Read Cuvok 2 Kweriŋtiye hay 1 Bible Online

2 Kweriŋtiye hay 1 - Cuvok bible

2 Kweriŋtiye hay 1

¹Yey Pawl, maslaŋ te Yesu Kəristi masa Zlav ta waya, andaw ava malamaŋ tandakwa Timawtey, ta vində leeter ana nesey, anda zlərakwaɗ kad akwar Macam yaŋ ta ndah ta Zlavay dapa berne te Kweriŋtiye va kad ndah ta Zlavay masa ac da gəva ta Akay fakwan may.

²A lada Zlav Papaŋ tandakwa va Bay Mazlakava Yesu Kəristi ac da vakwar mambəla ana va metehey.

³Mambaɗakwa Zlavay, Papaŋ ta Bay tandakwa Mazlakava Yesu Kəristi. Zlav Papaŋ te metekwen hay, aŋga nda matəka rav ta ndana hay fakwanay.

⁴A təkandan rav taciya dapa marga taciya hay fakwanay, afa andə da zlafa metəkecen rav ta ndah masana marga hay mekele mekele ara masa Zlav ta təkandan rav sə, may.

⁵Anda sə marga mabay ara masa Yesu Kəristi aŋga ana ta siya sə, may, ara aŋga ana andakwa may, Zlav a təkandakwaɗ rav mabay jaka pa Kəristi.

⁶Daha andə sə marga sə, afa Zlav da təkakwaɗ rav, a da mbəlakwar avəda dapa mebərey. Daha Zlav ka təkandan rav may, ŋgesey, afa akwar da ŋgat gədaŋ ta maɓəs marga hay ara masa andaw ta ɓəsiya na may.

⁷Cəɗem cəɗem masa andaw ava mawulak yaŋ fakwar, mawulak yaŋ taciya aŋga da yaŋ akwar, afa anda səniya ara masa akwar macama ava andaw dapa marga taciya hay, ara aŋga ana akwar ta cam vaw ava andaw dapa matək rav may.

⁸Malama va dəma hay, anda wal sə, akwar da səna marga hay masa ac ta ŋgatafandaw dapa vavara ta Azi. Marga ana hay ka padandan ma kasl pa slam masa anda zlafa maɓəsiya bay. Andaw wulakiya sə, andə ta məc taciya.

⁹Aŋga, andə ka wulakaw, ac ka təɗandaw ma yaŋ ta makəɗandaw avəda ka macəhwandaw. E ŋgə ara nesey sə, afa andaw da gas vaw fa gədaŋ taciya sabay, amaa fa gədaŋ ta Zlav mapəraka ndana hay dapa maməcay.

¹⁰Mambəlakandakwa dapa makaslafay ta maməcay sə, aŋga ana, a ta mbəlandakwa avəda saya. Eve metehwe ana, andaw ava mawulak yaŋ fətiya, a ta mbəlandaw avəda saya.

¹¹A ta mbəlandaw ara nesey sə, mbalay ha takwar mafay ta masa akwa jənandaw dapa macə mbahw may. Ara masa ndana hay gaa ac dapa macə mbahw mafay ta yaŋ taciya, e te ŋgec mambəla ana, a ta jənandaw, ara nesey, ndana hay gaa ac ta ŋgana wasay Zlavay mafay ta yaŋ taciya.

¹²Dapa masa aca wala manjah taciya dapa taɓa ta ndana hay dapa vavara, mawala masa anda ŋgə həɓa sə, jaka pe me hay mey, jaka pa makwaɗma va rav mapana masa ece dek da vara Zlavay, vaw tandakwa a cəna ara nesey ana, ara nesey, masa andə ta ŋgiya dapa taɓa takwar. Anda ŋgiya sə, eve leŋgesl masa e dek da vara ndah masa andaw ta njah dapa taɓa takwar na bay, amaa jaka pa mambəla ana ta Zlavay masa a jənandaw.

¹³Yaw, masa akwa jaŋgiya va masa akwa cəna ŋgesey sə, jene maraɓa dapa aabay. Amaa ya wulakiya sə, akwar ta cəna fakwanay,

¹⁴ara masa akwar ka zlara masəna tərsam ta manjah taaɗaw, pas masa Bay tandakwa Mazlakava Yesu e te vehekey sə, akwar ta ŋgə həɓa mafay taciya, andaw may, andə ta ŋgə həɓa mafay takwar.

¹⁵Ya ka səna a ta ŋgə ara nesey ana, mafay ana, ya ka yah madaɗ kad varakwar ɗagay, ava dəɓa ana, ye te vehek kad varakwar ana saya, afa akwar de wesl meecew ana.

¹⁶Ya wulakiya masa ye te kad Masiduwan sə, ya da daɗ jaka varakwar ɗagay, ava dəɓa ana, ye te vehek da Masiduwan kad varakwar ana saya, afa akwar de jəniyey dapa maŋgway aɗaw kad pa vavara te Zudey.

¹⁷Ava maləmad vaw ana nesey sə, ya ka wulaka daha aabay war geyey? Away! Daha aabay, akwa wulakiya sə, maləmad vaw ana hay sə, ac ara mawulak yaŋ ta ndana, afa ye gweɗ jene ava dəɓa ana, ya ŋgwada ma geyey?

¹⁸Away, Zlavay ava yaŋ tata ana, a səniya, andə ka gwaɗakwar jene, ava dəɓa ana, anda ŋgwada sə, aabay,

¹⁹afa Yesu Kəristi, Wut ta Zlavay masa yey Pawl, Silas va Timawtey ta ŋguzdakwaɗ ma da yaŋ ana nesey sə, e gweɗ jene ava dəɓa ana, a ŋgwada ma sə, aabay. Amaa aŋga nda masa e gweɗ jene, a ŋgana avəda.

²⁰Nda masa aŋga nda maŋgana jene hay fakwanay masa Zlav ka gwaɗa daha ec te ŋgeceŋ. Ara nesey, eve mezel tata, anda gwaɗakwa: E de ŋgey! Ara nesey, mevə mehehəm kad Zlavay.

²¹Zlavay ava yaŋ tata ana ta sasalandaw ava akwar dapa macam vaw ava Kəristi. Aŋga ava yaŋ tata ana, ka palaɗandaw ha wal,

²²aŋga masa ka ɗalandakwa ava tampaŋw tata va ka paɗ Mesfen tata pa rav tandakwa ara jene magəha[1] masa aŋga ta raɓaɗ ha kad andakwa.

²³Ye gweɗ eve metehwe ana, Zlav aŋga nda matana yaw da yaŋ manjahay aɗaw. Ye ke vehek kad varakwar Kweriŋtiye hay ɓasabay sə, afa ya wal ya da məcakwaɗ vaw sabay.

²⁴Andaw sə, andə ka yah matatəkakwar ta makəs kwa ma wula wula pa rav takwar sə, aabay, afa akwar mazlaca mambəla ana dapa makəsparav. Amaa anda wal macam vaw ava akwar dapa mambivaw takwar.