Read Cuvok 1 Kweriŋtiye hay 3 Bible Online

1 Kweriŋtiye hay 3 - Cuvok bible

1 Kweriŋtiye hay 3

¹Malama va dəma hay dapa makəsparav, ya ka zlafa magwaɗakwar ara kad ndah masa ac eve Mesfen Mavəna sə, aabay. Amaa ya gwaɗakwar sə, ara kad ndah ta vavara masa ac ara wude hey dapa cəv te Kəristi.

²Ara nesey, ya vakwar wa, bəna ɗaf masa masasala bay. Aŋga, ya ka sasərakakwaɗ jə masa gəra dapa sə, aabay heley, afa akwa zlafa maɓəsiya bay. Kwa təlam nesey ana maa, akwa zlafa maɓəsiya bay heley,

³afa leŋgesl takwar aŋga ara ta ndah ta vavara war. Akwa ŋgə səlek dapa taɓa takwar, akwa ŋgə gada fa vaw takwar. Mafay ana, mawulak yaŋ takwar sə, aŋga ara ta ndah ta vavara. Manjah takwar may, aŋga ara ta ndah ta vavara ana jaŋgata.

⁴Daha nda amta deveŋ akwar e gweɗey: «Andaw ndah ta Pawl.» Ndah dərziya, gege: «Andaw ndah ta Apawlaws.» Ma ana hay nesey sə, mawulak yaŋ ta ndah ta vavara aabay geyey?

⁵Apawlaws ana sə, aŋga wa? Yey Pawl ana sə, ya wa? Andaw sə, andaw ndah maŋga mezlər ta Zlav war. A zlərakandaw sə, afa akwar da kəs ma da yaŋ Kəristi. Kwa waawa deveŋ andaw sə, e ŋgə mezlər masa Bay Mazlakava ta vana.

⁶Andaw sə, andaw ara ndah te mehəvey[2]. Yey sə, ya nda masləka jene, Apawlaws sə, aŋga nda macəhafa yam. Amaa mazlafa magəla jeŋ ana sə, say Zlavay.

⁷Ara nesey, nda masləka jene va nda macəhafa yam sə, ac ara jene taambəla, say Zlav nda mazlafa magəliya.

⁸Nda masləka jene va nda macəhafa yam sə, ac amta, amaa Zlav a ta pal meyəv ta kwa waawa sə, təɗe fe mezlər ta nda ana.

⁹Andaw cuweeney, andaw ndah maŋga mezlər ta Zlav fa slam ana. Akwar sə, akwar ara ley ta Zlavay. Asaya, akwar ara way ta Zlavay malama.

¹⁰Ava gədaŋ masa Zlav te viyey, ya ka pana dar ta way ara nda malama way mambəla ana, masa ka tatəha dar ana eve kekeŋ. Təlam nesey, nda mekele ke dekey ka ta lam way ana. Amaa say kwa waawa da pə leŋgesl mambəla ana dapa malam way ana.

¹¹Sek ta way ana sə, matatəha cay, sek ana sə, Yesu Kəristi. Ndana mazlafa matatah sek ta way ana mekele sə, ɓasabay.

¹²Da yaŋ sek ta way ana sə, ndah mekele aca lamiya ava gənaɓ mambəla ana, ŋgeɗ hay aca lamiya ava ɓəray, dərziya hay aca lamiya eve kekeŋ hay masa ece zlezley, ndah mekele saya may, aca lamiya ava hap, ŋgeɗ hay aca lamiya ava panday, dərziya hay aca lamiya eve kəzeŋ hay.

¹³Amaa pas masa Zlav a ta təɗ ma kad yaŋ ndana hay sə, mezlər ta kwa waawa a ta ŋguzdakata fa yam te ndey ta ndana hay fakwanay, afa ta pəsaŋga ana ŋgesey, kwakwaw magəɗa e te ŋguzdek mezlər mambəla ana va mambəla ana aabay fa nda fa nda ana.

¹⁴Daha ndana ka ŋgə mezlərey, amaa kwakwaw ka zlafa mandal mezlər tata ana aabay sə, ŋgesey, nda ana a ta ŋgat meyəv tata.

¹⁵Amaa daha kwakwaw ka ndala mezlər ta ndana avəda sə, ŋgesey, nda ana a ta ŋgat meyəv tata aabay. Aŋga sə, a mbəlata, amaa membəley ana sə, ava gədaŋ dapa ara ndana te mbəlek dapa kwakwaw.

¹⁶Akwa sən masa akwar sə, akwar way ta kwakwas ta Zlavay, masa Mesfen ta Zlav aŋga manjaha dapa akwar sə, bay geyey?

¹⁷Daha ndana ka mbəɗa way ta kwakwas ana avəda sə, Zlav a ta zana nda ana ŋga avəda may, afa way ta kwakwas ana ŋgesey, aŋga mavəna. Way ta kwakwas ana sə, akwar ava yaŋ takwar ana.

¹⁸Ndana a ta fəca yaŋ tata bay. Daha ndana deveŋ akwar a wulakiya aŋga sə, aŋga nda eve leŋgesl te mevən jene ara ta ndah ta vavara nesey sə, a lada de tər ka nda marəzla. Ara nesey, a tərata ka nda eve leŋgesl te mevən jene metehwe ana,

¹⁹afa leŋgesl te meven jene hay ta vavara nesey sə, merəzley fa yam te ndey Zlavay. Ara mavinda dapa Ɗelewer mavəna, gege: «Zlav a ta təhaz ndah eve leŋgesl te meven jene hay ava gadaŋ te wewer tec masa ac ta ŋgiya ŋgesey.»

²⁰Ma ta Zlav ke gweɗ saya, gege: «Bay Mazlakava sə, a sən mawulak yaŋ ta ndah eve leŋgesl te mevən jene hay. A səniya, leŋgesl teceŋ ana ŋgesey, jene taambəla.»

²¹Ara nesey, ndana a ta ŋgə həɓa mafay ta ndana hay bay, afa jene hay fakwanay sə, takwar ana.

²²Ara megweɗey, yey, Pawl, Apawlaws va Keyfas sə, andaw fakwanay dapa ha takwar. Vavara nesey, manjah eve ndey, maməcay, jene hay masa ece ŋgə təlam nesey va masa ac te ŋgə maayaŋ kad fəma sə, fakwan ac dapa ha takwar.

²³Amaa akwar sə, akwar dapa ha te Kəristi, Kəristi may, aŋga dapa ha ta Zlavay.