweriŋtiye hay 16 Bible Online

1 Kweriŋtiye hay 16 - Cuvok bible

1 Kweriŋtiye hay 16

¹Ya ta gwaɗakwar təlam nesey da yaŋ ma ta səlay masa akwar ta cəkaliya kad ndah ta Zlavay de Zeruzelem. Ara masa ye te gweɗec ndah dapa Macam yaŋ ta ndah ta Zlavay dapa vavara ta Galat, akwar may, maŋgaw ara eceŋ ana.

²Fa manah macaaca ana ta hwaɗ ta luma fakwanay sə, kwa waawa deveŋ akwar da kəs səlay deveŋ səlay masa aŋga ta ŋgatiya ava gədaŋ tata, a da vaw. Ara nesey, akwar ta ɓal say pas masa ya ta husaɗay akwar da cəkal səlay ana bay.

³Daha ya ka husata varakwar cay sə, ye te zlərdec ndah masa akwar te pelec ka ta hwad səlay takwar ana, kad Zeruzelem. Ye te vec leeter ta maŋguzad yaŋ teceŋ pa ha, aca ra hwad jə takwar macəkala ana.

⁴Daha mambəla ye de dey ava yaŋ taaɗaw ana sə, ŋgesey, andə te dey eve eceŋ fa slam ana.

⁵Ye te də kad pa vavara ta Masiduwan, afa andə da cə yaŋ ava ndah dapa Macam yaŋ ta ndah ta Zlavay dərŋga. Ava dəɓa ana, ya da husaɗ varakwar.

⁶Ayakwa, daha efes e ŋgey sə, gəla ya ta njahata varakwar ana kusetke, daha aabay gəla ya ndəvda kiya te memeɗ varakwar faŋga kwa. Ara nesey, daha ya ta gərdakwar sə, akwar de jəniyey eve jene masa e te jəniyey dapa maŋgway aɗaw, kwa kad pa slam mekele mekele hay.

⁷Daha ya ta husaɗ varakwar ta manjah kusetke war sə, ŋgesey, e wefiyey bay. Amaa daha Bay Mazlakava ke və cəvey sə, ya wal sə, ya da njah gaa da varakwar.

⁸Ya ta njah dapa berne te Efez kasl pa pas ta macunam ta Pantikwasta te husekey,

⁹afa Zlav ke wuniyey cəv mazlakava te meŋgə mezlər mambəla ana dərŋga. Asaya, afa maslagəra tandakwa hay ac mabay.

¹⁰Daha Timawtey ka husaɗ a varakwar cay sə, makəsaw eve mewesley, afa a da njah ava zidaw dapa vaw bay, afa aŋga sə, e ŋgə mezlər ta bay Mazlakava ara yey.

¹¹Kwa ndana a ta ŋgaŋgəriya bay. Majənaw eve jene hay masa a da jəna te mevehek kad vereyey dapa metehey. Andaw ava malamaŋ tandakwa hay mekele mekele andə dapa maɓəliya fana.

¹²Da yaŋ malamaŋ tandakwa Apawlaws, ya ka ŋgana mbahw dəɓa gaa, ya ka gwaɗa, mambəla sə, da daɗay kad varakwar ava malamaŋ tandakwa hay dərziya, amaa a wal medə təlam na bay heley. Kad fəma na daha ka ŋgat ha sə, a ta daɗay.

¹³Akwar ta njawaŋ bay, majaha vaw mambəla ana dapa ma ta Zlavay, akwar te ŋgə zidaw bay, manjah ava gədaŋ.

¹⁴Meŋgə jene hay fakwanay ava mawal vaw.

¹⁵Malama va dəma hay, akwa sən Estifanas va ndah ta way tata biba. Eceŋ sə, ac makəsparav hay te Kəristi macaaca dapa vavara ta Akay. Ac ka və yaŋ teceŋ ka ta jən ndah ta Zlavay.

¹⁶Ya ŋgakwar mbahw malama va dəma hay, ndah ana hay ara ŋgesey sə, menehecen yaŋ, menehecen yaŋ kwa kad ndah masa ece ŋgə mezlərey, aca ŋgə gədaŋ eve eceŋ fa slam ana.

¹⁷Ye wesley mafay ta masa ya ta wala Estifanas, Fartunatus va Akaykus ec te dek kad vereyey. Masa ye weleceŋ sə, ara ya ta walakwar fakwanay.

¹⁸Ac ka təkawa rav ara masa ac ta təkakwaɗ rav may. Tərsam ta ndah ana ara ŋgesey sə, mehehəlecen yaŋ.

¹⁹Macam yaŋ hay ta ndah ta Zlavay dapa vavara ta Azi aca gwaɗafakwar. Akilas va ŋgwaza Pəriska va ndah te Yesu masa ac makwasa da way tata sə, aca gwaɗafakwar mambəla ana dapa mezel ta Bay Mazlakava Yesu.

²⁰Ndah te Yesu fakwanay fana aca gwaɗafakwar may. Akwar fakwanay megweɗ fa vaw dapa taɓa takwar amta amta ava mahumbat vaw ara akwar malamaŋ va dəmaŋ hay.

²¹Yey Pawl, ya gwaɗafakwar. Yey ava ha taaɗaw ta vindakwaɗ megweɗ fa vaw ana nesey.

²²Nda masa a wal Bay Mazlakava bay sə, a lada Zlav da nasa avəda. «Maranata» ara megweɗey: Bay Mazlakava, dekey!

²³Da lada sə, mambəla ana ta Bay tandakwa Mazlakava Yesu a da njah ava akwar.

²⁴Akwar ndah te Yesu Kəristi, ya walakwar, akwar fakwanay.