Read Cuvok 1 Kweriŋtiye hay 4 Bible Online

1 Kweriŋtiye hay 4 - Cuvok bible

1 Kweriŋtiye hay 4

¹Aca paɗandaw sə, ka ndah maŋga mezlər te Kəristi. Nda mapana ndey fa ndah maŋga mezlər ta ma masa maraɓa ta Zlavay.

²Daha aca gəraɗ jene pa ha ta ndana, a da pafa ndey sə, say nda ana a pafa ndey mambəla ana ara nda mavana jeŋ ana ta gwaɗa.

³Kad yey sə, kwa akwar, daha aabay ndah mavəna ma ta ndana hay ta vavara nesey ta wala mezlərey aɗaw ara mambəla ana aabay sə, ŋgesey, a təɗawa rav aabay. Kwa yey ana, ya zlafa matəɗana ma yaŋ aɗaw aabay.

⁴Mawulak yaŋ aɗaw sə, a təɗawa rav aabay. Yaw, amaa ara na bay, ya zlafa megweɗ masa ya nda mapana cay sə, aabay may, afa ma da vəna ma da yaŋ yey sə, Bay Mazlakava pal aŋga amta.

⁵Mafay ana, akwar ta təɗana ma yaŋ ndana wagaa pas te mevehek ta Bay Mazlakava bay. Maɓal pas masa Bay Mazlakava ana ta dakata. Pas masa ka ta vahakata sə, e te pəlehek jene hay masa maraɓa dapa ləvaŋ sə, avəda kad a vəda. Jene hay masa ndana hay ta wulakiya dapa rav teceŋ sə, ac ta ŋguzdakata kad a vəda may. Pəsaŋga ana ŋgesey, kwa waawa a ta ŋgat mahahal yaŋ təɗe fe mezlər tata masa aŋga ta ŋgiya.

⁶Malama va dəma hay, ya ka ŋguzadakwar jene da yaŋ andaw ava Apawlaws, afa a da jənakwar ta masasərak jene hay mambəla ana. Ya wal sə, maŋgaw ara andaw, ara ma ɓa te gweɗ, gege: «Ma majawa masa mavinda ana cay sə, ndana e te zleŋ jaka yaŋ ana bay.» Ara nesey, akwar ta ŋgə həɓa mafay ta ndana amta, akwa paɗ nda leŋgeɗey ara jene taambəla bay.

⁷Mapaɗakaa ka nda mazlakava da yaŋ ndah mekele sə, wa? Naa mavakaa jene hay fakwanay sə, Zlavay? Yaw, daha Zlav ta vakaa sə, naa ka ŋgə həɓa ara ka ta ŋgatiya ava gədaŋ takaa sə, mafay te mey?

⁸Akwar sə, akwar mban cay! Akwar eve zleley hay mabay! Akwar bay hay! Amaa andaw sə, bay hay bay. Daha efes akwar bay hay metehwe ana sə, anda ndakwa bay ana fa slam ana aabay ŋgəɗa geyey?

⁹Amaa ya maslaŋ te Yesu Kəristi, ya wulakiya sə, Zlav ka paɗandaw ka ndah metekweɗ ana. Andaw sə, andaw ara ndah masa ma matəɗa a yaŋ eceŋ te mekəɗec dapa slam ta macəkuma hay ka macəhwandaw fa yam te ndey ta vavara fakwanay, fa yam te ndey ta maskəla hay ta Zlavay va fa yam te ndey ta ndana hay.

¹⁰Ndana hay aca pandaw ka ndah marəzla, afa anda bəzad ma da yaŋ Kəristi. Amaa akwar sə, akwar ndah eve leŋgesl hay, afa akwar macama ava Kəristi. Andaw sə, andaw ndah bəle hay, amaa akwar sə, akwar ndah ava gədaŋ hay. Andaw sə, andaw ndah masa ndana hay aca pandaw ara jene taambəla, amaa akwar sə, ndana hay aca hahəmakwar.

¹¹Dəga fes na bay kasl pəsna, may a kəɗandaw, yam a kəɗandaw, rəkwat fa vaw taciya hay sə, mava ana gwanjanjaɓnjaɓ, ndana hay aca ŋgadandaw hahar, anda ŋgway saw, afa way taciya aabay.

¹²Anda ŋgə mezlərey ava gədaŋ taciya, afa andə da ŋgat jene ta manday. Daha ndana hay aca lafandaw sə, anda nəkafa Zlavay de ŋgec jene mambəla ana. Daha ndana hay aca ŋgadandaw hahar sə, anda ɓəsiya war.

¹³Daha ndana hay ece gweɗ ma hay mambəla ana aabay da yaŋ andaw sə, anda vehecen ava ma mambəla ana. Ta pəsna nesey fa yam te ndey ta ndah ta vavara sə, andaw ara jene makuya dapa cuwey, andaw ara jene hay masa a ta jən nda ɓasabay.

¹⁴Ya vindakwar ma nesey ta mapakwar hwar pe ndey bay, amaa ta makətakwar ara wude hey aɗaw masa ye welec elehey.

¹⁵Kwa akwar ka ŋgat ndana hay gaa masa aca sasərakakwar jene da yaŋ Kəristi, amaa papaŋ takwar sə, pal ya amta. Ya ara papaŋ takwar masa ya ta hayakakwar, afa akwar macama ava Yesu Kəristi dəga dapa masa ya ta bəzadakwar Labara mambəla ana.

¹⁶Ara nesey, ya ŋgakwar mbahw, meŋgə jene hay fakwanay ara masa ya ta ŋgiya.

¹⁷Mafay ana, ya zlərakwar Timawtey, wat aɗaw dapa Yesu masa ya waya elehey, aŋga sə, aŋga nda maŋga mezlər eve cəvey ana dapa macam vaw ava Bay Mazlakava, afa a da sləfakwaɗ jə masa ya ta ŋgiya dapa manjahay aɗaw dapa cəv te Kəristi saya. A ta sləfakwaɗ sə, ma masa ye te sesərekecen kad ndah dapa Macam yaŋ hay ta ndah ta Zlavay cəɗem cəɗem kwa fəla fəla fakwanay.

¹⁸Ndah mekele deveŋ akwar aca ŋgə həɓa, afa aca wulakiya sə, ye te veh kad varakwar ɓasabay.

¹⁹Amaa daha Bay Mazlakava ka walaw sə, mbala ya ta vahaɗ kad varakwar cay saya. Daha ya ka husaɗ cay sə, ya ta yah masəna ma teceŋ ana ŋgesey. Asaya, ya da wala mezlər tec masa ac ta zlafa maŋgiya.

²⁰Afa Wunam ta bay ta Zlavay sə, mazlaca da yaŋ ma hay bay, amaa da yaŋ gədaŋ.

²¹Akwar sə, akwa wal mey? Akwa wal sə, ya daɗ kad varakwar ava law dapa ha geyey? Daha aabay ya daɗ ava rav mambəla ana masa a da ŋguzdakwaɗ sə, ya walakwar geyey?