Read Cuvok 1 Kweriŋtiye hay 8 Bible Online

1 Kweriŋtiye hay 8 - Cuvok bible

1 Kweriŋtiye hay 8

¹Təlam nesey sə, ya ta gwaɗakwar da yaŋ slaw ta mbat hay. Eve metehwe ana, andakwa fakwanay, anda sənakwa jene ara akwar te gweɗey. Mesen jene sə, e vec magal yaŋ kad ndana hay. Amaa mawal vaw sə, a gal ndana hay dapa Macam yaŋ ta ndah ta Zlavay.

²Daha ndana a wulakiya aŋga sə, e sən jene mabay, ŋgesey, ka ŋgat mesen jene metehwe ana sə, aabay heley.

³Amaa nda masa a wal Zlavay ava rav pal amta sə, Zlav a sən nda ana.

⁴Yaw, slaw ta mbat hay sə, mandə geyey, aabay? Anda sənakwa mbat hay sə, jene hay taambəla dapa vavara nesey. Asaya, anda sənakwa Zlavay sə, aŋga pal aŋga amta.

⁵Eve metehwe ana, jene hay da baymaləvaŋ va dapa vavara nesey masa ndana hay ece kekəred kad eceŋ ara Zlavay sə, ac ɓa hay. Jeŋ ana hay ŋgesey sə, mbat hay. Mbat hay gaa masa ndana hay ece pec ka Zlav teceŋ. Asaya, mbat hay gaa masa ndana hay ece pec ka Bay tec Mazlakava.

⁶Amaa tandakwa sə, Zlav aŋga pal amta, aŋga papaŋ tandakwa. Jene hay fakwanay ece dek da vara vaw. Ka lamakandakwa, afa anda da njahakwa kad aŋga. Bay Mazlakava sə, aŋga pal amta may, aŋga ana sə, Yesu Kəristi. Zlav e lemek jene hay fakwanay sə, jaka vara vaw. Andakwa may, andakwa ɓa nesey sə, mafay tata.

⁷Amaa ndana hay fakwanay ece sən jene bay. Ndah dərziya deveŋ akwar ece gərek manah yaŋ kad mbat hay sə, ka ŋgə manjah gaa aabay heley. Kasl pəsna aca ndə slaw ta kwakwas ta mbat hay ara slaw masa mava kad mbat metehwe ana. Ac ava gədaŋ pahata dapa cəv ta Zlavay dapa mawulak yaŋ teceŋ. Mafay ana, aca wulakiya sə, slaw ta mbat ana hay ŋgesey, ke nesec avəda fəma ta Zlavay.

⁸Masəna, jə ta manday ana ŋgesey sə, a ta ŋgucaɗandakwa kad a rav ta Zlavay sə, aabay. Daha anda ndakwa jene, a jənandakwa aabay. Daha anda ndakwa jene aabay sə, a kəsafa jene fa andakwa aabay may.

⁹Akwar sə, akwar ava cəv ta mandə kwa jene wula wula ara akwar ta waya. Amaa map leŋgesl, afa mambivaw takwar ana ŋgesey e te teɗdec ndah masa gədaŋ pahata dapa ma ta Zlavay kad pe mebər bay.

¹⁰Yaw, wulakaw da yaŋ nda masa aŋga ava gədaŋ pahata dapa ma ta Zlavay. Daha nda ana a walakaa, kaa masa ka sən jə metehwe ana, ka dapa veŋ ta mbat ka ndə slaw ta mbat hay sə, ŋgesey a zada nda ana avəda ka ndə slaw ta mbat ana may aabay geyey?

¹¹Mafay ana, malamakw masa aŋga ava gədaŋ pahata ŋgesey, masa Kəristi a məc mafay tata sə, a ta zata dapa cəv mambəla ana mafay te mesen jene takaa ŋgesey.

¹²Daha ara nesey sə, akwa ŋgə mebərey fa yam te ndey ta malamaŋ va dəmaŋ takwar hay, akwa pefec mbəlek dapa mawulak yaŋ tec masa ac ava gədaŋ pahata dapa cəv ta Zlavay. Ara nesey, akwa ŋgek mebər fa yam te ndey te Kəristi may.

¹³Mafay ana, daha jə ta manday e te teɗdec malama va dəma hay makəsparav kad pe mebərey sə, zuwan ya ta ndə slaw sabay katar, da yaŋ masa e te teɗdeceŋ.