Read Cuvok 1 Kweriŋtiye hay 7 Bible Online

1 Kweriŋtiye hay 7 - Cuvok bible

1 Kweriŋtiye hay 7

¹Təlam nesey, ya vahakwaɗ ma takwar masa akwar te nəkefiyey dapa leeter. Kad mawal sə, jə mambəla ana kad aŋga, a da makəs ŋgwaz bay.

²Amaa, mafay ta makəs vaw saw fa zaŋ ana saw sə, zuwan kwa waawa da kəs ŋgwaz, ŋgwaz may, da kəs mawal.

³Mawal da van vaw tata kad ŋgwaza ara aŋga ta waya. Ara aŋga ana, ŋgwaz may, da van vaw tata kad mawula ara aŋga ta waya,

⁴afa ŋgwaz a zlafa meŋgə bay da yaŋ vaw tata bay, maŋga bay da yaŋ vaw tata sə, mawula. Ara aŋga ana, mawal may, a zlafa meŋgə bay da yaŋ vaw tata bay, maŋga bay da yaŋ vaw tata sə, ŋgwaza.

⁵Ara nesey, ndah ava ŋgwaza ac ta gərda makəs vaw tec bay, say gəla dapa macacal ma teceŋ ta manjah kusetke ka ta cə mbahw. Amaa ava dəɓa ana, aca ra cam vaw saya, daha aabay sə, ac ta zlafa majal vaw tec bay, Saadan a ta ŋgat cəvey te mecekeceŋ.

⁶Ya gwaɗakwar ara nesey sə, ya ŋgə ya ta təkakwar bay, amaa ya ŋgə sə, ya vakwar cəvey akwar da ŋgiya ara nesey.

⁷Yey sə, ya wal ndana hay fakwanay aca ra njah gwamba ara yey. Amaa Zlav a və gədaŋ kad ndana hay sə, wal wal. Kad nda leŋgeɗey, a vana gədaŋ ta makəs ŋgwaz, kad nda leŋgeɗey, a vana gədaŋ ta manjah gwamba.

⁸Təlam nesey, ya wal megweɗec ndah gwamba va ŋgwefidey hay. Mambəla sə, akwa njah gwamba ara yey, daha aabay ŋgwefidey.

⁹Amaa daha akwar ta zlafa majal vaw takwar bay, a lada mawal da kəs ŋgwaz, ŋgwaz may, da kəs mawal. Zuwan mawal ta kəs ŋgwaz, daha aabay ŋgwaz ta kəs mawal da yaŋ masa mekekesl ta vaw a ta ŋgana cəɗem cəɗem.

¹⁰Yaw, təlam nesey, ya wal megweɗec kad ndah masa ac ava ŋgwaza hay va ŋgwazah masa ac ava mawal: Ye gweɗek nesey sə, ma taaɗaw bay, amaa ma ta Bay Mazlakava, a lada ŋgwaz a ta vəna vaw ava mawula bay.

¹¹Daha ka vəna vaw avəda ava mawula sə, a ta kəs mawal mekele sabay, da njah aŋga amta. Daha a wal mawal saya sə, de veh kad way ta mawula macaaca ana, aca ra ləmad ma teceŋ fa slam ana. Mawal may, a ta mbasana bay.

¹²Təlam nesey, ya wal megweɗec ndah mekele. Ma masa ya ta gwaɗiya nesey sə, ma ta Bay Mazlakava sabay, amaa ma taaɗaw. Ya gwaɗakwar, daha ndana aŋga ava ŋgwaz masa ka kəs pa rav aabay, amaa daha ŋgwaz ana ka kəs manjah ava aŋga sə, mawula ana a ta mbasana bay.

¹³Ara aŋga ana may, daha ŋgwaz masa mawula aŋga nda makəsparav ana bay, amaa daha mawula ana ka wal manjah ava aŋga sə, ŋgwaz ana a ta wulak yaŋ ta mavəna vaw ava aŋga bay.

¹⁴Mafay ana, mawal masa aŋga makəsparav bay sə, aŋga zef ava Zlavay, afa aŋga macama ava ŋgwaza masa aŋga makəsparav. Ara aŋga ana ŋgwaz may, aŋga zef ava Zlavay, afa aŋga macama ava mawula masa aŋga makəsparav. Daha ara aŋga bay sə, ŋgesey wudeh takwar ac ta tərata ara wudeh masa ac mavəna ava Zlavay, amaa eve metehwe ana təlam nesey sə, ac zef ava Zlavay.

¹⁵Amaa daha mawal, daha aabay ŋgwaz masa aŋga makəsparav bay, a wal mavəna vaw ava ŋgwaza daha aabay ava mawula masa aŋga makəsparav sə, magərda, a da daɗay. Ara nesey, nda makəsparav, kwa mawal, kwa ŋgwaz sə, aŋga mapəla, afa Zlav a zalakakwar sə, akwar da njah dapa metehey.

¹⁶Kaa, ŋgwaz makəsparav, ka səniya eve metehwe ana, Zlav a ta mbəla mawulak masa aŋga makəsparav bay ŋga avəda mafay takaa geyey? Ara aŋga ana, kaa, mawal makəsparav, ka səniya eve metehwe ana, Zlav a ta mbəla ŋgwazak masa aŋga makəsparav bay ŋga avəda mafay ta makəsparav takaa geyey?

¹⁷Jə mazlakava dapa ma masa ya gwaɗiya kad Macam yaŋ hay fakwanay ta makəsparav hay. Kwa waawa da njah ara masa Zlav ta zala.

¹⁸Daha Zlav a zal nda masa ŋgwal maŋgəla cay sə, da njah ara aŋga ana, e te ŋgə jene mekele sabay. Daha Zlav a zal nda masa ŋgwal maŋgəla bay sə, a ta ŋgəliya sabay.

¹⁹Kwa nda masa ŋgwal maŋgəla, nda masa ŋgwal maŋgəla bay, ec cuweeney ec jene taambəla, afa jene masa a ta jəna nda fa yam te ndey ta Zlavay kwa amta sə, aabay. Jə mazlakava ana sə, manah yaŋ kad pa ma majawa ta Zlavay dapa jene hay fakwanay.

²⁰Da lada sə, kwa waawa a da njah ara masa aŋga manjaha dapa masa Zlav ta zala.

²¹Dapa masa Zlav a zalakaa sə, ke ɓel geyey? Daha ara nesey ana sə, ka ta wulak yaŋ bay, amaa daha ka zlafa membəlek yaŋ takaa avəda dapa ɓeley ana ka da ŋgat mapəla vaw paɗ sə, ŋgesey yah cəvey ana.

²²Ɓel masa Bay Mazlakava ke zelek avəda dapa ɓel tata sə, ŋgesey aŋga mapəla paɗ, afa aŋga macama ava Kəristi. Nda ana mapəla paɗ ŋgesey sə, a tərata ke ɓel te Kəristi may.

²³Zlav ka husamakakwar avəda ava jə masa mehehəmey ana mabay. Mafay ana, akwar ta van yaŋ takwar ke ɓel ta ndana hay sabay.

²⁴Malama va dəma hay, ya gwaɗakwar, da lada sə, kwa waawa a da njah fəma ta Zlavay ara masa aŋga ta zala.

²⁵Təlam nesey, ye te gweɗ kad ndah masa ac ka kəs ŋgwaz aabay heley, ya ava ma masa e dek da vara Bay Mazlakava kad eceŋ sə, aabay. Amaa yey sə, ya nda maŋga jene metehwe ana, afa Bay Mazlakava ke ŋgəfiyey metekweney, mafay ana, ma masa ya ta gwaɗiya nesey sə, ma masa ya ta wulakiya war.

²⁶Ya wulakiya sə, ara nesey: Mafay ta marga hay masa ece ŋgə təlam nesey, daha ndana ka kəs ŋgwaz aabay, daha aabay ka kəs mawal aabay heley sə, mambəla ana. Aŋga, mambəla ana kad eceŋ aca ra njah ara ŋgesey ana.

²⁷Yaw, daha ŋgwazak ɓa, ka ta yah cəv ta mambasana bay. Amaa daha ka ka kəs ŋgwaz aabay heley sə, ka ta wulak yaŋ ta makəs ŋgwaz bay.

²⁸Amaa daha nda masa a kəs ŋgwaz sə, ŋgesey, ke ŋgə mebər aabay. Ara aŋga ana, daha dem dahəla a kəs mawal sə, ke ŋgə mebər aabay. Amaa ndah masa ac ava ŋgwaz sə, ac ta sə marga dapa manjah tec cəɗem cəɗem mabay. Taaɗaw sə, ya wal mambəlakwar dapa marga ana hay.

²⁹Malama va dəma hay, ya gwaɗakwar, manah te meŋgə mezlər kad Zlavay sə, magəra gaa ɓasabay. Ara nesey, e zler dəga təlam nesey, ndah ava ŋgwaza hay sə, ac da njah ara ac va ŋgwaz aabay.

³⁰Ndah masa ac dapa makuɗa sə, ac da njah ara ac dapa makuɗa aabay. Ndah masa ac dapa mewesley sə, ac da njah ara ac dapa meweslə aabay. Ndah mahusama jene, ac da njah ara jene hay masa ac ta husamiya ŋgesey sə, jə tec bay.

³¹Ndah maŋgata jene a yaŋ jə masa ac ta ŋgatiya dapa vavara nesey sə, ac da njah ara ac ka ŋgat jene aabay. Ya gwaɗakwar ara nesey, afa vavara masa anda walakwaɗ nesey sə, a ta njah katar aabay.

³²Ya wal sə, yaŋ takwar de ɓesl bay. Nda masa ka kəs ŋgwaz aabay sə, yaŋ tata e ɓesl sə, fe jene hay ta Bay Mazlakava, a wal meŋgə jə masa a wafa kad Bay Mazlakava.

³³Amaa nda masa aŋga ava ŋgwaz sə, yaŋ tata e ɓesl sə, da yaŋ jene hay ta vavara, afa a yah sə, jene hay masa a wafa kad ŋgwaza.

³⁴Ara nesey, leŋgesl tata mavəna ecew. Ara aŋga ana, ŋgwefidey may, daha aabay dem dahəla masa aŋga ava mawal aabay sə, a ɓasl yaŋ tata mafay te jene hay ta Bay Mazlakava, afa a da njah mapana dapa Mesfen Mavəna ava vaw tata fakwanay. Amaa ta ŋgwaz masa aŋga ava mawal sə, yaŋ tata e ɓesl sə, da yaŋ jene hay ta vavara, afa a yah meŋgə jə masa a da wafa kad mawula.

³⁵Ya gwaɗakwar ara nesey sə, ya wal majənakwar, bəna ya yah cəv ta matatəkakwar bay. Ya wal sə, akwar de ŋgə jə mambəla ana mafəna ana saya, akwar de ŋgə mezlər ta Bay Mazlakava ava rav takwar pal amta.

³⁶Təlam nesey, daha wat gawla masa a hwar makəs maŋgusliya, mekekesl ta vaw tata a wulak yaŋ ta makəs vaw ava aŋga cay sə, amaa jene hay dərziya mandəva bay heley sə, zuwan aŋga ta kəsiya. Ŋgesey, jə mambəla ana, ke ŋgə mebər aabay.

³⁷Amaa daha wat ana ka wulakaw metehwe ana dapa rav tata, a wal makəs maŋgusliya ana sabay, ndana ta tatəkiya bay, mekekesl ta vaw tata ta manah eve dəm ana a ta fəna fa gədaŋ aabay, ŋgesey, ke ŋgə jə mambəla ana.

³⁸Ara nesey, nda makəsa maŋgusliya ana sə, ke ŋgə jene mambəla ana. Nda magərda makəs maŋgusliya ana sə, ke ŋgə jə mambəla ana mafəna ana saya.

³⁹Dapa masa mawal aŋga ava ndey heley sə, ŋgwaz aŋga majawa ava mawula ana kwa ewey ewey. Amaa daha mawula ana ka məcata sə, aŋga eve cəv ta makəs mawal mekele ara aŋga ta waya, amaa a lada a kəs sə, nda makəsparav ana.

⁴⁰Amaa daha fe yey sə, a da kəs mawal sabay, da njah ara ŋgesey ana, afa daha aŋga pal amta sə, a ta njah mambəla ana, mafəna masa aŋga ava mawal. Yey may, ya wulakiya Mesfen Mavəna ɓa de vereyey.