Read Cuvok 1 Kweriŋtiye hay 5 Bible Online

1 Kweriŋtiye hay 5 - Cuvok bible

1 Kweriŋtiye hay 5

¹Yaw, ya ka cəna vara ndana hay vəla vəla fakwanay, ece gweɗ, gege: Ndana deveŋ akwar ɓa, a ŋgə madama. Madama ana hay ara nesey sə, kwa vara ndah masa aca sən Zlav bay sə, aabay. Aya, ndana deveŋ akwar a kəs vaw ava ŋgwaz ta papaŋ.

²Efes akwar ta makuɗa mafay te mebər takwar, sesəker akwa ŋgə həɓa sə, meemey? Nda maŋga jeŋ ana ara nesey sə, say akwa mbasana dapa taɓa takwar.

³Yey sə, ya dapa taɓa takwar faŋga aabay, amaa mesfeney aɗaw aŋga da varakwar faŋga. Ya ka ŋgəla ma da yaŋ nda mambaha jeŋ ana ŋga cay ara ya dapa taɓa takwar faŋga.

⁴Ara nesey, pas masa akwar ta cam vaw fa slam ana sə, mesfeney aɗaw a ta njah ava akwar. Asaya, gədaŋ ta Bay tandakwa Mazlakava Yesu e te ŋguzdekey.

⁵Magəraɗ nda ana pa ha ta Saadan, da ŋgada hahar kad vaw tata, afa Bay Zlavay da mbəla mesfen tata avəda pas masa Bay tandakwa Mazlakava Yesu e te vehekey.

⁶Naa, akwa ŋgə həɓa sə, mafay te mey? Həɓa takwar ŋgesey sə, mambəla ana aabay! Akwa səniya is kusetke sə, a ɓəsla kəfa mahaɗa gaa avəda aabay geyey? Ara aŋga ana, mebər ta nda amta sə, a nasakwaɗ macam yaŋ takwar ana avəda fakwanay.

⁷Ara nesey, makəsa is mezleezle ana te mebər sə, avəda dapa taɓa takwar, afa akwar da tər mapana ara kəfa mahaɗa masa is dapa aabay. Ya səniya eve metehwe ana, Zlav ka panakwar avəda cay ava maməc te Kəristi masa aŋga ara wut ta təmak tandakwa Zuwef hay te meŋgə macunam ta Pak. Ac ka zləlawaɗ fa hap mazləlawa.

⁸Ara nesey, maŋgakwa macunam! Amaa andə ta ŋgakwa macunam ana sə, ava is mava bay. Ara megweɗey, magərakwaɗ meŋgə suwe, matərakwa ka ndah masa ec eve mebər aabay, ndah mambəla ana maŋga jene metehwe ana.

⁹Dapa leeter aɗaw leŋgeɗey sə, ya ka vindaw, ya ka gwaɗakwar, akwar ta cam vaw ava nda makəsa vaw fa zaŋ ana bay.

¹⁰Ye ke gweɗ da yaŋ ndah makəsa vaw fa zaŋ ana ta vavara na fakwan aabay. Eceŋ sə, aca kəs vaw fa zaŋ ana, aca ŋgə ndey fe jə ta ndana hay, ece kərey, aca tə mbat hay. Daha ara nesey sə, a lada akwa daɓa kad a vəda dapa vavara.

¹¹Ya wal magwaɗakwar sə, akwar ta cam vaw ava nda masa mezel makəsparav amaa a kəs vaw fa zaŋ ana, e ŋgə ndey fe jə ta ndana hay, a tə mbat hay, a laf ndana hay, a və yaŋ tata kad pe jene hay makwa nda, daha aabay, e kərey, ŋgesey, kwa ɗaf sə, akwar ta ndiya ava tərsam ta nda ana ŋga fa slam ana bay.

¹²Ma taaɗaw te megweɗ da yaŋ ndah masa aca sən Zlav sə, aabay. Akwar eve cəv te metəɗec ma yaŋ ndah masa ac dapa macam yaŋ takwar.

¹³Ndah masa aca sən Zlav bay sə, me te metəɗec ma a yaŋ sə, Zlavay ana ava yaŋ tata. Ara masa mavinda dapa Ɗelewer mavəna, gege: «Makəsa nda suwe avəda dapa taɓa takwar.»