Read Cuvok 1 Kweriŋtiye hay 9 Bible Online

1 Kweriŋtiye hay 9 - Cuvok bible

1 Kweriŋtiye hay 9

¹Yey Pawl, ya mapəla paɗ te meŋgə jene ara ya ta waya. Yey sə, ya maslaŋ bay geyey? Yey sə, ya ka wala Yesu Bay tandakwa Mazlakava eve ndey aɗaw aabay geyey? Naa akwar sə, wut te mezlərey aɗaw hay masa ya ta ŋgiya sə, biba?

²Kwa daha ndah dərziya ac ka kəsaw masa yey sə, ya maslaŋ sə, aabay, amaa fəma takwar sə, ya maslaŋ. Akwar sə, akwar tampaŋw te mezlər ta maslaŋ aɗaw dapa mezlər ta Bay Mazlakava.

³Ndah magwaɗa ma masa e teh bay da yaŋ yey sə, ye te veheceney, ye te gweɗec ara nesey.

⁴Andaw eve cəv ta maŋgat jə ta manday va jə ta masay, mafay te mezlər masa andaw ta ŋgiya sə, aabay geyey?

⁵Maslaŋ hay mekele, malamaŋ ta Bay Mazlakava va Keyfas, ac ava ŋgwazah tec hay, aca ŋgway fa slam ana. Naa andaw sə, andaw eve cəv ta makəs ŋgwaz makəsparav ana anda da ŋgway ava aŋga aabay ŋgəɗa geyey?

⁶Ma ta ŋgana mezlər ka ŋgat jene ta manday sə, say andaw ava Barnabas war geyey?

⁷Kafaraŋ masa e ŋgə mezlərey, akwa wala kwa pas amta masa a pal meyev te mezlər tata ana sə, ɓa geyey? Ndana wa deveŋ akwar masa a ŋgay wudez, amaa a ndə wudiya ana aabay? Daha aabay, ndana wa deveŋ akwar masa a ɓəc zla hay a sə wa teceŋ ana aabay?

⁸Ma masa ya ta gwaɗiya nesey sə, e dek dapa mawulak yaŋ ta ndana hay babəla bay, kwa ma majawa ta Muyiz ke gweɗ ara nesey ana may.

⁹Mavinda dapa ma majawa ta Muyiz, gege: «Daha zla e ŋgə mezlərey sə, ka ta pana jaalaŋ pa ma bay.» Akwa wulakiya sə, Zlav e gweɗ sə, da yaŋ zla hay war geyey?

¹⁰Naa e gweɗ ara nesey sə, mafay taciya? Eve metehwe ana, mavinda nesey sə, mafay taciya. Da lada sə, nda te mehəv sə, a da wulak maŋgat jene dapa mehəv tata ana ŋgesey. Nda magəzla daw a da wulak maŋgat mandə jene sə, dapa daw ana ŋga may.

¹¹Andə ka sləkaɗ jene hay mambəla ana te Mesfen Mavəna pa akwar. Yaw, naa daha anda ŋgat gəva te zleley takwar hay ara anda ɓəcek wut te mezlər taciya hay sə, a rəzla nda geyey?

¹²Daha ndah mekele ac ava cəv ta maŋgat jə ta manday da varakwar, naa andaw may, andaw eve cəv ta maŋgat jene varakwar mefəneceŋ ana aabay ŋgəɗa geyey? Efes aabay sə, de ŋgə ara ŋgesey ana, amaa andə ka nəkafakwar jene aabay. Sesəker anda ɓəsiya fakwanay eve mepəsek, afa andə ka wal meŋgə jene masa e te recen ma ta ndana hay ta makəs Labara mambəla ana da yaŋ Kəristi aabay.

¹³Akwa sən masa ndah maŋga mezlər dapa Way ta kwakwas, jə ta mandə teceŋ sə, aŋga dapa Way ta kwakwas ana, ndah mafaka gənaw hay fa slam te meŋgeŋgez təbekw kad Zlavay, aca ŋgat jə masa mava kad Zlavay ana ŋga may sə, aabay geyey?

¹⁴Aŋga ara aŋga ana, ava ndah mabəzada Labara mambəla ana, afa Bay tandakwa Mazlakava Yesu ke gweɗey, ndah mabəzada Labara mambəla ana sə, ac da ŋgat jə ta manday jaka pe mezlər teceŋ ana ŋgesey[3].

¹⁵Amaa yey sə, ya ka nəkafakwar jene aabay. Akwar ta wulakiya masa ya windakwar leeter nesey sə, afa akwar de zləriyey jene bay. Away, ara aŋga bay! Ara nesey, zuwan ya ta məcaɓa, amaa kwa ndana ma ta zlafa makəsawa meweslə te meŋgə həɓa aɗaw ana aabay.

¹⁶Kad yey sə, mabəzad Labara mambəla ana, a viyey cəv te meŋgə həɓa aabay, afa mezlərey ana ŋgesey, Zlav ka puwa pa ha taaɗaw ya da bəzadiya ndezl. Wabaw kad yey, daha ya ka bəzad Labara mambəla ana na aabay.

¹⁷Daha anjəkar ya ta yah meŋgə mezlərey ana nesey dapa rav aɗaw sə, efes ya ŋgat mapəl meyəv te mezlərey aɗaw, amaa ara na bay, afa mezlərey ana sə, mapa da yaŋ yey. Ara nesey, ya ŋgiya sə, afa Zlav ka gərawa mezlərey ana pa ha taaɗaw.

¹⁸Ara nesey, meyəv te mezlərey aɗaw ana kəla? Meyəvey aɗaw sə, mabəzad ma masa taambəla da yaŋ Labara mambəla ana, bəna kwa ya ka yah jə masa ya ava cəv ɓa ta maŋgatiya mafay ta mabəzad Labara mambəla ana sə, aabay.

¹⁹Yey sə, kwa ndana deveŋ akwar masa a zlafa metetəkiyey te meŋgə jene sə, aabay. Amaa, ya ta və yaŋ taaɗaw ta manjah ka nda maŋga mezlər ta ndana hay fakwanay, afa ye de həlekec hamazlakava ta ndana hay gaa kad pe cəv te Kəristi daha efes e ŋgey.

²⁰Daha ya ŋgə mezlər deveŋ Zuwef hay sə, ya njah ara Zuwef ana hay, afa ye de həlekec avəda kad pe cəv te Kəristi. Ma majawa ta Muyiz sə, aŋga ava gədaŋ da yaŋ yey aabay, amaa daha ye deveŋ ndah macəpa ma majawa ana sə, ya njah ara eceŋ, afa ye de həlekec avəda kad pe cəv te Kəristi.

²¹Ara aŋga ana daha ye deveŋ ndah masa aca sən ma majawa ta Muyiz bay sə, ya njah ara eceŋ, afa ye de həlekec avəda kad pe cəv te Kəristi may. Ye ke gweɗ masa ya ka cəp ma majawa ta Zlav aabay sə, aabay, afa ya dapa macəp ma majawa te Kəristi.

²²Daha masa ye deveŋ makəsparav hay masa ac ava gədaŋ pahata, ya njah ara eceŋ, afa ye de həlekec avəda kad pe cəv te Kəristi. Ya ŋgə jene hay fakwanay wal wal ara ndana hay fakwanay ta ŋgiya, afa ndah mekele mekele ac da ŋgat membəley.

²³Ya ŋgə jeŋ ana hay fakwan ara nesey sə, afa Labara mambəla ana da də fəma fəma. Asaya, Zlav e de pəsefiyey ma, ara masa aŋga te pəsefec ma ndah mekele may.

²⁴Dapa kwakwarɗa ta mahway sə, ndana hay gaa aca hway, amaa bigula ta maŋgat jeŋ ana sə, nda amta war. Yaw, akwar may, meŋgə gədaŋ ta mahway ara bigula dapa kwakwarɗa ana, afa akwar da ŋgat jene.

²⁵Nda masa a wal meŋgə kwakwarɗa sə, say a kəta yaŋ tata, a gərda jene hay mekele mekele manasa nda, a sasəraka vaw tata mambəla ana ɗagay. A və yaŋ tata ara nesey, e de ŋgə bigula ta maŋgat jene. Amaa jə masa nda ana a ta ŋgatiya fe meyəv tata sə, a ta njah gaa aabay. Andakwa sə, mavakwa yaŋ tandakwa ara ŋgesey, afa andə da ŋgatakwa jə masa a ta njah katar ka midakw.

²⁶Mafay ana, yey sə, ya hway saw dapa kwakwarɗa aabay. Asaya, yey sə, ya ara nda maɗəmazlə nda dapa wuɗey, maɗəmazlə nda taaɗaw ana ŋgesey e də ley aabay.

²⁷Yey sə, ya ŋgada hahar kad vaw aɗaw ɗagay, ya kəta mambəla ana, a da cənawa ma, afa pas te mendəv te jene hay, yey, nda mabəzada Labara mambəla ana kad ndana hay sə, Zlav de kezleɗiyey ava zlalav bay.