Read Cuvok 1 Kweriŋtiye hay 2 Bible Online

1 Kweriŋtiye hay 2 - Cuvok bible

1 Kweriŋtiye hay 2

¹Malama va dəma hay, dapa masa ya daɗ kad varakwar ka ta ŋguzdakwaɗ maləmad vaw maraɓa ta Zlavay sə, ya ka gwaɗakwar ava ma hay masa maɗəva, daha aabay eve mesen jene hay masa a rəzla nda sə, aabay.

²Masa ya da varakwar faŋga sə, ya ka pə mawulak yaŋ te mesen jene mekele aabay, say mawulak yaŋ da yaŋ Yesu Kəristi. Yesu Kəristi masa a məc fa hap mazləlawa.

³Masa ya da varakwar faŋga sə, ya ava bəle, zidaw e kəɗiyey, ye kekesl mabay.

⁴Mesesərekey aɗaw va mabəzad ma aɗaw sə, ec ke cecel ava ma hay masa ece dek dapa leŋgesl te meven jene hay ta ndana hay sə, aabay. Amaa ece ŋguzdek jaka pa gədaŋ mazlakava te Mesfen Mavəna.

⁵E ŋgə ara nesey sə, afa makəsparav takwar de zlec da yaŋ leŋgesl te meven jene hay ta ndamagəda bay, amaa de zlec da yaŋ gədaŋ mazlakava ta Zlavay.

⁶Ava aŋga ana fakwanay, anda sasərak ndah masəfa dapa ma ta Zlavay eve mesen jene hay masa metehwe ana. Anda sesərekeceŋ ana sə, eve mesen jene ta ndah ta vavara na bay. Asaya, anda sesərekeceŋ sə, eve mesen jene ta bay hay ta vavara na bay. Bay ana hay ŋgesey, Zlav e te zenec avəda.

⁷Andaw sə, anda sesərekec ndana hay da yaŋ leŋgesl te meven jene hay ta Zlavay masa aŋga maraɓa dəga zleezle fa yam te ndey ta ndana hay. Dəga vavara malama bay heley sə, Zlav ka ləmadaɗ leŋgesl te meven jene hay tata ana ha ka ta vandakwa mehehəmey.

⁸Bay hay maŋga bay dapa vavara nesey, kwa amta masa a sən leŋgesl ta Zlavay ana sə, aabay. Daha efes ac ka səna avəda sə, aca dar Bay tandakwa Mazlakava, nda masa aŋga eve membeɗ ta Zlav gaa fa hap mazləlawa sə, aabay.

⁹Amaa ara mavinda dapa Ɗelewer mavəna, gege: «Jə masa ndana ka wala aabay, kwa mecən ava zləmay, ka cəna aabay, kwa ndana ka wulakaw aabay sə, Zlav ke ləmedeɗec jeŋ ana hay kad ndah masa e weleceŋ.»

¹⁰Amaa andakwa sə, Zlav ka ŋguzdandakwaɗ jə maraɓa ana ŋgesey jaka pe Mesfen tata. Mesfeney ana sə, a wuzaɗ jene hay fakwanay, kwa mawulak yaŋ ta Zlavay maraɓa dəreŋ.

¹¹Ndana wa masa a sən mawulak yaŋ ta nda mekele? Say mesfen ta nda ana ta sən mawulak yaŋ ta nda ana! Ara aŋga ana ava Zlavay, say Mesfen Mavəna ana aŋga amta, ta sən mawulak yaŋ ta Zlavay ana.

¹²Mesfen vara andakwa nesey sə, Mesfen ta vavara na bay, amaa Mesfen masa Zlav ta vandakwa, afa a wal anda da sənakwaɗ jene hay fakwanay masa a wal mavandakwaɗay.

¹³Taciya sə, anda gwaɗiya eve mesesərek hay masa ece dek dapa leŋgesl te meven jene hay ta ndamagəda bay, amaa eve mesesərek hay masa ece dek dapa Mesfen Mavəna. Ara nesey, anda ŋguzdecen ma metehwe ana hay te Mesfeney kad ndah masa ec eve Mesfeney ana.

¹⁴Nda masa e ŋgə mezlər ava mawulak yaŋ tata sə, a cənan ma te Mesfen Mavəna aabay. A zlafa makəsiya bay sə, afa a wala ma ana ara merəzley. Mazlafa mawala ma ana va macəna ma ana sə, say nda masa aŋga eve Mesfen Mavəna ana.

¹⁵Nda masa aŋga eve Mesfen Mavəna sə, a zlafa mavən jene hay fakwanay. Ndana mazlafa mavən jə mambəla ana va mambəla ana aabay dapa manjah tata sə, aabay.

¹⁶Ma ana nesey, amta ava ma ta Zlav masa e gweɗ, gege: «Masən mawulak yaŋ ta Bay Mazlakava sə, wa? Mazlafa mavana mamənak sə, wa? Amaa andakwa sə, mawulak yaŋ tandakwa amta ava te Kəristi.»