Read Cuvok 1 Kweriŋtiye hay 6 Bible Online

1 Kweriŋtiye hay 6 - Cuvok bible

1 Kweriŋtiye hay 6

¹Daha ndana deveŋ akwar masa nda mekele aŋga deveŋ akwar ana, ka ŋgana jə masa e teh bay ɓa, e dey ka ta yah maləmad ma ana vara ndah masa aca sən Zlav bay, a gərda ndah ta Zlavay sə, mambəla ana geyey?

²Akwa sən masa pas ana e te dekey, ndah ta Zlavay ec te təɗec ma yaŋ ndah ta vavara fakwan sə, bay geyey? Yaw, daha me te təɗec ma yaŋ ndah ta vavara akwar ndah ta Zlavay sə, naa ma mekusetke ana dapa taɓa takwar, akwa zlafa maŋgəliya bay sə, a ŋgana gwagumaw?

³Masəna, kwa maskəla hay ta Zlav da baymaləvaŋ, me te təɗec ma yaŋ sə, akwar. Yaw, daha ara nesey sə, naa ma mekusetke ana dapa vavara nesey, akwa zlafa maŋgəliya bay sə, mafay te mey?

⁴Ndah masa aca sən Zlav bay sə, ma tec ava akwar makəsparav hay sə, aabay. Naa daha ma takwar te meven ɓa, akwa hwadiya kad vereceŋ sə, meemey?

⁵Ye gweɗ ara nesey sə, afa hwar da kəɗakwar. Eve metehwe ana, kwa nda amta masa aŋga eve leŋgesl te mevən jene hay masa a da ləmadakwaɗ ma ana dapa taɓa takwar sə, aabay geyey?

⁶Mawala jə masa akwar ta ŋgiya! Akwa cə lalaw fa vaw takwar. Macə lalaw takwar ana sə, say fəma ta ndah masa aca sən Zlav bay. Ŋgesey ana sə, jə mambəla ana geyey?

⁷Macə lalaw takwar ana ŋgesey, e ŋguzdek metəɗ takwar dapa cəv ta Zlavay. Daha ndana ka yahafakaa ma, ɓəsaw eve mepəsek, ka ta cafa lalaw bay. Ka ɓəs jə masa malamakw dapa makəsparav ta ŋgakaa eve cəvey ana aabay sə, mafay te mey? Ka vana cəv ka malamakw dapa makəsparav de kər jene takaa bay sə, mafay te mey?

⁸Sesəker maŋgana jene mambəla ana aabay kad ndana hay sə, akwar, makəra ndana hay sə, akwar. Naa akwa ŋgiya ara nesey sə, kad makəsparav hay?

⁹Ndah maŋga jene hay eve cəvey ana aabay ac ta ŋgat manjah dapa Wunam ta bay ta Zlav aabay sə, anjəkar akwa səniya bay geyey? Akwa fəca yaŋ takwar bay! Masəna, kwa ndah makəsa vaw fa zaŋ ana saw, kwa ndah matana mbat hay, kwa ndah maŋga madama, kwa mawulah daha aabay ŋgwazah makəsa vaw ava mawal, daha aabay ava ŋgwaz caliya,

¹⁰kwa makar hay, kwa ndah maŋga ndey fe jə ta ndana hay, kwa ndah makwa hay, kwa ndah maŋga mbaɗambaɗa fa ndana hay va ndah mapərasla ndana hay dapa cəvey sə, ac ta ŋgat manjah dapa Wunam ta bay ta Zlavay aabay.

¹¹Mawala masa ndah dərziya deveŋ akwar manjaha zleezle. Amaa ac ka panakwar avəda, ac ka paɗakwar ha wal, ac ka tərakwar avəda ka ndah maŋga mezlər eve cəvey ana, eve mezel ta Bay Mazlakava Yesu Kəristi jaka pe Mesfen Mavəna tandakwa.

¹²Ndah dərziya deveŋ akwar, aca wulakiya, ece gweɗ, gege: «Jene masa te meŋgə bay sə, aabay.» Aŋga, eve metehwe ana, jene hay fakwanay sə, te meŋgey, amaa jene hay dərziya sə, a ta jənakwar aabay, ya wulakiya, yey sə, ya mapəla te meŋgə jene hay fakwanay, amaa ya ta və yaŋ aɗaw ke ɓel te jeŋ ana hay ŋga aabay.

¹³Akwar ka wulakaw saya, akwa gwaɗa: «Zlav e lemek ɗaf sə, mafay ta hwaɗ, hwaɗ may malama mafay ta ɗaf.» Aŋga, metehwe ana, amaa Zlav e te zenec avəda cuweeney. Ava ma mekele, Zlav e lemek vaw ta ndana sə, te meŋgə jene hay saw ava aŋga bay. Amaa e lemek sə, mafay ta Bay tandakwa Mazlakava Yesu Kəristi, Bay Mazlakava may, mafay ta vaw tandakwa.

¹⁴Zlav mapəraka Bay Mazlakava dapa maməcay sə, a ta pərakandakwa avəda dapa maməc may ava gədaŋ tata mazlakava.

¹⁵Vaw takwar sə, ac gəva hay ta vaw te Kəristi. Təlam nesey, ya zlafa macam gəva ta vaw te Kəristi ava vaw ta ŋgwaz barvəla geyey? Ara na e te ŋgə aabay.

¹⁶Nda makəsa vaw ava ŋgwaz barvəla sə, ec cuweeney, ac ka camata ka slaw ta vaw amta sə, akwa səniya bay geyey? Ara mavinda dapa Ɗelewer mavəna, gege: «Ac cuweeney, ac ka tərata amta.»

¹⁷Amaa nda masa a cam vaw sesəker ava Bay Mazlakava Yesu dapa rav tata sə, aca tərata amta.

¹⁸Mafay ana, mahwaɓa dəreŋ fa makəs vaw fa zaŋ ana. Mebər hay mekele fakwan masa ndana ta ŋgiya sə, aca husafa vaw tata aabay. Amaa nda masa a və yaŋ tata ta makəs vaw fa zaŋ ana sə, ŋgesey, e ŋgə mebər kad fa vaw tata.

¹⁹Vaw takwar aŋga way te Mesfen Mavəna. Zlav ka vakwar Mesfen tata, afa a da njah dapa akwar. Vaw takwar sə, maŋga bay da yaŋ ana akwar bay, amaa Zlavay.

²⁰Zlav ka yambaɗakakwar avəda kad aŋga ava jə mambəla ana te mambəlakakwar dapa mebərey. Mafay ana, mahahəlan yaŋ ta Zlavay ava jə masa akwar ta ŋgiya ava vaw takwar.